Hi nga maha txani kasi ku Txizimu txi engisa mikombelo yathu?
Jehovha Txizimu ‘mu engisi wa mikombelo.’ (Masalmo 65:2) Hi nga womba-womba hi di ka wukhalo wuhi ni wuhi mwendo mbimo yihi ni yihi, ngu dipswi do guleka mwendo ngu mbiluni. Jehovha a lava ku u m’dhana ku i “Tate.” Ene ngu ditshuri ngene Tate wa kwati awu hi nga vako nayo. (Matewu 6:9) Ngu lirando, Jehovha a hi gondisa nzila ya yinene yo maha mkombelo kasi ku e kota kuxamula mikombelo yathu.
MAHA MKOMBELO KA JEHOVHA TXIZIMU NGU DITINA DA JESU
“Sotshe si mi no si kombela ka Tata ngu ditina dangu, ene a na mi ha.”—Johani 16:23.
Mapswi yawa a Jesu ma ti veka hakubasani ti to Jehovha a lava hi maha mkombelo kwakwe i si nga ngu kuthumisa sithombe, masantu, tingelozi mwendo maxaka athu ya ma nga fa kambe ngu kuthumisa ditina da Jesu Kristu. Mbimo yi hi mahako mkombelo ka Txizimu ngu ditina da Jesu hi tumela ti to Txizimu txi engisa mikombelo yathu ngu kona ha ka ti Jesu a nga hi mahela tona. Jesu a wombile tiya: “Kha nga ho awule a tako ka Tata, i si nga ngu ngani.”—Johani 14:6.
MTULELE MBILU YAKO
“Tshakunutani mbilu yanu masoni kwakwe.”—Masalmo 62:8, NM.
Mbimo yi hi mahako mkombelo ka Jehovha ti lava hi womba-womba nayo nga ti mwanana a mahisako tona masoni ka Tate wakwe wa lirando. Hahanze ko wuyeletela mapswi o dhekorarwa mwendo kulera dibhuku da mikombelo hi fanete kumaha mkombelo kwakwe ngu txixonipho ni ngu mbilu yotshe.
MAHA MKOMBELO WU WU TSIMBITISANAKO NI KUDHUNDA KA TXIZIMU
“Ngako hi txi txi kombela txo maha, madingano ni kuranda ka Txizimu, txa hi engisa.”—1 Johani 5:14.
Ngu kuthumisa Bhiblia Jehovha wa hi gela ati ene a no hi mahela ni ti athu hi fanelako ku mmahela. Hi txi lava ti to mikombelo yathu yi amukelwa ngu Txizimu ti lava yi tsimbitisana ‘ni kuranda ka txona.’ Ti to hi kota kumaha toneto, ti lava hi gonda Bhiblia kasi ku hi ziva kwati Txizimu. Hi txi maha toneto, mikombelo yathu yi na engiswa ngu txona.
U NGA WOMBA TXANI KA MIKOMBELO YAKO?
Kombela ti u ti lavako. Hi nga kombela ka Txizimu sakudya, sa ku ambala ni ko zumba kona. Hi nga tshumela hi kombela wutxhari kasi ku hi maha sisungo sa sinene ni mtamo wo wonisana ni sikarato. Hi nga kombela ku engetelwa likholo, kudivalelwa ngu Txizimu ni kuvhunwa ngu txona.—Luka 11:3, 4, 13; Jakobe 1:5, 17.
Kombelela vamwani. Vaveleki va lirando va tsaka ngutu ngako vanana vawe va txi pfana ni kudhundana. Jehovha nene a lava ti to vanana vakwe amu hamafuni ve khatalelana. Hi nga kombelela va mwaya wathu, mwamna wathu mwendo msikati wathu, vanana vathu ni vangana vathu. Jakobe a wombile ti to ti lava ‘mi kombelelana.’—Jakobe 5:16.
Maha mkombelo wo bonga asi u ku naso. Bhiblia yi womba tiya mayelano ni Mvangi wathu: “Ngu ku mahela ta tinene vathu, txi wisa mati a nzuma, ni ku mi ninga tinyango to pfuna, txi khurisa timbilu tanu ngu sakudya ni litsako.” (Mithumo 14:17) Hi txo ema hi alakanyisisa ngu totshe ti Txizimu txi hi mahelako tona hi na ti lava ku txi bonga ngu mkombelo. Ni ku ti hakubasani ti to nathu ti lava hi kombisa kubonga ngu kuengisa Txizimu.—Vakolosa 3:15.
TIMISELA U SIMAMA U MAHA MKOMBELO
Mbimo yimwani u nga thuka u godhola ngu kwa mbi amukela ngu txikuluveta xamulo ya mikombelo yako. Ina eto ti lava kuwomba ti to Txizimu kha txi khatali ngu ngawe? Ahim-him! Wona ati vamwani va ti wombako ti kombisako ti to mbimo yimwani ati hi fanelako ku ti maha ngu simama hi maha mkombelo.
Steve awu a nga wombwa ka gondo yo khata, a womba tiya: “I singa ngu mhaka ya mkombelo, ni pimisa ti to ni sa nga thuka ni va m’thu awu a nga tsaka kambe.” Nji txani txi nga maha Steve e txitxa mawonelo mayelano ni mkombelo? Ene a khatile kugonda Bhiblia ni ku a gondile mayelano ni txilaveko txo maha mkombelo ni kwa mbi godhola kumaha toneto. Ene a txhamusela tiya: “Ani na maha mkombelo ka Txizimu ni bonga txotshe txivhuno atxi ni txi manako ka vangana va mina vo dhundeka. Nyamsi ni m’thu wu a nga tsaka.”
Jenny awu a nga txi pimisa ti to kha na fanelo yo engiswa ngu Txizimu a womba tiya: “Mbimo yi ni nga ti kukaratekani ka hombe, ni kombete Txizimu kasi ku txi ni vhuna ni pfisisa ti to ngu kutxani ni nga txi ti pfa ni si nga wa lisima.” Mkombelo wu mvhunisile kutxani? “Kumaha mkombelo ka Txizimu ti ni vhuni ku ni va ni mawonelo a manene ngu ngani ni pune; ni ku wona ti to hambi mbilu yangu yi txi ni ninga mnando, Jehovha kha ni ninge mnando. Kumaha mkombelo ti ni vhuni kambe ti to ni si tshumeleli msana.” Kuve yihi wuyelo? “Mkombelo wu ni vhuni ku ni wona Jehovha kota Tate ni Txizimu txa lirando la hombe, mngana wa ditshuri awu a khatalako ngu ngani. Ngako ni txi simama ni tikaratela ku mtsakisa, ene yotshe mbimo a na ni seketela ni ku ni vhuna.”
“Ni txi wona mwanana wa mina, a di ni litsako hambiku a nga lemala, ni wona ti to ene i xamulo ya mikombelo yangu”
Wona kambe txikombiso txa Isabel. Mbimo yi a nga ti ni txirumbo, vadhokodhela va mu gete ti to a di na veleka mwanana wa txilima. Ene a karatekile ngutu. Vathu vamwani va tshumete ve m’gela ti to a na dole txirumbo. Isabel a womba tiya: “Ani ni pimisile ti to ni ndi na fa ngu mhaka ya kukarateka ku ni nga ti nako.” A mahile txani? “Ni txi maha ngutu mkombelo ni txi kombela txivhuno txa Txizimu. “Ngu kutsimbila ka mbimo, a hefemuti mwanana wakwe Gerard. Ni ku ene ngu ditshuri a velekilwe a di limati. Ina Isabel a pimisa ti to Txizimu txi xamute mikombelo yakwe? Ti hakubasani ti to txi xamute! Ngu nzila muni? Ene a womba tiya: “Ni txi wona mwanana wa mina, konku a ku ni 14 wa malembe, a di ni litsako hambiku a nga lemala, ni wona ti to ene i xamulo ya mikombelo yangu.”
Mapswi yawa o huma ngu mbiluni ma hi maha hi pimisa ngu mapswi yawa a m’bhali wa masalmo: “Mkoma, engisa mikombelo ya sisiwana; si mbuwetele u txi si amukela.” (Masalmo 10:17) Ti hakubasani ti to hi ni sivangelo so pfala so hi simama hi maha mkombelo!
Ka Bhiblia, hi nga mana mikombelo ya yingi ayi nga mahwa ngu m’thu mmwani: I ku Jesu. Ti hakubasani ti to mkombelo awu wu ziwako ngutu ngu wule a nga gondisa vagondiswa vakwe. Hi nga gonda txani ka mkombelo wonewo? A hi tiwone.
