I mani ditina da Txizimu?
Ngako u txi duketa kuziva m’thu wo kari, txo khata txi u nga navelako kumaha, ngu m’wotisa to, “Ngawe mani ditina dako?” I ti ku wo kota kuwotisa Txizimu txiwotiso txonetxo, txi ndina xamulisa kutxani?
“Ani ngani Jehovha. Edo ditina dangu.”—Isaya 42:8, Tradução do Novo Mundo.
Nda diphya ditina edo kwako? Ti nga maha, txivangelo ngu ti to vahundhuluxeli vo tala va Bhiblia kha va di thumisa ditina diya. Va di tsivetile ngu txithopo txo “MKOMA.” Kambe ditina da Txizimu di maneka kona mu ka 7.000 wa makhambi ka lidimi li Bhiblia yi nga bhalwa ngu lona. Dona di emelwa ngu mune wa maletra a Txihebheru, i ku YHWH mwendo JHVH, se ngu Txitxopi ma womba to “Jehovha.”
Rolo do Mar Morto dos Salmos ka dilembe da 30 kala 50, TXIHEBHERU
Tradução de Tyndale 1530, TXINGIZA
Versão Reina-Valera 1602, TXIPANYOLA
Union Version 1919, TXIXINA
Ditina da Txizimu da maneka ka mibhalo ya Txihebheru ni ku da tshumela di maneka ka wuhunduluxeli wo tala
NGU KUTXANI DITINA DA TXIZIMU I DI DA LISIMA
Ditina da Txizimu nda lisima ka txona. Kha ngaho wu a nga raya Txizimu ditina, txi to ti raya txipune. Jehovha a wombile tiya: “Adiya ditina dangu ngu hawa ku si gwitiko, di na va txialakanyiso txangu ngu hawa ku si gwitiko, di na va txialakanyiso ka liveleko ni liveleko.” (Eksodha 3:15) Amu ka Bhiblia, ditina da Txizimu di maneka ko tala kupinda sotshe sithopo sa txona, so fana ni Nyatxitimwi, Tate, Mkoma, mwedo Txizimu, ni kupinda otshe matina a vathu, vo fana ni Abrahamu, Mosi, Dhavhidha, hambi Jesu. Ngu toneto, ngu dhunda ka Jehovha ti to ditina dakwe di ziwa. Bhiblia yi khene: “Vathu va na ti zive ti to awe ditina dako u ku Jehovha, ngawe wekha u ku Nyatxitimwi ha mafuni kotshe.”—Masalmo 83:18, NM.
Ditina da Txizimu nda lisima ka Jesu. Ka mkombelo wu wu dhanwako Tate Wathu mwendo Mkombelo wa Mkoma, Jesu a gondisile valondeteli vakwe ku ve kombela ka Txizimu ngu mapswi awa: “Ditina dako di na sawulwe.” (Matewu 6:9) Jesu apune a khongete ka Txizimu a txi khene: “Tata dhumisa ditina dako.” (Johani 12:28) Jesu a sawulekisile ditina da Txizimu ngu ku dithangisa wutomini kwakwe, ngu toneto ka mkombelo wakwe a nga khene: “Ni va ningile kuziva ditina dako, kambe ni ngadi ni txi na va ninga ku di ziva.”—Johani 17:26.
Ditina da Txizimu nda lisima ka va va txi zivako. Vathu va Txizimu va mbimo ya kale va txi ti pfisisa ti to kuvhikelwa ni kuponiswa kwawe ku txi ta ngu ka ditina da Txizimu. “Ditina da Jehovha i nyumba yo lapha yo tsana. Wo lulama a tutumela ka yona ti to e mana kuvhikelwa.” (Mavingu 18:10, NM) “Se votshe vale va dhanako ditina da Jehovha va na hanyiswa.” (Joyeli 2:32, NM) Bhiblia ya kombisa ti to ditina da Txizimu di kombisa vathu ava va txi thumelako. “Nguko votshe vathu va na tsimbila, mmwani ni mmwani ngu ditina da txizimu txakwe, kambe athu hi na tsimbila ngu ditina da Jehovha Txizimu txathu ngu ha ku si gwitiko.”—Mika 4:5, NM; Mithumo 15:14.
ATI DITINA DI KOMBISAKO TONA
Ditina di di zivisako Txizimu. Sigondi so tala si womba to ditina da Jehovha di womba ti to “Txona txi Vanga ti to ti Koteka” Jehovha a wombile txhamuselo ya ditina dakwe mbimo yi a nga ti womba-womba ni Mosi mayelano ni nene: “Ani Ni Na Ti Kombisa Ni Di Ti Ni No Sunga Kuva Tona.” (Eksodha 3:14, NM) Ditina da Txizimu di hi gela to tala i singa ku ene M’vangi basi wu a nga maha to silo sothse si vaho. Ditina dakwe di kombisa wusikoti wakwe wo thumisa sivangwa sakwe kumaha ati a ti lavako ti to e hetisisa txikongomelo txakwe. Kambe sithopo so kombisa wuhombe wa Txizimu, wulawuli, mtamu wakwe dwe, kasi ditina dakwe, Jehovha, ngu dona basi di kombisako totshe ti a nga ti mahako.
Ditina da Txizimu di kombisa kukhatala ka txona ngu ngathu. Txhamuselo ya ditina da Txizimu yi kombisa lirando li txi ku nalo ngu sivangwa sa txona, kupata ni nathu. I si nga eto dwe, kuva Txizimu txi di zivisile ditina da txona ti kombisa ti to txi lava hi txi ziva. Kuengetela koneho, txi tekile dizambo do hi zivisa ditina da txona hi si se txi wotisa. Ti ha kubasani, Txizimu txi lava hi txi ziva, i singa txilo txo txi pimisela ni kuva kule, kambe kota M’thu wa ditshuri awu hi nga tshuketako kwakwe.—Masalmo 73:28.
Kuthumisa ditina da Txizimu ti komba kukhatala kwathu ngu txona. Ngu txikombiso, u nga kombela m’thu wu u navelako to eva m’ngana wako ti to e kudhana ngu ditina dako. U nga tipfisa kutxani ngako m’thu eneyo a txo lamba kuthumisa ditina dako? Mbimo yimwani u nga pimisa to kha ti lavi kutshuketa kwako. Ta fana ni Txizimu. Jehovha a hi gete ditina dakwe ni ku hi kuzeta ku di thumisa. Hi txi di thumisa, hi komba Jehovha ti to ha tilava kutshuketa kwakwe. Phela ene wa va wona a “vale va alakanyako ditina dakwe”! —Malakiya 3:16.
Kugonda ditina da Txizimu i nzila yo khata ya lisima yo txi ziva. Kambe kha ha fanela ku gwitela eho. Hi fanete kuziva kwati M’thu wu di lumbako ene ditina edo. Hi fanete kugonda ati a ti dhundako.
I MANI DITINA DA TXIZIMU? Ditina da Txizimu i Jehovha. Ditina donedo adi di si faniko ni dimwani di kombisa Txizimu kota M’thu wu a nga hetisisako txikongomelo txakwe
