Vathu va vangi va womba ti to va kholwa ka Txizimu. Kambe u txo wotisa to i mani Txizimu u nga pfa tixamulo to hambana-hambana. Ka vamwani, Txizimu mxuxisi wa tshofu, txi zumbela ku khatisa vathu ngu konaha ka sionho sawe. Ka vamwani, txona txa randa vathu ni ku vadivalela mbimo yotshe, ti singa ni mhaka ni ti va ti mahako. Kasi vamwani va kholwa to Txizimu txi kule ni ku kha txi khatali ngu ngathu. Ngu kupfa mawonelo a mangi o hambana, vathu vo tala va nga tipfa nga kha ti nge koteki kuziva to Txizimu i mani.

Ina nda lisima kuziva Txizimu? Ina, nda lisima. Kuziva kwati Txizimu ti nga ninga txikongomelo ni themba ka wutomi wako. (Mithumo 17:26-28) Ngako u txi tshuketa ka Txizimu, txona txi naya txi kudhunda ni ku kuvhuna. (Jakobe 4:8) Ngu magwito, u txo txi ziva kwati Txizimu u nga mana wutomi wo mbi guma.—Johani 17:3.

U nga txi zivisa kutxani Txizimu? Alakanya ngu m’thu wu u mzivako kwati, wo fana ni mngana wako wa hombe. Wu kulisile kutxani wungana wanu? Ngu ditshuri u lavile kuziva ditina dakwe, wuthu wakwe, ati a ti dhundako ni ti a ti vengako, ati a nga timaha, makungu akwe ni timwani. Eto ngu ti ti nga kumaha u va mngana wa m’thu eneyo—u gondile ngu ngene.

Ngu nzila yi yi fanako, hi nga ziva Txizimu ngu kuxolisisa ti ti londiselako:

• I MANI DITINA DA TXIZIMU?

• NGU TIHI TI FANELO TA TXIZIMU?

• NGU TIHI TI TXIZIMU TXI NGA TI MAHA?

• NGU TIHI TI TXIZIMU TXI NO TI MAHA?

• NGU YIHI WUYELO YO ZIVA TXIZIMU?

Direvhista diya di mahetwe kuningela tixamulu ta mu ka Bhiblia ta siwotiso si si ku txitimwi. Tindima tiya ti na mbi kuvhuna kuziva to i mani Txizimu basi, kambe ni hakelo yi u nga yi manako ngu kuva ni wungana wa wunene natxo.