U txi tsakela kuziva kwati m’thu wo kari, ati ti nga ku vhunako ngu gonda ti a nga ti hetisisa ni sikarato si a nga si xula. Ngu ha ku fanako, u txi lava kuziva kwati Txizimu, ti lava u gonda ti txi nga ti maha. U txi maha eto u nga xamaliswa ngu kutumbula ti to ati txi nga ti maha kale ti nga hi vhuna konkuwa ni mbimo yi yitako.

Jehovha Txizimu M’vangi wa Hombe, ni ku “asi sa Txizimu si si wonwiko ngu maso, i ku mtamo wa txona wo mbi na magwito ni wuzimu wa txona, eso sa ti wonekisa amu ka mithumo ya txona, kukhukhela kuvangwani ka ditiko.” (Varoma 1:20) “MKOMA a mahile mafu ngu mtamo wakwe, e tsanisa ditiko ngu wutxhari wakwe, ngu wuzivi wakwe a nawulutile nzuma.” (Jeremiya 10:12) Kutshura ka mtumbuluko kutshumela kukombisa ti to Txizimu txa khatala ngu ngathu.

Jehovha a ningile vathu wutomi wo sawuleka ngu ku va vanga ‘ngu txifaniso txakwe.’ (Genesisi 1:27) Eto ti womba ti to a mahile ti koteka ti to hi kombisa kudotho tifanelo takwe ati ti si dinganiswiko ni txilo. A hi mahile hi va ni wusikoti wa moya, mwendo wusikoti wo pfisisa mawonelo akwe ni ti a ti dhundako. Ngu ku tikaratela kuhanya ngu tona, ha tidila ngu litsako ni kuhanya wutomi wu wu ku ni txikongomelo. I singa eto dwe, a tshumete e hi ninga wusikoti wo aka wungana ni nene.

Mafu ma kombisa ati Txizimu txi tipfisako tona ngu ngathu. Ngu kuya ngu mapswi a mpostoli Paulo, Txizimu ‘kha txa leka kufakaza ti to txona txa ho, ngu ku hi mahela tatinene, txi wisa mati a nzuma, ni ku hi ninga tinyango to pfuna, txi khurisa timbilu tathu ngu sakudya ni litsako.’ (Mithumo 14:17) Txizimu txi hi ninga so pinda si hi si lavako ti to hi kota kuhanya. Txi hi ningile silo so tala so hambana-habana ti to hi tidila ngu wutomi. Totshe eto txi ti maha nguku txi hi dhundako.

Jehovha a mahile mafu kasi ku vathu ve zumba ka ona ngu ha ku si gwitiko. Bhiblia yi womba tiya: “Mafu a ma ningete ka vanana va vathu,” ni ku  “kha txa ma maha diphanga, aniko txi ma vangile kasi ku vathu ve zumba ka ona.” (Masalmo 115:16; Isaya 45:18) Mbamani va no zumba ka ona ni ku va na zumba mbimu muni? “Vathu vo lulama va na dya thomba ya mafu, va na xayiseka ka ona yotshe mbimo.”—Masalmo 37:29.

Ngutoneto, Jehovha a wumbile wamwamna wo khata ni wamsikati, Adhamu ni Evha, e va veka ka mafu ya i nga ti paradhise ‘kasi ku ve yi dima ni ku yi xayisa.’ (Genesisi 2:8, 15) Txizimu txi va ningile mthumo wo tsakisa: “Velekelani mi anda, mi tala ha mafuni, mi txi ma fuma.” (Genesisi 1:28) Adhamu ni Evha kumweko ni vanana vawe va ti ni themba yo tidila ngu wutomi wo mbi guma ha mafuni. Atxi txi pandako, vona va sawute kwambi engisa Txizimu, se ngu toneto va luzile lungelo yo va hagari ka “vo lulama” ava ‘va no dya thomba ya mafu.’ Hambi keto nga ha hi no ti wona ngu kona, simaho sawe kha sa txitxa txikongomelo txa Jehovha ngu ngathu ni ngu mafu. Kambe kukhata he xolisise a ti se Txizimu txi nga ti maha.

Bhiblia yi tshumela yi ziwa kota Dipswi da Txizimu. Ngu kutxani Jehovha a di hi ningile Bhiblia? Txo khata a lava hi gonda ngu ngene. (Mavingu 2:1-5) Ditshuri ti to Bhiblia kha yi nge xamuli txiwotiso tximwani ni tximwani txi hi nga vako natxo mayelano ni Txizimu, nem kha ku nga ni dibhuku di di nga xamulako. (Ekleziyaste 3:11) Kambe timwani ni timwani ati ti ku ka Bhiblia ti hi vhuna ti to hi ziva Txizimu. Hi wona ti a ku tona ngu nzila yi a ñolako vathu ngu yona. Hi wona mahanyelo a vathu va a va dhundako ni va a va vengako. (Masalmo 15:1-5) Hi gonda mawonelo akwe ngu wukhozeli, mahanyelo ni tithomba. Bhiblia ya hi komba tifanelo ta Jehovha ngu mapswi ni simaho sa mwanana wakwe Jesu Kristu.—Johani 14:9.

Txivangelo tximwani txo va Jehovha a di hi ningile Bhiblia, ngu ti to a lava hi ziva nzila yo hanya wutomi awu wu tsakisako wu ku ni txikongomelo. Ka Bhiblia, Jehovha a hi gela nzila yo va ni mwaya wo tsakisa, kueneliseka ni nzila yo xula kuvilela. I si nga eto dwe, ngu ha hi nga ti wona ngu kona ka direvhista diya, Bhiblia yi ni tixamulo ta siwotiso sa lisima sa wutomi, so fana ni siya: Ngu kutxani ku di ni kuxaniseka? Wumagwana wu na hi tisela txani? Yi tshumela yi txhamusela ti to ngu tihi ti Txizimu txi nga maha kasi kutsanisekisa ti to txikongomelo txa txona txi na hetiseka.

Ngu ditshuri Bhiblia yi sawulekile ngu tinzila timwani to tala, kha kuna dibhuku di di fanako nayo. Hambiku ku nga thumiswa 40 wa vavamna ti to ve yi bhala ngu mbimo yi yi dinganako 1.600 wa malembe, yona kha ya pindelwa nguko Mbhali wa yona i Txizimu. (2 Timoti 3:16) Kuhambana ni mithumo yimwani ya kale, mibhalo ya Bhiblia yi xolisisilwe kudingana malembe o tala ni kuxayiswa mbimo yo lapha. I singa eto dwe, Bhiblia yi hulukile hambiku va nga duketa kutsimbisa ku yi hunduluxelwa, yi humeswa ni kugondwa. Nyamsi ngu yona yi humeswako ni kuhunduluxelwa ngutu ha mafuni kotshe. Kuvaho ka Bhiblia njitsanisekiso txa ti to “dipswi da Txizimu txathu da zumba kala kupinduka.”—Isaya 40:8.

Tximwani txo sawuleka atxi Txizimu txi nga maha ngu tsanisekisa txikongomelo txa txona ngu ngathu. Nga ha hi nga tiwona ngu kona mnsana khe, Txizimu txi ti lavile ti to vathu ve hanya ngu ha ku si gwitiko ha mafuni. Hambi keto, mbimo yi Adhamu a nga sawula kwambi engisa Txizimu e maha txionho, ene ni vanana va a ndi no va navo va luzeketwe ngu lungelo ya wutomi wo mbina magwito. “Ngako txionho txi nga wulela ha ditikoni ngu mhaka ya m’thu wa mmweyo, ngu msana ku txi wulela lifo, ngu toneto lifo nilona li wulelete votshe vathu, nguko votshe va onhile.” (Varoma 5:12) Kwambi engisa ka m’thu ku tikomba nga ku kavanyetile txikongomelo txa Txizimu. Jehovha a mahile txani?

Simaho ni tifanelo ta Jehovha kha si txitxi. Ene a tsayisile Adhamu ni Evha ngu kona ha ka simaho sawe, kambe ngu lirando a mahile malulamiselo ka vanana vawe. Ngu wutxhari wakwe, Jehovha  a sungile ti to a na txi xulisa kutxani txikarato, se ngu txikuluveta a zivisile nzila yo txi xula. (Genesisi 3:15) Ti to ku gumiswa txionho ni lifo ku ndi na laveka mwanana wa Txizimu, Jesu Kristu. Toneto ti ti pata txani?

Ti to e khulula vathu ka txionho txa Adhamu, Jehovha a rumete Jesu ti to e ta ha mafuni e ta gondisa vathu nzila ya wutomi “ni kuningela wutomi wakwe, kasi kutirula vavangi.” * (Matewu 20:28; Johani 14:6) Jesu a ndi na va mtirulo nguko a ti hetisekile kufana ni Adhamu. Kambe kuhambana ni Adhamu, Jesu a simamile a di hetisekile ni kuengisa, hambi a txi wonisana ni lifo. Hambiku Jesu a nga mbi li vayilela lifu, Jehovha a m’wusile eva ni wutomi wo mbi guma nzumani. Se Jesu a ndi na maha a ti ti nga tandwa ngu Adhamu—kuninga vathu va va engisako, wutomi wo hetiseka wo mbi na magwito. “Ngu toneto kambe, nga kuwa txieyiso txa m’thu mmweyo txi nga nyeta votshe vathu, kufana ni toneto, ngu kuengisisa ka m’thu wa mmweyo vavangi va na mahwa valulami.”(Varoma 5:19) Ngu kona ha ka mtirulo wa digandelo da Jesu, Txizimu txi na hetisisa txikongomelo txa txona txo vathu vo lulama ve hanya ngu ha ku si gwitiko ha mafuni.

Hi nga gonda to tala ngu Jehovha ka nzila yi a nga wonisana ngu yona ni sikarato si si nga tiswa ngu kwambi engisa ka Adhamu. Hi wona ti to kha txi ngaho txi txi nga tsivelako Jehovha kuhetisisa a ti a nga ti khata; dipswi dakwe di na ‘hetiseka.’ (Isaya 55:11) Hi tshumela hi wona lirando lo xamalisa la Jehovha ngu ngathu. “Lirando la Txizimu li ti wonekisisile tiya kwathu: Txizimu txi rumete Mwanana wa txona wa mmweyo ekha ha mafuni, kasiku athu hi txi hanya ngu ngene. Lirando la Txizimu ngu liya: Hi nga athu hi nga randa Txizimu, txona ngu txona txi nga hi randa, txi hi rumela Mwanana wa txona, kuta maha mhamba ya kudihela sionho sathu.”—1 Johani 4:9, 10.

Txizimu ‘kha txa felela Mwanana wa txona, kambe txi m’ningete ngu mhaka yathu hotshethu,’ ngu toneto ha tsaniseka ti to Txizimu ‘txi na hi ninga silo sotshe’ si txi nga hi thembisa. (Varoma 8:32) Ngu ti hi ti Txizimu txi nga hi thembisa ti to txi na hi mahela? Wona xamulo ka misungo yi yi londiselako.