I ti ku u ka sikarato, kha ti kanakanisi ti to u ndina emela ti to mngana wako e maha to kari kasi ku e kuvhuna. Va txi pimisa eto, vamwani va womba ti to Txizimu hi nga mngana nguko vapfa nga kha txi mahi txilo ti to txi va vhuna. Kambe ngu ditshuri, Jehovha kha mahi ti ti nga hi vhunako yotshe mbimo dwe, kambe a na tshumela e teka dizambo ti to e xula sotshe sikarato ni kuxaniseka ku hi mananako nako nyamsi. Ngu tihi ti Txizimu txi no ti maha?

Txizimu txi na gumisa wotshe wubihi ngu kuthavisa ditshina da kona. Bhiblia ya womba to i mani ditshina donedo mbimo yi yi wombako tiya: “Ditiko dotshe di mtamoni ka m’bihi.” (1 Johani 5:19) “M’bihi” eneyo kha ti kanakanisi to ngu wu Jesu a nga m’dhana “mfumi wa mafu awa,” Sathani Dhiyabhulosi. (Johani 12:31) Mkuzetelo wa Sathani ka vathu va mafu awa, ditshina da sikarato si hi mananako naso. Ngu tihi ti Txizimu txi no ti maha?

I singa kale Jehovha Txizimu txi na thumisa Jesu Kristu “kasiku e lovisa ngu lifo lakwe awu a fumako lifo, i ku ene Sathani.” (Vahebheru 2:14; 1 Johani 3:8) Ngu ditshuri Bhiblia yi kombisa ti to Dhiyabhulosi apune wa tiziva to a saletwe ngu “mbimo ya yidotho” ti to e loviswa. (Mtuletelo 12:12) Txizimu txi na maha ngu ha kufanako ni ka votshe ava va mahako wubihi.—Masalmo 37:9; Mavingu 2: 22.

Msana ko fuvisa wotshe wubihi ha mafuni, Muwumbi wathu a na maha ti ti lavekako ti to e hetisisa txikongomelo txakwe ngu vathu vavanene ni mafu. Hi emela kuwona txani?

Kudikha ka kwambina magwito ni kuzumbiseka. “Aniko avale vo thutha va na mana mafu va na tsaka, ve hanya ngu kudikha.”—Masalmo 37:11.

Kutala ka sakudya sasinene. “Ditiko di na talelwa ngu kupfuna ka fulaho, ayi yi zinginikelako txitimwi ka situnga.”—Masalmo 72:16.

Tinyumba to tshuri ni mthumo wo tsakisa. “Se va na aka tinyumba, ve zumba ka tona; va na phaya mivhinya, ve dya mihando ya kona . . . se vasawuleki vangu va na tsakela mithumo ya manza awe.”—Isaya 65:21, 22.

Khu ti tsakeli kuwona siemo soneso? I singa kale i nava mahanyelo a ditshiku ni ditshiku a votshe vathu.

Nyamsi mmwani ni mmwani wa lwala e tshumela efa, kambe kha ti na mbi swela kuguma toneto. I singa kale Txizimu txi na thumisa wuyelo ya mtirulo wa digandelo da Jesu “kufela ku, votshe va va no kholwa kwakwe, va si lovi, aniko va na mana wutomi wo mbi guma.” (Johani 3:16) I nava yihi wuyelo?

Malwati ma na fuviswa. “Se muaki ni wammweyo kha na mbi khene: Na lwala; nguko vathu va va no zumba ka dona, va na divalelwa ka wubihi wawe.”—Isaya 33:24.

Lifo kha li na mbi xupha kambe vathu. “A na fuvisa lifo ngu ha ku si gwitiko, ngu kumaha keto, MKOMA Txizimu, a na bahula mirongo ka totshe tikhohe.”—Isaya 25:8.

Vathu va na hanya ngu ha ku si gwitiko. “Kambe txiningo txa Txizimu ngu wutomi wo mbi na magwito, ngu ka Kristu Jesu Mkoma Wathu.”—Varoma 6:23.

Ava va nga fa va na wuswa. “Vo lulama ni va ku ambi lulama va na wuka ka vakufa.” (Mithumo 24:15) Va na wuyelwa ngu ningo ya Txizimu ya mtirulo.

Txizimu txi na si hetisisa ngu nzila yihi sotshe sithembiso siya?

Txizimu txi na hetisisa txikongomelo txa txona ngu vathu ni ngu mafu ngu kusimeka mfumo wa nzumani, awu Mfumeli wa kona i ku Jesu Kristu. (Masalmo 110:1, 2) Ewo i mfumo awu Jesu a nga gondisa valondeteli vakwe ti to ve wu khongelela ngu mapswi awa: “Tata wathu, u ku nzumani, . . . wu na te kwathu Mfumo wako.”—Matewu 6:9, 10.

Mfumo wa Txizimu wu na fuma otshe mafu wu tshumela wu gumisa wotshe wubihi ni kuxaniseka aku ku tiswako ngu wona. Mfumo wuwa mbwa wunene ngutu wo vathu kha va khali kuva nawu! Eto ngu ti ti nga maha Jesu apune e txhumayela “mahungu a maphya a Mfumo” mbimo yi a nga ti ka wuthumeli wakwe wa ha mafuni e tshumela e gela valondetele vakwe to ve maha ti ti fanako.—Matewu 4:23; 24:14

Ngu konaha ka lirando lakwe ngu vathu, Jehovha Txizimu a thembisile to a na va mahela totshe tiya. Eto kha ti kumahi u lava ku mziva ni kuva mngana wakwe? I nava yihi wuyelo yi u no yi mana ngu kusawula kumaha toneto? Msungu wu wu londiselako wu na txhamusela.