Ka direvhista diya hi gondile tinzila ti ti nga hi vhunako ti to hi xamula txiwotiso txi txi ku, i mani Txizimu? Hi khatile ngu kugonda ka Bhiblia ti to ditina da txona i Jehovha ni ti to fanelo ya txona ya hombe i lirando. Hi tshumete hi gonda ati txi nga ti maha ni ti txi no ti maha ti to txi vhuna vathu. Hambiku i ku tingi ti u nga gondako ngu Txizimu, ti lava u ziva ti to ngu yihi wuyelo yo maha toneto.

Jehovha a thembisile ti to “ngako u txo mlava, u na mmana.” (1 Makronika 28:9) Alakanya ningo ya lisima yi u nga yi manako ngu kuziva Txizimu—ku ‘dhundwa ngu Jehovha’! (Masalmo 25:14) U na wuyelwa ngu txani u txi dhundwa ngu Jehovha?

Litsako la ditshuri. Jehovha a txhamuselwa kota “txisima txa makatekwa.” (1 Timoti 1:11) Kutshuketa hafuhi kwakwe ni kuetetela tinzila takwe ti na kutisela litsako la ditshuri, ali li nga kuwuyelisako ka mialakanyo, ka dihanyo ni matipfelo. (Masalmo 33:12) Awe u nga tshumela u va ni litsako wutomini—ngu kuvayilela sikarato sa wutomi, se u sakulela simaho asi si vhunako ni kuxayisa wungana wa wunene ni vamwani. Se u na tumelelana ni mapswi a Mbhali wa masalmo wu a nga khene: “Aniko kwangu ndinene kuzumba hafuhi ka Txizimu.”—Masalmo 73:28.

Ku kukhatalela ni ku kuxayisa. Jehovha a thembisile tiya malanda akwe: “Ni na kutsimbitisa ni si leki ku kulwela.” (Masalmo 32:8) Eto ti womba ti to Jehovha a xayisa malanda akwe dimwedo ngu dimwedo e tshumela e khatalela silaveko sa dona. (Masalmo 139:1, 2) Mbimo yi u kulisako wungana wa wunene ni Jehovha, u na tumbula ti to mbimo yotshe a ni nawe.

Wumangwana wa wunene. Kuengetela ka ku kuninga khiya ya litsako ni kueneliseka wutomini konkuwa, Jehovha Txizimu a tshumela e maha ti koteka ti to u va ni wumangwana wa wunene. (Isaya 48:17, 18) Bhiblia yi womba tiya: “Se wutomi wo mbi guma ngu kuva va txi kuziva, awe, u ku Txizimu txa tximwetxo txa ditshuri, ni Jesu Kristu, awu u nga mruma.” (Johani 17:3) Ka timbimo tiya to karata, themba ayi Txizimu txi hi ningako yi nga thuma kota hangi ayi yi hi ‘tsanisako.’—Vahebheru 6:19.

Asiya nzidotho sa sivangelo so tala sa lisima so ziva kwati Txizimu ni ku kulisa wuxaka natxo. Wa amukeleka ko bhula ni Tifakazi ta Jehovha mwendo kubela ka jw.org ti to u mana madungula o tala aya ma vhunako.