Mafu a maphya a Parayiso ma hafuhi!
Txizimu txi mahile vathu hamafuni i di vo lulama ti to ve hanya va si fi. (Masalmo 37:29) Ene a vekile Adhamu ni Evha ni vanana ava va ndi no va veleka ka Jaradhi ya Edheni ti to ve dima ni ku kuxayisa.—Genesisi 1:28; 2:15.
Mafu ya hi hanyako ka ona nyamsi hi nga Parayiso nga ti Txizimu txi nga ti ti lavisa tona. Kambe Txizimu kha txa txitxa maplano a txona o maha ti to mafu me va Parayiso, a na hetisisa makungo akwe. Nga ha hi nga tiwona ngu kona ka gondo yi ku ka mapajina a msana, Txizimu kha txi na mbi khindimusa mafu ya hi hanyako ka ona. Ene a na tumelela ti to vathu ava va mahako ta tinene ve ta hanya ka mafu a maphya. Mbimo yi Txizimu txi no hetisisa makungo oneyo mafu ma na ta va ma di njani?
Ku na ta va ni Mfumo wa wumwewo hamafuni kotshe
I si nga kale mfumo wa Txizimu awu wu khukhelako nzumani wu na fuma mafu otshe. Se hamafuni ku na va wukhalo wo tsakisa ahawa vathu va no hanya ngu wumwewo ve maha mthumo wo tsakisa. Txizimu txi sawute Jesu ti to e fuma hamafuni, kuhambana ni vafumeli va nyamsi Jesu a na va mfumeli awu a khatalelako vathu. Mafumelo akwe ma na seketelwa ka lirando, a nava mfumeli wa mnene wo pfela wusiwana ni ku a na mahela ta tinene votshe vathu. Vathu votshe hamafuni va na pwana. Hamafuni kotshe kha ku na mba va ni txi sawu-sawu mwendo ku vathu ve hambaniswa ngu matiko.—Isaya 11:4.
Votshe vathu va na ta pwana
Votshe vathu ava va no va va txi hanya ha mafuni va na randa Txizimu ni ku randa muakelani. (Mtuletelo 7:9, 10) Ni ku va na thuma ngu wumwewo ni kupfana kasi kuhetisisa makungo a Txizimu. Vona va na thuma ni Txizimu ko maha to mafu me va Parayiso.—Masalmo 115:16.
Mtumbuluko wu na ta thuma ngu nzila ya yinene
Mbimo yi mfumo wa Txizimu wu no khata kufuma hawa hamafuni kha ku na mba va ni tiphango ta mtumbuluko. (Masalmo 24:1, 2) Mbimo yi Jesu a nga ti hamafuni ene a thumisile mtamo wu Txizimu txi nga ti mningile kasi ku malata moya wa hombe. (Marku 4:39, 41) Ka Mfumo wa Txizimu awu wu no fumwa ngu Jesu kha hi na mbi thava kambe tiphango ta mtumbuluko nguko ti na mbi vaho. Mfumo wonewo wu na maha ti to mafu me va ti ma nga di ka tona makhatoni.—Hoseya 2:18.
Kha ngaho wu a no lwala mwendo kukumba mwendo kufa, ni ku ku na ta va ni sakudya so tala
Ku na va ni sakudya sa singi kha ku na mbi lalwa, votshe vathu va na ta va ni wutomi wa wunene. (Isaya 35:5, 6) Vathu va na ta zumba ka wukhalo vo basa wo tshura wo fana ni wu va nga txi hanya ka wona Adhamu ni Evha ka Jaradhi ya Edheni. Ka mafu a maphya kufana ni Jaradhi ya Edheni mafu ma na ta pfuna ngutu, futshi ku na ta va ni sakudya so tala, se ava va no va va txi zumba ka ona va na ta ti dila. (Genesisi 2:9) Kufana ni va Israyeli va kale votshe ava va no ta hanya ka Parayiso va na ta “dya sakudya ngu kuenela.”—Levhi 26:4, 5.
Ku na ta va ni kudikha ni kuzumbiseka
Ka Mfumo wa Txizimu votshe vathu va na hanya ngu kudikha ni ku va na ta hanyisana. Kha ku na mba ta va ni tiyimbi, kha ku na mba ta va ni vafumeli va tshofu ni ku sotshe si hi si lavako hi na ta si mana. Bhiblia yi thembisa ti to: ‘Mmwani ni mmwani a na khalahatsa hahatshi ka m’vhinya wakwe, ni hahatshi ka mkuwa wakwe, se kha ku na mbi va ni wo va dhukisa.’—Mika 4:3, 4.
Votshe va na ta va ni tinyumba tawe ni mthumo wo tsakisa
Timwaya totshe ti na ta va ni tinyumba tawe ni ku ti na mbi thava ku ti na thuka ti hingwa ni ku wotshe mthumo wu va no wu maha wu na ta va ni wuyelo yo tsakisa. Bhiblia yi womba ti to ava va no ta hanya ka mafu a maphya a Txizimu “kha va na mbi ta thuma mahala.”—Isaya 65:21-23, Tradução do Novo Mundo.
Ku na ta va ni gondo ya yinene
Bhiblia yi thembisa ti to: “Mafu ma na ta tala ngu ku ziva MKOMA.” (Isaya 11:9) Vathu ava va no ta hanya ka mafu a maphya va na gonda ngu wutxhari wa Jehovha ni ku va na gonda kambe ngu so tshura asi a nga si vanga. Vona kha va na mbi thumisa wuzivi wawe kasi kumaha sibhamu mwendo kuxanisa vambenyani. (Isaya 2:4) Hahanze keto vona va na gonda nzila yo hanya ngu kudikha ni vamwani ni kuxayisa mtumbuluko.—Masalmo 37:11.
Wutomi wo mbi guma
Txizimu txi thumile ngutu kasi kulungiselela mafu kasi ku ti dila ngu wutomi wo tsakisa ditshiku ni ditshiku. Txizimu txi lava ti to vathu ve hanya ka mafu a maphya ve hanya wutomi wo mbi guma va sifi. (Masalmo 37:29; Isaya 45:18) Ti to txi hetisisa makungo oneyo Txizimu txi na “fuvisa lifo ngu ha ku si gwitiko.” (Isaya 25:8) Bhiblia yi womba ti to: “Kha ku nambi swa ku txi maneka kambe lifo, hambi kudila, hambi tihuwa, hambi kupandiseka.” (Mtuletelo 21:4). Txizimu txi na ninga wutomi wo mbi guma votshe vathu ava va no pona mbimo yi a no ta fuvisa vabihi ni va txi no va wusa ka mafu a maphya ti to ve hanya va sifi.—Johani 5:28, 29; Mithumo 24:15.
Hambi konkuwa vathu vo tala va ti lulamisela to ve ta hanya ka mafu a maphya. Hambi ku va mahako tiphazamo vona va maha mizamo yo ve hanya ngu nzila ayi yi no va maha ti to ve faneleka ku ta hanya ka mafu a maphya a Txizimu. Va mahisa ku txani toneto? Vona va gonda ngu Jehovha Txizimu ni ngu wu a nga m’ruma Jesu Kristu.—Johani 17:3.
Ngako u txi la kuziva to u nga maha txani kasi ku u huluka mbimo yi ku no fuviswa vabihi u ta hanya ka mafu a maphya. Tumbela gondo ya Bhiblia ya mahala ka Tifakazi ta Jehovha ngu kuthumisa dibhuku adi di ku Hanya wutomi wo tsakisa kala kupinduka!
Ti nga maha si kutsakisa
MUWONELELI
Ngu tihi ti Mfumo wa Txizimu wu no ti maha?
Jesu a ti tiziva ti to ati ti mahekako ha mafuni hi nga kudhunda ka Txizimu, ni ku Mfumo wa Txizimu ngu wona basi awu wu no gumisa sotshe sikarato. Ngu tihi ti Mfumo se wu nga timaha kasi ku hi tsanisa themba yathu?
