• Sawulwa ngu Txizimu. “Ngani ni nga fumisa mfumeli wangu . . . Ni na kuninga mifumo yi txi va i di thomba yako mafu otshe ma na kulumba.”—Masalmo 2:6, 8.

• Va m’dya thomba wa Mkoma Dhavhidha. “Nguko hi veleketwe mfana, hi ningilwe mwanana wa mfana . . . Kuanda ka kufuma ni kudikha kwakwe, kha ku na mbi va ni magwito, txitimwi ka txikhalo txa wukoma txa Dhavhidha, ni ka mfumo wakwe, kasi kutsanisa ni kuseketela.”—Isaya 9:6, 7.

• Velekwa Bhetlehema. “Awe Bhetlehema . . . , ku na huma ngu kwako awu a no va Mfumeli . . . A no kuliswa kala magwito ka mafu.”—Mika 5:2, 4.

• Vengelwa ngu vathu ni kudawa. “Ati ti ti txhipiswa kambe i ti ti wo nyenywa ngutu. . . . Aniko ene a pekilwe ngu sihambunyeto sathu, e xaniswa ngu mhaka ya wubihi wathu.”—Isaya 53:3, 5.

• Wuswa ka vakufa e dhumiswa. “Awe MKOMA, khu nambi ni leka ka wukhalo wa vafi, kambe khu nambi tumela ti to msawuleki wako e sina diphalani. . . . Ka dianza dako da txinene ku ni kuzumbiseka ko mbi gwita.”—Masalmo 16:10, 11.

Ka matimu a vathu, ko va ni m’thu mmweyo basi a ku ni tifanelo ti ti nga kombiswa, m’thu eneyo i Jesu Kristu. Ku ni ditshiku di ngelozi yi nga gela Mariya mame wa Jesu yi txi: “Mkoma Txizimu a na mu ninga txikhalo txa tate wakwe Dhavhidha; . . . Se mfumo wakwe kha wu na mbi va ni magwito.”—Luka 1:31-33.

Jesu kha khali kufuma ha mafuni. Kambe ene a na fuma vathu a ti nzumani ka Mfumo wa Txizimu. Nji txani txi nga maha ti to Jesu e faneleka? Wona ati a nga timaha adi ha mafuni.

•   Jesu a ti khatalela vathu. Jesu a vhuni majaha, vavasikati, vaphya ni vo kumba, ti si nga ni mhaka ni txiemo txawe. (Matewu 9:36; Marku 10:16) Mbimo yi m’thu wu a nga ti ni tshekela a nga khene: “Ngako u txi ti lava, u nga ni basisa,” Jesu a gwesekile e mu hanyisa ka wulwati wakwe. —Marku 1:40-42.

• Jesu a hi gondisile nzila yo tsakisa Txizimu. Ene a ti khene: “Kha mi na ku si kota kuthumela Txizimu ni thomba ya mafu.” A tshumete e womba to hi fanete kuñola vamwani nga ha hi lavako ku ve hi ñola ngu kona. I si ngeto dwe a wombile to Txizimu kha txi khatali basi ngu ti hi ti mahako, kambe ni ti hi ti pimisako. Se ngako hi txi lava kutsakisa Txizimu hi fanete kualakanyisisa ngu ti hi ti pimisako mbiluni. (Matewu 5:28; 6:24; 7:12) Jesu a junyatisile ti to kasi ku hi mana litsako ka wutomi hi fanete kugonda ati Txizimu txi ti lavako ni kutshumela hi ti maha.—Luka 11:28.

• Jesu a gondisile ati lirando li wombako tona. Mapswi ni simaho sa Jesu si gwesile timbilu ta vaegiseli vakwe. “Mabutho ma to xamala ngutu ngu kugondisa kwakwe. Nguko a ti ti va gondisa kufana ni m’thu wu a ku ni wukoma.” (Matewu 7:28, 29) E gwita e va gondisa tiya: “Randani valala vanu.” A tshumete e khongelela hambi va va nga ti ni mnando wa lifo lakwe atxi: “Tata, va divalele, nguko kha va ti zivi ati va ti mahako.”—Matewu 5:44; Luka 23:34.

Jesu wa faneleka kufuma vathu. Se a na khata mbimo muni kufuma?