Ka msungo wu wu nga pinda hi woni sikombiso si Jesu a nga si womba. Kuhetiseka ka sikombiso sileya ku ti veka hakubasani ti to Mfumo wa Txizimu se wu ho nzumani ni ku Mkoma wa kona i Jesu Kristu.

Bhiblia yi womba ti to mbimo yi Jesu a no teka Wukoma, a ndi na hinga Sathani ni madhimoni akwe nzumani. Simaho sawe so gwitela ha mafuni basi, ngu toneto kukhukhela ngu 1914 ku ni wubihi ngutu ha mafuni.—Mtuletelo 12:7, 9.

Ti si nga ni mhaka ni wubihi wu wu kuho ha mafuni, Jesu kota Mkoma wa Mfumo wa Txizimu a maha to kari ti to e vhuna vathu ha mafuni. Ngu ya mhaka mthumo wo txhumayela awu Jesu a nga womba-womba ngu wona, vathu vo tala va gonda matshina a milayo ya Bhiblia ni ku ma thumisa ka wutomi wawe. (Isaya 2:2-4) Timiliyoni ta vathu ti gondile kuva ni mawonelo a manene ngu mthumo, kuva ni wutomi wo  tsakisa ha mwayani ni kwa mbi tumelela tithomba ti tsulupeta wutomi wawe. Vathu vava va gonda ati ti va wuyelisako konkuwa ni ku va ni mahanyelo aya Txizimu txi ma tsakelako ka va no hanya ka Mfumo wa txona.

Konkuwa Jesu a fuma nzumani, mifumo ya vathu yi fuma mafu. Kambe Txizimu txi gete tiya Jesu: “Fuma txitimwi ka valala vako!” (Masalmo 110:2) I si nga kale, Jesu a na lovisa votshe valala e tisa kudikha ka vale va lavako kuengisa Txizimu.

Ngu mbimo yoneyo, Mfumo wa Txizimu wu na ta

• Lovisa wukhongeli wa makuhu. Wukhongeli awu wu nga gondisa makuhu mayelano ni Txizimu wu tshumela wu nemeta wutomi wa vathu, wu na loviswa. Bhiblia yi fananisa wukhongeli wa makuhu ni digelegele. Kuloviswa koneko ku na dhukisa vathu vo tala.—Mtuletelo 17:15, 16.

• Lovisa wukoma wa vathu. Mfumo wa Txizimu wu na “balisela ni ku heta yotshe mifumo ya vathu.—Mtuletelo 19:15, 17, 18.

• Lovisa vathu vo biha. Kuwombwa txani ngu va va nga tiemisela kumaha wubihi ni va va si ti laviko kuengisa Txizimu? “Aniko vaonhi va na dulwa ha mafuni.”—Mavingu 2:22.

• Lovisa Sathani ni madhimoni. Sathani ni madhimoni va na mbi “kanganyisa mifumo.”—Mtuletelo 20:3, 10.

Ava va tumelako Mfumo wa Txizimu, va na wuyelwa ngu nzila yihi ngu simahakalo siya?

Na a di nzumani, Jesu a na maha to tala kupinda totshe ti vathu va nga khala ku ti maha. Ene a na fuma ni va 144.000, ava va nga sawulwa hagari ka vathu. (Mtuletelo 5:9, 10; 14:1, 3) Ene a na maha ti to kudhunda ka Txizimu kumaheka ha mafuni. Ngu tihi ti Mfumo wa Txizimu wu no mahela vathu ha mafuni?

• Kugumiswa ka malwati ni lifo. “Se muaki ni wammweyo kha na mbi khene: Na lwala” ni ku “kha ku nambi swa ku txi maneka kambe lifo.”—Isaya 33:24; Mtuletelo 21:4.

• Kudikha ni kukhaliseka. “Kudikha ka vanana vako ku na maha ko enela,” ni ku ditiko “dimwani ni dimwani di na khalahatsha hahatshi ka m’vhinya wa dona, ni hahatshi ka mkuwo wa dona, se kha ku na mbi va ni wo va dhukisa.”—Isaya 54:13; Mika 4:4.

• Ku na va ni mthumo wo tsakisa. ‘Se vasawuleki vangu va na tsakela mithumo ya manza awe. Kha va na mbi thuma mahala.’—Isaya 65:22, 23.

• Kululamiswa ka sikarato sa mtumbuluko. “Se txiwula ni makhalo a kuwoma si na tsaka; se ligwangwa li na peka mikulungwani, kambe li na rumbuka nga txiluva.”—Isaya 35:1.

• Kugondisa vathu kasi ku ve hanya ngu ha ku si gumiko. “Se wutomi wo mbi guma ngu kuva va txi kuziva, awe, u ku Txizimu txa tximwetxo txa ditshuri, ni Jesu Kristu, awu u nga mruma.”—Johani 17:3.

Txizimu txi lava ti to awe u mana makatekwa awa. (Isaya 48:18) Msungo wu wu londiselako wu na txhamusela ati u fanelako kumaha konkuwa ti to u mana wumangwana wo tsakisa.