Ngu ha kufanako, i si nga kale hotshethu hi na wonisana ni “txingulo” txa hombe atxi Jesu a nga txi dhana ku i ‘xanisa ya hombe.’ (Matewu 24:21) Athu kha hi nge tutumi xanisa yiya. Kambe ku ni ti hi nga ti mahako kasi ku ti vhikela. Hi nga maha txani?

Ka m’wombawombo wakwe wa Mmangoni, Jesu a ningete mkongomiso wuwa: “Kukhata, lavani Mfumo wa Txizimu ni kululama ka txona.” (Matewu 6:33) Hi nga mahisa kutxani toneto?

Kukhata lava Mfumo wa Txizimu. Atiya ti la kuwomba to hi fanete kuwona Mfumo wa Txizimu i di wa lisima kupinda totshe ka wutomi wathu. (Matewu 6:25, 32, 33) Ngu kutxani hi di fanete kuva ni mawonelo awa? Nguko vathu kha va sikoti kululamisa sikarato. Ova Mfumo wa Txizimu basi awu wu nga lulamisako sikarato sotshe.

Lava kululama ka wona. Hi fanete kumaha totshe ti hi nga tikotako ti to hi hanya ngu milayo ya Txizimu. Ngu kutxani? Nguko ngako hi txi ti mahela sisungo na hi si kongomiswi ngu Txizimu, hi nga va ni wuyelo yo biha. (Mavingu 16:25) Kasi hi txi hanya ngu milayo ya Txizimu, kha hi tsakisi Jehovha basi, kambe hi tshumela hi wuyelwa nathu.—Isaya 48:17, 18.

Kukhata lava Mfumo wa Txizimu ni kululama ka wona. Jesu a wombile ti to vo tala va ndi na humbwa ngu kualakanya ti to va nga tivhikela ngu kuva ni tithomba. Kasi vamwani va ndi na karatwa ngu kunemelwa ngu kuvilela ngu ta wutomi aha koza va si thembi Mfumo wa Txizimu.—Matewu 6:19-21, 25-32.

Kambe Jesu a thembisile ti to ava va seketelako Mfumo wa Txizimu va na mana sotshe si va si  lavako konkuwa ni makatekwa o mbi na magwito ka mbimo yi yi tako.—Matewu 6:33.

Hambiku malanda a Jesu a dilembe dizana do khata ma nga themba Mfumo wa Txizimu ni kululama ka wona, kha ma wona magwito a kotshe kuxaniseka. Kambe ma ti vhikelekile. Ngu nzila yihi?

Ona ma ti hanya ngu milayo ya Txizimu, se eto ti ma vhikete ka sikarato si si nga ti vangwa ngu va va nga si engisi ati Txizimu txi nga ti womba. Likholo la ona la ti to Mfumo wu nata, li ma vhunile kuwonisana ni sikarato sa hombe. Se Txizimu txi ma ningile “mtamo wuwa wa hombe” ti to me wonisana naso.—2 Vakorinto 4:7-9.

Makristu a dilembe dizana do khata ma engisile txirumo txo lava Mfumo kukhata. Ona ma txhumayete mahungu a Mfumo kotshe mu ma nga kukota. (Vakolosa 1:23) Ina ku ni va va mahako toneto nyamsi?

Ina! Tifakazi ta Jehovha ta ti wona to magwito ma hafuhi se Mfumo wa Txizimu wa hoka. Ngu toneto tona ti maha totshe ti ti nga tikotako kuengisa mapswi a Jesu aya ma ku: “Evhangeli yiya ya Mfumo yi na huwelelwa ka dotshe ditiko, kasi kumahwa wufakazi ka yotshe mifumo. Se msana keto, ngu kona ku no va i di magwito.”—Matewu 24:14.

U na angulisa kutxani ka mahungu a manene? Hi kukuzeta kutekelela txikombiso txa vahanyi va Makedhoniya didhoropa da Bhereya. Mbimo yi va nga pfa mahungu a manene a Mfumo ni Paulo, vona “va amukete dipswi ngu yotshe mbilu.” Ngu msana va mahile wuxolisisi wa Mibhalo kasi kutsaniseka ti to ati va nga tipfa ditshuri kani, se ve gwita ve hanya ngu tona.—Mithumo 17:11, 12.

Nawe u nga maha ti ti fanako. Ngu kulava Mfumo wa Txizimu kukhata ni kululama ka wona, awe u nga vhikeleka konkuwa ni kutidila ngu kudikha ko mbi na magwito mbimo yi yi tako.