1, 2. a) Ati hi ti rinzelako ti hambani ngu nzila yihi ni ta vamwane? b) Hi na bhula ngu txani ka msungo wuwa?

JEHOVHA a hi ningile sithembiso so tsakisa asi hi nga si rinzela ti to si hetiseka. Ene a thembisile kusawulekisa ditina dakwe ni kumaha ti to ha mafuni ku mahwa kudhunda kwakwe nga nzumani. (Matewu 6:9, 10) Ina atiya hi nga timhaka ta lisima? Jehovha a tshumete e thembisa ku hi ninga wutomi wo mbi guma nzumani hambi ni ha mafuni. Eto ngu ditshuri ti na tsakisa! (Johane 10:16; 2 Pedro 3:13) Hi tshumela hi rinzela kuwona nzila yi Jehovha a no ya masoni e kongomisa ngu yona malanda akwe ka masiku awa a magwito.

² Bhiblia yi womba ti to likholo “njitsaniso txa kumana” si hi nga si rinzela. Votshe ava va ku ni likholo va tsaniseka ti to totshe ati Jehovha a nga ti thembisa ti na maheka. (Vahebheru 11:1) Kambe ti nga maheka vathu vamwane ni vona ve va ni themba ya to kari, kambe kha va tsaniseki ti to ti na maheka. Ngu txikombiso, m’thu wo kari a nga va ni themba ya ti to a na ganya msakano wo kari, kambe ene kha na kutsaniseka ti  to ngu ditshuri a na ganya. Ka msungo wuwa hi na gonda ngu ti to hi nga li tsanisisa ku txani likholo lathu ka sithembiso sa Txizimu. Hi na tshumela hi bhula ngu ti to likholo lo tsana li nga hi vhuna ngu nzila yihi nyamsi.

3. Ngu ku txani hi txi themba ti to sithembiso sa Txizimu si na hetiseka?

³ A walo ni wamweyo a velekwako a di ni likholo. Ti to hi va ni likholo hi fanete hi tumelela moya wo sawuleka wu kongomisa timbilu tathu. (Vagalatiya 5:22) Wona wu nga hi vhuna kuziva Jehovha. Ngako hi txi pfisisa ti to ene a ni mtamo wotshe ni wuzivi, hi na tsaniseka ti to ene a nga sikota kumaha ati a thembisako tona. Jehovha a txi maha txithembiso, kwakwe ti fana ni loko txi di hetisekile. Ngu toneto ene a khene: “Mapswi awa ma tatisekile!” (Lera Mtuletelo 21:3-6.) Ha tiziva ti to Jehovha wa maha totshe ati a ti thembisako. Ene i “Txizimu txo thembeka.” Ngu toneto hi kholwako totshe ati a wombako ti to a na ti maha.—Dheuteronome 7:9.

4. Nji txani atxi malanda a kale a Txizimu ma nga ti txi rinzete?

⁴ Ku ni vavamna ni vavasikati va 16 ava va nga va ni likholo ka sithembiso sa Txizimu ava kuwombawombwako ngu vona ka dibhuku da Vahebheru 11. Di tshumela di wombawomba ngu vamwane vo tala ava va nga tsakisa Jehovha “ngu mhaka ya kukholwa kwawe”. (Vahebheru 11:39) Votshe vava, va ti rinzete “liveleko” ali Jehovha a nga li thembisa. Va ti ti ziva ti to “liveleko” liya, li na lovisa valala votshe va Txizimu li tshumela li maha ti to mafu me tshumela me va paradhise. (Genesisi 3:15) Ni ku malanda onewo a Txizimu ma ti ni likholo lo tsana la ti to Jehovha a na ma wusa ka va kufa. Ona ma sa emela kuwuswa me ya hanya nzumani nguko Jesu a si se maha ti to toneto ti koteka. (Vagalatiya 3:16) Ona ma rinzete ku ta wuswa me hanya ha mafuni ka paradhise yo tshura.—Masalmu 37:11; Isaya 26:19; Hoseya 13:14.

5, 6. Abrahamu ni mwaya wakwe va ti rinzete txani? Va mahisile ku txani ti to ve simama ni likholo lo tsana? (Wona mfota wa makhatoni.)

⁵ Mayelano ni malanda onewo o thembeka a Jehovha Vahebheru 11:13 yi khene: “Votshe vathu vava va fete kukholwani, na va si nzi kumana si va nga ti thembisilwe sona. Vona va to si wona ni ku si tsakela ngu kule dwe.” Vona va rinzete mafu a maphya ni ku ti wona nga vo va ka ona. Mmweyo wawe i Abrahamu. Jesu a wombile ti to Abrahamu “a tsakete kuwona ditshiku dangu, se a di woni e nengela” ngu mbimo yoneyo. (Johane 8:56) Sara, Isake, Jakobe ni vamwane vo tala va ti rinzete mbimo yi Mfumo awu ‘mpimisi ni muaki wa wona i ku Txizimu’ wu ndino fuma otshe mafu.—Vahebheru 11:8-11.

⁶ Abrahamu ni mwaya wakwe va li tsanisile ngu nzila yihi likholo lawe? Ngu kusimama ve gonda ngu Jehovha. Mbimo yimwane Jehovha a wombawombile navo ngu kuthumisa tingelozi, miwoniso mwendo miloro. Ti nga maheka vona va ti gonda ngu vathu vamwane va kale vo thembeka mwendo ngu mabhuku aya ma nga ti ho. Abrahamu kha thuka a di divate sithembiso sa Txizimu, futhi a ti dhunda kualakanyisisa ngu sona. Ti mu vhuni ngu txani toneto?  Ti mu vhuni kwa mbi kanakana ngu sithembiso sa Jehovha. Se hambi a txi xaniswa a zumbile a di thembekile.

7. Nji txani atxi Jehovha a nga hi ninga ti to hi tsanisa likholo lathu? Athu hi fanete hi maha txani?

⁷ Nji txani atxi txi no hi vhuna kutsanisa likholo lathu? I Bhiblia yi hi nga ningwa ngu Jehovha. Yona yi hi gondisa ngu sithembiso sa mbimo yi yi tako ni ti hi ti lavako ti to hi mana litsako. Ngu toneto i ku ta tinene kulera Bhiblia ditshiku ni ditshiku ni kulondisela nkongomiso wa yona. (Masalmu 1:1-3; lera Mithumo 17:11.) Jehovha a tshumela e hi ninga “sakudya ngu txikhati txi txi fanelako” ngu kuthumisa ‘txithumi txo thembeka ni txa wutxhari’. (Matewu 24:45) Kufana ni malanda a Txizimu a kale, nathu mbimo yotshe hi lava kugonda ngu sithembiso soneso ni ku alakanyisisa ngu sona. Eto ti na hi vhuna kuzumba hi di thembekile ka Txizimu ni kurinzela mbimo yi Mfumo wa txona wu no fuma mafu otshe.

8. Mkombelo wu nga li tsanisisa ku txani likholo lathu?

⁸ Nji txani atxi txi nga vhuna malanda a kale a Jehovha ti to me simama me va ni likholo lo tsana? Va to maha mkombelo ve kombela kuvhunwa ngu Jehovha, se mbimo yi va wonako ti to mikombelo yawe ya xamulwa, likholo lawe li tsani. (Nehemiya 1:4, 11; Masalmu 34:4, 15, 17, Tradução do Novo Mundo; Dhanieli 9:19-21) Nanathu hi txi wona ti to mikombelo yathu ya xamulwa, likholo lathu la tsana. (Lera 1 Johane 5:14, 15.) Ti lava kambe hi simama hi ‘kombela’ ti to Jehovha e hi ninga moya wakwe wo sawuleka ti to hi va ni likholo lo tsana.—Luka 11:9, 13.

9. Ngu tihi timwane ati hi nga ti khongelelako?

⁹ Hi nga ti to mbimo yotshe hi no kombela ti to Jehovha e hi ninga asi hi si lavako dwe. Hi fanete hi m’bonga ni ku m’dhumisa ditshiku ni ditshiku, nguko ene a hi mahete silo so tala so xamalisa! (Masalmu 40:5, NM) Malanda a Jehovha ma khongelela ni vanawe va ha mafuni kotshe. Ngu txikombiso, hi ‘alakanya ava va nga khotelwa’. Hi tshumela hi khongelela ava ‘va thangelako’. Mbimo hi wonako ti to Jehovha wa xamula sikhongelo soneso, likholo lathu la tsana hi tshumela hi tshuketa hafuhi nayo.—Vahebheru 13:3, 7.

10. Nji txani txi nga vhuna vo tala ku va ni txibindi ni kuzumba va di thembekile ka Txizimu?

¹⁰ Ka Vahebheru 11 mpostoli Paulo a ti khene: “Vavasikati va tshumete ve mana vafi vawe va nga wuswa kufani. Vamwane va wiletwe sihango, ve lamba kuthuswa ngu kulava kuwuswa kufani ngu nzila ya tshuko.” (Vahebheru 11:35) Vamwane va tsanisete sikarato ve simama ve thembeka ka Txizimu nguko vona va ti ni likholo lo tsana ka kuwuswa ka vafi aku Txizimu txi nga ku thembisa. Va ti ti ziva ti to mbimo yi yi tako Jehovha a na va wusa ve hanya kala kupinduka ha mafuni. Khumbula Nabhoti ni Zakariya. Vona va fayilwe ngu marigwi ve  fa ngu mhaka yo engisa Txizimu. (1 Vafumeli 21:3, 15; 2 Matimu 24:20, 21) Dhanieli a rinzilwe amu ka diphala da tingonyamu ati ti ku ni nzala, se vangana vakwe ve betwa ka mndilo wa hombe ngutu. Vona va ti bheja kufa kupinda kwa mbi engisa Txizimu. Vavamna vonevo va ti themba ti to Jehovha a na va zamela moya wo sawuleka kasiku ve tsanisela siduko soneso.—Dhanieli 3:16-18, 20, 28; 6:13, 16, 21-23; Vahebheru 11:33, 34.

11. Ngu mhaka ya likholo lawe, nji txani atxi vamwane va vaprofeti va nga txi tsanisela?

¹¹ Vaprofeti vamwane vo kota Mika, ni Jeremiya, va poyiletwe ni kukhotelwa. Vamwane vo fana ni Elija, ‘va tsimibite siwulani, ni mimangoni, ve zumba diphalani ha mafuni’. Votshe va tsanisete ve zumba va di thembekile ka Txizimu nguko va ti ni ‘txitsaniso txa kumana simaha si va si rinzelako’.—Vahebheru 11:1, 36-38; 1 Vafumeli 18:13; 22:24-27; Jeremiya 20:1, 2; 28:10, 11; 32:2.

12. I mani txikombiso txa txinene ngutu txo txi tekelela? Nji txani atxi txi nga mu vhuna ti to e tsanisela?

¹² Jesu Kristu a tsanisete siduko sa hombe ngutu ka sotshe, kambe a simamile e thembeka ka Jehovha. Nji txani txi nga mvhuna ti to e tsanisela? Mpostoli Paulo a ti khene: “Litsako li a nga velekwa ka lona, a txi langa mixaniso ya kurwala txihambano, a si khatali ngu kurukwa. Se konkuwa, a maneka a di khalahatshile txineneni ka txikhalo txa wukoma txa Txizimu.” (Vahebheru 12:2) Paulo a gwitile e gela Makristu a txi khene “alakanyani” txikombiso txa Jesu. (Lera Vahebheru 12:3.) Kufana ni Jesu, Makristu a kale ma datwe ngu mhaka ya ku ma nga ti thembekile ka Jehovha. Mmwane wawe i Antipasi. (Mtuletelo 2:13) Makristu mamwane se ma yi mani hakelo ya ona nzumani kambe malanda a Txizimu a kale ngutu ma ti rinzete ku ta wuswa me hanya ha mafuni. (Vahebheru 11:35) Jesu se a khatile kufuma ngu 1914, se Makristu aya ma nga sawulwa aya se ma nga fa, ma yi mani hakelo ya wutomi wo mbi guma nzumani ni ku ma na fuma ni Jesu ha mafuni.—Mtuletelo 20:4.

13, 14. Ngu sihi sikarato asi Rudolf Graichen a nga manana naso? Nji txani txi nga m’vhuna ti to e tsanisela?

¹³ Timiliyoni ta Makristu nyamsi ti ti emisete kulondisela txikombiso txa Jesu. Ona ma alakanyisisa ngu sithembiso sa Txizimu ni kuzumba ma di thembekile ka txona. Alakanya ngu Rudolf Graichen wa Alemanha, awu a nga velekwa ngu 1925. Mbimo yi i nga ti ngadi m’dotho, vaveleki vakwe va ti nameketete mifota ya paradhise amu nyumbani. A khene: “Mfota wumwane wu ti kombisa dixolwa di di ni txinvutana, yingwe ni txihongwana, dirole ni ngonyamu. Sotshe si ti zumba ngu kudikha si txi golwa  ngu mwanana wa m’dotho.” (Isaya 11:6-9) Atiya ti vhuni Rudolf ti to e alakanyisisa ngu paradhise e tshumela e tsanisa likholo ka yona. Ene a zumbile a di thembekile ka Jehovha hambi a txi xaniswa ngu va nazistas ni va comunistas.

¹⁴ Rudolf a tsanisete siduko so tala. Mame wakwe a fite ngu wulwati awu a nga wu mana ka wukhalo wu va nga ti ka wona mbimo yi va nga ti ñotwe. Tate wakwe a sayinile diphepha do landula likholo a txi khene hi nga ngadi Fakazi ya Jehovha. Kambe Rudolf a ve ni likholo lo tsana. Msana ka ku va a di humesilwe jele a thumile kota muwoneleli wa txigava. Se e gwita e dhanwa ti to e ya txikolwane ka Gileade. Mbimo yi a nga huma a avetwe ku ya thuma Chile kota muwoneleli wa txigava. Eho ngu ha a nga txhadha ni Patsy, i nga ti murumiwa. Dikhombo da kona, msana ka dilembe va di tekanile, txihoranana txi va nga veleka txi luzile. Ngu kutsimbila ka mbimo, nene Patsy a luzile a di ni 43 wa malembe. Hambiketo, Rudolf a timisete e thumela Jehovha. Hambi mbimo yi se a nga kumba, a di ni tinyamakazi, ene a thumile kota didhota na i di  nyaphandule wa mbimo yotshe. Matimu akwe ma bhatwe ka A Sentinela, 1.° de agosto de 1997, maphepha 20-25. ^[1] (Wona txhamuselo yo gwitisa.)

15. Womba sikombiso sa vathu va va thumelako Jehovha ngu litsako hambiku va xaniswako?

¹⁵ Nyamsi, malanda mamwane a Jehovha ma xaniswa, kambe mathumela Jehovha ngu litsako. Mazana a vanathu vonevo va ti khotetwe ka ditiko da Coreia do Sul, Eritreia ni Cingapura nguku va nga lamba “kuthumisa ditxhari”. (Matewu 26:52) Ngu txikombiso, Isaac, Negede ni Paulos va ditiko da Eritreia se va ni 20 wa malembe va di khotetwe, kambe vona va simama va di thembekile ka Jehovha ngu likholo lo tsana! Va xanisilwe ngutu, ni ku ngu mbimo yi va nga ti jele kha ta va hehukela kutxhada mwendo kukhatalela vaveleki vawe. Ni konkuwa vona va thembekile ka Jehovha ni ku va ni likholo lo tsana. Hambi maphoyisa awe kona jele mule ma va xonipha. Ka Website ya jw.org u nga wona mfota wawe. Hambiku va xanisekako, va bonyozela.

16. Likholo lo tsana li nga kuvhuna ti to u maha txani?

¹⁶ Hambiku ku nga wombawombwa ngu vanathu vava va nga xaniswa ngutu, hi nga otshe malanda a Jehovha ma nga betwa majele. Kambe vamwane va xanisekile ngu mhaka ya wusiwana, tiphango ta mtumbuluko mwendo tiyimbi ta matikoni kwawe. Vamwane va londisete txikombiso txa Abrahamu, Isake, Jakobe ni Mosi se ve leka ku va ni nduma ni mithumo ya timale ve thumela Jehovha. Nji txani txi nga vhuna vanathu vonevo? Va vhunwi ngu lirando lawe ka Jehovha ni ku va ni likholo lo tsana ka sithembiso sakwe. Vona va ti ziva ti to ene a na hakela malanda akwe ngu wutomi ka mafu a maphya a ha ku no mbi va ni wubihi.—Lera Masalmu 37:5, 7, 9, 29.

17. Hi nga mahisa ku txani ti to hi va ni likholo lo tsana?

¹⁷ Ka msungo wa mhaka wuwa hi woni ti to i ngu nzila yihi likholo i ku “txitsaniso txa kumana simaha si hi si rinzelako”. Kasi hi va ni likholo lonelo, ti lava hi maha mkombelo ka Jehovha ni ku alakanyisisa ngu sithembiso sakwe. Se hi txi maha toneto ti na hi vhuna kutsanisela siduko sotshe. Ka msungo wu wu londiselako hi na bhula ngutu ngu ti to ti womba txani ku va ni likholo.