1. Ku ti laveka txani ti to m’thu e womba-womba ni mkoma wa Persiya?

ALAKANYA u txi hanya ka ditiko da Persiya wa kale kona mu ka 2.500 wa malembe msana. U txi lava kuwomba-womba ni mkoma ngu mhaka yo kari, kambe ti lava u enda ti to u ya ka didhoropa da Susani. Kambe khu nge womba-wombi nayo u sa khata ngu kutumelelwa. Ngako u txo maha to hambana, u nga luza hambi wutomi wako!—Est. 4:11.

2. Jehovha a lava hi tipfisa kutxani hi txi womba-womba nayo?

² Ha tsaka ngutu aku Jehovha a si faniko ni mkoma wa Persiya! Jehovha mbwa hombe ngutu ni ku mbwa lisima kupinda votshe vakoma, kambe hi nga womba-womba nayo. Ene a lava hi womba-womba nayo hi di txhusekile. Ngu txikombiso, Jehovha a ni sithopo so tala so fana ni M’vangi wa Hombe, Nyamitamo, Mkoma wo Guleka, kambe ene a lava ti to hi m’dhana ngu madhanelo ya ma nga toloveleka i ku awa: “Tata.” (Mat. 6:9) Ta hi tsakisa ngutu kuziva to Jehovha a lava hi tipfa hi di hafuni ni nene!

3. Ngu kutxani hi nga dhanako Jehovha hi txi “Tata”? Hi na bhula ngu txani ka msungo wuwa?

³ Hi nga dhana Jehovha hi txi “Tata” nguko ngene Txisima txa wutomi. (Mas. 36:9) Aku Jehovha i ku Tate wathu, hi ni fanelo yo mu engisa. Ngako hi txi maha ati a hi kombelako, hi na tidila ngu makatekwa o tala. (Vaheb. 12:9) Makatekwa onewo ma pata ni wutomi wo mbi na magwito ha mafuni mwendo nzumani. Hi tshumela hi tidila ngu makatekwa i di ngadi konku. Ka msungo wuwa, hi na gonda to Jehovha a hi ñolisa kutxani konkuwa kota Tate wa lirando, ni ku hi nga tsanisekisa  kutxani ti to kha na mbi thuka e hi leka mbimo yi yi tako. Kambe konkuwa, he woneni to hi nga tsanisekisa kutxani to Tate wathu wa nzumani wa hi randa ni ku a lava ku hi vhuna.

4. Ngu kutxani vamwani ti txi va karatela kuwona Jehovha kota Tate wawe?

⁴ Ina ta kukaratela kuwona Txizimu kota Tate? Vamwani va nga tipfa va si vhuni txilo va txi ti fananisa ni Jehovha. Va kanakana to mwendo Txizimu txo Guleka txi nga va khatalela. Kambe Tate wathu wa lirando kha lavi hi tipfa ngu nzila yoneyo. Ene a hi ningile wutomi, ni ku a lava hi va ni wungana nayo. Msana ka kuva mpostoli Paulo a ti wombile ditshuri edo, a txhamusete vaengiseli vakwe khe Atena ti to Jehovha kha “nga kule ka mmweyo ni mmweyo wathu.” (Mith. 17:24-29) Txizimu txi lava to mmweyo ni mmweyo wathu e txi tshuketela kufana ni mwanana wu a yelako tate wakwe wa lirando.

5. Hi gonda txani ka txikombiso txa mwanathu mmwani wa txisikati?

⁵ Vamwani ti nga va karatela kuwona Jehovha kota Tate wawe nguko va tate vawe va nyama kha va khali ku va kombisa lirando ni wunene. Wona ati mwanathu mmwani wa txisikati a nga womba: “Tate a ti karata ngutu. Se mbimo yi ni nga khata kugonda Bhiblia ti txi ni karatela kuwona Txizimu txa nzumani kota Tate. Kambe mbimo yi ni nga ziva Jehovha ni txitxile.” Ina u ni matipfelo o fana? I di ti to ina, tsaniseka to u nga sikota kuwona Jehovha kota Tate wu a ku ni lirando la hombe.

6. Ngu kuya ngu Matewu 11:27, ngu yihi nzila yi Jehovha a nga yi thumisa ti to hi mu wona kota Tate wathu wa lirando?

⁶ Nzila yimwani ayi Jehovha a nga hi vhuna ngu yona ti to hi mu wona kota Tate wathu wa lirando, ngu tumelela ti to kubhalwa mapswi ni simaho sa Jesu amu ka Bhiblia. (Lera Matewu 11:27.) Jesu a kombisile tifanelo ta Tate wakwe, aha koza e womba tiya: “Awule a ni wonako, a woni Tate.” (Joh. 14:9) Jesu a tshumete e womba-womba ngu ti Jehovha a ti hetisisako kota Tate. Ka mune wa tievhangeli, Jesu a thumisile dipswi “Tate” kona mu ka 165 wa makhambi a txi kombetela ka Jehovha. Ngu kutxani Jesu a di womba-wombile makhambi o tala ngu Jehovha? Txikongomelo ngu ti to vathu votshe va fanete kutsaniseka ti to Jehovha i tate wa lirando.—Joh. 17:25, 26.

7. Hi nga gonda txani ngu Jehovha ka nzila yi a nga ñola ngu yona Mwanana wakwe?

⁷ Wona ati hi nga ti gondako ngu Jehovha ka nzila yi a nga ñola ngu yona Mwanana wakwe Jesu. Mbimo yotshe Jehovha a ti engisa mikombelo ya Jesu. Ene kha yi engisa basi, kambe a yi xamute. (Joh. 11:41, 42) Ti si nga ni mhaka ni sikarato asi Jesu a nga manana naso, ene a pfite lirando ni txivhuno txa Tate wakwe.—Luka 22:42, 43.

8. I ngu nzila yihi Jehovha a nga khatalela ngu yona Jesu?

⁸ Jesu a txi ti ziva to Tate wakwe ngene i ku Txisima txa wutomi mbimo yi a nga khene: ‘Ni hanya ngu ngene.’ (Joh. 6:57) Jesu a ti kholwa ngutu ka Tate wakwe, ni ku Jehovha a ti khatalela silaveko sakwe sa nyama. Txa lisima ngutu, a ti khatalela Jesu ngu didhawa da moya.—Mat. 4:4.

9. Jehovha a ti kombisisile kutxani ka Jesu ti to i Tate wa lirando ni wo khatala?

⁹ Aku Jehovha i ku Tate wa lirando, a tsanisekisile Jesu ti to wa mu seketela. (Mat. 26:53; Joh. 8:16) Hambiku Jehovha a nga mbi vhikela Jesu ka kuxaniseka kotshe, Ene a mu vhunile ti to e tsanisela sikarato. Jesu a ti  tsaniseka to kotshe kuxaniseka nga mbimoanyana. (Vaheb. 12:2) Jehovha a kombisile to a ti khatala ngu Jesu ngu ku mu engisa, ku m’khatalela, ku m’gondisa ni ku m’seketela. (Joh. 5:20; 8:28) He woneni ti to Tate wathu wa nzumani a hi khatalelisa kutxani ngu nzila yi yi fanako.

10. Ngu kuya ngu Masalmo 66:19, 20, Jehovha a ti kombisisa kutxani ti to wa hi randa?

¹⁰ Jehovha wa engisa mikombelo yathu. (Lera Masalmo 66:19, 20.) Ene kha veki mihingano ka mikombelo yathu; kambe wa hi kuzeta kukhongela mbimo yotshe. (1 Vat. 5:17) Hi nga khongela ka Txizimu mbimo yotshe ti si nga ni mhaka ni ti to hi hani. Kha thuki e ñoleka aha koza e tandeka ku hi engisa; kuhambana ni eto, mbimo yotshe a tiemisete ku hi engisela. Mbimo yi hi wonako ti to Jehovha wa engisa mikombelo yathu eto ti hi maha hi mu randa. M’bhali wa masalmo a wombile tiya: “Ni na randa MKOMA, nguko a engisile dipswi da mkombelo wangu.”—Mas. 116:1.

11. Jehovha a xamulisa kutxani mikombelo yathu?

¹¹ Tate wathu kha ngo engisa basi mikombelo yathu, kambe wa yi xamula. Mpostoli Johani wa hi tsanisekisa: “Ngako hi txi txi kombela txo maha, madingano ni kuranda ka Txizimu, txa hi engisa.” (1 Joh. 5:14, 15) Ditshuri ti to Jehovha a nga xamula mikombelo yathu ngu nzila yi hi nga sa yi emela. Ene wa ti ziva ati i ku ta tinene kwathu, se mbimo yimwani xamulo yakwe i nga va nadha, mwendo e lava ku hi rinzela.—2 Vak. 12:7-9.

12-13. Ngu tihi tinzila ati Jehovha a ti thumisako ti to e hi khatalela?

¹² Jehovha wa hi khatalela. Ene a maha ati a lavako to vatate ve ti maha. (1 Tim. 5:8) Wa khatala ngu silaveko sa nyama sa vanana vakwe. Ene kha lavi hi karateka ngu sakudya, siambalo mwendo ko zumba. (Mat. 6:32, 33; 7:11) Kota tate wa lirando, Jehovha wa hi tsanisekisa ti to a na hi khatalela mbimo yi yi tako.

¹³ Txo tsakisa ngutu ngu ti to Jehovha wa khatalela silaveko sathu sa moya. Ka Bhiblia wa hi gela to ngene mani, txikongomelo txakwe, txikongomelo txa wutomi ni ta mbimo yi yi tako. Ene a hi vhuni kugonda ditshuri ngu kuthumisa maxaka mwendo vathu vamwani ti to hi mu ziva. Wa simama e hi vhuna ti to hi va vangana vakwe ngu kuthumisa madhota dibanzani kumweko ni vanathu vamwani ava va nga vitwa ngu didhawa da moya. I si ngeto dwe, Jehovha wa hi gondisa ngu kuthumisa mitshangano ya dibanza, aha hi gondako ngu mwaya wathu wa moya. Ngu kuthumisa tinzila tiya, Jehovha wa kombisa kukhatala kwakwe ngu ngathu.—Mas. 32:8.

14. Ngu kutxani Jehovha a txi hi gondisa? Ngu tihi tinzila ti a ti thumisako?

¹⁴ Jehovha wa hi gondisa. Kuhambana ni Jesu, athu kha ha hetiseka. Ngu toneto, mbimo yi a hi gondisako, Tate wathu wa lirando wa hi kawuka ngako ti txi laveka. Dipswi dakwe da hi khumbuxeta tiya: “Mkoma a kawuka m’thu wu a m’randako.” (Vaheb. 12:6, 7) Jehovha wa hi kawuka ngu tinzila to tala. Ngu txikombiso, hi nga lera to kari ka Bhiblia mwendo kupfa to kari mitshanganoni, se hi wona to hi fanete kumaha kutxitxa. Mbimo yimwani txivhuno txi nga ta ngu ka madhota. Ti si nga ni mhaka ni ti to a hi kawuka ngu nzila yihi, ene a maha toneto ngu ku kuzetwa ngu lirando.—Jer. 30:11.

15. Ngu tihi tinzila ti Jehovha a hi vhikelako ngu tona?

¹⁵ Jehovha wa hi vhuna kuwonisana ni sikarato. Kufana ni tate wa nyama awu a vhunako mwanana wakwe ngu mbimo ya sikarato, Tate  wathu wa nzumani wa hi vhuna. Ene wa hi ninga moya wo sawuleka ti to wu hi vhikela ka ti ti nga dayisako wuxaka wathu ni nene. (Luka 11:13) Jehovha wa hi vhikela kambe ngako hi txi vilela. Ngu txikombiso, ene wa hi ninga themba yo tsakisa. Themba yoneyo ya hi vhuna kuwonisana ni sikarato. Khumbula tiya: Hambi ku txo humelela mhaka yo nemela, Tate wathu wa lirando a na gumisa kotshe kuxaniseka koneko. Sikarato sathu nza mbimoanyana, kambe makatekwa ya Jehovha a no hi ninga nga ha ku si gumiko.—2 Vak. 4:16-18.

16. Kumahekile txani mbimo yi Adhamu a nga mbi engisa Tate wakwe wa lirando?

¹⁶ Hi nga wona lirando la Jehovha hi txi khumbula ati a nga maha mbimo yi Adhamu a nga mbi mu engisa. Mbimo yi Adhamu a nga ndaka mlayo wa Tate wakwe wa nzumani, a luzile wukhalo ka mwaya wo tsakisa wa Jehovha, ene kumweko ni vatukulu vakwe. (Var. 5:12; 7:14) Kambe Jehovha a mahile to kari ti to e vhuna vatukulu va Adhamu.

17. Msana kova Adhamu a di ndakile mlayo, ngu tihi ti Jehovha a nga ti maha koneho?

¹⁷ Jehovha a tsayisile Adhamu, kambe kha leka vatukulu vakwe va si nga ni themba. Koneho a to thembisa to vathu va va engisako va ndi na wuseta mwaya wakwe. (Gen. 3:15; Var. 8:20, 21) Ene a seketete txithembiso txonetxo ka digandelo da Mwanana wakwe wo dhundeka Jesu. Ngu kuningela mwanana wakwe ngu mhaka yathu, Jehovha a kombisile to wa hi randa ngutu.—Joh. 3:16.

18. Hi nga tsanisekisa kutxani ti to Jehovha a lava hi va mwaya wakwe hambi hi di mu henyisile?

¹⁸ Ti si nga ni mhaka ni kwa mbi hetiseka kwathu, Jehovha a lava hi va mwaya wakwe, ni ku kha thuki e wona i di txikarato ku hi vhuna. Ti nga maha hi mu henyisa mwendo kuhuma hanzila, kambe Jehovha mbimo yotshe a  ti emisete ku hi amukela. Jesu a kombisile lirando li Jehovha a ku nalo ngu vanana vakwe ka txikombiso txa mwanana wo mwalala. (Luka 15:11-32) Ka txikombiso txonetxo tate kha nga luza themba ya ti to mwanana wakwe a ndi na tshumela mtini. Mbimo yi mwanana a nga tshumela, tate a mu amukete ngu litsako la hombe. Ngako hi di hambanile ni Jehovha kambe hi ti sola, hi nga tsaniseka to Tate wathu wa nzumani a tiemisete ku hi amukela.

19. Jehovha a na lulamisisa kutxani sikarato asi si nga vangwa ngu Adhamu?

¹⁹ Tate wathu wa lirando a na lulamisa sotshe sikarato asi si nga vangwa ngu Adhamu. Msana kova Adhamu a di ndakile mlayo, Jehovha a sungile kusawula ha mafuni 144.000 wa vathu ava va no fuma kota vakoma ni vaphaxeli khe nzumani kumweko ni Mwanana wakwe. Jesu ni vafumi kulowe va na vhuna vathu va va engisako ti to ve va vo hetiseka ka mafu a maphya. Msana kova va di pindile ka txiduko txo gwita, Txizimu txi na va ninga wutomi wo mbi guma. Tate wathu a na va ni litsako lo wona mafu ma di tate ngu vanana vakwe vo hetiseka. Eyo i nava mbimo yo tsakisa ngutu!

20. Ngu tihi tinzila ati Jehovha a nga kombisa ngu tona to wa hi dhunda ngutu? Ka msungo wu wu londiselako hi na ta gonda ngu txani?

²⁰ Jehovha se a kombisile to wa hi dhunda ngutu. Ene i Tate wamnene ngutu. Ene wa engisa mikombelo yathu ni ku wa hi khatalela ngu didhawa da nyama ni da moya. Wa hi gondisa ni ku hi vhuna. Wa hi ninga themba yo tsakisa. Ta hi tsakisa ngutu kuziva to Tate wathu wa hi randa ni ku wa khatala ngu ngathu! Ka msungo wu wu londiselako hi na ta wona to athu vanana vakwe hi nga kombisisa kutxani kubonga lirando lakwe.