1-2. Ngu sihi siemo si vathu va Jehovha va wonisanako naso? Ngu yihi wuyelo ya kona?

WONA sikombiso siya sa siraru: Mwanathu wu i ku ngadi mphya a getwe ngu dhokodhela ti to a ni malwati o karata kuthumwa. Mwanathu wu a nga kula ngu tanga, a hingilwe mthumoni, hambiku a mahako yotshe mizamo, kha wu mani wumwani. Mwanathu wo thembeka wa txisikati awu a nga kumba, kha swi e sikota kumaha to kari a ti a nga ti maha kale ka mthumo wa Jehovha.

² Ngako u txi wonisana ni sikarato so fana ni si si nga wombwa, ti nga maha u tipfa u si nga wa txilo. Siemo soneso si nga kutekela litsako, si kumaha u si ti ningi lisima ni kukhulumetela wungana wako ni vamwani.

3. Sathani ni va va kongomiswako ngu ngene va wu wonisa kutxani wutomi?

³ Mafu awa ma ni mawonelo a Sathani ngu wutomi. Sathani mbimo yotshe a teka vathu i si nga va txilo. Ngu nzila ya tshofu a gete Evha ti to a nga va ni mkhululeko hambi a si engisi Txizimu, hambiku a nga ti ti ziva to kumaha toneto a ndi nava ni wuyelo ya lifo. Sathani ngene a wonelelako timhaka ta mabhindu, politika ni wukhongeli wa mafu awa. Se kha ti hi xamalisi hi txi wona va nyamabhindu, vathangeli va politika ni va wukhongeli va si khatali ngu vathu ni matipfelo awe.

4. Hi na bhula ngu txani ka gondo yiya?

⁴ Ngu didhawa dimwani, Jehovha a lava hi ti ninga lisima hipuni, a tshumela e hi vhuna mbimo yi hi mananako ni siemo  si si nga hi mahako hi ti wona hi si vhuni txilo. (Mas. 136:23; Var. 12:3) Gondo yiya yi na womba-womba ngu nzila yi Jehovha a nga hi vhunako ngu yona ka siemo si si londiselako: 1) Hi txi wonisana ni malwati, 2) hi txi wonisana ni txikarato txa timale ni mbimo yi 3) kukumba ku hi mahako hi wona nga kha hi nge mahi txilo ka mthumo wa Jehovha. Kambe kukhata hi na wona to ngu kutxani hi nga tsanisekako ti to mmweyo ni mmweyo wathu mbwa lisima ka Jehovha.

5. Nji txani txi kombisako ti to hi va lisima ka Jehovha?

⁵ Hambiku hi nga vangwa ngu lithuli la mafu, athu hi va lisima ngutu kupinda lithuli. (Gen. 2:7) Wona simwani sa sivangelo asi si kombisako to hi va lisima ka Jehovha. Ene a mahile vathu va di ni wusikoti wo kombisa tifanelo takwe, ngu kumaha toneto a hi vekile ka txiemo txo guleka ngutu. (Gen. 1:27) A hi mahile hi va txitimwi ka sotshe sivangwa sa ha mafuni, a tshumete e hi ninga lungelo yo khatalela mafu ni sihari.—Mas. 8:4-8.

6. Ngu sihi sivangelo simwani si hi mahako hi wona to Jehovha wa ninga lisima vathu va kwa mbi hetiseka?

⁶ Hambi msana ka kuva Adhamu a di onhile, Jehovha a simamile e ninga lisima vathu. A hi randile aha koza e ningela ngu mwanana wakwe wo dhundeka ngutu ti to e ta tirula sionho sathu. (1 Joh. 4:9, 10) Ngu kuthumisa mtirulo, Jehovha a na wusa vale va nga fa ngu kona ha ka txionho txa Adhamu, “vo lulama ni va kwa mbi lulama.” (Mith. 24:15) Dipswi da Jehovha di ti veka hakubasani ti to hi va lisima kwakwe ti si nga ni mhaka ni malwati, siemo sa timale mwendo kukumba.—Mith. 10:34, 35.

7. Ngu txihi txivangelo tximwani atxi txi mahako malanda a Txizimu me tsaniseka ti to Jehovha wa ma ninga lisima?

⁷ Hi ni sivangelo simwani sa ti to hi va lisima ka Jehovha. A hi tshuketisile kwakwe, e tshumela e wonisisa kwati nzila yi hi nga angula ngu yona ka mahungu a manene. (Joh. 6:44) Mbimo yi hi nga khata kutshuketa kwakwe, nene a tshuketile kwathu. (Jak. 4:8) Kasiku e hi komba ti to hi va lisima kwakwe, Jehovha a tshumela e tiha mbimo yo hi gondisa. Ene wa wu ziva wunene wu hi kunawo konku, ni ku wa ti ziva ati hi no ta zumbisa tona mbimo yi yi tako. Ene wa hi kawuka nguko wa hi dhunda. (Mav. 3:11, 12) Ngu ditshuri Jehovha wa hi ninga lisima!

8. Mapswi ya ma ku ka Masalmo 18:27-29, ma yi gwesisa kutxani nzila yi hi wonako ngu yona sikarato sathu?

⁸ Hambiku vamwani va nga ti wona Mkoma Dhavhidha kota txipumbo, kambe ene a ti ti ziva to Jehovha a ti mseketela. Mapimo onewo ma mahile Dhavhidha e kota kuwonisana kwati ni txiemo txi a nga ti ka txona. (2 Sam. 16:5-7) Ngako hi txi tipfa hi si vhuni txilo mwendo hi txi wonisana ni sikarato, Jehovha a nga hi vhuna ti to hi wonisana naso ngu nzila ya yinene. (Lera Masalmo 18:27-29.) Ngako hi txi vhunwa ngu Jehovha, txi walo txi ngo hi tsivela ku mthumela hi di tsakile. (Var. 8:31) Konkuwa he woneni siemo siraru aha ti lavako hi khumbula to Jehovha wa hi ninga lisima.

9. Malwati ma nga hi gwesisa kutxani?

⁹ Malwati ma nga gwesa mialakanyo yathu me tshumela me hi maha hi ti wona nga kha hi swi hi vhuna txilo. Hi nga tshumela hi va ni dikhodho mbimo yi vathu va wonako  kutandeka kwathu. Hambi vamwani va si ti zivi to ha lwala, hi nga lwisana ni matipfelo a tingana ngu kuwona to se kha hi swi hi maha ati hi nga ti maha kale. Ka timbimo toneto, Jehovha wa hi tsanisa. Ngu nzila yihi?

10. Ngu kuya ngu Mavingu 12:25, nji txani txi nga hi vhunako mbimo yi hi lwalako?

¹⁰ Ngako hi txi lwala “mapswi a manene” ma nga hi tsanisa. (Lera Mavingu 12:25.) Ka Bhiblia, Jehovha a vekile mapswi o tshura aya ma hi khumbuxetako to hi va lisima kwakwe ti si nga ni mhaka ni malwati. (Mas. 31:19; 41:3) Ngako hi txo lera Bhiblia ngu wuyeletela, Jehovha a na hi vhuna hi wonisana ni kukarateka ngu mhaka ya kulwala.

11. Mwanathu mmwani a txi wonisile kutxani txivhuno txa Jehovha?

¹¹ Wona txikombiso txa Jorge. Mbimo yi Jorge i nga ti mphya, ene a ma ni malwati aya ma nga mheta mtamo, e tipfa a si vhuni txilo. Ene a womba tiya: “Ni sa tiemisela kuwonisana ni matipfelo ni ti vathu va ndi no ni wonisa tona ngu mhaka ya malwati. Mbimo yi ni nga wona to malwati ma ti ni heta mtamo ni alakanyile ngu ti wutomi wangu wu ndi no txitxisa tona. Ni ti karatekile ngutu, se ni kombete txivhuno ka Jehovha.” Jehovha a m’vhunisile kutxani? “Aku ni nga ti ni txikarato txo vekisa mapimo angu, va ti ni kuzeta kulera Bhiblia ngu mpimo wa wudotho, ka Masalmo aya ma kombisako ati Jehovha a ti pfisako tona ngu malanda akwe. Ni ti lera tindimana tiya ta tidotho otshe masiku, ni mani mapswi aya ma nga ti ni thavelela ngutu. Ngu mbimo, vathu vamwani va woni to se ni ti zumba ni di tsakile. Va tshumete ve womba to mawonelo angu a manene ma va tsanisa. Ni ti woni to  Jehovha a ti xamula mikombelo yangu! Ene a ni vhuni kutxitxa ati ni nga ti tiwonisa tona. Ni khatile kuveka mapimo ka ti Dipswi dakwe di wombako to a ni wonisa tona ti si nga ni mhaka ni malwati angu.”

12. Mbimo yi u wonisanako ni malwati, u nga maha txani ti to u wona txivhuno txa Jehovha?

¹² Ngako u txi wonisana ni malwati, tsaniseka to Jehovha wa txi ziva txikarato txako. Mkombele ti to e kuvhuna kasi ku u va ni mawonelo a manene ngu ngawe upune. Ngu msana, lera mapswi aya Jehovha a nga ma bhala mu ka Bhiblia aya ma tsanisako. Veka mapimo aku amu ka tindimana ati ti kombisako nzila yi Jehovha a tipfako ngu yona ngu malanda akwe. Mbimo yi u mahako toneto, u na wona to Jehovha wa kombisa wunene ka votshe va va mthumelako va di thembekile.—Mas. 84:11.

13. Msungo wa mwaya wu nga tipfisa kutxani ngako wu txi hingwa mthumoni?

¹³ Yotshe misungo ya timwaya yi lava kukhatalela silaveko sa mwaya. Kambe alakanya ngu mwanathu wu a nga hingwa mthumoni na a sa onha txilo. Ene wa zama ngu tinzila totshe ti to e mana mthumo wumwani, kambe kha ti koteki. Aku a ku ka txiemo txiya, a nga khata ku tipfa a si vhuni txilo. Kuveka mapimo akwe ka sithembiso sa Jehovha ti nga m’vhunisa kutxani?

14. Ngu sihi sivangelo si si mahako Jehovha e hetisisa sithembiso sakwe?

¹⁴ Jehovha mbimo yotshe wa hetisisa sithembiso sakwe. (Jox. 21:45; 23:14) Ene a maha toneto ngu sivangelo so tala. Txo khata ngu ti to ti gwesa ditina dakwe. Jehovha a wombile to a na khatalela malanda akwe, se kha nge leki kumaha toneto. (Mas. 31:1-3)  Tximwani ngu ti to ene wa tiziva to hi ndina karateka ngako asi khataleli ava va mahako txienge txa mwaya wakwe. Ene a hi thembisa to a na khatalela silaveko sathu sa nyama ni sa moya, txi walo txi txi nga mu tsivelako kumaha toneto!—Mat. 6:30-33; 24:45.

15. a) Ngu txihi txikarato txi Makristu a dilembe dizana do khata ma nga manana natxo? b) Ngu txihi txitsaniso atxi hi txi manako ka Masalmo 37:18, 19?

¹⁵ Ngako hi txi khumbula sithembiso sa Jehovha, hi nga sikota kuwonisana ni sikarato sa timale ngu nzila ya yinene. Wona txikombiso txa Makristu a dilembe dizana do khata. Mbimo yi ku nga khata kuwukelwa dibanza da Jerusalema, “votshe, hahanze ka Vapostoli, va to hangalaka.” (Mith. 8:1) Wona to eto ti txi pata txani. Txikarato txa timale! Makristu ma luzile miti yawe, mithumo ni mabhindo. Kambe Jehovha kha va leka mpfhukani; nem kha va luza litsako lawe. (Mith. 8:4; Vaheb. 13:5, 6; Jak. 1:2, 3) Jehovha a khatalete Makristu ale o thembeka, se nathu a na hi seketela.—Lera Masalmo 37:18, 19.

16. Ngu txihi txiemo txi txi nga hi mahako hi ti wona nga mthumo wathu ka Jehovha hi nga wa lisima?

¹⁶ Mbimo yi hi kumbako, hi nga khata ku tipfa nga kha hi nge mahi to tala ka mthumo wa Jehovha. Mkoma Dhavhidha ti nga maha a di tipfisile toneto mbimo yi a nga txi kumba. (Mas. 71:9) Jehovha a nga hi vhunisa kutxani?

17. Hi nga gonda txani ka mhaka ya mwanathu Jerhi?

¹⁷ Wona mhaka ya mwanathu wa txisikati Jerhi. Ene a ti rambilwe kuya gonda mthumo wo lungisa Tinyumba ta Mfumo, kambe a si ti lavi kutsula. Ene a womba tiya: “Se ni kumbile, ni noni, kha ni zivi kumaha txilo  atxi txi nga vhunako. Kha ni vhuni txilo.” Ka wusiku wu mangwana ka kona a nga ti fanete kutsula, a khongete ngutu ka Jehovha. Se mangwana ka kona, mbimo yi a nga hoka ka Nyumba ya Mfumo, ene atxi ti sola ngu kuva adi tsute. Mbimo yi mtshangano wu nga txi tsimbila, m’wombawombi a junyatisile to txa lisima ngutu kwathu ngu tiemisela kugondiswa ngu Jehovha. Jerhi a womba tiya: “Ni to pimisa, ni txi, ‘ewo wusikoti ni nawo!’ Se ni to khata kudila aku ni nga wona to Jehovha a ti ko xamula mkombelo wangu. Ene a ti ko ni tsanisekisa to ni nga vhuneta ka mthumo wakwe ni ku a ti tiemisete ku ni gondisa!” A txi wona msana Jerhi a womba tiya: “Ni tsute ka mtshangano wonewo ni di karatekile ni kutipfa ni si vhuni txilo. Kambe ni tshumete ni di tsakile, ni di tsani ni kuwona to ni wa lisima!”

18. Bhiblia yi ti kombisisa kutxani to Jehovha wa ninga lisima mthumo wathu hambi hi txi kumba?

¹⁸ Hambi hi txi kumba, hi nga tsaniseka to Jehovha a nga simama e hi thumisa. (Mas. 92:12-15) Jesu a hi gondisile to ku si nga ni mhaka ni wusikoti wathu, mtamo wathu, Jehovha mbimo yotshe wa ninga lisima ati hi tikotako kumaha. (Luka 21:2-4) Veka mapimo ako ka ti u ti kotako kumaha. Ngu txikombiso, u nga womba-womba ngu Jehovha, u nga kombelela vanathu ni kutsanisa vamwani ti to ve simama va di thembekile. Jehovha a kuwona u di mthumi kulowe wakwe, i singa ngu mhaka ya ti u ti mahako, kambe ngu mhaka ya kutiemisela ku mu engisa.—1 Vak. 3:5-9.

19. Varoma 8:38, 39, yi hi vhuna kukholwa ti to txani?

¹⁹ I lungelo ya hombe ngutu kukhozela Jehovha, Txizimu atxi txi ningako lisima ava va txi thumelako! Ene a hi mahete ti to hi maha kudhunda kwakwe, ni ku wukhozeli wa ditshuri ngu wona wu mahako wutomi wathu wu va ni txikongomelo. (Mtu. 4:11) Hambi mafu awa ma txi hi wona hi si vhuni txilo, Kambe Jehovha kha hi woni ngu nzila yoneyo. (Vaheb. 11:16, 38) Mbimo yi hi tipfako hi di ni dikhodho ngu mhaka ya malwati, sikarato sa timale mwendo kukumba, he khumbuleni to kha ku na txi txi nga hi hambanisako ni lirando la Tate wathu wa nzumani.—Lera Varoma 8:38, 39.