1. Ngu tihi ti Jehovha a nga profeta ngu masiku athu?

JEHOVHA a profetile mayelano ni masiku athu atxi: “Digumi da vavamna, va totshe tidimi ta matiko, ve ñola ha ka mrungo wa txyambalo txa M’judha, va txi kha vona: Hi na tsula ni nanu, nguko ha tolovela kupfa taku,Txizimu txi ni nanu.” (Zak. 8:23) “M’judha” ahawa a emela ava Txizimu txi nga va sawula ngu moya wo sawuleka. Vona va dhanwa kambe to i “Israyeli wa Txizimu.” (Vag. 6:16) Kasi “digumi da vavamna” di emela ava va ku ni themba yo hanya kona ha mafuni hawa. Vona va ti ziva to Jehovha ngene a nga sawula mtxawa wa vasawuleki, ni ku va ti teka i di lungelo kuthumela navo Jehovha.

2. “Digumi da vavamna” di “tsula ni” vasawuleki ngu nzila yihi?

² Hambiku nyamsi ti si kotekiko kuziva ditina da msawuleki mmweyo ni mmweyo ha mafuni, * ava va ku ni themba yo hanya ha mafuni va nga “tsula ni” vasawuleki. Ngu nzila yihi? Bhiblia yi womba to “digumi da vavamna” va ndi na “ñola ha ka mrungo wa txyambalo txa M’judha, va txi kha vona: ‘Hi na tsula ni nanu, nguko ha tolovela kupfa taku,Txizimu txi ni nanu.’” Ndimana yiya yi womba-womba ngu M’judha mmweyo. Kambe aku va nga “nanu” ti kombetela ka m’thu wo pinda mmweyo. Ati ti kombisa ti to M’judha wuwa kha kuwombwi  m’thu mmweyo, kambe a emela mtxawa wotshe wa vasawuleki. Ava va nga mbi sawulwa va thumela kumweko Jehovha ni va va nga sawulwa. Hambi keto kha va ñoli vasawuleki kota vathangeli nguko va tiziva ti to Jesu ngene i ku Mthangeli wawe.—Mat. 23:10.

3. Ngu sihi siwotiso asi hi no xamula ka gondo yiya?

³ Aku vamwani ava va va nga sawulwa va hanyako kona ha mafuni hawa, ti nga maha hi ti wotisa siwotiso siya: 1) Vasawuleki va fanete ku ti wona ngu nzila yihi? 2) Ava va dyako sifanekiselo ngu ditshiku da txialakanyiso, hi fanete ku va ñola ngu nzila yihi? 3) Ngako mtengo wa va va wombako to va sawutwe wu txi engeteleka, ina hi fanete kukarateka ngu mhaka yoneyo? Gondo yiya yi na xamula siwotiso soneso.

4. Ngu txihi txialakanyiso txi txi manekako ka 1 Vakorinto 11:27-29 atxi vasawuleki va fanelako kualakanyisisa kwati ngu txona?

⁴ Vasawuleki va fanete kualakanyisisa kwati ngu txialakanyiso txi txi manekako ka 1 Vakorinto 11:27-29. (Lera.) I ngu nzila yihi msawuleki a nga dyako sifanekiselo  “na a si nga ni fanelo” ka Txialakanyiso? A nga maha toneto ngako a txo dya sifanekiselo na a si hanyi ngu milayo ya Txizimu. (Vaheb. 6:4-6; 10:26-29) Vasawuleki va ti ziva to va fanete kusimama va di thembekile ngako va txi lava ‘kuya mana txhatxhazelo ya kuxula ayi va dhanelwako yona nzumani ngu Txizimu, ditinani ka Kristu Jesu.’—Vaf. 3:13-16.

5. Vasawuleki va fanete ku tipfa ngu nzila yihi?

⁵ Moya wo sawuleka wa Jehovha wu vhuna malanda akwe ti to me va ni moya wo thutha, i si nga wo tiguleta. (Vaef. 4:1-3; Vakl. 3:10, 12) Ngu toneto, vasawuleki kha va tipfi i di va tshuko kupinda vamwani. Vona va ti ziva to hi nga ti to Jehovha o va ninga moya wo sawuleka kupinda malanda mamwani. Vona kha va tipfi va txi pfisisa Mibhalo kupinda vamwani. Ni ku kha va nge thuki ve gela m’thu mmwani ti to a sawutwe se a fanete kudya sifanekiselo. Kuhambana ni eto, ngu ku ti veka hahatshi vona va ti ziva to ova Jehovha basi awu a sawulako ava va no ya hanya nzumani.

6. Ngu kuya ngu 1 Vakorinto 4:7, 8, ngu tihi ti vasawuleki va ti ñolisako tona?

⁶ Hambiku vasawuleki va wonako i di lungelo ya hombe kuva va di sawutwe, kambe kha va emeli ti to ve ñolwa ngu nzila yo sawuleka. (Vaf. 2:2, 3) Ni ku va ti ziva to mbimo yi Jehovha a nga va sawula kha gela m’thu mmwani. Ngu toneto vona kha va xamali ngako m’thu a si kholwi to va sawutwe. Va ti ziva kambe to Bhiblia yi kha ha fanela kututumela kukholwa ava va ti gelako to va ningilwe txiavelo txo sawuleka. (Mtu. 2:2) Ngu kuva va si lavi nduma, vona kha va geleteli vathu va va ku ngadi kuva ziva to vona mbasawuleki. Ni ku kha va tiguleti ngu mhaka ya lungelo yawe.—Lera 1 Vakorinto 4:7, 8.

7. Ngu tihi ti vasawuleki va vayilelako ku ti maha? Ngu kutxani?

⁷ Vasawuleki kha va tipfi nga va fanete kuzumba basi ni va i ku vasawuleki ni vona, nga ova mtxawa wo kari wo sawuleka. Vona kha xoleteli vasawuleki kasi kubhula ngu ti va nga sawuliswa tona ni kumaha mtxawa wo gonda Bhiblia. (Vag. 1:15-17) Dibanza di si na kuva ni wumwewo ngako vasawuleki vo txo maha tiya. Vona va ndina nava va txi maha to hambana ni moya wo sawuleka, awu wu va vhunako ti to ve va ni kudikha ni wumwewo.—Var. 16:17, 18.

8. Ngu kutxani hi di fanete ku ti wonela ka nzila yi hi ñolako ngu yona vasawuleki? (Wona ni txhamuselo ya hahatshi.)

⁸ Hi fanete ku va ñola ngu nzila yihi vasawuleki? Ti ndi nava ti di bihile ngutu hi txo dhumisa m’thu hambi i di m’thu wu a nga sawulwa. (Mat. 23:8-12) Mbimo yi Bhiblia yi womba-wombako ngu madhota yi hi kuzeta to hi “londetela likholo lawe,” kambe kha yi hi geli to hi maha m’thu wo kari eva m’thangeli wathu. (Vaheb. 13:7) Ditshuri ti to Bhiblia yi womba to vathu vamwani va fanetwe nguko “xoniphwa kambidi.” Kambe ngu mhaka ya ku va “tsimbitisako tatinene” mthumo ni ku va “thumelako kutxhumayela dipswi ni kugondisa.” (1 Tim. 5:17, Tradução do Novo Mundo) Ngako hi txo nõla vasawuleki ngu nzila yo sawuleka hi na va thela tingana. * To pinda eto, hi nga va maha ve ti guleta. (Var. 12:3) Kha ngaho ni wamweyo wathu a tsakelako to msawuleki e maha txionho etxo txa hombe!—Luka 17:2.

9. Hi nga kombisisa kutxani to ha va xonipha vasawuleki?

⁹ Hi nga kombisisa kutxani to ha va xonipha ava va nga sawulwa ngu Jehovha? Ngu kwa mbi va wotisa to va sawulisilwe kutxani. Eyo i mhaka ya m’thu ni Jehovha, kha hi nga ni fanelo yo yi ziva. (1 Vat. 4:11; 2 Vat. 3:11) Ni ku kha ha fanela kuwona nga msikati, mwamna, vaveleki mwendo siro simwani sa mwaya wawe ni sona si sawutwe. M’thu kha mani lungelo yo ya nzumani ngu mhaka ya mwaya wakwe. A yi mana ka Jehovha. (1 Vat. 2:12) Hi fanete kuvayilela kumaha siwotiso si si nga henyisako vamwani. Ngu txikombiso, kha ha fanela kuwotisa msikati wa mwanathu wu a nga sawulwa to a ti pfisa kutxani ngu kuziva to a ni themba yo hanya ha mafuni ngu ha ku si gumiko na a si nga ni mwamna wakwe. Kambe hi fanete kuziva to ka mafu a maphya, Jehovha a na “ninga sotshe si si lavekako ka votshe vale va hanyako.”—Mas. 145:16.

10. Hi na va hi txo tivhikela ngu nzila yihi mbimo yi hi vayilelako kuñola vathu ngu nzila yo sawuleka?

¹⁰ Ngako hi si ñoli vasawuleki ngu nzila yo sawuleka, hi na va hi txo ti vhikela nathu. Ngu nzila yihi? Nguko Bhiblia yi hi gela to vasawuleki vamwani va nambi simama va di thembekile. (Mat. 25:10-12; 2 Pedro 2:20, 21) Kambe ngako hi txi vayilela kuñola vathu ngu nzila yo sawuleka, kha hi na mbi thuka hi ñola vasawuleki mwendo vamwani va va ziwako ngutu ava va thumelako Jehovha malembe o tala. Se hambi va txo thuka ve leka kuthumela Jehovha ni dibanza, kha hi na mbi leka likholo lathu li moroka mwendo hi ema kuthumela Jehovha.

11. Ngu tihi ti ti mahekako ngu mtengo wa va va dyako sifanekiselo ka Txialakanyiso?

¹¹ Kudingana malembe o tala mtengo wa va va dyako sifanekiselo ka Txialakanyiso wu ti hunguteka. Kambe ka malembe awa o gwita, mtengo wo ya wu txi engeteleka. Ina hi fanete kukarateka ngu toneto? Nadha. He woneni to ngu kutxani.

12. Ngu kutxani hi sa fanela kukarateka ngu mtengo wa va va dyako sifanekiselo ka Txialakanyiso?

¹² “Mkoma wa va ziva ava va m’lumbako.” (2 Tim. 2:19) Kuhambana ni Jehovha,  vanathu va va balako mtengo wa va va dyako sifanekiselo ka Txialakanyiso, kha va ti zivi to i mani ngu ditshuri i ku msawuleki. Ngu toneto mtengo wu pata ni va va pimisako to va sawutwe na ngu ditshuri va sa sawulwa. Ngu txikombiso, vamwani va va nga ti dya sifanekiselo se va emile. Vamwani ti nga maha va di ni sikarato sa mialakanyo, asi si va mahako ve kholwa to va na fuma kumweko ni Kristu nzumani. Ti ha kubasani ti to kha hi wu zivi ngu kukongoma mtengo wa vasawuleki va va ku ha mafuni.

13. Bhiblia yi womba to ku nava ni vasawuleki va ngahi ha mafuni na ku si se khata xanisa ya hombe?

¹³ Ku na va ku di ni vasawuleki ka makhalo o tala ha mafuni kotshe mbimo yi Jesu a nota va teka veya nzumani. (Mat. 24:31) Bhiblia yi womba to ka masiku a magwito ku na va ni mtengo wa wudotho wa vasawuleki ha mafuni. (Mtu. 12:17) Kambe kha yi wombi mtengo wa va va no va va di ha mafuni ku si se khata xanisa ya hombe.

14. Nga ha ti nga kombiswa ngu kona ka Varoma 9:11, 16, ngu tihi ti hi fanelako ku ti khumbula mayelano ni kusawulwa ka vasawuleki?

¹⁴ Jehovha ngene a sungako mbimo yi a no sawula m’thu ngu yona. (Var. 8:28-30) Jehovha a khatile kusawula vasawuleki msana kova Jesu adi wusilwe. Ti ti komba nga ka dilembe dizana do khata, otshe Makristu i ti vasawuleki. Ngu kutsimbila ka mbimo, wungi va va va nga ti tiwomba to Makristu va si londeti Kristu. Hambi keto, Jehovha a simamile e sawula mtengo wa wudotho wa va i nga ti Makristu a ditshuri. Va txi fana ni fulaho yi Jesu a nga khene yi ndi na kula ni nyasavari. (Mat. 13:24-30) Ni masiku a nyamsi, Jehovha wa simama e sawula ava va no maha  mtxawa wa 144.000. * Se hambi Txizimu txi txo sawula va va no maha mtxawa wuwa ku si se hoka magwito, kha ha fanela kukanakana wuzivi wa txona. (Lera Varoma 9:11, 16.) * Hi fanete ku ti wonela ti to hi si mahi nga sithumi sa txikombiso txa Jesu. Sona si ngura-ngurile ngu nzila yi nyamne wa thembwe a nga ñola ngu yona vathumi vale va nga bwaka ngu mbimo yo gwita.—Mat. 20:8-15.

15. Ina votshe vasawuleki va maha txienge txa ‘txithumi txo thembeka na txi ni ni wutxhari’ atxi txi nga kombiswa ka Matewu 24:45-47? Txhamusela.

¹⁵ Hi nga votshe va va ku ni themba yo ya hanya nzumani va mahako txienge txa ‘txithumi txo thembeka na txi di ni wutxhari.’ (Lera Matewu 24:45-47.) Kufana ni ka dilembe dizana do khata, Jehovha ni Jesu va simama ve thumisa mtengo wa wudotho wa vanathu ti to ve kongomisa ni kugondisa vathu vo tala. Ngu dilembe dizana do khata i ti kova Makristu o kari basi aya ma nga ti thumiswa ti to me bhala Mibhalo ya Wukristu ya Txigriki. Ni nyamsi ova vasawuleki va vadotho ava va thumiswako ti to ve “phamela sakudya ngu txikhati txi txi fanelako.”

16. Ngu tihi ti u nga ti gonda ka msungo wuwa?

¹⁶ Ngu tihi ti hi nga ti gonda ka msungo wuwa? Jehovha a sungile kuninga wutomi wo mbi guma vathu vo tala ha mafuni, ni kusawula vathu va vadotho ti to veya hanya nzumani. Jehovha a na ninga hakelo otshe malanda akwe; M’judha kumweko ni “digumi da vavamna,” ni ku a lava to votshe ve engisa milayo yo fana ni kusimama va di thembekile. Votshe va fanete ku ti veka hahatshi. Va fanete ku mu thumela va di ni wumwevo. Votshe va fanete kumaha mizamo ti to ve seketela wumwewo ni kurula dibanzani. Aku magwito a mafu awa ma yako ma txi tshuketela, he simameni hi thumela Jehovha hi txi londisela Kristu kota “mtxhambi wumwewo.”—Joh. 10:16.