DILEMBE di di nga guma vanathu vo tala va ve ni lungelo yo va madhota ni malanda a wuthumeli. Se ngako u di mmweyo wawe, ngu ditshuri u tsakile ngutu ngu wutixamuleli wuwa wa wuphya.

Ti nga maha se u txi karateka, eto ti tolovelekile. Jason, mphya wu i ku didhota a khene: “Mbimo yi ni nga ti ngadi kusawulwa kota didhota ni ti pfite ni ti rwate wutixamuleli wa hombe ngutu.” Mosi ni Jeremiya va ti pfite va si nga ni wusikoti mbimo yi va nga ningwa siavelo sa siphya ngu Jehovha. (Eksodha 4:10; Jeremiya 1:6) Ngako u txi ti pfisa toneto, u nga maha txani ti to u kulisa kuthemba kwako ni kusimama u kula ka txiavelo txako? U nga gonda to tala ka txikombiso txa Timoti.​—Mithumo 16:1-3.

Ti nga maha Timoti a ti ni kona mu ka 20 wa malembe mbimo yi a nga khata kutsimbila ni mpostoli Paulo. Mbimo yi a nga rambwa ti nga maha a di ti pfite asi faneleki kugondisa ni ku ninga sileletelo vamwani, nguko i nga ti ngadi mfana. (1 Timoti 4:11, 12; 2 Timoti 1:1, 2, 7) Kambe a simamile e kula ngu didhawa da moya, ku di pindile 10 wa malembe Paulo a bhalete Vafilipiya a txi khene: “Na themba ngu ka Mkoma Jesu ti to ni na mi rumela Timoti.” Ngu kutxani Paulo a di ti pfisile toneto? A tshumete a txi khene: “Nguko kha ni nga ni mmwani m’thu wa mbilu ya kufana ni yangu [yakwe, NM].”​—Vafilipiya 2:19, 20.

Ngu kutxani Timoti i di txikombiso txa txinene ka madhota? Xolisisa 6 wa sivangelo.

1. Ene a txi khatala ngutu ngu vathu. Paulo a gete vanathu va khe Filipiya ti to Timoti a ndina va “khatalela.” (Vafilipiya 2:20) Timoti a txi lava ti to vanathu ve randa Jehovha, ni ku a di ti emisete kuningela ngu mbimo ni mtamo wakwe ti to e va vhuna.

William, a ku ni malembe ya ma pindako 20 i di didhota, a tolovela kugela madhota a maphya a txi khene: “Randa vanathu. Khatalela silaveko sawe i si nga kuningela siavelo dwe.” U nga fane ni mpeki wa xapa awu a khatalako ngu kuhoka ngu mbimo txititxhini a si na mhaka ni kuteka vathu.

2. Ene a thangetisile mthumo wa Jehovha. Paulo a ti khene Timoti a ti hambanile ni vale va nga ti “khatalela wutomi wawe, i si nga timhaka ta Jesu Kristu.” (Vafilipiya 2:21) Paulo a ti ti woni ti to makristu mamwani ma ti khatalela wutomi wawe dwe. Mbimo yimwani va txi thangetisa silaveko sawe i si nga kuthumela Jehovha. Kambe Timoti a ti hambanile navo! Se ngako a di mani mkhanjo wo andisa mthumo wakwe ka Jehovha a wombile kufana ni Isaya awu a nga khene: “Ngani wuwa, ni rume ani!”​—Isaya 6:8.

U nga ti kotisa kutxani ku dinganisela ti to u khatalela silaveko sako ni sa dibanza? Txo khata, engisa txileletelo txa Paulo: ‘Sawula ati i ku ta tinene ngutu.’ (Vafilipiya 1:10) Thangetisa mthumo wa Jehovha. Txa wumbidi, vayilela mithumo yi yi nga ku tekelako mbimo ni mtamo. Paulo a gete Timoti a txi khene: “Vayilela minavelo yo biha ya vavaphya. Tsimbila ngu nzila yo lulama, ya likholo, ya lirando, ya kudikha.”​—2 Timoti 2:22.

3. Ene a txi thuma ngu kuhiseka ka mthumo wa Jehovha. Paulo a wombile tiya ngu Timoti: “Ene, nga mwanana wu a thumisanako ni tate wakwe, a thumile kumweko ni nani ka mthumo wa Evhangeli.”  (Vafilipiya 2:22) Timoti i si nga mkara. A thumile kumweko ni Paulo ni ku eto ti tsanisile wungana wawe.

Nyamsi, ka sengeletano ya Jehovha ku ni mithumo ya yingi. Mithumo yiya ya tsakisa ngutu ni ku yi na kuvhuna ku va hafuhi ni vanathu. Ngu toneto, tsaniseka ti to wa ‘khutala u ya masoni ka mthumo wa Mkoma.’​—1 Vakorinto 15:58.

4. Ene a thumisile ati a nga ti gonda. Paulo a bhalete Timoti a txi khene: “Awe u ni londisete ngu hafuhi amu ka kugondisa, amu ka mahanyelo, amu ka makungo, amu ka likholo, amu ka lihoniselo, amu ka lirando, amu ka kutimisela.” (2 Timoti 3:10) Timoti a thumisile ati a nga ti gonda, ngu toneto amukete wutixamuleli wa hombe.​—1 Vakorinto 4:17.

Ina u nga sawula didhotha dimwedo ti to di va txikombiso txako? Tom, awu i ku kale i di didhota, a khene didhota dimwani di di ku ni wusikoti di ti mu khatalela ni ku mu gondisa. Ene a womba tiya: “Mbimo yotshe ni txi kombela txivhuno ni tshumela ni txi thumisa. Eto ti mahile ti to ni va ni themba.”

5. Ene a txi ti gondisa. Paulo a gete Timoti a txi khene: “Ti tolovete wukhongeli.” (1 Timoti 4:7) Hambiku mkhaveli wa bhola aku ni mgondisi, eto kha ta enela, ti lava eti gondisa apune. Paulo a kuzetile Timoti a txi khene: “Na u txi verela kubwaka kwangu, ti ningetele amu ka kugonda dibhuku, amu ka kulaya, amu ka kugondisa. . . . Atiya ngu tona u fanelako ku ti veketa hakhana. Atiya ngu tona u fanelako kutsanisela ka tona. U txi hanyisa tiya, kukula kwako ka mithumo ya yinene ku na ti komba ka votshe.”​—1 Timoti 4:13-15.

Nawe u fanete u simama u kulisa wusikoti wako. Ti lava u gonda Bhiblia ngu kuhiseka, tsimbitisana ni mkongomiso wa wuphya wa sengeletano u si zumbi ka mamahelo mamwewo. U nga ti thembe kupinda mpimo. Ti nga va ti di bihile kualakanya ti to u ni wusikoti wo maha totshe u sa khata ngu kumaha wuxolisisi. Kufana ni Timoti, “ti wonele upune, u txi xola ni gondo yi u gondisako.”​—1 Timoti 4:16.

6. Ene a ti themba moya wa Jehovha. Paulo a khumbuxetile Timoti ngu wuthumeli wakwe a txi khene: “Tximaha txa txinene, txi txi nga vekwa manzani kwako, txi xayise ngu kuvhunwa ngu Moya wo Sawuleka, awu wu zumbako timbiluni kwathu.” (2 Timoti 1:14) Phela ti ti lava e themba moya wa Txizimu.

Donald, awu i ku kale i di didhota a womba tiya: “Ava va nga sawulwa ti lava ve teka wungana wawe ni Jehovha i di wa lisima. Ava va mahako toneto va na ‘tsimbila na mtamo wu txi engetelwa ditshiku ni ditshiku.’ Ngako va txi kombela moya wo sawuleka ni kusakulela tifanelo ta wona, va na va txivhuno txa hombe ngutu ka vanathu.”​—Masalmo 84:7; 1 Pedro 4:11.

Ta tsanisa kuwona madhota ni malanda a wuthumeli a maphya o fana ni nawe ma txi kula ka mthumo wa Jehovha. Jason, awu hi nga bhula ngu ngene, a khene: “Kukhukhela ka mbimo yi ni nga sawulwa kota didhota, ni gondile to tala ni themba yangu yi ya yi kula. Konkuwa, na wu tsakela mthumo wangu ni ku, ni wu wona i di lungelo ya hombe ngutu!” Ina u na simama u kula? Ngako u txi londisela txikombiso txa Timoti, nawe u na va txivhuno txa hombe ngutu ka vanathu.