Ngu kutxani ti si tumelelwi to mabhuku, mwendo silo simwani sa sengeletano ya Tifakazi ta Jehovha si betwa ka ma site timwani?

Vathu vamwani va pimisa ti to aku hi ningako vathu mabhuku athu mahala, kha ti lambiswi ku ma teka ve betela ka ma site timwani ka internet. Kambe eto ti nga maha timhaka ta hombe futhi ti lwisana ni Mlayo wa Mathumiselo * (wona txhamuselo ya hahatshi) a site yathu. Mlayo wonewo wu womba ti to a walo a tumelelwako “kubeta mifota, mabhuku, maemblema a jw, wutxenje, tivhidhiyo mwendo misungo ya timhaka ta site yathu ka internet (ka ma site o rumelelana so maha mwendo ma facebook, whatsapp, youtube ni simwani so fana ni soneso).” Ngu kutxani milayo yiya yi txi laveka?

Sotshe si si ku ka site yathu si vhiketwe ngu mlayo. Eto ta laveka nguko ti vhikela nyamahe ngu sona. Ava va nga leka ditshuri ni vamwani vathu ava va ku ni makungu o khulumetela mthumo wathu va tolovela kubeta mabhuku ni simwani kasi ku ndinda Tifakazi ni vathu vamwani ka ma site awe. Hambiketo, vona va betela mabhuku ni simwani simaha si si kanakanisako vale va gondako. (Masalmo 26:4; Mavingu 22:5) Vamwani va thumisa silo sathu mwendo emblema ya jw.org ti to ve ndinda vathu ve xava silo sawe, ka ma aplicativo ya tifone ni ka si va xavisako internet. Sotshe si si ku ka jw.org kupata ni maemblema si vhikelwa ngu mlayo se, hi nga sikota kuteka va va mahako toneto hi va yisa wukomani mwendo ku va lekisa kumaha toneto. (Mavingu 27:12) Se ngako hi txi va tumelela kumaha toneto hambi i di ti to i vanathu, wukoma kha wu na mbi seketela ngako hi txi va mangalela.

Kubhaxara mabhuku ni simwani sa sengeletano ka ma site mamwani i si nga ka jw.org ti nga va ni phango. Jehovha a hi ninga sakudya sa moya ngu kuthumisa “txithumi txo thembeka na txi di ni wutxhari” “Txithumi” txi thumisa ma site ya txona ti to txi ningela sakudya sa moya i ku​—www.pr418.com, tv.pr418.com, ni wol.pr418.com. Sengeletano yi ni 3 wa ma aplicativo ya tifone i ku​—JW Language^®, JW Library^®, ni JW Library Sign Language^®. Ka ma site ni ma aplicativo awa kha hi na mbi mana silo si si xaviswako mwendo silo si si nga nyamiswa ngu Sathani. Se ngako hi txo bhaxara mabhuku athu ka ma site ni ma aplicativo mamwani ti ni phango nguko ti nga maha ma ti txitxilwe.​—Masalmo 18:26; 19:8.

Ku engetela ka toneto, ngako hi txi beta so kari ka ma site a ya vathu va nga sikotako kuveka mawonelo awe, eto ti tula nzila ti to vakanganyisi ni vamwani ve poyilela sengeletano ya Jehovha. Vanathu vamwani va lwisana ni vathu vonevo ni ku eto ti tisa txiruko ka ditina da Jehovha. Kuphikizana ka internet hi nga nzila ya yinene yo vhuna vamwani ti to ve ziva ditshuri. (1 Timoti 6:3-5; 2 Timoti 2:23-25) Vathu vamwani va maha ma site mwendo ti facebook ni ma whatsapp ma txi nga ma lumbana ni sengeletano mwendo Mmidi wu wu Fumako. Kambe ditshuri ngu ti to kha ma va lumbi. Ni wamweyo wa Mmidi wu wu Fumako a nga ti mahela ma site oneyo.

Ngako hi txi kongomisa vathu ka jw.org, hi seketela kutxhumayelwa ka “Evhangeli ya Mfumo.” (Matewu 24:14) Ma site ni ma aplicativo athu ma ya masoni me kula. Hi tsakela ti to votshe vathu ve ma thumisa. Ngu toneto ha tumelelwa kurumela mabhuku ngu kuthumisa e-mail, mwendo nzila ya site yathu. Ngu nzila yoneyo hi kongomisa vathu ka txisima txa tximwetxo a txi Jehovha a txi thumisako ti to e hi ninga sakudya sa moya, i ku “txithumi txo thembeka na txi di ni wutxhari.”