1. Ngu tihi ati Isaya a nga profeta mayelano ni Jesu? Ngu txani toneto ti txi hi tsanisa?

WUPROFETI wa Isaya mayelano ni Jesu Kristu wa hi tsanisa ni ku hi ninga themba. Isaya a profetile ti to Jesu a “na mbi lamula madingano ni kuwona ka maso akwe, hambi kuwila mhaka madingano ni kuengisa ka tinzeve takwe; kambe a na lamula sisiwana ngu kululama.” (Isaya 11:3, 4) Ngu txani toneto ti txi hi tsanisa? Nguko hi hanya ka mafu aya ma nga tala ngu txisawu-sawu, ni ku vathu vo tala va lamula ngu kuwona khohe. Ngu ditshuri hi lava mlamuli wo hetiseka i ku Jesu, ene a na mbi lamula ngu kuya ngu khohe!

2. Ngu ti hi ti Jesu a nga hi leleta ti to hi maha? Hi na bhula ngu txani ka msungo wuwa?

² Ditshiku dimwani ni dimwani, hi ni ti hi ti pimisako ngu vamwani. Kuhambana ni Jesu, athu kha ha hetiseka, ngu toneto hi nga thuka hi pimisa ta walo. Hi nga thuka hi pimisa to kari ngu kuya ngu ti hi ti wonako ngu maso. Jesu a ti khene: “Mi nga lamuleni ngu kuwona khohe dwe, aniko lamulani ngu  nzila yo lulama.” (Johani 7:24) Ngu toneto hi nga fana ni Jesu ngu kwa mbi lamula vamwani ngu kuya ngu khohe. Ka msungo wuwa, hi na bhula ngu timhaka tiraru ati ti nga kuzetelako mawonelo athu ngu vamwani, i ku: Lixaka la m’thu, amu a tako ngu kona, male yi a ku nayo ni tanga yakwe. Ka yimwani ni yimwani hi na wona ti to hi nga mu engisisa kutxani Jesu, hi si lamuli vamwani ngu kuya ngu khohe yawe.

3, 4. a) Nji txani txi nga maha ti to Pedro e txitxa mawonelo akwe ngu vamatiko? (Wona mfota wu wu ku makhatoni.) b) Ngu dihi ditshuri da diphya adi Jehovha a nga gondisa Pedro?

³ Ditshiku dimwani mpostoli Pedro a getwe ku e tsula Khezareya, mtini ka Korneliyo i nga ti wa matiko, alakanya nzila yi a nga tipfa ngu yona! (Mithumo 10:17-29) Pedro a kulisilwe a txi kholwa ti to va matiko kha va basa. Kambe ku ni ti ti nga ti humelete ati ti nga txitxa mawonelo akwe. Ngu txikombiso a ti wonisilwe muwoniso ngu Txizimu. (Mithumo 10:9-16) Ka muwoniso wonewo, Pedro a woni txo fana ni nguwu yi txi txhika ngu nzumani, yo tala ngu sihari asi si nga ti wonwa si sa basa. Se kupfate dipswi di txi kha dona: “Pedro, khukha u txi ema! Daya u txi dya!” Pedro a lambile makhambi mararu. Kambe dipswi di txi thuma ku kha dona: “Silo si Txizimu txi nga si basisa, u nga wombe ti to sa yila.” Msana ka muwoniso, Pedro a si tipfisisi ati dipswi di nga txi la ku mu gela tona. Kambe kha ta swela, ku to bwaka mitumi yo ta ngu ka Korneliyo. Moya wo sawuleka wu to gela Pedro ti to e tsula mtini ka Korneliyo.

⁴ Itiku Pedro a to lamula ngu “kuwona khohe dwe,” nga a sa tumela kutsula mtini ka Korneliyo. Vajudha va si kandi mtini ka va matiko. Se, ngu kutxani Pedro a di tsute? Hambiku a nga ti va nyenya va matiko, muwoniso wu a nga wu wona ni moya wo sawuleka si txitxile nzila yi a nga ti pimisa ngu yona. Mbimo yi Pedro a nga engisela ati Korneliyo a nga womba, a gwitile a txi khene: “Kha ditshuri se na ti wona ti to Txizimu kha txi khedhi m’thu. Kambe ka dihi ni dihi ditiko, awule a txi thavako ni kumaha to lulama wa sikota kuamukelwa ngu txona.” (Mithumo 10:34, 35) Ditshuri diya da diphya, di ndi na gwesa ni otshe Makristu. Ngu nzila yihi?

5. a) Ngu tihi ati Jehovha a lavako ti to Makristu otshe me ti pfisisa? b) Hambiku hi zivako ditshuri, ina hi nga maneka hi di ni txisawu-sawu kani?

⁵ Jehovha a thumisile mpostoli Pedro ti to e vhuna otshe Makristu me pfisisa ti to Ene kha na txisawu-sawu. Ka Jehovha, lixaka lathu, ditiko di hi tako ngu ka dona, mxowo wathu mwendo lidimi hi nga sa txilo. Ngako hi txi thava Txizimu hi maha ta tinene, txona txa hi amukela. (Vagalatiya 3:26-28; Mtuletelo 7:9, 10) Eto ti nga maha se u txi tiziva. Kambe, ti txani ngako u di kulete ka wukhalo wu ku nga tala txisawu-sawu? Hambi u txi di ziva ditshuri, ti nga koteka ti  to u maneka u di ngadi ni txisawu-sawu. Hambiku Pedro a nga vhuna vamwani ve wona ti to Txizimu kha txi nga ni txisawu-sawu, nene a ti ngadi natxo. (Vagalatiya 2:11-14) Se hi nga mu engisisa kutxani Jesu ni kuleka kulamula vamwani ku kuya ngu khohe?

6. a) Nji txani txi no hi vhuna kuthavisa txisawu-sawu? b) Ngu tihi ati ti nga humelela mwanathu mmwani?

⁶ Hi nga maha txani ti to hi tumbula txisawu-sawu mbiluni kwathu? Ti lava hi tixolisisa hipune. Hi nga fananisa mawonelo athu ni ti hi ti gondako ka Bhiblia. (Masalmo 119:105) Hi nga tshumela hi wotisa mngana wathu ti to e hi gela ngako hi di natxo ngako athu hi si ti woni hipune. (Vagalatiya 2:11, 14) Ti nga maha hi kombisa matipfelo onewo na hi si ti tumbuli to hi ni txisawu-sawu. Mwanathu mmwani awu a ku ni wutixamuleli ti mu humelete toneto. Ku ti ni mpatwa wu wu nga ti ka mthumo wa mbimo yotshe, ene a bhate ati wu nga thumisa tona. Mwamna wa kona a ti huma ka lixaka ali vathu va nga ti li wona i si nga la txilo. Msana ko bhala to tala ta tinene ngu vona a gwitile a txi khene: “Hambiku mwamna [a humako ka ditiko diya], mahanyelo akwe ma kombisile ti to ku va u txi [huma ka ditiko diya] kha ti wombi ti to u ni nzambwa, wutomi wa hahatshi, kufana ni votala vo ta ngu ka [wukhalo wuwa].” Hi gonda txani ka mhaka yiya? Ku si nga ni mhaka ni ti to hi ni wutixamuleli muni ka sengeletano ya Jehovha, hi fanete hi ti xolisisa ni kutumela txivhuno txo wona txisawu-sawu atxi hi nga vako hi di natxo. Hi nga maha txani timwani?

7. Hi nga tikombisisa kutxani ti to “timbilu tathu ti tulekile kha kwati”?

⁷ Idi ti to “timbilu tathu ti tulekile kha kwati,” hi na xula txisawu-sawu ngu lirando. (2 Vakorinto 6:11-13) Ina awe u dhunda kuzumba ni vathu va lixaka lako, ditikoni kwako, mxowo wako mwendo va lidimi lako kani? Ti di ngeto, duketa kuzumba ni vamwani ni vona. U nga ramba vanathu va tixaka timwani ti to mi tsula motshe ka mthumo wo txhumayela. Mwendo ku va ramba mi ta susula motshe. (Mithumo 16:14, 15) Ngu kutsimbila ka mbimo, mbilu yako yi na tala ngu lirando ha koza ku si maneki kambe txisawu-sawu. Konkuwa he bhuleni ngu yimwani nzila ayi hi nga thukako hi lamula vamwani ngu “kuwona khohe.”

8. Hi nga gonda txani ka dibhuku da Levhi 19:15 mayelano ni nzila yi asi m’thu a ku naso si nga kuzetelako nzila yi hi wonako ngu yona vamwani?

⁸ Mawonelo athu ma nga thuka me kuzetelwa ngu silo si m’thu a ku naso. Dibhuku da Levhi 19:15 di khene: “U nga wone khohe ya wule i ku txisiwana, kambe u nga khatalele nyatithombe; u fanete kulamula mkwanu ngu kululama!” Ti nga mahisa kutxani ti to asi m’thu a ku naso si kuzetela ati hi mu wonisako tona?

9. Dibhuku da Mavingu di womba txani? Athu hi gonda txani?

 ⁹ Ati ti wombwako ngu dibhuku da Mavingu hi nga makuhu, di khene: “Txisiwana txi nyenywa hambi ngu muakelani wa txona, aniko vangana va nyatithombe mbavangi.” (Mavingu 14:20) Divingu diya di womba txani? Ngako hi si ti woneli, hi nga thuka hi lava ku va vangana va va ku naso dwe, i si nga sisiwana. Ngu kutxani ti di ni phango kulamula ngu kuya ngu si m’thu a ku naso mwendo asi a si ngako naso?

10. Ngu kutxani Jakobe a di ningile txialakanyiso Makristu ale a kale?

¹⁰ Ngako hi txi lamula vanathu ngu kuya ngu si va ku naso, hi nga vanga mibhando dibanzani. Toneto ti humelete ka mabanza a dilembe dizana do khata, se Jakobe a va alakanyisile ka toneto. (Lera Jakobe 2:1-4.) Mibhando kha yi laveki dibanzani. Se hi nga ti vayilelisa kutxani kulamula vathu ngu kuya ngu si va ku naso?

11. Ina silo si m’thu a ku naso sa yelana ni wuxaka wakwe ni Jehovha? Txhamusela.

¹¹ Hi fanete hi wona vanathu nga ti Jehovha a va wonisako tona. Jehovha kha tsakeli m’thu ngu kuva a di naso mwendo i di txisiwana. Wuxaka wathu ni Jehovha kha wu yelani ni male mwendo silo si hi ku naso. Ditshuri ti to Jesu a wombile ti to “ta karata kuwulela Mfumoni ka nzumani awule a ku ni tithomba,” kambe kha womba ti to kha ti  koteki. (Matewu 19:23) Jesu a tshumete a txi khene: “Mi katekile anu sisiwana, nguko mfumo wa nzumani mbwanu.” (Luka 6:20) Kambe eto kha ti la kuwomba ti to sotshe sisiwana si ndi na engisa Jesu ni kumana makatekwa o sawuleka. Kale si ti ho sisiwana so tala si nga lamba kulondisela Jesu. Ditshuri ngu diya: Athu hi nge woni wuxaka wu m’thu a ku nawo ni Jehovha ngu kuya ngu si a ku naso.

12. Bhiblia yi va gondisa txani ava i ku sisiwana ni va va ku naso?

¹² Hagari ka vathu va Jehovha ku ni sisiwana ni va va ku naso. Kambe votshe va m’randa Jehovha ni ku va mthumela ngu mbilu yotshe. Bhiblia yi gela va va ku naso ti to “va si veki kuthemba kwawe ka thomba yo mbi tsana, aniko ve themba Txizimu.” (Lera 1 Timoti 6:17-19.) Bhiblia yi bhasopisa otshe malanda a Jehovha, aya i ku sisiwana mwendo ya ma ku naso ti to ti ni phango kuranda male. (1 Timoti 6:9, 10) Ngako hi txi wona vanathu nga ti Jehovha a va wonisako tona, kha hi na mbi va lamula ngu kuya ngu si va ku naso mwendo si va si ngako naso. Kambe ku ni tximwani txikarato, txa tanga yi m’thu a ku nayo. Ina ndinene kulamula ngu kuya ngu tanga?

13. Ngu tihi ati Bhiblia yi ti wombako mayelano ni kuxonipha va hombe?

¹³ Mbimo yo tala Bhiblia yi womba ti to hi fanete hi xonipha vathu va hombe. Dibhuku da Levhi 19:32 di womba tiya: “Khukha u txi ema, u komba txithavo ka wule a ku ni msungo wa tinvi, u txi xonipa m’thu wule i ku wa hombe, thava Txizimu txako.” Da Mavingu 16:31 ni dona di hi gela ti to “wunvi m’bhoti wo dhundeka, wu manekako ka mahanyelo o lulama.” Paulo a gete Timoti ti to a si sola-soli vathu va hombe kambe e va ñola kota vatate vakwe. (1 Timoti 5:1, 2) Hambiku Timoti a nga ti ni wutixamuleli hagari ka vanathu ava i nga ti va hombe, mbimo yotshe ti lavile e laphisa mbilu ni ku va ni txixonipho.

14. M’thu wa hombe ti nga lava ku e lulamiswa ngako a txi maha txani?

¹⁴ Kambe ti txani ngako m’thu wa hombe a txi maha txionho kha kwenye mwendo e seketela timhaka ti ti si tsakisiko Jehovha? Hambi i di wa hombe, Jehovha kha na mbi mu leka ngako a di mahile to biha. Wona ditshina diya da mlayo di ku ka Isaya 65:20: “Muonhi wa 100 wa malembe a na ruketelwa.” Mlayo wo fana ni wuwa hi wu mana ka muwoniso wa Ezekhiyele. (Ezekhiyele 9:5-7) Ta lisima ngutu ngu xonipha Jehovha, i ku Didhota da Kale. (Dhaniyeli 7:9, 10, 13, 14) Txixonipho txi hi ku natxo ngu Jehovha, txi na maha ti to hi va ni txibindi txo lulamisa m’thu wu a lavako txivhuno, ku si nga ni mhaka ni tanga yakwe.​—Vagalatiya 6:1.

15. Hi gonda txani ka Paulo mayelano ni kuxonipha vanathu ava i ku ngadi vaphya?

¹⁵ Se ngako mwanathu i di ngadi mphya ko? Ina kha ti lavi hi mu xonipha? Ahim-him. Paulo a gete Timoti a txi khene: “Ku nga ve ni m’thu wo dhelela wuzambi wako, aniko, kuhambana nito, kulaveka u va txikombiso masoni ka makholwa, amu ka kutxhumayela dipswi, amu ka mahanyelo, amu ka lirando, amu ka likholo, amu ka kubasa mbilu.” (1 Timoti 4:12) Mbimo yi Paulo a nga bhala toneto, ti nga maha Timoti a ti ni konamu ka 30 wa malembe. Se a  ti ningilwe wutixamuleli wa lisima ngutu. Hi gonda txani? Kha ha fanela hi lamula vanathu ngu kuya ngu tanga yawe. Alakanya ngu ti Jesu a nga maha mbimo yi a nga ti ni 33 wa malembe dwe!

16, 17. a) Madhota ma mahisa kutxani ti to me sunga ku mwanathu wa faneleka kuva dilanda da wuthumeli mwendo didhota? b) Mawonelo a m’thu mwendo ati ti nga toloveleka ka wukhalo si nga lwisana ni Mibhalo ngu nzila yihi?

¹⁶ Ka midhawuko yimwani, vathu kha va va xoniphi vaphya. Ngu toneto, vanathu vamwani va i ku madhota va nga leka kukombela ti to mphya wo kari e thuma kota dilanda da wuthumeli mwendo e va didhota hambi a di ni tifanelo ti ti lavekako. Kambe Bhiblia kha yi wombi ti to mwanathu a fanete e va ka tanga yo kari ti to e va dilanda da wuthumeli mwendo e va didhota. (1 Timoti 3:1-10, 12, 13; Titosi 1:5-9) Ngako didhota di txo maha mlayo wo kari ngu kuya ngu mdhawuko wa dona, da hambana ni ti ti ku ka Bhiblia. Madhota kha ma fanela kulamula vaphya ngu kuya ngu mapimo awe mwendo ati ti nga toloveleka ka ditiko dawe, kambe va fanete ve londisela ati ti ku ka Bhiblia.​—2 Timoti 3:16, 17.

¹⁷ Ngako madhota ma si londiseli Bhiblia mayelano ni kusawula madhota mwendo malanda a wuthumeli, ma tshumetela msana vanathu va va fanelekako. Ka ditiko dimwani, ku ti ni dilanda dimwani da wuthumeli adi di nga ti hetisisa kwati mithumo yi di ti nga ti ningwa, se madhota ma ti woni ti to a ti ni tifanelo totshe ati ti lavekako ti to e va didhota ngu kuya ngu Bhiblia. Hambi keto, mamwani madhota ma wombile ti to a nge vi didhota nguko a woneka nga i ngadi mfana, se vona kha va kombela ti to e va didhota. Dikhombo da kona, kha sawulwa, ngu ti a nga ti wonekisa tona. Ti woneka nga mawonelo eyo ma tolovelekile ka makhalo o tala. Ti ni lisima kuthemba Bhiblia kupinda mawonelo athu mwendo ati ti nga toloveleka ka wukhalo wathu. Hi txi maha toneto, hi na va hi txi engisa Jesu ni ku hi na mbi lamula ngu kuwona khohe.

18, 19. Nji txani atxi txi no hi vhuna kuwona vanathu nga ti Jehovha a va wonisako tona?

¹⁸ Athu kha ha hetiseka, kambe hi nga simama hi gonda kuwona vamwani hi si na txisawu-sawu kufana ni Jehovha. (Mithumo 10:34, 35) Mbimo yotshe hi fanete hi ningela nzeve ka sialakanyiso sa Dipswi da Txizimu. Ngako hi txi si thumisa, hi engisa txirumo txa Jesu txo mbi “lamula ngu kuya ngu khohe dwe.”​—Johani 7:24.

¹⁹ Na i si nga kale, Jesu Kristu, i ku Mkoma wathu, a na lamula vathu votshe. Wulamuli wakwe wu na seketelwa ka milayo ya Txizimu yo lulama, i si nga ka ti a ti wonako mwendo ku tipfa. (Isaya 11:3, 4) Ngu ditshuri hi yi emete mbimo yoneyo yo tsakisa!