1. Ngu tihi tinzila timwani to thuma ni Jehovha?

MBIMO yi Jehovha a nga wumba vathu, ene a lavile ti to ve thuma kumweko nayo. Nyamsi, hambiku vathu va nga mbi hetiseka, vathu vo thembeka va nga sikota kuthuma ni Jehovha ditshiku ni ditshiku. Ngu txikombiso, athu “hi vavhuneteli va Txizimu” mbimo yi hi txhumayelako ni kumaha vagondiswa. (1 Vakorinto 3:5-9) Mthumo wo txhumayela mbwa lisima ngutu, se aku Mvangi a nga hi sawula ti to hi wu maha, i lungelo ya hombe! Kambe, kha hi thumi kumweko ni Jehovha ngu kutxhumayela dwe. Hi nga thuma ni Jehovha mbimo yi hi vhunako va mwayani kwathu ni vamwani dibanzani, hi txi amukela vapfhumba, hi txi vhuneta ka mithumo ya sengeletano ya ha mafuni kotshe ni mbimo yi hi andisako mthumo wathu wo txhumayela. Ka msungo wuwa hi na bhula ngu tinzila toneto to thuma ni Jehovha.​—Vakolosa 3:23.

2. Ngu kutxani hi sa fanela ku tidinganisa ni vamwani ka mthumo wa Jehovha?

² Mbimo yi hi gondako msungo wuwa, hi nga divaleni ti to  hotshethu hi hambanile. Hotshethu ha hambana ngu tanga, wutomi wathu, siemo ni wusikoti wathu. Se u nga tidinganisi ni vamwani u txi thumela Jehovha. Mpostoli Paulo a ti khene: “Aniko m’thu ni m’thu a na wonisise mithumo yakwe, se ngu kona a no sikota ku ti dhumisa ngu mithumo yakwe dwe, i si nga ngu ku ti dinganisa ni vamwani.”​—Vagalatiya 6:4.

3. Ngu kutxani hi txi womba to awu a xayisako mwaya a thuma kumweko ni Jehovha?

³ Jehovha a emete ti to hi xayisa timwaya tathu. Ngu txikombiso, ti nga maha ti lava ti to u thuma kasi ku u xayisa mwaya wako. Wungi wa vamame va zumba mtini ti to ve khatalela vanana. Ngako vaveleki vathu va si tikoti ku ti xayisa, se ti nga lava hi va khatalela. Eto njilaveko. Bhiblia yi womba tiya: “Awu a si khataleliko maxaka akwe, ngutu-ngutu ava i ku va mwaya wakwe, eyo a kanetile likholo, a bihile ngutu kupinda dihedheni.” (1 Timoti 5:8) I di ti to awe u ni wutixamuleli wa mwaya, ti nga maha usi thumeli Jehovha nga ti u nga txi navelisa tona. Hambiketo, u nga gumi mtamo! Jehovha wa tsaka ngako u txi dyisa mwaya wako.​—1 Vakorinto 10:31.

4. Vaveleki va nga thangetisa kutxani Jehovha ka wutomi wawe? Eto ti nga va vhunisa kutxani?

⁴ Vaveleki va i ku Makristu va nga sikota kuthuma ni Jehovha ngu kuvhuna vanana vawe ve ti vekela makungu ka mthumo wa Jehovha. Vaveleki vo tala va mahile toneto. Se, vanana vawe va ti vekete makungu o thumela Jehovha ngu mbimo yotshe, hambi ti txi lava veya thumela kule ni mtini. Vamwani va thuma kota varumiwa, vanyaphandule ka makhalo aya ma ku ni txilaveko txa vahuweleli, kasi vamwani va thuma Bhetele. Ngu ditshuri, ngako vanana va ti kule, vaveleki ta va karatela kuheta mbimo yo tala va di navo nga ti va nga txi ti lavisa tona. Kambe, vona va va kuzeta ti to ve simama ve thumela Jehovha ngu ku tiningela amu va ku kona. Ngu kutxani? Nguko, va tsaka va txi wona vanana vawe va txi thangetisa Jehovha ka wutomi wawe. (3 Johani 4) Wungi wa vaveleki vonevo va tipfa kufana ni Ana, a wu a nga khene mwanana wakwe Samuweli a “mningete [lombile, NM]” Jehovha. Vona va tipfa i di lungelo ya hombe kuthuma ni Jehovha.​—1 Samuwele 1:28.

5. U nga va vhunisa kutxani vanathu dibanzani? (Wona mfota wu wu ku makhatoni.)

⁵ Se ngako u si nga ni txilaveko txa hombe txo xayisa mwaya, u nga sikota kuvhuna vanathu va vo lwala, ava va nga kumba mwendo va va ku ni silaveko simwani. Mwendo, kuvhuna ava va va khatalelako. Lava tinzila to vhuna vanathu dibanzani ava va lavako txivhuno. Ngu txikombiso ti nga maha a di ho mwanathu awu a xayisako mveleki awu a nga kumba. U nga sikota kukhatalela mveleki wakwe ti to nene e mana mbimo yo khatalela timhaka takwe. U nga sikota kuvhuna vamwani ngu ku va teka veya mitshanganoni, kuya txitolo, hambi kupfuxela mlwati sibhejela. Ngako u txi maha eto, u nga va u txo thumiswa ngu Jehovha ti to u xamula mikombelo yawe.​—Lera 1 Vakorinto 10:24.

6. Hi nga ti kombisisa kutxani ti to ha tiziva kuamukela vapfhumba?

⁶ Vavhuneteli va Txizimu mbathu vo ziva kuamukela vapfhumba. Amu ka Bhiblia “kuziva kuamukela vapfumba” ngu Txigriki ti womba kukomba wunene valuveli. (Vahebheru 13:2) Bhiblia yi ni sikombiso sa vathu ava hi nga gondako ngu vona kuziva ku kombisa wunene wonewo. (Genesisi 18:1-5) Ta laveka ti to hi vhuna vamwani ngako hi txi va ni mkhanjo, eto hi nga ti kota ku si nga ni mhaka ni ti to “makholwa kulothu” mwendo nem.​—Vagalatiya 6:10.

7. Ngu yihi wuyelo yo amukela ava va ku ka mthumo wa mbimo yotshe?

⁷ Nzila yimwani yo kombisa kuziva kuamukela vapfhumba ngu vhuna vathumi va mbimo yotshe kulava wukhalo wo zumba. (Lera 3 Johani 5, 8.) Hi txi maha toneto, vona va vhuneka kumweko ni nathu. Bhiblia yi womba ti to eto ngu “thavelelana.” (Varoma 1:11, 12) Wona txikombiso txa Olaf. Mbimo yi i nga ti ngadi mfana, va endetwe ngu muwoneleli wa txigava dibanzani kwawe, ene a ti lava wukhalo wo zumba. Kambe dibanzani ku si nga ni wu a nga ti nawo. Vaveleki va Olaf i si nga Tifakazi, hambiketo a va kombete ti to mwendo va nga tumela ku e mu amukela mtini mule kwawe. Vona va tumete, kambe va mu gete ti to a na otela ha ka disofa. Olaf a tumete, ni ku kha ti sola ngu toneto. Divhiki di tsakisile a di ni muwoneleli wa txigava! Ditshiku ni ditshiku ni mixo va ti bhula ngu timhaka to tala ta Bhiblia va txi susula. Muwoneleli wa txigava a kuzetile Olaf ti to e bela ka mthumo wa mbimo yotshe. Se kupinda 40 wa malembe Olaf a txi thuma kota murumiwa ka matiko o tala.

8. Ngu kutxani hi di fanete kuva ni wunene ka vathu hambi va si bongi ka dikhambi do khata? Womba txikombiso.

⁸ Ku ni tinzila to tala to kombisa lirando ka valuveli, hambi i di ti to kha va kombisi kubonga ka dikhambi do khata. Ngu txikombiso, Yesica wa ditiko da Ecuador a rurile e ya zumba Espanha, se mwanathu mmwani wa txisikati a gondile Bhiblia nayo. Ditshiku dimwani va txi gonda, wule wamsikati a to dila a si malali. Mwanathu wule a mu wotisile ti to i mhaka muni. Yesica a ti khene mbimo yi a nga ti zumba Ecuador, i ti txisiwana ngutu. Se dimwani ditshiku, nem mndiwo wa mwanana wu si ngaho, a ndi no mu ninga mati dwe. Mbimo yi a nga ti zama kuotelisa mwanana, Yesica a khongete e kombela txivhuno. Ngu txikuluveta ku to bwaka Tifakazi timbidi, ti mu ninga direvhista. Se ene a to va henyela e di vharulela a txi khene: “Nzakudya so na ninga mwanana wangu siya?” Vanathu va zamile ku mu thavelela, kambe Yesica ma ti kwete, kha tumela. Ngu mbimo yimwani, vanathu vale va ti ta veka thavango ya sakudya ditimbani kwakwe. Se kule a nga ti dila a txi gonda ni mwanathu wule nguko a  nga ti woni ti to a khala kulamba xamulo ya mkombelo wakwe. Kambe Yesica a ti tiemisete kuthumela Jehovha. Ngu ditshuri, wuha wa vanathu vale, wu ve ni mihando ya yinene.​—Ekleziyaste 11:1, 6.

9, 10. a) Ngu yihi mikhanjo ayi Vaisrayeli va nga ti nayo yo tiningetela? b) Vanathu dibanzani va nga vhuneta ngu tinzila tihi?

⁹ Vaisrayeli va ti ni mikhanjo yo tala yo tiningetela ka mithumo. (Eksodha 36:2; 1 Makronika 29:5; Nehemiya 11:2) Nyamsi, nawe u ni mikhanjo yo tala yo ningela ngu mbimo, silo sako ni wusikoti ti to u vhuna vanathu. Mbimo yi u mahako toneto, u na tsaka ni ku Jehovha a na ku katekisa.

¹⁰ Bhiblia yi kuzeta vavamna dibanzani ti to ve thuma ni Jehovha kota malanda a wuthumeli mwendo madhota. (1 Timoti 3:1, 8, 9; 1 Pedro 5:2, 3) Ava va mahako toneto, va lava kuvhuna vamwani ngu tinzila ti ti wonekako kumweko ni ka wukhozeli wawe. (Mithumo 6:1-4) Ina madhota ma ta nga kukombela ti to u va mxungameti mwendo kuvhuneta ka kukhatalela mabhuku, thembwe ya dibanza, kulungisa Nyumba ya Mfumo, mwendo ka timwani? Vanathu va va vhunetako ka mithumo yoneyo va tsaka ngutu.

11. Mwanathu mmweyo wa txisikati a wuyetwe ngu nzila yihi ngu ku va ka mthumo wo aka? Womba ati ti nga kuhumelela ka mhaka yiya.

¹¹ Ava va tiningetelako ka mthumo wo aka va mana vangana va vaphya. Mwanathu wa txisikati awu a dhanwako ku i Margie a thumile ka kuaka Tinyumba ta Mfumo kudingana 18 malembe. Ene a ti tolovela kukhatalela vanathu va i ku ngadi mahorana ni ku ma vhuna ti to ve gonda mthumo. Ene a womba ti to mthumo wo aka i nzila yimwani ya hombe ngutu yo khatalelana.  (Varoma 1:12) Phela mbimo yi a nga txi tshangana ni sikarato vangana va a nga va mana mbimo yi a nga ti ka mthumo wo aka ngu vona va nga mu vhuna. Ina u khala ku ti ningela ka mthumo wo aka Tinyumba ta Mfumo kani? Phela u nga ti kota kupateka hambi i di ti to khu nga ni wusikoti wo aka.

12. U nga vhunetisa kutxani ngako yi di humelete phango?

¹² Hi nga sikota kuthuma ni Jehovha ngu kuvhuna vanathu ngako va di humeletwe ngu tiphango. Ngu txikombiso, hi nga vhunisa ngu miningelo yathu. (Johani 13:34, 35; Mithumo 11:27-30) Nzila yimwani yi hi nga vhunetako ngu yona ngu basisa mwendo kulungisa si si nga onheka msana ko humelela phango. Gabriela wa Polonia awu nyumba yakwe yi nga manana ni ku gindimuswa ngu ndambi, a mani litsako mbimo yi vanathu va mabanza a hafuhi va nga mu vhuna. A txi alakanyisisa ngu txivhuno txonetxo a khene kha na mhaka ni si a nga si luza, ene a veka mialakanyo yakwe ka si a nga si mana. Ene a womba tiya: “Tximahakalo txiya txi vhuni ku ni wona ti to kuva ka sengelatano yiya ya Wukristu i lungelo ya hombe ngutu ni ku njisima txa litsako.” Wungi wa va va manako txivhuno txonetxo va khona va tipfa ngu nzila yo fana. Vanathu va va thumako ni Jehovha ti to ve vhuna vanathu vava va tipfa va di tsakile.​—Lera Mithumo 20:35; 2 Vakorinto 9:6, 7.

13. Hi li tsanisisa kutxani lirando lathu ngu Jehovha mbimo yi hi vhunako vamwani? Womba txikombiso.

¹³ Mwanathu wu a dhanwako ku i Stephanie ni vahuweleli vamwani, va thumile ni Txizimu ka wukhalo wawe ngu kuvhuna Tifakazi ti ti nga thava ditikoni kwawe ti ya Estados Unidos ngu mhaka ya yimbi. Vona va va vhuni ngu ku va lavela wukhalo wo zumba ni siya sa mwaya. A khene: “Hi susumetilwe ngu litsako ni kubonga kwawe ngako va nga wona lirando ka vanathu va ha mafuni kotshe. Vona va ti khona hi va vhunile, kambe ngu ditshuri, ngu vona va nga hi vhuna ngutu. Lirando, wumwewo, likholo, ni kuthemba Jehovha a ku vanathu va nga ku kombisa kutsanisile lirando lathu ngu Jehovha, eto ti hi vhuni ti to hi bonga totshe ti hi ti manako ka sengeletano yakwe.”

14, 15. a) Isaya a ti ti emisete kumaha txani? b) Makristu ma nga mu etetelisa kutxani Isaya?

¹⁴ Ina u navela kuengetela mthumo wako ka Jehovha? Ina khu tsakeli kurura u ya thuma kha makhalo ya ku ku ni txilaveko  txa vatxhumayeli? Ngu ditshuri, kha ti sinzisi kurura u ya kule ti to u va ni wuha. Kambe ku ni vanathu va va nga sikotako. Vona va ti emisete kufana ni mprofeti Isaya. Mbimo yi Jehovha a nga khene, “Ni na ruma mani, i mani a no hi yela kani?” Ene a ti khene: “Ngani wuwa, ni rume ani!” (Isaya 6:8) Ina u nga sikota kuvhuneta sengeletano ya Jehovha? U nga vhuneta ngu tinzila tihi?

¹⁵ Jesu a wombile tiya mayelano ni kutxhumayela ni kumaha vagondiswa: “Kuelula nga hombe, aniko sithumi nzidotho. Ngu kota yeto, kombelani ka Nyamne wa kuelula, ti to e rumela sithumi kuelulani kwakwe.” (Matewu 9:37, 38) Ina u nge ti tsakeli kuthuma ka makhalo ya ku ku ni txilaveko txa vatxhumayeli? Mwendo kuvhuna vamwani ti to ve maha toneto? Vanathu vo tala va khona nzila ya lisima yo kombisa lirando ngu Txizimu ni muakelani ngu va nyaphandule ka makhalo ya ku ku ni txilaveko. Ina u nga alakanya ngu tinzila timwani to engetela mthumo wako ka Jehovha? U txi maha toneto u na tsaka.

16, 17. Ngu tihi tinzila timwani to andisa mthumo wako ka Jehovha?

¹⁶ Ina u nga ti tsakela kuthuma Bhetele mwendo u vhuneta ka kuaka? U nga thuma mbimonyana mwendo masiku o kari ka divhiki. Mbimo yotshe, sengeletano ya Jehovha yi lava vathu vo ti ningela ti to ve thuma ova ha ku ku ni txilaveko. Vathumi vonevo va fanete va di tiemisete kuthuma tihi ni tihi va kombelwako, hambi i di ti to ku ni mithumo yimwani va yi zivako. Jehovha a ninga lisima votshe va va nga tiemisela ku ti ningela aha ku ku ni txilaveko.​—Masalmo 110:3.

¹⁷ Ina wa ti lava kugonda txikolwa txo kari ti to u kota kuthumela kwati Jehovha? U txi ti lava, u nga tatisela diphepha kasi ku u bela ka Txikolwa txa Vatxhumayeli va Mfumo. Txikolwa txiya txi gondisa vanathu va txiwamna ni va txisikati ava va nga vitwa ngu didhawa da moya, ava i ku vanyaphandule ti to sengeletano ya Jehovha yi va thumisa ngutu. Vona va fanete ku va va di emekile ti to ve ya thuma amu va no rumelwa kona. Ina wa ti lava kuthumela Jehovha ngu nzila yoneyo?​—1 Vakorinto 9:23.

18. Ngu yihi wuyelo yo thuma ni Jehovha ditshiku ni ditshiku?

¹⁸ Aku hi ku vathu va Jehovha, hi ni wuha, wunene, ni lirando. Ha khatala ngu vathu vamwani masiku otshe. Eto ti hi tisela litsako ni kudikha. (Vagalatiya 5:22, 23) Ku si nga ni mhaka ni siemo sako, u nga mana litsako ngako u txi etetela wuha wa Jehovha ni kusimama u va mmweyo wa vavhuneteli va Txizimu!​—Mavingu 3:9, 10.