1. Nji txani txi kombisako ti to Jehovha a ni wuha?

KALE ka kale, Jehovha a ti zumba ekha. Se a to gwita e sunga kumaha sivangwa sa nzumani ni sa ha mafuni, e si ha ningo ya wutomi ni wutxhari. Jehovha, i ku ‘Txizimu txa litsako’ wa tidhunda kuningela silo sa sinene. (1 Timoti 1:11; Jakobe 1:17) Se, aku Jehovha a lavako ti to hi va ni litsako kufana ni nene, a hi gondisa ti to hi va ni wuha.​—Varoma 1:20.

2, 3. a) Hi nga maha txani ti to hi va ni litsako? b) Hi na gonda txani ka msungo mhaka wuwa?

² Txizimu txi vangile m’thu ngu txifaniso txa txona (Genesisi 1:27) Eto ti womba ti to Jehovha a hi vangile hi di ni tifanelo ati ene a ku nato. Ti to hi va ni litsako la ditshuri ni ku va ni makatekwa a Jehovha, ti lava hi londisela txikombiso txakwe. Ti lava hi dhunda votshe vathu ni ku va ni wuha. (Vafilipiya 2:3, 4; Jakobe 1:5) Ngu kutxani? Nguko ngu  toneto Jehovha a nga hi vangisa tona. Hambiko hi nga mbi hetiseka, hi nga sikota kuetetela Jehovha ni ku va ni wuha.

³ Ka msungo mhaka wuwa hi na bhula ngu tigondo ta mu ka Bhiblia a ti ti hi gondisako ku va ni wuha. Hi na wona ti to ngu kutxani Jehovha a txi tsaka ngako hi txi va ni wuha. Hi na tshumela hi gonda ti to wuha wu hi vhunisa kutxani ka mthumo wathu wo txhumayela ni ku hi nga li manisa kutxani litsako ngako hi txi va ni wuha. Ngu magwito, hi na bhula ngu sivangelo so simama hi va ni wuha.

4, 5. Ngu tihi ti kombisako ti to Jehovha ni Jesu va ni wuha? Ngu kutxani hi di fanete hi va etetela?

⁴ Jehovha a lava ti to hi mu etetela, se wa tsaka ngako hi txi va ni wuha. (Vaefesu 5:1) Jehovha a lava ti to vathu ve va ni litsako. Eto ha tiziva nguko nzila yi a nga hi vanga ngu yona ya xamalisa, ni ku a vangile ditiko do tshura ni sotshe si si ku ka dona ti to hi tsaka. (Masalmo 104:24; 139:13-16) Ngu toneto, hi dhumisa Jehovha mbimo yi hi mahako ti to vamwani ve tsaka.

⁵ Hi tshumela hi etetela Jesu awu a nga veka txikombiso txo hetiseka txa nzila yi m’thu a nga vako ni wuha ngu yona. Ati khene: “Nga toneto, Mwanana wa M’thu nene kha tela kuta thumelwa, aniko a tete kuta thumela, ni kuningela wutomi wakwe, kasi kutirula vavangi.” (Matewu 20:28) Mpostoli Pedro a kuzetile Makristu a txi khene: “Hagari kwanu, ku laveka mi zumba mi di ni mapimo a Jesu Kristu . . . A tekile txiemo txa txithumi.” (Vafilipiya 2:5, 7) Se ku lava hi ti wotisa tiya: ‘Ina ni nga sikota kulondetela mkondo wakwe?’​—Lera 1 Pedro 2:21.

6. Hi gonda txani ka txikombiso txa Jesu txa Msamariya wa mnene? (Wona mfota wu wu ku makhatoni.)

⁶ Jehovha wa tsaka ngako hi txi londisela txikombiso txi ene ni Jesu va nga hi vekela. Hi maha toneto ngu kukhatalela vamwani ni kulava tinzila to va vhuna. Jesu a kombisile lisima la toneto mbimo yi a nga bhula ngu txikombiso txa Msamariya wa mnene. (Lera Luka 10:29-37.) Ene a gondisile valondeteli vakwe ti to va fanete kuvhuna vamwani, ku si nga ni mhaka ni txiemo txawe mwendo mu va humako kona. Wa ti kumbula ti to ngu kutxani Jesu a ti womba-wombile ngu txikombiso txonetxo? Ngu mhaka ya Mujudha wu a nga mu wotisa tiya: “Ngu mani muakelani wangu kani?” Xamulo yi Jesu a nga mninga yi hi gondisa ti to, kufana ni Msamariya ngako hi txi lava kutsakisa Jehovha hi fanete kuva ni wuha.

7. Hi nga ti kombisisa kutxani ti to ha kholwa taku nzila yi Jehovha a mahako timhaka ngu yona nja yinene? Txhamusela.

⁷ Txivangelo tximwani txa ku hi va ni wuha txi yelana ni ti ti nga humelela jaradhi ka Edheni. Sathani a hembile a txi khene Adhamu ni Evha va ndina mana litsako ngako va si engisi Jehovha, se vona va txo lava tawe dwe. Evha a txo alakanya ngu ngene dwe, se a ti lava kufana ni Txizimu. Adhamu nene a ti alakanya ngu kutsakisa msikati dwe kupinda Txizimu. (Genesisi 3:4-6) Eto ti ve ni wuyelo yo biha ngutu. Phela m’thu awu a ko alakanya ngu ngene  dwe kha mani litsako. Ngako hi si alakanyi ngu ngathu dwe hi va ni wuha, hi kombisa ti to ha kholwa taku nzila yi Jehovha a mahako timhaka ngu yona nja yinene.

8. Adhamu ni Evha va di pimisile ngu va mani? Ngu kutxani?

⁸ Hambiku Adhamu ni Evha va nga ti vokha jaradhi ka Edheni, nga va di pimisile ngu vamwani. Ngu kutxani? Jehovha a ti va ningile mthumo. A va gete ti to ve veleka ve tata mafu ni ku ma maha paradhise. (Genesisi 1:28) Adhamu ni Evha nga va di lavile ti to vanana vawe ve mana litsako, nga ti Jehovha a nga ti lavile ti to votshe ha mafuni ve tsaka. Vona va ndina thuma votshe ti to ve maha mafu otshe me va paradhise. Ewo wu ndina va mthumo wa hombe!

9. I ngu nzila yihi vathu va ndino va va di tsakile mbimo yi va mahako mafu me va paradhise?

⁹ Vathu vo hetiseka ti ndina lava ve tshumela ve thuma kumweko ni Jehovha ti to ve maha mafu me va paradhise ni kuhetisisa kudhunda kwakwe. Ngu nzila yoneyo, va ndina bela kuhumulani kwakwe. (Vahebheru 4:11) Ina wa ti wona ti mthumo wonewo wu ndino tsakisisa tona? Jehovha a di va katekisile ngutu i ti ku kha va ti alakanyela, ni kukhatala ngu vamwani.

10, 11. Nji txani txi txi no hi vhuna kutxhumayela ni kugondisa?

 ¹⁰ Nyamsi, Jehovha a hi ningile mthumo wo sawuleka. A lava ti to hi txhumayela ni kugondisa vathu. Ti to hi wu kota, ngu ditshuri ti lava hi khatala ngu vathu vamwani. Kambe, hi ngo simama hi maha mthumo wuwa ngako hi di ni minavelo ya yinene basi, i ku: Kuranda Jehovha ni vathu.

¹¹ Mpostoli Paulo a ti khene, ene ni Makristu mamwani a dilembe dizana do khata ‘mba vhuneteli va Txizimu’ nguko vona va ti txhumayela ni kugondisa vathu ditshuri. (1 Vakorinto 3:6, 9) Nyamsi, nathu hi “vavhuneteli va Txizimu” nguko ningela ngu mbimo yathu, mtamo, ni silo sathu ti to hi maha mthumo wo txhumayela wu Txizimu txi nga hi ninga. Ayiya, i lungelo ya hombe!

12, 13. Ngu yihi wuyelo yo gondisa vamwani Bhiblia?

¹² Kuningela ngu mbimo ni mtamo wathu hi txi txhumayela ni kugondisa ti hi tisela litsako la hombe. Vanathu vamwani ava va nga va ni mkhanjo wo tsimbitisa sigondo va womba toneto. Ha tsaka ngutu hi txi wona sigondo sathu si txi tsaka mbimo yi si pfisisako ati Bhiblia yi ti gondisako, si va ni likholo la ditshuri, si txitxa wutomi wa sona, ni kukhata kugela vamwani ati si ti gondako. Nene Jesu a tsakile mbimo yi vale va 70 va nga “wuya va txi tsaka” ngu mhaka ya ti va nga ti mananile nato to tsakisa.​—Luka 10:17-21.

¹³ Vanathu ha mafuni kotshe va tsaka ngutu ngako va txi wona ati madungula ya Bhiblia ma vhunisako tona vathu ti to ve tshukwatisa wutomi wawe. Ngu txikombiso, mwanathu mmwani awu a dhanwako ku i Ana wu i ku ngadi mphya, a lavile kuengetela mthumo wakwe ka Jehovha. * (Wona txhamuselo ya hahatshi.) Ene a rurile eya ka wukhalo wumwani wa Europa wa Wutxani amu ku nga ti ni txilaveko txa hombe txa vatxhumayeli. Ene a wombile tiya: “U mana vathu vo tala vo lava kugonda, se eto ni ti tsakete ngutu. Mthumo wangu wu ni ninga litsako la hombe. Ni txi wuya ngu thembweni, kha ni nga ni mbimo yo ti alakanyela. Ni alakanyisisa ngu va ni gondako navo, sikarato sawe ni kuvilela kwawe. Ni xota tinzila to va tsanisa ni kuva vhuna ngu silo simwani. Se, na kholwa ti to ‘kuha i kateko ya hombe ngutu kupinda kuhiwa.’”​—Mithumo 20:35.

14. U nga li manisa kutxani litsako hambi vathu va si tsakeli?

¹⁴ Hambi i di ti to vathu kha va hi engisi mbimo yi hi txhumayelako, hi nga tsaka nguko hi va ninga mkhanjo wo engisa mahungu a manene. Jehovha a emete ku hi maha to fana ni ti Ezekhiyele a nga maha: “Aniko awe u na va gela timhaka tangu, mwendo va na tiengisa, mwendo kha va na mbi tiengisa.” (Ezekhiyele 2:7; Isaya 43:10) Ngu toneto, hambi vathu va si amukeli, Jehovha wa yi ninga lisima mizamo  yathu. (Lera Vahebheru 6:10.) Mayelano ni mthumo wakwe wo txhumayela, mwanathu mmwani a ti khene: “Athu hi phayile, hi theletela, ni kukhongela hi txi emela ti to Jehovha a na va maha ve tsakela.”​—1 Vakorinto 3:6.

15. Ina hi no va ni wuha ka va va bongako dwe? Txhamusela.

¹⁵ Jesu a lava ti to hi va ni wuha nguko eto ti hi tisela litsako. Ngako hi di ni wuha, vathu vo tala ni vona va nava ni wuha. Ngu toneto a hi kuzetako a txi khene: “Hanani vamwani, kasiku nananu mi na hiwa. Ha tikhanani kwanu ku na thelwa mpimo wa wunene, wo zindetwa, wu txi khusungelwa, wo tala wu txi thekela; nguko mpimo wu mi no pimela vamwani, ngu wonewo nanu mi no pimelwa ngu wona.” (Luka 6:38) Hambi u di ni wuha, hi nga votshe va no bonga. Kambe, hambi va si bongi, u nga leki wuha. Phela u nga maha wunene wa hombe ngutu ngu ti u mahako hambi ti txi woneka nga ndidotho.

16. Mba mani ava hi nga va kombako wuha? Ngu kutxani?

¹⁶ Vathu va va ku ni wuha kha va ningeli va txi emela kumana txo kari. Jesu a ti khene: “Ngako u txi maha m’buso, dhana sisiwana, silima, sidiya ni mabhofu; eho u na va u di katekile, nguko evo kha va na so kutshumetela ngu sona.” (Luka 14:13, 14) Bhiblia yi tshumela yi txi: “Awule a ku ni mawonelo a manene a na katekiswa,” ni ku “A katekile m’thu wu a alakanyako txisiwana.” (Mavingu 22:9; Masalmo 41:1) Hi fanete kuva ni wuha nguko ngu ditshuri hi lava kuvhuna vamwani.

17. Hi nga va ninga txani vathu kasiku hi mana litsako?

¹⁷ Mbimo yi Paulo a nga womba mapswi  ya ma nga wombwa ngu Jesu o khene “kuha i kateko ya hombe ngutu kupinda kuhiwa,” asi wombi kuningela ngu so maha dwe. Hi nga ninga vathu txitsaniso, txialakanyiso txa mu ka Bhiblia, ni kuva vhuna to kari. (Mithumo 20:31-35) Paulo a hi gondisile ti to kuningela ngu mbimo yathu, kukhatala kwathu ni lirando lathu nda lisima ngu kuya ngu ti ene a nga womba ni ku ti maha.

18. Vaxolisisi vamwani va womba txani ngu wuha?

¹⁸ Vaxolisisi va va gondako mahanyelo a vathu va tumbute ti to kuninga ti ninga m’thu litsako. Va bhate ku vathu va womba ti to va tipfa va di tsakile ngutu ngako va di mahete vamwani ta tinene. Vaxolisisi va womba ti to ngako hi txi vhuna vamwani, ti maha hi tiziva ti to hi hanyela txani. Titxhari timwani ti khona vathu va va mahako mthumo wo vhuneta va mana dihanyo da dinene ni litsako. Ngu ditshuri, eto kha ti hi xamalisi nguko Jehovha, Mvangi wathu wa lirando, mbimo yotshe wa hi gela to kuha ti tisa litsako.​—2 Timoti 3:16, 17.

19, 20. Ngu kutxani u txi lava kukombisa wuha?

¹⁹ Ngako vathu vamwani hagari kwathu va txi khatala ngu tawe dwe, ti nga karata ku va ni wuha. Kambe Jesu a hi alakanyisile ti to sirumo simbidi sa hombe ngu randa Jehovha ngu yotshe mbilu yathu, moya, mialakanyo, ni mtamo wathu ni kuranda muakelani wathu nga ti hi ti randisako tona. (Marku 12:28-31) Ka msungo wuwa hi gondile ti to ava va randako Jehovha va mu etetela. Jehovha ni Jesu va ni wuha. Se vona va hi gela ti to nathu hi londisa txikombiso txawe nguko va tiziva ti to eto ti na hi tisela litsako. Ngako hi txi va ni wuha ka ti hi mahelako Txizimu ni vaakelani vathu, hi na dhumisa Jehovha ni ku athu hi na vhuneka kumweko ni vamwani.

²⁰ Awe se wa maha ati u ti kotako ti to u va ni wuha ni kuvhuna vamwani, ngutu-ngutu vanathu. (Vagalatiya 6:10) Ngako u txi simama u maha toneto, vathu va na kubonga ni ku kudhunda, ni ku u na va ni litsako. Bhiblia yi khene: “Moya wa wuha wu na ena, ni wule a theletelako mati nene a na theletelwa.” (Mavingu 11:25) Ka mthumo wathu wo txhumayela ni ka wutomi wathu, hi ni tinzila ta tingi to kombisa wuha ni wunene. Ka msungo wu wu tako hi na bhula ngu tinzila toneto.