1. Nji txani txi nga mahekako msana ka ku m’thu a di mahile txionho txa hombe?

 KA GONDO yi yi nga pinda hi woni mkongomiso wu mpostoli Paulo a nga wu ningela ka dibanza da Korinto mayelano ni wamwamna wu a nga ti maha txionho txa hombe. Muonhi eneyo asi tisoli, ngu mhaka yoneyo a thavisilwe dibanzani. Nga ha ndimana ya msungo mhaka wuwa yi wombako ngu kona, m’thu wu a nga maha txionho txa hombe a nga vhunwa ti to e tisola. (Var. 2:4) Madhota ma nga mvhunisa kutxani m’thu kasiku e tisola?

2-3. Nji txani hi fanelako kumaha ngaku hi txi ziva ti to mwanathu wo kari a mahile txionho txa hombe, ni ku ngu kutxani?

² Ngako madhota ma si tizivi ti to m’thu a wete ka txionho, kha mana kusikota ku m’vhuna. Nji txani atxi hi nga txi mahako ngako hi txi ziva to mwanathu wo kari a wete ka txionho txa hombe a txi txi nga mahako to e thaviswa dibanzani? Hi fanete ku kuzeta m’thu eneyo ti to eya ka madhota kasiku me m’vhuna.— Isaya 1:18; Mith. 20:28; 1 Pedro 5:2.

³ Se hi nga maha txani ngako m’thu wu a nga maha txionho e lamba ku ya gela madhota? Ka mhaka yoneyo athu hi nga womba-womba ni madhota kasiku m’thu eneyo e mana txivhuno. Kumaha eto ti kombisa lirando ngu mwanathu nguko kha hi ti lavi ku mluza. Ngako m’thu eneyo atxi lamba kutxitxa eya masoni e maha to biha a na onha wuxaka wakwe ni Jehovha. Niku eto ti nga maha vathu va hahanze ve womba-womba kubiha ngu Jehovha ni vathu vakwe. Hambiku ti karatako, hi fanete kuva ni txibindi hi ya gela madhota kasiku me vhuna mwanathu awu a nga wela ka txionho. Ngako hi txi maha toneto hi na kombisa lirando  ka Jehovha ni ka mwanathu awu a nga maha txionho.— Mas. 27:14.

ATI MADHOTA MA TI MAHAKO KASI KUVHUNA AWU A NGA WELA KA TXIONHO TXA HOMBE

4. Ngu txihi txikongomelo txa madhota mbimo yi ma tshanganako ni m’thumo wu a nga maha txionho txa hombe?

⁴ Ngako mwanathu wo kari dibanzani a txi wela ka txionho txa hombe, mmidi wa madhota wu sawula madhota mararu ya ma fanelekako kasiku me wumba komisawu ayi yi no womba-womba ni m’thu wu a nga maha txionho. a Madhota onewo ma fanete kuva o dinganisela ni kutiveka hahatshi. Ma maha totshe ti ma nga tikotako kasi kuvhuna muonhi ti to e tisola. Kambe ona ma tiziva ti to kha mana kusinzisa m’thu ti to e txitxa. (Dhewut. 30:19) Va tshumela ve tiziva ti to hi nga votshe vaonhi va no tisola kufana ni Dhavhidha. (2 Sam. 12:13) Vamwani vaonhi va sawula kwambi engisa sialakanyiso sa Jehovha. (Gen. 4:6-8) Hambiketo, txikongomelo txa madhota ngu kuvhuna muonhi ti to e tisola. Nji txani txi madhota ma fanelako ku txi alakanya mbimo yi ma wombawombako ni muonhi?

5. Ngu txihi txialakanyiso atxi madhota ma fanelako ku txi tekela ha msungo mbimo yi ma tshanganako ni muonhi? (2 Timoti 2:24-26) (Wona ni mfota.)

⁵ Madhota ma wona muonhi kota txinvutana txa lisima txa Jehovha atxi txi nga mwalala. (Luka 15:4, 6) Se mbimo yi va tshanganako ni muonhi vona kha va wombawombi nayo ngu nzila yo nemela nem ku mñola ngu nzila yo biha. Madhota kha ma njo tshangana ni muonhi kasiku hetisisa mlayo basi mwendo ku mmaha siwotiso ni kumana tixamulo dwe. Hahanze keto, ona ma maha mizamo yo kombisa tifanelo ati ti txhamuselwako ka dibhuku da 2 Timoti 2:24-26. (Lera.) Madhota ma simama ma di thuthile, me kombisa wunene ni wungana kasiku me gwesa mbilu ya muonhi.

6. Madhota ma wu lavisa kutxani mkongomiso wa Jehovha ma sise tshangana ni muonhi? (Varoma 2:4)

⁶ Madhota ma ti ninga mbimo kasi kumana mkongomiso wa Jehovha. Ona ma tikaratela ku etetela nzila yi Jehovha a ñolako ngu yona vaonhi ni kukhumbula mapswi a Mpostoli Paulo aya ma ku: “Wunene wuwa wa Txizimu wu ku ndindela kuya kuhundulukani.” (Lera Varoma 2:4.) Txo khata txi madhota ma fanelako ku txi khumbula ngu ti to ona vadyisi ava va ku hahatshi ka mkongomiso wa Jesu Kristu. (Isaya 11:3, 4; Mat. 18:18-20) Yi si se tshangana ni muonhi, komisawu yi na maha mkombelo ni kualakanyisisa ngu txikongomelo txawe txa hombe i ku kuvhuna muonhi ti to e tisola. Vona va na  maha wuxolisisi ka Bhiblia ni ka mabhuku a sengeletano, ve maha mkombelo ve kombela wutxhari. Va na tshumela ve xolisisa ati ti lavekako ku ve tiziva mayelano ni ti ti nga humelela ka wutomi wa muonhi eneyo, nguko toneto ti ngava ti di vite txivangelo txa mapimiselo ni mamahelo akwe o biha.— Mav. 20:5.

7-8. Madhota ma nga yi etetelisa kutxani pasiyensiya ya Jehovha mbimo yi ma tshanganako ni muonhi?

⁷ Madhota ma etetela pasiyensiya ya Jehovha. Ona ma khumbula ti Jehovha a nga txi ñolisa tona vaonhi ka mbimo yi yi nga pinda. Ngu txikombiso, Jehovha a vite ni pasiyensiya e womba-womba ni Kayini e m’bhasopisa ngu wuyelo ya txionho txakwe ni ku m’gela ti to a ndi na m’katekisa ngako a txi engisa. (Gen. 4:6, 7) Jehovha a kawukile Dhavhidha ngu kuthumisa Mprofeti Natani awu a nga maha txidinganiso atxi txi nga gwesa mbilu ya mkoma Dhavhidha. (2 Sam. 12:1-7) “Ditshiku ni ditshiku” mwendo makhambi a mangi, Jehovha ati rumela vaprofeti mbimo yi ditiko da Israyeli di nga ti mwukela. (Jer. 7:24, 25) Jehovha a ti si emeli ti to vathu ve tisola se idi kona a khatako kuva vhuna. Kambe, ngene a nga txi khatisa kulava ku va vhuna. Hambi ngako vathu va txi ngadi vatxi maha sionho, Jehovha atxi simama e va kuzeta ti to ve tisola.

⁸ Madhota ma etetela txikombiso txa Jehovha mbimo yi ma zamako kuvhuna ava va nga maha txionho txa hombe. Nga ha 2 Timoti 4:2 a wombako ngu kona madhota ma bhulisana ni muonhi “ngu kuhonisela” mwendo ngu pasiyensiya. Ngu toneto, didhota tilava di va m’thu wo thutha, ngu kuthumisa pasiyensiya di vhuna muonhi ti to e tsakela kumaha ati i ku ta tinene. Didhota di txo henya di nga maha ti to muonhi asi engisi txivhuno niku asi gwitisi kutisola.

9-10. Madhota ma nga m’vhunisa kutxani muonhi kasiku e alakanyisisa ngu ti a nga timaha?

⁹ Madhota ma zama kupfisisa atxi txi nga vako txi di mmahile e wela ka txionho. Ina wungana wa m’thu eneyo ni Jehovha wu yite wu hola? Ina kudotho-kudotho a yite e leka kugonda Bhiblia mwendo kuya kutxhumayelani? Ina mikombelo yakwe yi yite yi va yo toloveleka niku ati si ngadi e maha nguto mikombelo? Ina a emile kuzama kulwa ni minavelo yo biha? Mba mani a tolovelako kumaha wungana navo niku ngu yihi misakano yi a sawulako yona? Kusawula koneko ku ngava ku di kuzetile ngu nzila muni mipimiso ni minavelo yakwe? Ina wa tipfisisa ti to timwani ati a ti mahako kupata ni sisungo sakwe sa gwesa Tate wakwe Jehovha?

¹⁰ Madhota ma nga mmaha siwotiso asi singa mvhunako ku e pimisa ngu simaho asi singa holisa wungana wakwe ni Jehovha si tshumela si m’yisa ka txionho. Kambe ti hakubasani ti to va na maha toneto ngu nzila ya wunene nguto niku va na mbi maha siwotiso sa timhaka takwe ta mndani ti tisi lavekiko ku va ti ziwa. (Mav. 20:5) Hahanze keto, nga ha Mprofeti Natani a nga maha ngu kona ka Dhavhidha, madhota ma nga thumisa sidinganiso asi si nga mvhunako ku e alakanyisisa ni kuwona ti to ati a nga timaha ti bihile. Ngu nzila yoneyo ti nga maha ka mtshangano wo khata e khata kupfisisa ti to ati a nga ti maha ti bihile se e alakanyisisa ngu simaho sakwe. Se ti nga maha e khata kutisola ngu ditshuri.

11. Jesu a wonisanisile kutxani ni vaonhi?

¹¹ Madhota ma tikaratela kuetetela txikombiso txa Jesu. Mbimo yi a nga ti womba-womba ni Sawule wa Tarso, Jesu a mmahile txiwotiso txiya ngu wutxhari: “Sawule, Sawule, u ni xanisela txani?” Txiwotiso txiya txi Sawule to e pfisisa ti to ati a nga txi timaha ti bihile. (Mith. 9:3-6) Niku ka mhaka ya msikati wule “Jezabheli”, Jesu a wombile tiya: “Ni mu sikete masiku, kasi ku e hunduluka.”—Mtu. 2:20, 21.

12-13. Madhota ma mu ningisa kutxani mbimo muonhi ti to e tisola? (Wona ni mfota.)

¹² Madhota ma etetela Jesu niku kha ma mahi  txisungo ngu magwava, me pimisa ti to muonhi a nge tisoli. Ti nga maha vamwani ve tisola ka mtshangano wo khata awu vaku nawo ni madhota, kambe vamwani ti nga lava mbimo yo lapha. Ngu toneto madhota ma nga tsangana ni muonhi makhanbi o tala. Ti nga maha msana ka mtshangano wo khata muonhi e khata kupimisa ngu ti a nga timaha ni ku alakanyisisa ngu mabhulo aya a nga va nawo ni madhota se e tiveka hahatshi, e maha mkombelo ka Jehovha e kombela divalelo ya txionho txakwe. (Mas. 32:5; 38:18) Ngu toneto, ka mtshangano wu wu no londisela ene a ngava adi tiemisete kukombisa kutisola kupinda aku a nga kukombisa ka mtshangano wo khata.

¹³ Kasiku vhuna muonhi ti to e tisola, yotshe mbimo madhota ma kombisa wunene ni kukhatala ngu muonhi eneyo. Ona ma maha mkombelo ka Jehovha kasiku e katekisa mizamu ya muonhi niku ona ma ni themba ya ti to mwanawe a na txitxa e tisola.—2 Tim. 2:25, 26.

14. I mani ngu ditshuri a vhunako muonhi ti to e tisola, niku ngu kutxani hi txi womba toneto?

¹⁴ Mbimo yi muonhi a tisolako hotshethu ha tsaka nguto! (Luka 15:7, 10) Hambiku madhota ma mahako totshe ati ma nga tikotako kasiku vhuna muonhi, i mani ngu ditshuri a mvhunako ti to e txitxa? Khumbula ti Paulo a nga ti bhala mayelano ni vaonhi: ‘Txizimu txi na va ninga mtamo wa kuhunduluka mwendo kutisola.’ (2 Tim. 2:25) Ngu toneto, Jehovha ngene a vhunako mkristu ti to e txitxa mapimiselo ni mahanyelo akwe. Paulo a txhamusela timhaka ta tinene ati ti mahekako ngako m’thu a txi tisola: M’thu eneyo ti nga maha e va ni wuzivi wo tshima wa ditshuri e txitxa mahanyelo akwe niku ti nga maha e huluka ka mlawu wa Sathani.—2 Tim. 2:26.

15. Madhota ma nga simamisa kutxani me vhuna muonhi awu a nga tisola?

¹⁵ Mbimo yi muonhi a ti solako Komisawu ya madhota yi na maha maendo a wudyisi kasiku vhuna m’thu eneyo ku e simama e mana txivhuno atxi txi lavekako ti to e lwisana ni siduko sa Sathani ni kumaha ati i ku ta tinene. (Vaheb. 12:12, 13) Niku ti hakubasani ti to madhota ma na mbi gela m’thu ati muonhi a nga timaha. Kambe ina ku ni ti dibanza di fanelako kutiziva?

 ‘KAWUKA AVALE VA ONHAKO MASONI KA VOTSHE MWENDO TIFAKAZI’

16. Mba mani “votshe mwendo tifakazi” ava Paulo a nga womba-womba ngu vona ka 1 Timoti 5:20?

¹⁶ Lera 1 Timoti 5:20. Paulo a bhalete mapswi yawa mngana wakwe Timoti awu nene i ngati didhota mbimo yi a nga txi m’txhamusela nzila yo wonisana ni ‘va va mahako sionho.’ Ti womba txani toneto? Ene a si lavi kuwomba ti to votshe vanathu va dibanzani va dni nava hagari ka ‘votshe mwendo tifakazi’ ava a nga va wombwa ka ndimana yiya. Hahanze keto, ene a txi womba-womba ngu vale ti nga mahako va di txi zivile txionho txonetxo. Ti nga maha tifakazi toneto ti di woni m’thu eneyo a txi maha to biha mwendo ti ti tiho hagari ka vale muonhi a nga va gela txionho txakwe. Ngu nzila ya txihunja madhota ma na gela tifakazi toneto ti to mhaka yi khataletwe niku muonhi a kawukilwe.

17. Txiziviso muni txi mahelwako dibanza ngako txionho txi txi ziwa mwendo txi na ziwa ka mbimo yi yi tako, niku ngu kutxani?

¹⁷ Kambe ti nga maha mbimo yimwani txionho txi txi ziwa nguto ngu dibanza mwendo txi ngadi txi txi na ziwa. Ka txiemo txiya ti nga maha ‘votshe mwendo tifakazi’ vatxi pata dibanza dotshe. Ngu toneto didhota do kari di na zivisa dibanza ti to mwanathu wa txiwamna mwendo wa txisikati a sotwe. Kambe ngu kutxani ku txi mahwa txiziviso txonetxo? Paulo a txhamusete ti to eto ti na maha vamwani “ve telwa ngu kuthava” kasiku va si mahi txionho txa hombe.

18. Ngako mwanana awu a nga bhabhatiswa wa atxi maha txionho txa hombe a si se kutshanganisa 18 wa malembe, nji txani atxi madhota ma nga txi mahako? (Wona ni mfota.)

¹⁸ Nji txani txi mahekako ka vanana ava va nga bhabhatiswa mbimo yi va mahako txionho va sise kutshanganisa 18 wa malembe? Mmidi  wa madhota wu sawula madhota mambidi kasiku me ya tshangana ni mwanana eneyo kumweko ni vaveleki vakwe ava i ku Makristu. b Madhota ma na wotisa vaveleki va mwanana eneyo ti to nji txani atxi va nga txi maha kasi kuduketa kuvhuna mwanana wawe ku a maha kutxitxa aku kulavekako niku e tisola. Ngako mwanana eneyo adi tiemisete kuengisa sialakanyiso sa vaveleki vakwe e txitxa mahanyelo akwe, ti nga maha madhota onewo a mambidi me maha txisungo txa ti to kha kuna txilaveko txo wumba komisawu ya madhota kasiku yi tshangana ni mwanana eneyo kumweko ni vaveleki vakwe. Ngu nzila yoneyo vaveleki va na simama ve vhuna mwanana wawe nguko Jehovha a ningile vaveleki wutixamuleli wo kawuka vanana vawe ngu nzila ya lirando. (Dhewut. 6:6, 7; Mav. 6:20; 22:6; Vaef. 6:2-4) Ngu kutsimbila ka mbimo, madhota ma na simama me xolisisa ti to ina vaveleki va ningela txivhuno atxi txi lavekako ka mwanana wawe. Kambe ngako mwanana eneyo a nga bhabhatiswa a txi simama e maha to biha e lamba kumaha kutxitxa? Ti di ngeto komisawu ya madhota yi na maha mtshangano ni mwanana eneyo ni vaveleki vakwe ava i ku Makristu mwendo ni m’thu wu a mkhatalelako.

“NGUKO MKOMA [JEHOVHA] ANA NI WUMBILU NI DIVALELO”

19. Madhota ma muetetelisa kutxani Jehovha mbimo yi ma tshanganako ni m’thu wu a nga maha txionho txa hombe?

¹⁹ Jehovha a lava ti to madhota me vhikelela dibanza ka vale va lambako kuengisa milayo yakwe. (1 Vak. 5:7) Kambe ona ma tilava nguto ti to muonhi e tisola, ngako ti txi koteka. Ngu toneto, yotshe mbimo madhota ma simama me va ni themba ya ti to muonhi a na txitxa mahanyelo akwe. Ngu kutxani? Nguko ona ma lava kuetetela Jehovha awu aku ni “wumbilu ni divaleleo.” (Jak. 5:11) Wona nzila yi Mpostoli Johani awu se a nga ti kute ngu tanga a nga kombisa ngu yona lirando la hombe ngu vanathu. Ene a bhate tiya: “Sivanananu sangu, ni mi bhalela timhaka tiya kasi ku mi si onhi; se ngako mmweyo wanu a txi onha, hi na ni Mthaveleli masoni ka Tata, Ene Jesu Kristu, Mlulami.”—1 Joh. 2:1.

20. Hi na bhula ngu txani ka gondo yo gwita ya mlongoloko wuwa?

²⁰ Txo kwambi tsakisa ngu ti to mbimo yimwani m’thu wu a nga maha txionho wa lamba kutisola. Ti di ngeto m’thu eneyo tilava e thaviswa dibanzani. Nji txani txi madhota ma txi mahako ka siemo so nga soneso? Hi na bhula ngu mhaka yiya ka gondo yo gwita ya mlongoloko wuwa wa tigondo.