1-2. a) Jehovha a va wonisa kutxani vaonhi ava va si laviko kutxitxa? b) Ngu tihi ti Jehovha a emelako ti to vaonhi ve ti maha?

 JEHOVHA kha amukeli mahanyelo otshe aya hi nga ma lavako, ene wa txi nyenya txionho. (Mas. 5:4-6) Ene a lava ti to hi engisa milayo yakwe yi ku mu ka Bhiblia. Kambe, ti hakubasani ti to ene kha emeli ti to hi va vo hetiseka nguku wa tiziva ti to kha ha hetiseka. (Mas. 130:3, 4) Hambiketo, ene kha amukeli ‘vathu va kwambi mthava va hindulako kateko yakwe, ve yi maha txivhikelo txa wubhemba wawe.’ (Judha 4) Ngu ditshuri, Bhiblia yi womba-womba ngu “kuloviswa ka vathu ava va si khataliko ngu Txizimu” aku ku no maheka ka yimbi ya Armagedhoni.—2 Pedro 3:7; Mtu. 16:16.

² Kambe, Jehovha kha ti lavi ti to ni wamweyo e lova. Nga ha hi nga ti wona ngu kona ka tigondo ati ti nga pinda, Bhiblia yi tiveka hakubasani ti to ene “a lava ti to votshe ve hunduluka mwendo ve tisola.” (2 Pedro 3:9) Madhota ma etetela Jehovha ngu kuva ni pasiyensiya mbimo yi ma zamako kuvhuna vaonhi ti to ve txitxa mahanyelo ni kutshumela ve va ni wungana ni Jehovha. Kambe, to mbi tsakisa, ngu ti to hi nga votshe va tumelako txivhuno txonetxo. (Isaya 6:9) Vamwani va na simama ve maha to biha hambi madhota ma txi zama kuva  vhuna makhambi a mangi. Ka txiemo txonetxo, ngu tihi ati madhota ma fanelako ku ti maha?

“THAVISANI M’BIHI HAGARI KWANU”

3. a) Ngu tihi ati Bhiblia yi wombako ti to ti fanete kumahwa ngako m’thu asi tisoli? b) Ka txiemo txonetxo ngu kutxani hi txi womba ti to m’thu a to ti sawulela apune kuthaviswa dibanzani?

³ Mbimo yi m’thu a mahako to biha e gwita asi tisoli, madhota ma londisa mkongomiso awu wu manekako ka 1 Vakorinto 5:13 awu wu ku: “Thavisani m’bihi hagari kwanu.” Ngu mapswi mamwani, m’thu a to sawula apune kuthaviswa dibanzani, ene o elula asi a nga phaya. (Vag. 6:7) Ngu kutxani hi txi womba toneto? Nguko m’thu eneyo a lambile kutxitxa hambi msana ka kuva madhota ma di zamile ku m’vhuna makhambi a mangi. (2 Vaf. 17:12-15) Simaho sakwe si tiveka hakubasani ti to ene kha ti lavi kuengisa milayo ya Jehovha.—Dhewut. 30:19, 20.

4. Ngu kutxani ku txi mahwa txiziviso mbimo yi m’thu awu asi ti soliko a thaviswako dibanzani?

⁴ Ngako m’thu asi tisoli e gwita e thaviswa dibanzani, ka mahwa txiziviso kugelwa dibanza dotshe ti to m’thu eneyo hi nga ngadi Fakazi ya Jehovha. a Txikongomelo txa txiziviso txonetxo hi nga kudhanisa m’thu eneyo. Ngu ditshuri eto ti mahelwa ku dibanza di londisa txialakanyiso txo ‘ema kutipata’ nayo ni ‘kudya hi si dyi’ nayo. (1 Vak. 5:9-11) Ku ni sivangelo so pfala so va Jehovha a di hi ningile mkongomiso wonewo. Mpostoli Paulo a wombile tiya: “Mtshumbelo wa wudotho wa sikota kuvilisa wurathi wotshe.” (1 Vak. 5:6) Ngako m’thu awu asi ti soliko ka sionho si a nga si maha a si thaviswi dibanzani, vamwani va na pimisa ti to kha kuna txilaveko txo engisa milayo ya Jehovha.—Mav. 13:20; 1 Vak. 15:33.

5. Hi fanete ku m’wonisa kutxani m’thu wu a nga thaviswa dibanzani niku ngu kutxani?

⁵ Kambe hi fanete ku m’wonisa kutxani m’thu wu a nga thaviswa dibanzani? Athu kha hi na mbi ngadi hi tipata nayo mwendo kuheta mbimo hi di nayo. Hambiketo, kha ha fanela ku m’wona kota m’thu wo a na mbi thuka e txitxa kambe hi fanete ku m’wona kota nvuta ayi yi nga mwalala, ayi yo ngu kutsimbila ka mbimo yi nga thuka yi wuya. Khumbula ti to m’thu eneyo a ningetete wutomi wakwe ka Jehovha. To mbi tsakisa ngu ti to ka mbimo yoneyo ene kha hanyi ngu kutumelelana ni kutiningetela koneko, nem kha hanyi ngu nzila yi yi tsakisako Jehovha. (Eze. 18:31) Kambe ngako ku di ni mbimo niku Jehovha adi tiemisete kukombisa wumbilu, ku nga di ni themba ka m’thu eneyo. Se madhota ma nga mvhunisa kutxani muonhi wu a nga thaviswa dibanzani?

ATI MADHOTA MA TI MAHAKO KASI KUVHUNA AVA VA NGA THAVISWA DIBANZANI

6. Ngu tihi ti madhota ma fanelako ku ti maha kasi kuvhuna m’thu wu a nga thaviswa dibanzani?

⁶ Ngako m’thu atxi thaviswa dibanzani, ina madhota kha ma fanela kusimama me m’vhuna? Ahim-him! Mbimo yi madhota ma gelako m’thu eneyo ti to a na thaviswa dibanzani, ona ma tshumela me m’gela ati a fanelako kumaha ngako a txi la kutshumela e wuyela. Niku madhota ma na tshumela me maha timwani. Ka makhambi a mangi ona mana wotisa m’thu eneyo ti to ma nga tshumela me bhula nayo msana ka mitximanyana ngu txikongomelo txo wona ti to ina a txitxile mahanyelo akwe. Ngako m’thu eneyo a txi tumela, madhota ma na tshumela me bhula nayo ku  di pindile mbimonyana kasiku ve mkuzeta ku e tisola ni kutshumelela ka Jehovha. Hambi i di ti to m’thu eneyo kha se kutisola, madhota ma na zama kubhula nayo kambe me tshumela me mkuzeta ku e tisola.

7. Madhota ma wu etetelisa kutxani wuxinji wa Jehovha mbimo yi m’thu a thaviswako dibanzani? (Jeremiya 3:12)

⁷ Mbimo yi madhota ma kuya bhulisana ni m’thu wu a nga thaviswa dibanzani, ma maha mizamo kasi kuetetela wuxinji wa Jehovha. Jehovha kha emela ti to Vaisrayeli ve tisola asi se kukhata kuva vhuna. Hahanze keto, ene a tekile dizambu do va vhuna va si se khata kukombisa kutisola. Nga ha hi nga tiwona ngu kona ka gondo ya wumbidi ya mlongoloko wuwa, Jehovha a gete Hoseya ku e divalela msikati wakwe ni kutshumela e m’tumela hambiku a ngati ngadi e maha txionho. Ngu nzila yoneyo Jehovha a kombile vathu vakwe ti to ati tiemisete kuva divalela. (Hos. 3:1; Mal. 3:7) Kufana ni Jehovha madhota ngu ditshuri ma tilava ti to muonhi e tisola e tshumelela dibanzani ni ku ona ma na maha totshe kasiku toneto ti maheka. Ni ku kha ma na mbi karatisela muonhi eneyo ku e tisola ni ku e tshumelela dibanzani.—Lera Jeremiya 3:12.

8. Txidinganiso txa mwanana wo mwalala txi hi vhunisa kutxani kupfisisa wuxinji wa Jehovha? (Luka 15:7)

⁸ Ka txidinganiso txa mwanana wo mwalala khumbula ti tate a nga amukelisa tona mwanana wakwe. Mbimo yi a nga wona mwanana a txi wuya mtini, tate a to “tutuma e ta m’wukarela e m’nyuta.” (Luka 15:20) Tate kha emela ti to mwanana e kombela divalelo. Hahanze keto, ene a tekile dizambo do m’divalela, i ku tona ti tate mmwani ni mmwani wa lirando a nga ti mahako. Ayiya i nzila yi Jehovha a tipfako ngu yona ngu vale va nga leka ku m’thumela ni ku madhota ma maha totshe ti ma nga ti kotako kasi kuetetela Jehovha. Vona va lava ti to nvuta yi nga mwalala “yi tshumelela m’tini.” (Luka 15:22-24, 32) Mbimo yi muonhi a ti solako, Jehovha, Jesu ni tingilozi va tsaka ngutu ni ku ngu toneto dibanza dotshe di tipfisako tona!—Lera Luka 15:7.

9. Ngu tihi ti Jehovha a kuzetako vaonhi ku ve ti maha?

⁹ Ngu kuya ngu ti hi nga tiwona kala hawa, ti hakubasani ti to Jehovha kha lavi ti to muonhi wu asi tisoliko e simama dibanzani. Kambe ene wa simama e m’vhuna ti to e tshumelela kwakwe. Dibhuku da Hoseya 14:4 di tiveka hakubasani ati Jehovha a tipfisako tona mayelano ni muonhi awu a ti solako. Dona di womba tiya: “Ani ni na holisa ku ni tshuralela kwakwe, ani ngu kutilava kwangu, ni na va randa; nguko kuhenya kwangu kukhukhile kwawe.” Aku madhota ma ma zivako matipfelo a Jehovha, ona ma na wonisisa kutxitxa kumwani ni kumwani aku kukombisako to m’thu a khatile kutisola. Ni ku ka vale va nga leka Jehovha mapswi yawa txitsanisekiso txa ti to ene wa va randa nguto ni ku a lava ti to ve tshumelela dibanzani.

10-11. Madhota ma zamisa kutxani kuvhuna vale va ku ni malembe a mangi va di thavisilwe dibanzani?

¹⁰ Se ngako m’thu a di ni malembe a mangi a di thavisilwe dibanzani, ngu ti hi ti madhota ma fanelako ku ti maha kasiku m’vhuna? Ti nga maha m’thu eneyo adi emile ku maha txionho txi txi nga mmaha e thaviswa dibanzani. Ti nga maha asi nga ngadi e tiziva ti to ngu kutxani a di thavisilwe dibanzani. Ti si nga ni mhaka ni ti to ngu txihi txivangelo, madhota ma na zama kulavetela m’thu eneyo ni ku m’endela. Ka maendo onewo madhota mana maha mkombelo ni m’thu eneyo me mu kuzeta ku e tshumelela dibanzani. Ngu ditshuri  ngako m’thu adi ni malembe a mangi a di emile ku tipata ni dibanza a nava adi hote ngu didhawa da moya. Se ngako a txi womba ti to a lava kutshumelela dibanzani, madhota ma na lava m’thu wu a no m’tsimbitisela gondo ya Bhiblia, hambi i di ti to kha se kuwuyiselwa dibanzani. Ka txiemo txonetxo madhota ngu ona ma no m’tsimbitisela gondo ya Bhiblia.

¹¹ Madhota ma lava kuetetela wuxinji ni lirando la Jehovha. Ngu toneto ona ma lavetela vale va nga leka kuthumela Jehovha niku ma ti veka hakubasani ti to matimba ma tulekile ngako va txi la kutshumela ve wuya. Ngako muonhi a txi kombisa ti to a tisote ni kutxitxa mahanyelo akwe, ene a nga tshumela e wuyiselwa ngu txikuluveta.—2 Vak. 2:6-8.

12. a) Ngu ka sihi siemo madhota ti lavako me tiwonela nguto? b) Ngu kutxani hi sa fanela kupimisa ti to kha ti koteki ku vathu vamwani ku ve amukela divalelo ya Jehovha? (Wona ni txhamuselo ya hahatshi.)

 ¹² Ka siemo simwani madhota ti lava me tiwonela ngutu ma sise kuwuyisela m’thu dibanzani. Ngu txikombiso, ngako m’thu a di ni mnando wo pfinya mwanana, a di vile apostata mwendo a di mahite maplanu o daya mtxhadho, madhota ma fanete kutsaniseka ti to ene a tisote ngu ditshuri. (Mal. 2:14; 2 Tim. 3:6) Nguko madhota ma fanete kuvhikela mtxhambi wa Jehovha. Ngu mbimo yimweyo madhota ma tiziva ti to Jehovha wa amukela muonhi mmwani ni mmwani awu a nga tisola ngu ditshuri ni kuva a di lekile kumaha to biha. Hambiku madhota ma fanelako kutiwonela mbimo yi ma wonisanako ni m’thu wu a nga maha txionho mbimo yi yi nga pinda, ona kha ma fanela kupimisa ti to m’thu eneyo kha na mbi amukela divalelo ya Jehovha. b—1 Pedro 2:10.

ATI DIBANZA DI NGA TI MAHAKO

13. a) Hi m’wonisa kutxani m’thu wu a nga solwa ni m’thu wu a nga thaviswa dibanzani?

¹³ Nga ha hi nga tiwona ngu kona ka gondo yi nga pinda, ngako ku txi mahwa txiziviso txa ti to m’thu a sotwe, athu hi nga simama hi ti pata nayo nguko ha tiziva ti to m’thu eneyo a tisote niku kha ngadi e maha kambe to biha. (1 Tim. 5:20) M’thu eneyo a simama e maha txienge txa dibanza, ni ku a lava kuvhunwa ngu vanathu kasiku e simama e maha tatinene. (Vaheb. 10:24, 25) Kambe txiemo txa hambana ngako m’thu a di thavisilwe dibanzani. Ka txiemo txonetxo, athu ‘ha ema kutipata’ ni m’thu eneyo ni ku ‘hambi kudya kha hi dyi nayo.’—1 Vak. 5:11.

14. Makristu ma nga thumisisa kutxani livhalo lawe lo trenarwa ngu Bhiblia kasi kuwonisana ni va nga thaviswa dibanzani (Wona ni mfota.)

¹⁴ Ina ati ti ku ka 1 Vakorinto 5:11 ti la kuwomba ti to kha ha fanela kuramba m’thu wu a nga thaviswa dibanzani ti to eta mitshanganoni mwendo ku m’losa adi tile mitshanganoni? Ahim-him. Ditshuri ti to athu hi na mbi heta mbimo ni m’thu eneyo, kambe ngako m’thu eneyo i di dixaka dathu mwendo mngana  wathu wa hafuhi, athu hi nga thumisa livhalo lathu li nga trenarwa ngu Bhiblia kasi kumaha txisungo txa ti to hi nga mramba ti to eta xalela mitshangano. Se ngako a txi tumela ko? Kuhambana ni ti hi nga txi maha kale ta kwambi m’losa, awaha n kona Mkristu mmwani ni mmwani a nga thumisa livhalo lakwe ali li nga trenarwa ngu Bhiblia kasi kusunga ti to a na maha txani ka txiemo txonetxo. Vamwani ti nga maha va txi la ku losa m’thu eneyo ni ku m’hoyozela. Hambiketo nda lisima ku khumbula ti to kha hi lavi kuva ni dibhulo do lapha ni m’thu eneyo mwendo ku heta mbimo hi txi maha nayo mithumo yimwani.

15. Vaonhi vo zumbisa kutxani ava va wombwako ka 2 Johani 9-11? (Wona dikwadru adi di ku “ Ina Johani ni Paulo va txi womba-womba ngu txionho txona txi txa tximwetxo?”)

¹⁵ Vamwani ti nga maha ve tiwotisa tiya: ‘Kambe ina Bhiblia kha yi wombi ti to kha ha fanela ku losa muonhi?’ (Lera 2 Johani 9-11.) Didungula da 2 Johani 9-11 di kombisa ti to eto ti thuma ka vale i ku vaapostata mwendo va va zamako ku kuzetela mahanyelo o biha. (Mtu. 2:20) Ngu toneto ngako m’thu a txi kuzetela tigondo ta vaapostata mwendo mahanyelo o biha, madhota kha ma na mbi muendela. Hambiketo ku ngadi ni themba ya ti to ene a na tisola e txitxa mahanyelo. Kambe ngako eto ti si maheki, athu hi na mbi m’losa m’thu eneyo nem ku mramba ti to eta xalela mitshangano.

ETETELA WUXINJI NI WUMBILU WA JEHOVHA

16-17. a) Ngu tihi ati Jehovha a lavako ti to vaonhi ve ti maha? (Ezekhiyele 18:32) b) Madhota ma nga thumisa kutxani kumweko ni Jehovha kasi kuvhuna muonhi?

¹⁶ Ngu tihi hi nga tigonda ka 5 wa tigondo ta direvhista diya? Hi gondile ti to Jehovha kha lavi ti to ni wammweyo e loviswa! (Lera Ezekhiyele 18:32.) Ngu toneto yotshe mbimo Jehovha a kombete malanda akwe aya ma nga ti mahile txionho ti to me tisola ni ku me tshumelela kwakwe. (2 Vak. 5:20) Madhota ma ni lungelo yo thuma kumweko ni Jehovha kasi kuvhuna avale va nga maha sionho sa hombe ti to ve tisola.—Var. 2:4; 1 Vak. 3:9.

¹⁷ Zama kualakanya litsako ali votshe va ku nzumani va li pfako mbimo yi muonhi a ti solako! Tate wathu wa nzumani Jehovha wa tsaka ngutu otshe makhambi aya nvuta ayi yi nga mwalala yi tshumelelako dibanzani. Ni ku, lirando lathu ngu Jehovha la engeteleka ngutu mbimo yi hi alakanyisisako ngu wuxinji, wumbilu ni wunene wakwe awe wu si hi faneliko.—Luka 1:78.