Mpostoli Paulo a bhatele tiya makristu a Tesalonika: “Ngako m’thu atxi kanyisa ati hi bhalako ka dipapilo diya, muwonisiseni.” (2 Vat. 3:14) Kale hi txi womba ti to ewo m’kongomiso i para madhota. Ngako m’thu atxo simama e kanyisa matshina a mlayo ya mu ka Bhiblia, hambi msana kova adi mani txivhuno makhambi o tala, yimwani mbimo madhota ma ndi na maha dixkursu dibanzani me womba-womba ngu mhaka yoneyo. Khukhela koneho, vahuweleli va si na kutipata ni m’thu eneyo hahanze ka kuva va di mitshanganoni mwendo kutxhumayelani.

Kambe ta laveka ku hi txitxa mapfisiselo ya ndimana yiya. Konku hi pfisisa ti to txialakanyiso txa mpostoli Paulo txi womba-womba ngu txisungo atxi mkristu mmwani ni mmwani a fanelako kumaha ka siemo so kari. Se kha ku na txilaveko txa ti to madhota me maha dixkursu me womba-womba ngu mhaka yoneyo. Kambe ngu kutxani ku di mahilwe kutxitxa koneko? Wona ti Paulo a nga ti womba-womba ngu tona mbimo yi a nga ti ningela txialakanyiso txiya.

Paulo a wombile ti to vamwani ka dibanza da Tesalonika va si ‘londisi mlayo.’ Paulo a ti ningile vamwani va dibanza dileya sialakanyiso so kari asi singa ti seketetwe mu ka Bhiblia, kambe vona va si ti lavi kusi engisa. Mbimo yi a nga va endela ka dikhambi dimwani msana, Paulo ava ningile txialakanyiso txiya: “Awu asi ti laviko kuthuma kha nga ni fanela ya kudya.” Vamwani va txi ngadi va txi lamba kuthuma kasiku ve ti hanyisa hambi va di ni wusikoti wo maha toneto. Hahanze keto vona va ti dhunda ku ti beta ka timhaka ti ti si va lumbiko. Se makristu ma ndi na mñolisa kutxani mkristu awu asi londisiko mlayo?—2 Vat. 3:6, 10-12.

Paulo a wombile tiya: “Muwonisiseni.” Dipswi di di ku muwonisiseni ngu txigrika di txhamusela kutumbula m’thu eneyo asi londisiko mlayo kasiku hi tiwonela ku hi si eteteli mahanyelo akwe. Paulo a ningete txialakanyiso txonetxo ka dibanza dotshe, i singa ka madhota basi. (2 Vat. 1:1; 3:6) Se mkristu mmwani ni mmwani awu a wonako mwanathu mmwani asi engisi txialakanyiso txonetxo txa dipswi da Txizimu, a ndi na ti mahela txisungo txo ‘ema kutipata’ ni m’thu eneyo asi engisiko mlayo.

Ina eto ti lava kuwomba ti to m’thu eneyo andi ñolwa kota m’thu wo thaviswa dibanzani? Ahim-him. Nguko Paulo a tshumete e womba tiya: “Aniko mlayeni nga mwananu.” Se mkristu mmwani ni mmwani a nga womba-womba nayo ka mitshangano ya dibanza ni ka mthumo wo txhumayela kambe a nga sawula kwa mbi tipata nayo ka mitshangano yo sakana. Ngu konaha katxani? Paulo a wombile tiya: “Kasiku a na wiswa tingana.” Ngako hi txi vayilela mwnathu eneyo, ti nga maha e theleka tingana ngu ti ati mahako, e zama kutxitxa mahanyelo akwe.—2 Vat. 3:14, 15.

Makristu ma ti zivisa kutxani ti to i mbimo yayinene yo vayilela mwanathu eneyo? Txo khata hi fanete kutsaniseka ti to mahanyelo ya m’thu eneyo ngu ditshuri ma kombisa ti to “kha londisi mlayo” nga ha Paulo a nga txhamusela ngu kona. Paulo a si wombawombi ngu vathu ava va ku ni mawonelo o hambana ni yathu ti txi ta ka mhaka ya livhalo mwendo ka ti m’thu ati dhundako. Nem a si wombawombi ngu vathu va va nga thukako ve hi henyisa. Hahanze keto, Paulo ati womba-womba ngu vathu va va sawulako kwa mba engisa sialakanyiso sa hakubasani sa dipswi da Txizimu khakwenye.

Nyamsi, ngako hi txi wona ti to mwanathu a kombisa moya wa kwa mbi engisa ni kusimama e kanyisa sialakanyiso sa dipswi da Txizimu, a hi nga ti mahela txisungo txa kwa mbi tipata ni m’thu eneyo ka mitshangano yo hungula mwendo kwambi sakana nayo, kambe hi nga womba-womba ni m’thu eneyo hi di mitshanganoni mwendo kutxhumayelani. Aku etxo i ku txisungo txa m’thu apune, kha ha fanela kuwombawomba ni m’thu mmwani ngu mhaka yoneyo, i singa va mwaya wathu wa hafuhi. Ngako m’thu eneyo atxi txitxa mapimiselo ni mahanyelo akwe hi nga tshumela hi tipata nayo ngaha hi nga ti maha ngu kona kale.