1, 2. Ngu kutxani i di wutxhari kuengisa Mvangi wathu hi txi sawula ati hi no maha ngu wutomi wathu? (Wona mifota yi yi ku makhatoni.)

NGAKO u di mphya, wa mana sialakanyiso so tala mayelano ni wumangwana wako. Vagondisi, maxaka ni vathu vamwani ti nga maha va txi kugela ti to u fanete u bela ka sikolwa sa hombe mwendo u lava kurso ayi yi no kuvhuna ti to u mana male yo tala. Kambe Jehovha a ku ninga txialakanyiso txo hambana. Ditshuri ti to, Jehovha a lava u ti karata txikolwani ti to u mana nzila yo ti khatalela. (Vakolosa 3:23) Kambe wa tiziva ti to aku u ku mphya, ti lava u maha sisungo sa lisima asi si no gwesa wutomi wako mbimo yi yi tako. Ngu toneto, ene a ku ninga milayo ayi yi no kuvhuna ti to u hanya wutomi awu wu mu tsakisako ka masiku awa a magwito.—Matewu 24:14.

² U nga divali ti to Jehovha a ziva totshe. Wa ti ziva ati ti no humelela mbimo yi yi tako, futhi wa ti ziva kwati to i  mbimo muni yi nga sala ti to magwito me hoka. (Isaya 46:10; Matewu 24:3, 36) Awe wa ziwa ngu Jehovha. Wa ti ziva ati ti no kutisela litsako ni ti ti no kutisela sikarato. Wusungukati wa vathu wu nga pfala nga mbwa wunene, kambe ngako wu sa seketelwa mu ka Dipswi da Txizimu, hi nga wa wutxhari.—Mavingu 19:21.

3, 4. Aku Adhamu ni Evha va nga mbi engisa Txizimu, ngu yihi wuyelo va nga yi mana vona ni vanana vawe?

³ Sialakanyiso so biha i kale si diho. Sathani ngene wo khata kuninga vathu txialakanyiso txo biha. A gete Evha ti to ene ni Adhamu va ndi na tsaka ngako va txi ti mahela sisungo sa wutomi vapune. (Genesisi 3:1-6) Kambe Sathani atxo alakanya ngu ngene dwe! Ene a ti lava ti to Adhamu ni Evha kupata ni vanana vawe ve engisa ni kukhozela ene i si nga Jehovha. Sathani asi khali ku va mahela txilo vathu. Jehovha ngene a nga ti va ningile sotshe si va nga ti naso. A va ningile ku va mwamna ni msikati, e va ninga jaradhi yo tshura, mimidi yo hetiseka ti to ve hanya kala kupinduka.

⁴ Dikhombo da kona, Adhamu ni Evha kha va engisa Txizimu. Ngu toneto, va ti hambanisile ni Wu a nga va ninga wutomi. Ku ve ni wuyelo yo biha. Kufana ni siluva si si nga wilwa, Adhamu ni Evha va kumbile ve tshumela ve fa. Vanana vawe va xanisekile ni vona, kupata ni nathu. (Varoma 5:12) Wungi wa vathu nyamsi va kanyisa ati Txizimu txi wombako, ve maha a ti va ti tsakelako. (Vaefesu 2:1-3) Ngu yihi wuyelo ya kona? Bhiblia yi womba ti to “kha ku nga ni wutxhari” ngako vathu va si engisi Jehovha.—Mavingu 21:30.

5. Nji txani atxi Jehovha a nga ti tsaniseka ngu txona ka vathu? Ti wonekisa kutxani ti to eto ditshuri?

⁵ Jehovha a ti tsaniseka ti to ku ndi na va ni vathu, kupata ni vaphya vo tala, ava va ndi no lava kugonda ngu ngene ni ku mthumela. (Masalmo 103:17, 18; 110:3) Vaphya vonevo mba lisima ngutu ka Jehovha! Ina awe u mmweyo wawe? U di mmweyo wawe, ngu ditshuri wa tibusa ngu “sihiwa” so tala sa Jehovha, ni ku eto ti engetela litsako lako. (Lera Masalmo 103:5; Mavingu 10:22) Hi na bhula ngu sihiwa soneso sa muni. I ku, sakudya sa moya, vangana va vanene, makungo a manene ni mkhululeko wa ditshuri.

6. Ngu kutxani hi di fanete kukhatalela txilaveko txathu txa moya? Nji txani si Jehovha a hi ningako ti to si hi vhuna?

⁶ Ku hambana ni sihari, athu hi ni txilaveko txa moya ni txo ziva Mvangi wathu. (Matewu 4:4) Mbimo yi hi engisako Jehovha hi mana wuzivi, wutxhari ni litsako. Jesu a ti khene: “Va katekile ava i ku sisiwana moyani, nguko Mfumo wa nzumani mbwawe!” (Matewu 5:3) Txizimu txi hi ningile Bhiblia ni ku txi thumisa “txithumi txo thembeka na a di ni wutxhari” ti to txi hi ninga mabhuku ya ma hi vhunako kutsanisa likholo lathu. (Matewu 24:45) Mabhuku onewo hi ma dhana ku nzakudya sa moya nguko ngu ona ma nonisako likholo lathu ni kutsanisa wuxaka wathu ni Jehovha. Ha ti busa ngu sakudya sa moya so hambana-hambana asi hi ku naso!—Isaya 65:13, 14.

7. Sakudya sa moya so ta ngu ka Txizimu si na kuvhunisa kutxani?

 ⁷ Sakudya sa moya si kuninga wutxhari ni wusikoti wo pimisa kwati, ati ti nga kuvhikelako ngu tinzila to tala. (Lera Mavingu 2:10-14.) Ngu txikombiso, tifanelo toneto ti nga kuvhuna ku u tumbula ati i ku makuhu, to fana ni ku kha ku nga ni Txizimu mwendo ku hi nga tsaka ngako hi di ni male ni silo so tala. Ti nga tshumela ti kuvhuna kuvayilela minavelo ni mikhuwo yi yi nga ku dayisako. Ngu toneto, ti karati ti to u va wo txhariha ni kupimisa kwati. Ngu magwito u na ti wona upune ti to Jehovha wa kudhunda ni ku a ku navelela ta tinene.—Masalmo 34:8; Isaya 48:17, 18.

8. Ngu kutxani u di fanete kutshuketa hafuhi ni Txizimu konkuwa? Toneto ti na ku wuyelisa ngu nzila yihi mbimo yi yi tako?

⁸ I si nga kale ditiko da Sathani di na loviswa. Jehovha ngene basi a no hi vhikela ni ku hi ninga silo si hi si lavako, asi si patako sakudya sa ditshiku ni ditshiku. (Habhakuki 3:2, 12-19) Konkuwa i mbimo yo tshuketa hafuhi ni Txizimu ni kutsanisa themba yathu kwakwe. (2 Pedro 2:9) Se ngako u txi maha toneto, ku si nga ni mhaka ni ti ti no kuhumelela, u na tipfa kufana ni Dhavhidha, awu a nga khene: “Yotshe mbimo ni na ni MKOMA masoni kwangu; kha ni na mbi dhukiswa ngu txilo, nguko ene a ka didhawa dangu da txinene.”—Masalmo 16:8.

9. a) Ngu kuya ngu Johani 6:44, nji txani atxi Jehovha a txi mahako? b)  Ngu lihi lisima lo ziva m’thu wu a zivako ditshuri?

⁹ Ngako u txi tshangana ni m’thu ngu dikhambi do khata awu asi ziviko ditshuri, khu lavi kuziva to tala ngu ngene. Ti nga maha u txi lava kuziva ditina dakwe ni mazumbelo akwe dwe. Kambe ta hambana ni wu a zivako ditshuri. Wa tiziva ti to ene wa dhunda Jehovha. Wa ti ziva ti to Jehovha  a woni ta lisima kwakwe ni ku a mrambile ti to e ta va txiro txa mwaya wa vakhozeli vakwe. (Lera Johani 6:44.) Ti si nga ni mhaka ni mu a nga velekelwa kona mwendo mu a tako ngu kona, awe se wa ziva to tala ngu ngene, nene wa ziva to tala ngu ngawe!

10, 11. Ngu tihi ti vathu va Jehovha va fanako ka tona? Eto ti ku gwesisa kutxani?

¹⁰ Mbimo yi u mananako ni m’thu wu i ku Fakazi, wa tiziva ti to ku ni to tala ta lisima a ti mi fanako ka tona. Wa ti ziva ti to hambi mi txi bwabwata tidimi to hambana, ‘sisofu sanu si sawulekisilwe,’ si bwabwata lidimi limwelo la ditshuri. (Zefaniya 3:9) Eto ti womba ti to motshe mi kholwa ka Txizimu, mi hanya ngu milayo yimweyo ni ku mi ni themba yo fana ya mbimo yi yi tako. Toneto ta mi vhuna ku mi thembana ni ku aka wungana wo tsana awu wu no zumba kala kupinduka.

¹¹ Ngako u txi khozela Jehovha, ngu ditshuri u nga womba ti to u ni vangana va vanene. U ni vangana ha mafuni kotshe, hambi u si khali kumanana navo! Ina vaho vamwani u va zivako i si nga vathu va Jehovha ava va ti busako ngu ningo yi ya yo sawuleka?

12. Ngu yahi makungo aya u nga ti vekelako ona?

¹² Lera Ekleziyaste 11:9–12:1. Ina u ti vekete makungo aya u zamako ku ma hokelela? Ti nga maha i di o lera Bhiblia ditshiku ni ditshiku mwendo kuxamula ni ku va ni sienge mitshanganoni. Kutilava u zama kuthumisa ngutu Bhiblia u di kutxhumayelani. U ti pfisa kutxani ngako u txi wona ti to wa hokelela makungo ako mwendo va txi kundunduzela ngu vamwani? Ngu ditshuri wa tsaka! Ngu kutxani? Nguko u maha ti Jehovha a ti lavako, kufana ni Jesu.—Masalmo 40:8; Mavingu 27:11.

13. Kuthumela Txizimu ti ni lisima kupinda ku ti vekela makungo a timhaka ta mafu ngu nzila yihi?

¹³ Ngako u txi veka mapimo ako ka mthumo wa Jehovha, u maha mthumo awu wu no kuninga litsako u tshumela u va ni themba. Paulo a ti khene: “Zumbani mi di tsani, mi si xulwi ngu txilo. Khutalani mi txi ya masoni ka m’thumo wa Mkoma, na mi txi ti ziva ti to, masoni ka Mkoma m’thumo wanu hi nga wa mahala.” (1 Vakorinto 15:58) Kambe ngako vathu va txi ti vekela makungo a timhaka ta mafu, to fana ni ku va ni male yo tala ni nduma, ngu ditshuri kha va li mani litsako. Hambi va txo humelela, kha va eneliseki. (Luka 9:25) Eto hi nga ti wona ti to hi nga makuhu ka ti ti nga humelela Mkoma Solomoni.—Varoma 15:4.

14. U gonda txani ka ti Solomoni a nga duketa kumaha?

¹⁴ Solomoni a ti ganyile kupinda vathu votshe ni ku i ti mkoma wa hombe, ene a duketile to maha. A ti gete tiya: “Ngono, ni ta kuduka ngu kutsaka; ti phine ngu litsako [ti to u wona ku ngu yihi wuyelo ya kona, NM].” (Ekleziyaste 2:1-10) Se Solomoni a to aka tinyumba to dhula ngutu, e hamba ni majaradhi o tshura ni makhalo o pepa ka wona ni txihi atxi a nga txi lava. Ina a enelisekile ni kumana litsako? Mbimo a nga gwita e wona totshe ti a nga mahetela, a ti khene: “Kambe wona taku eto  ni tona i ti ti wukanganyisi.” A tshumete a txi khene: “Totshe i ti ti wukanganyisi.” (Ekleziyaste 2:11) Ina u gonda txo kari ka ti Solomoni a nga duketa kumaha?

15. Ngu kutxani ti txi laveka ku va ni likholo? Ngu kuya ngu Masalmo 32:8, lona li na kuvhunisa kutxani?

¹⁵ Vathu vamwani va gonda to kari va txi maha tiphazamo se ve gwita ve va ni wuyelo yo panda. Eto hi nga tona ati Jehovha a lavako ti humelela ngu ngawe. Ene a lava u mu engisa. Eto ti lava likholo, kambe khu na mbi thuka u ti sola ngu sisungo asi u nga maha ngu mhaka ya likholo. Futhi Jehovha a na mbi thuka e divala ‘lirando li u nga li kombisa ka ditina dakwe.’ (Vahebheru 6:10) Ngu toneto, tikaratele kuva ni likholo lo tsana. Ngu magwito, u na maha sisungo sa sinene ka wutomi u tshumela u ti wona upune ti to Tate wako wa nzumani a lava ati i ku ta tinene kwako.—Lera Masalmo 32:8.

16. Ngu kutxani hi di fanete hi ninga lisima mkhululeko ni ku wu thumisa ngu wutxhari?

¹⁶ Paulo a ti khene: “Se aha ku ku ni moya wa Mkoma, ku ho kutxhatxheka.” (2 Vakorinto 3:17) Jehovha wa wu dhunda mkhululeko, se nawe u nga sikota ku wu dhunda. Kambe ene a lava ti to u thumisa mkhululeko wako ngu nzila ya wutxhari ayi yi no kuvhikela. Ti nga maha titanga tako ti txi xalela sithombe sa vathu va i ku simbwiri, ti txi geleza, tibela ka misakano yi yi ku ni phango mwendo ve dhaha ni kusela ngutu. Makhatoni ti nga woneka nga ta tsakisa, kambe ti nga va tisela malwati, wudevi mwendo lifo. (Vagalatiya 6:7, 8) Vaphya vo tala va ku ka timhaka toneto, va nga pimisa ti to va khululekile, kambe va wukhumbini.—Titosi 3:3.

17, 18. a) Kuengisa Txizimu ti hi khulula ngu nzila yihi? b) Ti mahisa kutxani ti to mkhululeko awu Adhamu ni Evha va nga ti nawo wu pala wa vathu nyamsi?

¹⁷ Ngu didhawa dimwani, kuengisa Jehovha ndinene kwathu. Ti hi ninga dihanyo da dinene ni mkhululeko. (Masalmo 19:7-11) Se ngako u txi thumisa mkhululeko ngu nzila ya wutxhari, i ku ti to mbimo yi u sawulako kuengisa milayo ni matshina a milayo ya Txizimu, u komba Txizimu ni vaveleki vako ti to u ni wutixamuleli. Vaveleki vako va na kuthemba ni ku kuninga mkhululeko wa hombe. Jehovha a thembisa malanda akwe o thembeka ku va ninga mkhululeko wo hetiseka, awu Bhiblia yi wu dhanako ku i mkhululeko wa “wudhumo wa vanana va Txizimu.”—Varoma 8:21.

¹⁸ Mkhululeko wonewo ngu wu Adhamu ni Evha va nga ti nawo. Ka jaradhi ya Edheni, ku ti ko va ni tximwetxo dwe atxi Txizimu txi nga ti va gete ku va nga mahi. Va sa fanela ve dya m’hando wa mndonga wo kari. (Genesisi 2:9, 17) Ina u alakanya ti to Txizimu txi ti ko karatisela timhaka ngu mlayo wonewo? Lambi! Alakanya ti to milayo yingahi ayi vathu va mahelako vamwani ve tshumela ve va sinzisa ku yi  engisa. Kambe, Jehovha a ti ningile Adhamu ni Evha mlayo wumwewo dwe.

19. Jehovha ni Jesu va hi gondisa txani ti to hi va ni mkhululeko?

¹⁹ Jehovha a hi ñola ngu nzila ya wutxhari. Hahanze ko hi ningetela milayo yo tala, ngu kutimisela ene a hi gondisa kulondisela mlayo wa lirando. Ene a hi gondisa kuhanya ngu milayo yakwe ni kuvengela to biha. (Varoma 12:9) Ka Gondo ya Mmangoni, Jesu a hi vhuni kupfisisa ti to ngu kutxani vathu va txi maha to biha. (Matewu 5:27, 28) Ka mafu a maphya, aku Jesu a no va Mkoma wa Mfumo wa Txizimu a na simama e hi gondisa kuwona ta tinene ni to biha nga ti ene a ti wonisako tona. (Vahebheru 1:9) Jesu a na maha ti to mimidi ni mialakanyo yathu si hetiseka. Alakanya ati ti no mahisa tona mbimo yi hi no mbi thuka hi dukwa kumaha to biha nem hi si xaniseki ngu mhaka yo mbi hetiseka. Ngu magwito, hi na ti busa ngu mkhululeko ‘wa wudhumo’ awu Jehovha a wu thembisako.

20. a) Jehovha a wu thumisisa kutxani mkhululeko wakwe? b) U nga mu etetelisa kutxani?

²⁰ Hambi ka mafu a maphya mkhululeko wathu wu na ta va ni mihingano. Ngu nzila yihi? Hi na simama hi kongomiswa ngu kuranda Txizimu ni vathu. Jehovha a lava hi mu etetela. Hambiku ene a ku ni mkhululeko wo mbi na mihingano, ene a sawula kuleka lirando li kongomisa totshe ati a mahako, kupata ni nzila yi a hi ñolako ngu yona. (1 Johani 4:7, 8) I ku ti to, ngako hi txi lava ku va ni mkhululeko wa ditshuri, ti lava hi etetela Jehovha, ngu kuleka lirando li hi kongomisa ka totshe.

21. a) Dhavhidha a ti pfisile kutxani ngu Jehovha? b) Hi na bhula ngu txani ka msungo wu wu londiselako?

²¹ Ina wa bonga Jehovha nguko a nga kuninga sotshe asi i ku sa sinene? Ene a ku ningile sakudya sa moya, vangana va vanene, makungo a manene, themba yo va ni mkhululeko wo hetiseka mbimo yi yi tako kumweko ni tiningo timwani ta tinene. (Masalmo 103:5) Ti nga maha u txi ti pfa kufana ni Dhavhidha awu a nga khongela ka Masalmo 16:11 a txi khene: “U na ni komba nzila ya wutomi; masoni kwako ku tate litsako; ka dianza dako da txinene, ku ni kuzumbiseka ko mbi gwita.” Ka msungo wu wu londiselako hi na ta gonda ditshuri dimwani da lisima di ku ka Masalmo 16. Eto ti na kuvhuna kuwona ti to u nga wu manisa kutxani wutomi wa wunene ngutu!