DIANA se a ni malembe ya ma pindako 80, ene a xuphekile ngutu malembenyana awa. Mwamna wakwe a nga ti lwala ngu Alzheimer (malwati a msungo) a ti zumba ka wukhalo wo khatalela valwati, se a fite. A fetwe ngu vanana vambidi, e tshumela e va ni wulwati wa câncro da mama. Kambe, mbimo yi a ku mitshanganoni ni ka mthumo wa thembwe, Diana a zumba a di tsakile.

John a hetile 43 wa malembe i di muwoneleli wa txigava. Ene a ti txi dhunda txiavelo txakwe ni ku a si pimisi to a nga thuka e ningwa txo hambana. Hambi keto, ti lavile e ema ti to e ya khatalela dixaka dakwe di nga ti lwala. Kambe mbimo yi John a nga ti tshangana ni vanathu ka mitshangano ya hombe, a sa txitxa. A ti ngadi a di tsakile ngutu.

Ti kotekisa kutxani ti to Diana ni John ve va ni litsako? Ti nga mahisa kutxani ti to m’thu wu a xanisekako e tsaka? Ti mahisa kutxani ti to m’thu e mana litsako hambi a di lekile txiavelo txi a txi dhundako? Bhiblia ya xamula. Yi womba tiya: “M’thu wamnene a mana litsako ka MKOMA.” (Masalmo 64:10) Hi nga pfisisa kwati ditshuri donedo ngako hi txi ziva ti to nji txani txi no hi ninga litsako lo mbi na magwito ni txi txi no mbi hi ninga.

Silo simwani si tolovela ku mbimo yotshe si tisa litsako. Ngu txikombiso, litsako la vathu va va ku ngadi kutekana. Mwendo litsako li li manwako ngu m’thu wu a nga veleka mwanana mwendo awu a nga mana txiavelo txa txiphya ka mthumo wa Jehovha. Totsheleleto ta tsakisa nguko ndiningo ati ti tako ngu ka Jehovha. Ene a hi ningile ningo yo tekana, kuveleka vanana ni mithumo ka sengeletano yakwe.—Genesisi 2:18, 22; Masalmo 127:3; 1 Timoti 3:1.

Hambi keto, silo simwani si si tisako litsako si nga va sa mbimo ya yidotho. Dikhombo da kona, ti nga maha mngana wa wukati a si thembeki mwendo e fa. (Ezekhiyele 24:18; Hoseya 3:1) Ti nga maha vanana va si engisi vaveleki ni Txizimu, mwendo ve tshumela ve thaviswa  dibanzani. Ngu txikombiso, vanana va Samuwele va sa thembeka ka Jehovha, Dhavhidha a vite ni sikarato so tala sa mwaya nguko a nga maha txionho ni Bhate-Sebha. (1 Samuwele 8:1-3; 2 Samuwele 12:11) Ngako eto ti txi humelela ti wusa mirongo ni kupanda ka hombe.

Ngu kufana, mbimo yimwani ti nga lava hi leka txiavelo txathu ka mthumo wa Jehovha nguko hi lwalako mwendo ti txi lava hi ya khatalela dixaka dathu mwendo ngu mhaka ya kutxitxa ko kari ka sengeletano. Wungi wa va ti nga lava ve leka siavelo sawe, va khona va xuva litsako ali si nga ti va tisela.

Ti ha kubasani ti to sivangelo simwani sa litsako hi nga sa kala kupinduka. Kambe, ina ku ni litsako ali li simamako hambi ku di ni sikarato sa wutomi? Liho, nguko Samuwele, Dhavhidha ni vamwani kha va mwalalelwa ngu litsako mbimo yi va nga manana ni sikarato.

Jesu a ti ti ziva ti to litsako li tshambisa kutxani. Na a si se ta ha mafuni, Bhiblia yi womba ti to ene a ti “zilimuka masoni kwakwe [Jehovha] yotshe mbimo.” (Mavingu 8:30) Kambe, mbimo yi a nga ti ha mafuni, ku ni mbimo yi ti nga lava e wonisana ni sikarato sa hombe. Hambi keto, Jesu a mani litsako ngu kumaha kuranda ka Tate wakwe. (Johani 4:34) Ani mbimo yi a nga ti dawa ko? Bhiblia yi womba tiya: “Ngu mhaka ya litsako li a nga ti veketwe masoni kwakwe ene a tsanisete phande ya xanisa.” (Vahebheru 12:2, NM) Hi nga mana gondo ya lisima ka timhaka timbidi ati Jesu a nga womba ngu litsako la ditshuri.

Ditshiku dimwani, vagondiswa va Jesu va 70 va ti yite kutxhumayelani. Mbimo yi va nga wuya va ti tsakile ngutu ngu ti va nga ti mahile, phela va ti hinga ni madhimoni. Kambe Jesu a va gete tiya: “Mi nga tsakeni ngu kuva mimoya yi mi thava, aniko tsakani nguko matina anu ma bhatwe nzumani.” (Luka 10:1-9, 17, 20) Ngu ditshuri, kumana kuamukelwa ngu Jehovha nga lisima ngutu, futhi ku tisa litsako la hombe kupinda kumana txiavelo txo kari txo sawuleka.

Dikhambi dimwani Jesu a txi gondisa dibutho, wamsikati mmwani wa Mjudha a xamate ngu magondiselo akwe aha ko za txi khene mame wakwe a tsakile ngu kuva ni mwanana wo nga Jesu. Kambe Jesu a to mu xamula a txi khene: “Kambe ngutungutu va katekile ava va  engisako dipswi da Txizimu, va txi di vekisa.” (Luka 11:27, 28) Ku ti guleta ngu vanana vathu ti nga hi tisela litsako. Kambe ati ti hi tiselako litsako la mbimo yotshe ngu engisa Jehovha ni kuva ni wuxaka wa wunene nayo.

Ha tsaka ngutu hi txi pfa to Jehovha wa tsakiswa ngu ngathu. Se, hambiku sikarato si si tsakisiko, kha si na ku hi tekela matipfelo onewo. Ngu ditshuri, hi txi simama hi thembeka ngu mbimo ya sikarato, litsako lathu la engeteleka ngutu. (Varoma 5:3-5) I si ngeto dwe, Jehovha a ningela moya wakwe wo sawuleka ka vale va mthembako, ni ku litsako wumwani wa mihando ya moya. (Vagalatiya 5:22) Eto ti hi vhuna kupfisisa ti to ngu kutxani Masalmo 64:10 yi txi khene: “M’thu wamnene a mana litsako ka MKOMA.”

Atiya ti tshumela ti txhamusela ku ngu kutxani Diana ni John va nga simama ve tsaka hambi va txi wonisana ni sikarato. Diana a khene: “Ni thavela ka Jehovha, kufana ni ku mwanana a yako ka m’veleki wakwe.” A tshumela a txi khene: “Ni pfa ti to a ni katekisile ngu wusikoti wo simama ni txhumayela mbimo yotshe ngu litsako.” Nji txani txi nga vhuna John ti to e zumba a di tsakile ni kuñoleka ngu wuthumeli wakwe msana ko gumelwa ngu txiavelo txakwe? A khene: “Kukhukhela ngu 1998 mbimo yi ni nga avelwa ku va m’gondisi wa Txikolwa txa Magwenda, ni maha ngutu gondo yangu nipune kupinda kale.” Ene a khene kutxitxa aku ene ni msikati ti nga lava ve kumaha kha ka karata nguko va ti tiemisete kumaha tihi ni tihi ati Jehovha a va rumako tona. A khene: “Hi mahile toneto na hi si tisoli.”

Vanathu vo tala va ti pfite to ati ti ku ka Masalmo 64:10 ditshuri. Ngu txikombiso, ku ni mpatwa wumwani wu wu nga thuma Bhetele ka Estados Unidos malembe ya ma pindako 30. Wu gwitile wu kombelwa ku va vanyaphandule vo sawuleka. Va wombile tiya: “Kudila u txi luza txo kari txi u txi dhundako, nda mtumbuluko,” va tshumete va txi kha vona: “Kambe u nge dili kala kupinduka.” Neti va nga tsula ka txiavelo txawe va to ya khata kutxhumayela ni dibanza. Va tshumete ve womba tiya: “Hi mahile mikombelo yo kongoma. Msana ko wona xamulo ya mikombelo yathu, hi tsanisilwe ni ku mana litsako. Ka mbimo yi hi nga bwaka ngu yona, vamwani va tekile wunyaphandule, se athu hi katekisilwe ngu sigondo simbidi asi si nga txi kula ngu didhawa da moya.”

Phela hi nga mbimo yotshe ti hehukako kuzumba u di tsakile. Ku ni mbimo yi hi no godhola. Kambe Jehovha a hi tsanisa ngu mapswi a Masalmo 64:10. Hambi hi di ni dikhodho, hi nga tsaniseka ti to hi nga simama hi thembeka ku si nga ni mhaka ni ti ti humelelako, hi na “mana litsako ka MKOMA.” Hi nga tshumela hi emela mbimo ayi txithembiso txa Jehovha txa “mafu a maphya ni tinzuma ta tiphya” txi no hetiseka ngu yona. Msana keto, hotshethu hi na va hi di hetisekile ni ku hi na ‘tsaka hi pfalisa, ngu ha ku si gwitiko’ ngu mhaka ya totshe ati Jehovha a no maha.—Isaya 65:17, 18.

U alakanya ti to eto ti womba txani. Ti womba ku, hi na ta va ni wutomi wo hetiseka ni ku ditshiku ni ditshiku hi na ta wuka hi txi tipfa kwati. Silo so tala asi si hi xanisako, kha si na mbi ta hi vangela kupanda. Jehovha a hi thembisa ti to “ta kale kha ti nambi ngadi ti alakanywa, kha ti nambi ngadi ti wuya mialakanyoni.” Hi na ta amukela maxaka athu aya ma nga fa ni ku hi na ta tipfa kufana ni vaveleki va txihoranana txa 12 wa malembe a txi txi nga wuswa ngu Jesu ava va nga “xamala ngutu.” (Marku 5:42) Ngu magwito, mmwani ni mmwani ha mafuni a na ta va wo lulama ni ku a na ta “mana litsako ka MKOMA” ngu ha ku si gumiko.