VOTSHE vathu va ti lava ku va ni litsako. Kambe masiku awa ngo gwitisa, se hotshethu hi ni sikarato asi si “karatako” kuwonisana naso. (2 Timoti 3:1) Vamwani va mwalalelwa ngu litsako nguku va nga ñolwa ngu nzila yo biha, nguko va lwalako, va nga luza mthumo mwendo kufelwa. Vamwani va mwalalelwa ngu litsako ngu mhaka va nga humelelwa ngu to kari se ti va dhukisa mwendo ku va henyisa. Hambi vakhozeli va Jehovha va nga thuka ve va ni dikhodho se kudotho-kudotho ve gumelwa ngu litsako. Ngako ti txo kuhumelela, u nga mahisa kutxani ti to u tshumela u va ni litsako?

Kasiku hi xamula txiwotiso txiya, ti lava hi khata ngu kupfisisa ti to nji txani litsako ni ti to vamwani va nga simamisa kutxani ve va ni litsako hambi va txi wonisana ni sikarato. Msana keto, hi na wona ti to hi nga li nga kulisisa kutxani litsako lathu.

Phela litsako kha ti wombi kuzumba u txi sekelela mwendo kusakana. Alakanya ngu m’thu wu i ku didevi, tximwani ni tximwani txi mahekako ene o seka. Kambe mbimo yi wusuke wu gumako hahanze ko e sekelela, o tisola mwendo kuva ni sikarato so tala. Maseko akwe i ti a mbimunyana i singa litsako la ditshuri.​—Mavingo 14:13.

Kambe litsako i matipfelo ya hi ku nawo mbiluni kwathu ngako hi di mahile mwendo kuemela to mmaha ti i ku ta tinene. Kuva ni litsako ti womba kutsaka hambi hi di ka siemo sa sinene mwendo so biha. (1 Vatesalonika 1:6) Ti nga maha hi txi wonisana ni txikarato kambe ngu mbimo yoneyo hi tipfa hi di tsakile. Ngu txikombiso, vapostoli va Jesu va pekilwe nguku va nga ti txhumayela mahungu a manene. Hambiketo, vona va “to huma ngu dibanzani ka wukoma, na va txi tsaka ngu kumaneka va di ha mtengoni ka vale va ku ni fanelo yo xupheka ngu mhaka ya ditina da Jesu.” (Mithumo 5:41) Kha va tsaka ngu ku va nga pekwa kambe nguku va nga sikota kusimama va di thembekile ka Txizimu.

Phela litsako hi nga txo mmaha txi hi ngo velekwa natxo mwendo txi txi ko titela txipuni. Ngu kutxani hi txi womba eto? Nguko litsako la ditshuri njienge txa mihando ya moya wo sawuleka wa Txizimu. Moya wa Txizimu wu na hi vhuna kukulisa “m’thu wa m’phya,” awu a patako litsako. (Vaefesu 4:24; Vagalatiya 5:22) Se ngako hi di ni litsako, ti na hi hehukela kutsanisela sikarato.

Jehovha a ti lava ti to mafu me va wukhalo wo tshura i singa ti ma nga zumbisa tona nyamsi. Kambe hambiku vathu va mahetelako to biha, Jehovha kha gumelwa ngu litsako lakwe. Bhiblia yi khene: “Mtamo ni litsako si ha wukhaloni kwakwe.” (1 Makronika 16:27) I singeto dwe, silo sa sinene si malanda a Jehovha ma si mahako sa m’tsakisa.​—Mavingu 27:11.

Nathu hi nga duketa kutekelela Jehovha ngu kwa mbi gumelwa ngu litsako lathu hambi ku txi humelela timhaka ti hi nga sa ti emela. Hahanze ko hi karateka, hi nga vekisa mapimo athu ka silo si hi ku naso konkuwa ni ku emela ngu kutimisela  silo sa singi ka mafu a maphya. *​—Wona txhamuselo ya hahatshi.

Hi na gonda ngu sikombiso sa mu ka Bhiblia sa vathu va va nga xayisa litsako lawe ti singa ni mhaka ni sikarato sawe. Ngu txikombiso, Abrahamu a xayisile litsako hambi mbimo yi wutomi wakwe wu nga di ha dikhomboni ni mbimo si vathu va nga mu vangela sikarato. (Genesisi 12:10-20; 14:8-16; 16:4, 5; 20:1-18; 21:8, 9) A ti kotisile kutxani toneto? Ngu ku alakanyisisa ngu themba yo ta hanya ka mafu a maphya hahatshi ka mfumo wa Mesiya. (Genesisi 22:15-18; Vahebheru 11:10) Jesu a ti khene: “Abrahamu, tate wanu, a tsakete kuwona ditshiku dangu, se a di woni e nengela.” (Johani 8:56) Nathu hi nga tekelela Abrahamu nguko alakanyisisa ngu litsako li hi no va nalo mbimo yi yi tako.​—Varoma 8:21.

Paulo ni Silasi va ve ni likholo lo tsana ni kuxayisa litsako lawe ti singa ni mhaka ni sikarato si va nga manana naso. Ngu txikombiso, msana kova va di pekilwe ve tshumela ve khotelwa jele, vona “va khongete ni kudhumisa Txizimu ngu tindando.” (Mithumo 16:23-25) Va si koti kutimisela sixaniso nguko va nga alakanya ngu txithembiso txa Txizimu txa mbimo yi yi tako. Kuziva to va xaniswa ngu mhaka ya ku va londetelako Kristu ti va ningile litsako la hombe. Nathu hi nga fana ni Paulo ni Silasi ngu kukhumbula wuyelo ya yinene yi hi yi manako nguko hi thumelako Txizimu ngu kuthembeka.​—Vafilipiya 1:12-14.

Ni nyamsi ku ni sikombiso sa vanathu va va nga xayisa litsako lawe ti singa ni mhaka ni sikarato sawe. Ngu txikombiso, ngu Novembro wa 2013, txingulo txa hombe txi txi dhanwako ku i Haiyan txi onhetete tinyumba ti ti pindako 1.000 ta Tifakazi ta Jehovha ta khe Filipinas. George, wu a nga onhelwa nyumba yakwe ka didhoropa da Tacloban, a ti khene: “Ku singa ni mhaka ni ti ti nga humelela, vanathu va tsakile. Kha ni tikoti kutxhamusela litsako li ni li pfako.” Kupimisa ngu ti Jehovha a nga hi mahela ni kusimama hi m’bonga, ti na hi maha hi xayisa litsako lathu hambi hi di ni sikarato sa hombe. Ngu sihi simwani si Jehovha a hi ningako asi si hi ningako txivangelo txo tsaka?

Wuxaka wathu ni Jehovha ngu txona txivangelo txa hombe txi txi hi mahako hi tsaka. Ha m’ziva Mkoma wa mafu otshe. Ene i Tate, Txizimu, ni Mngana wathu!​—Masalmo 71:17, 18.

Hi tshumela hi bonga Jehovha nguko a nga hi ninga wutomi ni wusikoti wo tidila ngu wona. (Ekleziyaste 3:12, 13) Ngu mhaka ya ku ene a nga hi tshuketisa hafuhi kwakwe, hi nga sikota kupfisisa kudhunda kwakwe ni kuziva txikongomelo txa wutomi wathu. (Vakolosa 1:9, 10) Kambe vathu vo tala kha va txi pfisisi txikongomelo txa wutomi. Kasiku e kombisa kuhambana koneko, Paulo a ti khene: “‘Nzimaha si hambi maso ma si si kotiko ku si tshanganisa, hambi tinzeve ti si si kotiko ku si engisa, hambi mialakanyo ya m’thu yi si si kotiko ku si pima, asile Txizimu txi nga lulamisela avale va txi dhundako.’ Aniko, kwathu, Txizimu txi si wonekisile ngu Moya wa txona wo Sawuleka.” (1 Vakorinto 2:9, 10) Kupfisisa kudhunda ka Jehovha ni txikongomelo txakwe ti hi ninga litsako.

Jehovha a hi mahete timhaka ta lisima ngutu. Ene a mahile ti koteka ti to hi divalelwa sionho sathu. (1 Johani 2:12) Ene a hi ningile themba ya ti to i singa kale hi na hanya ka mafu a maphya. (Varoma 12:12) Konkuwa a hi ninga vangana vo tala ava hi nga m’khozelako hi di navo. (Masalmo 133:1) Ene wa hi vhikela ka Sathani ni madhimoni akwe. (Masalmo 91:11) Kualakanyisisa ngu silo soneso so xamalisa asi Jehovha a nga hi ninga, ti hi maha hi tsaka.​—Vafilipiya 4:4.

Ina ti nga koteka ti to Mkristu wu a nga tsaka e engetela litsako lakwe? Jesu a ti khene: “Ni mi gete mhaka yiya, kasiku litsako langu li txi zumba ni nanu, se kutsaka kwanu ku txi va i di ka kuhetiseka.” (Johani 15:11) Eto ti kombisa ti to nathu mbimo yotshe hi nga tsaka ngutu. Hi nga fananisa litsako lathu ni mndilo. Phela hi txi lava ti to  mndilo wu tura ngutu, hi fanete ku engetela tikhuni ni ku wu hembenyeta. Khumbula ti to i moya wo sawuleka wu wu nga hi vhunako kuva ni litsako. Se hi txi lava kuengetela litsako, ti lava hi maha mkombelo hi kombela moya wo sawuleka wa Txizimu. Hi fanete hi gonda Bhiblia ni ku alakanyisisa ngu ti hi ti gondako.​—Masalmo 1:1, 2; Luka 11:13.

Tximwani txi txi nga engetelako litsako lathu ngu zumba hi di ñolekile ngu timhaka ti ti tsakisako Jehovha. (Masalmo 35:27; 112:1) Ngu kutxani? Bhiblia yi womba ti to Txizimu txi hi vangile ti to hi txi ‘thava ni kuxayisa milayo ya txona, nguko ayiya ngu yona fanelo ya votshe vathu.’ (Ekleziyaste 12:13) Hi mahetwe kumaha kudhunda ka Txizimu. Se ngako hi txi thumela Jehovha, hi na mana litsako la ditshuri ka wutomi wathu. *​—Wona txhamuselo ya hahatshi.

Ngako hi txi kulisa litsako lathu, hi na mana wuyelo ya yinene. Ngu txikombiso, Jehovha a na hi katekisa ngutu ti to hi simama hi mthumela ngu litsako hambi hi txi wonisana ni sikarato. (Dhewuteronome 16:15; 1 Vatesalonika 5:16-18) Aku hi no va ni litsako la ditshuri, hi na mbi pimisa ti to tithomba ti hi ku nato ta nyama ngu tona i ku ta lisima ngutu ka wutomi wathu. Ngu toneto, hi na zama kumaha ti hi nga ti kotako ngu Mfumo wa Txizimu. (Matewu 13:44) Ni ku mbimo yi hi wonako wuyelo ya yinene ayi yi tako ngu kumahela to tala Jehovha, hi na engetela litsako, hi na tipfa hi di va lisima hipuni ni ku hi na maha ti to vamwani ve tipfa va di tsakile.​—Mithumo 20:35; Vafilipiya 1:3-5.

Tximwani txi txi no hi tsakisa ngutu, ngu va ni wutomi wa wunene. Bhiblia yi khene: “Mbilu yo tsaka i mrende wa wunene.” (Mavingu 17:22) M’xolisisi mmwani wu a nga gonda ngu ta dihanyo da m’thu khe Universidade de Nebraska, wa Estados Unidos a tumelelanile ni ti Bhiblia yi ti wombako, a ti khene: “I di ti to konkuwa u tsakile ni ku eneliseka, ti kombisa ti to u na va ni dihanyo da dinene mbimo yi yi tako.”

Hambiku hi hanyako ka timbimo to karata, hi nga va ni litsako la ditshuri mbimo yi hi mahako mkombelo hi amukela moya wo sawuleka, hi gondako ni alakanyisisa ngu Dipswi da Txizimu. Hi nga tshumela hi tsaka hi txi alakanyisisa ngu silo sa sinene a si Jehovha a hi ningako konkuwa, hi tekelela likholo la vanathu vamwani ni kumaha kudhunda ka Txizimu. Ngu magwito hi na tipfa kufana ni m’bhali wa Masalmo 64:10, awu a nga khene: “M’thu wamnene a mana litsako ka MKOMA ni ku wa lava kuvhikelwa ngu ngene.”