1. I ngu mbimo muni votshe vasawuleki va no ya va nzumani?

 MALEMBE msana, vathu va Jehovha va txi tiwotisa tiya, ‘I ngu mbimo muni masalelwa ya vasawuleki ma no tsula nzumani?’ Kale hi txi pimisa ti to vasawuleki va ndi na zumba ha mafuni ka paradhise ngu mbimonyana msana ka Armagedhoni. Kambe ka Muwoneleli wa 15 ka Julho wa 2013, hi gondile ti to yi si se khata yimbi ya Armagedhoni, votshe vasawuleki va 144.000 va na va nzumani.—Mat. 24:31.

2. Ngu txihi txiwotiso atxi vamwani va nga thukako ve txi maha, ni ku hi na bhula ngu txani ka gondo yiya?

² Kambe vamwani kwathu hi nga thuka hi tiwotisa tiya: Ku na maheka txani ngu “timwani tinvuta” ta Kristu ati ti no va ti txi thumela Jehovha ngu kuthembeka ha mafuni ngu mbimo ya “xanisa ya hombe”? (Joh. 10:16; Mat. 24:21, NM) Vamwani ka timwani tinvuta, ti nga maha ve karateka ngu kwa mbi ti ziva to va na ta maha txani mwendo ku, ku na mbi va ni m’thu wo va vhuna mwendo ku va kongomisa msana ko va vanathu va txiwamna ni va txisikati va vasawuleki va di tsute nzumani. Ti nga maha ve pimisa toneto ngu mhaka ya madungula mambidi ya mu ka Bhiblia. A hi woneni madungula oneyo ni ku ngu kutxani hi sa fanela kukarateka.

NGU TIHI TI TI NO MBI MAHEKA?

3-4. Ngu tihi ati vamwani va nga ti wotisako, ni ku ngu kutxani?

³ Vamwani ti nga maha ve karateka ngu ti to tinvuta timwani ti na ema kuthumela Jehovha mbimo yi ti no mbi swa ti va ni vanathu va Mmidi wu wu Fumako kasi ku ve va kongomisa. Ti nga maha ve pimisa toneto ngu mhaka ya madungula yo kari ya mu ka Bhiblia. A hi wone sikombiso simbidi. Txikombiso txo khata mayelano ni Mphaxeli wa Hombe Joyadha. Ene i ti dilanda do  thembeka da Txizimu. Ene ni msikati wakwe Jehosebhate, va vhikete dijovhem adi di dhanwako ku i Jowasi ni ku di vhuna di va mkoma wa mnene ni kuthembeka. Mbimo yi Joyadha a nga txi ngadi a txi hanya, Jowasi a thumete Jehovha ngu kuthembeka ni kumaha timhaka ta tinene. Kambe msana ka ku va Joyadha a di fite mkoma Jowasi a khatile kumaha timhaka to biha. Ene a engisile sialakanyiso sa vathangeli vo biha ni ku a emile kuthumela Jehovha.—2 Mak. 24:2, 15-19.

⁴ Txikombiso tximwani nja Makristu ya ma nga hanya msana ko vapostoli va di fite. Mpostoli Johani i ve wo gwitisa kufa ka vapostoli, mbimo yi a nga txi nga di a txi hanya ene a vhunile Makristu a mangi kusimama ma di thembekile ka Jehovha. (3 Joh. 4) Nga ha vapostoli vamwani va Jesu va nga ti mahile ngu kona, Johani a mahile totshe ati a nga ti kota kasi kuvhikela dibanza ka vapostata ava va nga txi hangalasa tigondo ta makuhu. (1 Joh. 2:18; 2 Vat. 2:7) Kambe msana ko Johani a di fite, tigondo ta vapostata ti hangalakile kufana ni wuhya txitingani. Ka malembe ma nga londisela vapostata va txi gondisa tigondo ta makuhu, se eto ti txi maha to kumahwa timhaka to biha ka otshe mabanza.

5. Ngu kuya ngu matimu yawa a mambidi kha ha fanela kupimisa ti to ku na maheka txani?

⁵ Ina madungula yawa a mambidi ma kombisa to ku na maheka ati ti fanako ka tinvuta timwani mbimo yi vasawuleki va no va va di tsute nzumani? Ina Makristu o thembeka ha mafuni ma na khata kumaha to biha kufana ni Jowasi, mwendo ma na maha kufana ni vapostata nga ha vavangi va nga maha ngu kona msana ka ku vapostoli va di fite? Xamulo ya hakubasani i, Ahim-him! Athu hi nga tsaniseka to mbimo yi vasawuleki va no tsula nzumani, timwani tinvuta ti na simama ti khozela Jehovha ngu nzila ya yinene ni ku Ene a na simama e ti khatalela. Ngu kutxani hi nga tsanisekako ka toneto?

WUKHOZELI WA DITSHURI WU NA SIMAMA NGU HA KU SI GUMIKO

6. Ngu tihi timbimo tiraru ati hi no bhula ngu tona?

⁶ Ngu kutxani hi nga tsanisekako ka ti to wukhozeli wa ditshuri kha wu na mbi guma, hambi ka timbimo to karata ati hi no wonisana nato? Nguko Bhiblia yi txhamusela ti to hi hanya ka timbimo to hambana ni ta Vaisrayeli ni timbimo ta msana ka ku vapostoli va di fite. Se he pfisise to kumahekile txani mndani ka timbimo tiya ta tiraru: 1) Mbimo ya Israyeli wa kale, 2) msana ka ku vapostoli va di fite, ni 3) mbimo yathu i ku “mbimo ya kuwuseta sotshe.”—Mithumo 3:21.

7. Ngu kutxani Vaisrayeli vo thembeka va ndi no va ni txibindi txo simama ve thumela Jehovha?

⁷ Mbimo ya Israyeli wa kale. Msananyana ka kuva Mosi a si se fa, ene a gete tiya Vaisrayeli: “Nguko ani na tiziva ti to msana ka kuva ni di fite, mi na ti bihisa nguto, ngu kuhambuka ka nzila yi ani ninga mi leleta yona.” (Dhewut. 31:29) Mosi a tshumete e gela Vaisrayeli ti to ngako va txo thuka ve tshuralela Txizimu, va ndi na tekwa ve yiswa wukhumbini. (Dhewut. 28:35, 36) Ina mapswi oneyo ma hetisekile? Ina. Kudingana malembe a mangi vakoma vavangi va sungile kwa mbi engisa Jehovha ni ku va mahile ti to vathu vavangi ve khozela sizimu sa walo. Ngu mhaka yeto Jehovha a tshuralete vathu vakwe vo biha ni ku kha nga tumelela ti to ni mkoma ni wammweyo wa Vaisrayeli e va fuma. (Eze. 21:25-27) Kambe vamwani Vaisrayeli vo thembeka va mani txibindi txo khozela Jehovha mbimo yi va nga wona ti to otshe mapswi ya Txizimu ma ti hetisekile.—Isaya 55:10, 11.

8. Ina hi fanete kuxamala ngu ku msana kova vapostoli va di fite Makristu ma di mahile vapostata? Txhamusela.

⁸ Msana ka kuva vapostoli va di fite. Ina hi fanete kuxamala ngu kuva mabanza ya Wukristu msana ka ku vapostoli va di fite ma di vile ni vapostata? Ahim-him. Nguko Jesu a ti profetile ti to eto ti ndina maheka. (Mat. 7:21-23; 13:24- 30, 36-43) Mpostoli Paulo, Pedro ni Johani va wombile ti to wuprofeti wa Jesu wu txi khata kuhetiseka ka timbimo tawe. (2 Vat. 2:3, 7; 2 Pedro 2:1; 1 Joh. 2:18) Msananyana ka ku mpostoli wo gwita a di fite, Makristu a vapostata ma khatile kumaha txienge txa Bhabhilona wa Hombe, i ku wotshe wukhozeli wa makuhu. Ngu dikhambi da wumbidi, ati Jesu a nga ti ti wombile ti hetisekile.

9. Ngu kutxani mbimo yathu yi di hambani ni mbimo ya Israyeli wa kale, ni ya dibanza da Wukristu msana ka kuva vapostoli va di fite?

⁹ “Mbimo ya kuwuseta sotshe.” Mbimo yathu ya hambana ni ya Vaisrayeli va kale ni mbimo yi Makristu o khata ma nga va vapostata. Mbimo yi hi hanyako ka yona yi dhanwa ku i mbimo muni? Athu hi tolovela ku yi dhana ku “masiku a kugwitisa” a mafu o biha. (2 Tim. 3:1) Kambe Bhiblia yi kombisa ti to ka mbimo yoneyo ya yimweyo ku nga khata masiku a ku gwitisa, kukhatile kambe mbimo ya lisima ngutu ayi yi ndi no teka mbimo yo lapha. Mbimo yoneyo yi ndina simama kala kuza Mfumo wa Kristu wu maha ti to vathu veva vo pelela ni kutxitxa mafu me va paradhise. Mbimo yoneyo yi dhanwa ku i “mbimo ya kuwuseta sotshe.” (Mith. 3:21) Mbimo yoneyo yi khatile ngu 1914. Kambe nji txani txi nga wusetwa? Jesu a khatile kufuma nzumani. Ngu nzila yoneyo Jehovha a tshumete e emisa Mkoma kasi ku e m’emela, kota txidya thomba txa mkoma Dhavhidha. Kambe, Mfumo wonewo hi nga totshe ati Jehovha a nga ti wuseta. Msananyana ka toneto, wukhozeli wa ditshuri ni wona wu khatile kuwusetwa! (Isaya 2:2-4; Eze. 11:17-20) Kambe ina wukhozeli wa ditshuri wu na tshumela wu onhetelwa?

10. a) Nji txani atxi Bhiblia yi nga txi womba mayelano ni wukhozeli wa ditshuri ka timbimo tathu? (Isaya 54:17) b) Ngu kutxani wuprofeti wonewo wu txi hi tsakisa?

¹⁰ Lera Isaya 54:17. Pimisa ngu wuprofeti wuwa: “Otshe matxhari ale ma lungiselelwako ku kuwukela kha ma nambi humelela”! Mapswi yawa ma nga huhutelwa ma hetiseka nyamsi. Hahanze keto mapswi a Isaya a ya ma ku: “Se votshe vanana vako va na maha vagondiswa va Mkoma, ni kudikha ka vanana vako ku na maha ko enela. U na tsaniswa ngu kululama. . . . Nguko khu na mbi thava, hambi kuxamala, nguko kha ku na mbi kuhokela.” (Isaya 54:13, 14) Ni ona ma hetiseka ka timbimo tathu ni ku, ma hi thavelela. Hambi Sathani “Txizimu txo biha txa ha mafuni,” kha sikoti kuemisa mthumo awu wu mahwako kasi kugondisa vathu mayelano ni Jehovha. (2 Vak. 4:4) Wukhozeli wa ditshuri wu wusetilwe, ni ku kha wu nambi swa kambe wu nyetiswa ngu wukhozeli wa makuhu. Wona wu na simama kala kupinduka. Kha di  ngaho ditxhari di no sikota kufuvisa vathu va Jehovha!

NGU TIHI TI TI NO MAHEKA?

11. Nji txani txi hi tsanisako ti to dibutho da hombe kha di na mbi tshotshwa mbimo yi vasawuleki va no tsula nzumani?

¹¹ Ngu tihi ati ti no maheka mbimo yi vasawuleki va no tsula nzumani? Khumbula ti to, Jesu M’dyisi wathu. Ene, msungo wa dibanza da Wukristu. Jesu a ti vekile hakubasani mbimo yi a nga khene: “Mthangeli wanu mmweyo dwe, i ku Kristu.” (Mat. 23:10) Mkoma wathu se wa fuma ni ku kha nambi thuka a di tandekile kuhetisisa txiavelo txakwe. Aku Kristu i ku ene a thangelako, athu kha ha fanela kuthava txilo hamafuni. Ti hakubasani ti to athu kha hi ti zivi kwati ati Jesu a no kongomisisa tona vathu vakwe ka mbimo yoneyo. Se, a hi woneni sikombiso so kari sa mu ka Bhiblia asi si nga hi mahako hi rula.

12. Jehovha a va khatalelisile kutxani vathu vakwe a) msana ko Mosi a di fite? b) msana ka kuva Elija a di mani txiavelo txa txiphya? (Wona ni mfota.)

¹² Na vathu va Israyeli va si se bela ka Ditiko da Txithembiso, Mosi a fite. Se ku mahekile txani ngu vathu va Israyeli? Msana ko va Mosi a di fite, ina Jehovha a emile kuvhuna vathu vakwe? Ahim-him. Ngako va to ko simama va di thembekile ka Jehovha, Ene a ndi na va khatalela. A si se fa Mosi, Jehovha a mu gete ti to a ti fanete kuveka Joxuwa kasi ku e va mthangeli. Mosi a trenarile Joxuwa ku dingana malembe o tala. (Eks. 33:11; Dhewut. 34:9) Hahanze keto, va vavamna vavangi vamwani va ti tiemisete kuthangela vathu va Jehovha, ve va vathangeli va 1.000, vathangeli va dizana, vathangeli va mtxhanu wa magumi ni vathangeli va digumi. (Dhewut. 1:15) Vathu va Txizimu va ti xayisekile kwati. Txikombiso tximwani txa txinene hi ku natxo nja Elija. Kudingana malembe o tala ene a vhunile Vaisrayeli ti to ve simama ka wukhozeli wa ditshuri. Kambe kuhokile mbimo yi Jehovha a nga ninga txiavelo txa txiphya Elija wulambwe ka Judha. (2 Vafu. 2:1; 2 Mak. 21:12) Ina Vaisrayeli vo thembeka va mfumo wa 10 wa tihunzu va tshotshilwe? Ahim-him. Elija a trenarile Elixa kudingana malembe o tala. Ku ti ngadi ni “vanana va vaprofeti” ti nga mahako va di lulamisetwe ngu mitxawa ni ku va txi mana trenamento. (2 Vafu. 2:7) Mwendo ku, ku ti ni vavamna vavangi vo thembeka ava va nga ti tiemisete kuthangela vathu va Jehovha. Jehovha a simamile e hetisisa txikongomelo txakwe, ni kukhatalela kwati malanda akwe.

13. Ngu tihi ati Jehovha a hi thembisako tona ka Vahebheru 13:5b? (Wona ni mfota.)

¹³ Msana ka kubhula ngu sikombiso siya, u alakanya to ku na maheka txani mbimo yi  msawuleki wo gwita a no tsula nzumani? Kha ti lavi ku hi jujeka msungo ngu toneto. Amu ka Bhiblia hi mana ditshuri do hehuka adi di hi mahako hi zenga: Jehovha kha nambi gwita a di tshotshile vathu vakwe ahawa hamafuni. (Lera Vahebheru 13:5b.) Nyamsi ku ni mtxawa wa wudotho wa Makristu ya vasawuleki, awu wu thangelako vathu va Txizimu, i ku Mmidi wu wu Fumako. Kufana ni Mosi ni Elija vona va trenara vavamna va tinvuta timwani kasi ku ve va vhuna kukhatalela vathu va Txizimu. Ngu txikombiso, Mmidi wu wu Fumako wu lulamisela sikolwa sasingi kasi kutrenara madhota, vawoneleli va sigava, siro sa komisawu ya Bhetele, vawoneleli va Bhetele, ni vanathu vamwani. Va tshumela kambe ve pateka ko trenara vavhuneteli va makomisawu o hambana-hambana a Mmidi wu wu Fumako. Va vhuneteli vonevo se va ni wutixamuleli kukhukhela konku. Ni ku, va tiemisete kusimama ni mthumo wo khatalela tinvuta ta Kristu.

14. Nji txani atxi txi nga vekwa hakubasani ka gondo yiya?

¹⁴ Pontu ya lisima ayi hi nga yi gonda ngu yiya: Mbimo yi votshe vasawuleki va no tsula nzumani, hafuhi ni magwito ka xanisa ya hombe, malanda ya Jehovha ma na simama me mu khozela na ma di thembekile. Ngu kona hawa ka wuthangeli wa Jesu Kristu, athu kha hi na mbi leka kukhozela Jehovha. Ha ti ziva ti to ka mbimo yoneyo mtxawa wa matiko awu Bhiblia yi wu dhanako ti to i Goge wa Magoge, wu na xasela vathu va Txizimu. (Eze. 38:18-20) Kambe kuxaselwa koneko ku na va ka mbimonyana ni ku, ku na feyila. Ku na va ka mbimo ya yidotho aha ko ti nambi koteka kutsivela vathu va Jehovha ku ve m’khozela. Jehovha ngu ditshuri a na hi hulukisa! Mpostoli Johani ka m’woniso a woni “dibutho da hombe” da timwani tinvuta ta Kristu. Johani a ti zivile ti to “dibutho da hombe” i ti vathu ava va nga txi huma ngu mu ka “xanisa ya hombe.” (Mtu. 7:9, 14, NM) Kha ti kanakanisi ti to Jehovha a na hi hulukisa!

15-16. Ngu kuya ngu Mtuletelo 17:14, nji txani atxi vasawuleki va no txi maha ngu mbimo ya yimbi ya Armagedhoni, ni ku ngu kutxani ti txi hi tsanisa?

¹⁵ Hambiketo, vamwani va nga thuka ve pimisa tiya: ‘Nji txani txi no maheka ka vasawuleki? Nji txani txi va no maha msana ko va va di nzumani  ?’ Bhiblia yi xamula kwati txiwotiso txiya. Yona yi txhamusela ti to, mifumo ya ditiko diya, yona “yi na lwa ni Txinvutana.” Kambe ti hakubasani ti to va nambi wina. Bhiblia yi womba ti to: “Txinvutana txi na va xula.” Kambe i mani awu a no vhuna Jesu? Bhiblia yi tshumela yi xamula yi txi: Ava va nga “dhanwa,” “va nga sawulwa,” na va di “thembekile.” (Lera Mtuletelo 17:14, NM.) Mba mani vonevo? Vasawuleki ava va nga wuswa! Se, mbimo yi vasawuleki vo gwita va no tsula nzumani, hafuhi ni magwito ka xanisa ya hombe, txiavelo txo khata va no txi mana nja ku yalwa. Etxo i na va txiavelo txo guleka! Vasawuleki vamwani va si se va Tifakazi ta Jehovha va txi tolovela kupeka txibhakela ni vamwani. Vamwani ka vona i ti masotxhwa. Kambe mbimo yi va nga va Makristu, va khatile kuziva nzila yo rula. (Vag. 5:22; 2 Vat. 3:16) Vona va lekile kuseketela tiyimbi. Kambe, msana ka kuva va di tekilwe ve tsula nzumani, vona va na ya ti pata ni Jesu ni tingelozi timwani to sawuleka, ve lwa ka yimbi yo gwita ni valala va Txizimu.

¹⁶ Pimisa ngu tiya. Nyamsi vasawuleki vavangi va ku ha mafuni, va kumbile ni ku kha va nga ni mtamo. Kambe mbimo yi va no wuswa ti to ve ya hanya nzumani, vona va na va siwumbiwa sa moya sa kwa mbi fa, sa mtamo, ni ku va na va va di kumweko ni Ndena ya Mtamo, Jesu Kristu. Msana ko gwita yimbi ya Armagedhoni, vona va na thuma kumweko ni Jesu kasi kuvhuna vathu ti to ve va vo pelela. Kha ti kanakanisi ti to, mbimo yi va no va nzumani vona va na ti kota kumaha ta tingi ngu vanathu ava va no va va di ha mafuni kupinda ti va nga ti maha mbimo yi va nga ti ha mafuni kota vathu vo mbi pelela!

17. Hi tizivisa kutxani ti to otshe malanda ya Jehovha ma na va ma di vhikelekile ngu mbimo ya yimbi ya Armagedhoni?

¹⁷ Ina awe u maha txienge txa timwani tinvuta? Ngu tihi ati awe u fanelako kumaha mbimo yi yimbi ya hombe ya Armagedhoni yi no khata? Ti hehukile: Themba Jehovha, ni kulondisa mkongomiso wakwe. Tipata txani toneto? Bhiblia ya txhamusela ka Isaya 26:20: “Wulelani tinyumbani kwanu mi ti sekela matimba, baramani ngu mbimoanyana, kala kuza kuboxa kuhenya.” Mwendo ku otshe malanda ya Jehovha o thembeka, ha mafuni ni nzumani, ma na va ma di vhikelekile ngu mbimo ya Armagedhoni. Nga ha mpostoli Paulo a nga bhala ngu kona, athu ha themba ti to ‘kha wu ngaho mfumo, hambi timbimo ta nyamsi hambi timbimo ti titako . . . kha si na mbi sikota ku hi hambanisa ni lirando la Txizimu.” (Var. 8:38, 39) Mbimo yotshe, khumbula tiya: Jehovha wa kudhunda ngutu ni ku kha nambi thuka a di kutshotshile!