NGU wazithathu, 18 ka Janeiro wa 2023 ku ve ni txiziviso ka jw.org, txi nga txi womba to Gage Fleegle ni Jeffrey Winder va di sawutwe kasi kuthuma kota siro sa Mmidi wu wu Fumako wa Tifakazi ta Jehovha. Vanathu vava va vambidi se va ni mbimo yo lapha va txi thumela Jehovha ngu kuthembeka.

Mwanathu Fleegle a kulisilwe ngu vaveleki ava i ku Tifakazi ta Jehovha khe mswa ditambo ka Pennsylvania, Estados Unidos. Mbimo yi i nga ti jovhem, mwaya wawe wu rurile ve ya ka txidhoropana atxi txi nga ti masoni nyana ka ha va nga txi zumba kona, ku nga ti ni txilaveko. Ku di pindile mbimonyana, ene a bhabhatisilwe ngu dhiya 20 ka Novembro ka 1988.

Vaveleki va mwanathu Fleegle mbimo yotshe va m’kuzetile ku e bela ka mthumo wa mbimo yotshe. Makhambi a mangi va txi amukela vawoneleli va sigava ni vabhetelita mtini kwawe. Mwanathu Fleegle a ti ni mkhanjo wo wona litsako li vanathu vonevo va nga ti nalo. Msananyana ka kuva a di bhabhatisilwe a khatile kuthuma kota nyaphandule wa mbimo yotshe ngu 1 ka Setembro ka 1989. Ku di pindile malembe mambidi ene a hetisisile minavelo yi a nga ti nayo kukhukhela ka 12 wa malembe, i ku kuthuma Bhetele. Ene a khatile kuthuma Bhetele ka Brooklyn ngu Outubro wa 1991.

Bhetele, mwanathu Fleegle a thumile ko lungisela mabhuku kudingana 8 wa malembe, ni ku ngu msana a avetwe ku ya thuma ka Dhepartamentu ya Mthumo. Kudingana mbimo yileya, ene a thumile malembe o kari ka dibanza da Txirussu. Ngu 2006 ene a txhadhile ni Nadia. Nadia nene a tumeletwe ku ya thuma Bhetele. Ngu wumbidi wawe va thumile ka teritoriyo ya Txiputukezi ni ku kupinda 10 wa malembe, va thumile ka teritoriyo ya Espanyoli. Ku di pindile mbimo yo tala a di ka Dhepartamentu ya Mthumo, mwanathu Fleegle a avetwe kuya thuma ka txikritori txa Komisawu yo Gondisa ni ku ngu msana a avetwe ku ya thuma ka txikritori txa Komisawu ya Mthumo. Ngu  Março wa 2022 ene a avetwe kuthuma kota m’vhuneteli wa Komisawu ya Mthumo ya Mmidi wu wu Fumako.

Mwanathu Winder a kulisilwe Murrieta, California khe Estados Unidos da America. Ene a gondile ditshuri ka vaveleki vakwe, ni ku a bhabhatisilwe ngu 29 ka Março wa 1986. Ti sa swela, ka mtxima awu wu nga londisela ene a tekile wunyaphandule wo vhuneta. Ti m’tsakisile ngutu ni ku a simamile kota nyaphandule wo vhuneta. Msana ka mitxima nyana a txi thuma kota nyaphandule wo vhuneta, ngu 1 ka Outubro wa 1986 a khatile kuthuma kota nyaphandule wa mbimo yotshe.

Mbimo yi a nga txi ya ka wujovhem, mwanathu Winder a endete vakoma vakwe va vambidi ava va nga txi thuma Bhetele. Ka mbimo yileya, diendo diya di m’mahile e navela kuya thuma Bhetele. Ngu Maio wa 1990, a rambilwe kuya thuma ka Bhetele ya Wallkill.

Akhe Bhetele, mwanathu Winder a thumile ka madhepartamento o hambana-hambana aya ma patako kuthuma ko basisa, maxamba ni txikritori ka Bhetele. Ngu 1997 ene a txhadhile ni Angela ni ku kala nyamsi va thuma Bhetele. Ngu 2014 ene a thavisilwe eya Warwick, ahawa a nga ya vhuneta ko aka Mzinda wa Tifakazi ta Jehovha. Ngu 2016 vona va rurile ve ya Centro Educacional da Torre de Vigia khe Patterson ahawa mwanathu Winder a nga ya thuma ka Audhiyo i Vhidhiyo. Msana ka 4 wa malembe vona va rurile ve ya Warwick, ahawa mwanathu Winder a nga ya avelwa kuya thuma ka txikritori txo khatalela vathumi va Bhetele. Ngu 1 ka Março wa 2022 ene a avetwe ku eya thuma kota m’vhuneteli wa Komisawu yo khatalela vathumi va Bhetele ya Mmidi wu wu Fumako.

Athu ha khongela ti to Jehovha e simama e katekisa ‘vavamna vonevo i ku tiningu,’ ti to ve simama ve thuma ngu kuhiseka kasi kuseketela Mfumo.—Vaef. 4:8.