1. Ngu txihi txikombiso txi hi mahako hi pfisisa ti to ha mu lava Jehovha ti to e va mkongomisi wathu?

 HI NGA alakanya u di timete hagari ka txitinga. Ku ni phango madhawani kotshe: sihari sa txitinga, sibhebhenene asi si nga kuningako malwati, mindonga yo tshavanga, maphala ni marigwi ma nga sisaleka. Awe u nga ti pfa u di rute ngako u di ni m’thu awu a ku experiyenti, a ku zivako kwati aha ku ku ni phango ni ku mi nga simamisa kutxani mi di vhikelekile. Mafu yawa nyamsi ma fana ni wukhalo wonewo. Ma tate ngu tiphango ati ti nga onhako wuxaka wathu ni Jehovha. Kambe athu hi ni Jehovha i ku Mkongomisi wo pelela. Wa hi vhikela ka tiphango ni ku hi vhuna ku hi hoka amu hi yako kona, i ku ka wutomi wo mbi guma ka mafu a maphya.

2. Jehovha a hi kongomisa ngu nzila muni?

² Jehovha a hi kongomisa ngu nzila muni? A maha toneto ngutu-ngutu ngu kuthumisa Dipswi dakwe, i ku Bhiblia. Kambe ene wa tshumela e thumisa vathu kasi ku hi kongomisa. Ngu txikombiso, ene a thumisa ‘txithumi txo thembeka na txi di ni wutxhari’ kasi ku hi ninga sakudya sa moya ni ku hi vhuna kumaha sisungo sa sinene. (Mat. 24:45, NM) Jehovha a tshumela kambe e thumisa vavamna vamwani vo fana ni vawoneleli va sigava ni madhota dibanzani. Vona va hi ninga txitsanisekiso ni txivhuno kasiku hi wonisana ni sikarato. Athu ha m’bonga ngutu Jehovha ngu ku a hi kongomisako ngu nzila ya yinene ka timbimo to karata ati hi hanyako ka tona nyamsi ku si se hoka magwito. Mkongomiso wonewo wu hi vhuna kusimama hi va vangana va Jehovha ni kusimama ka nzila ayi yisako ka wutomi wo mbi guma.

3. Hi na bhula ngu txani ka gondo yiya?

³ Hambi hi txi ti ziva tiya, mbimo yimwani ti nga karata kuengisa mkongomiso wa Jehovha. Ngutu-ngutu ngako mkongomiso  wonewo wu txi ningelwa ngu vathu vo kwa mbi pelela. Kambe ngu kutxani? Ti nga maha mkongomiso wonewo i si nga wu hi nga txi tsakela ku wu pfa. Mwendo kupimisa ti to mkongomiso wonewo kha wu pfisiseki se hi hokelela magwito ya ti to kha wu ti ngu ka Jehovha. Nga timbimo toneto hi fanelako kuthemba ti to Jehovha ngene a thangelako vathu vakwe ni ku kulondisa mkongomiso wonewo, yotshe mbimo ndinene kwathu. Kasi ku hi vhuna kutsanisa themba yathu, gondo yiya yi na womba-womba ngu tipontu tiya: 1) Jehovha a kongomisile ngu nzila muni va Israyeli ni Makristu o khata? 2) a kongomisa ngu nzila muni vathu vakwe nyamsi? 3) ngu kutxani i di ta lisima kwathu nyamsi ku hi simama hi themba mkongomiso wa Jehovha?

JEHOVHA A KONGOMISILE NGU NZILA MUNI DITIKO DA ISRAYELI?

4-5. Jehovha a ti kombisile ngu nzila muni ti to a txi thumisa Mosi kasi ku e kongomisa Vaisrayeli? (Wona mfota wa kapa.)

⁴ Jehovha a sawute Mosi kasi kuhumisa Vaisrayeli ka ditiko da Egipta. Ni ku Jehovha a ningile va Israyeli sikombiso sa hakubasani asi si nga ti kombisa ti to a txi thumisa Mosi kasi ku va kongomisa. Ngu txikombiso, Jehovha ni mitshikari a thumisile direfu se ni wusiku a thumisile phande ya mndilo. (Eks. 13:21) Mosi a londisete direfu ni phande ya mndilo kasi kuteka va Israyeli kala Linene lo Bhilivila. Vaisrayeli va thavile ngutu mbimo yi va nga wona ti to va ti hagari ka linene ni masotxhwa a Egipta. Vona va pimisile ti to Mosi a ti mahile phazamo ya hombe ngu ku va teka e va yisa ka Linene lo Bhilivila. Kambe Mosi a sa maha phazamo, i Jehovha a nga lava kuteka vathu vakwe e va yisa kheya ngu kuthumisa Mosi. (Eks. 14:2) Eto ti ni ningile mkhanjo Jehovha wo kombisa mtamo wakwe ngu nzila yimwani yo xamatisa.—Eks. 14:26-28.

⁵ Ka 40 wa malembe ya ma nga pinda, Mosi a simamile e themba sileletelo sa Jehovha kasi kukongomisa vathu vakwe txiwulani. a Ngu mbimo nyana yo kari, Jehovha a tumelete ti to direfu di zumba hatxikeni ka ditenda da Mosi kasiku votshe Vaisrayeli ve kota ku ti wona. (Eks. 33:7, 9, 10) Jehovha a txi womba-womba ni Mosi ngu kuthumisa direfu, se Mosi a txi phindisa sileletelo ka vathu. (Mas. 99:7) Vaisrayeli va ndi na ti wona ti to Jehovha a txi thumisa Mosi kasi ku va kongomisa.

6. Vaisrayeli va anguti ngu nzila muni ka sileletelo asi Jehovha a nga txi va ninga? (Mitengo 14:2, 10, 11)

⁶ Txo mbi tsakisa ngu ti to Vaisrayeli kha va kholwa ka sotshe sikombiso si si nga txi veka hakubasani ti to Jehovha a txi thumisa Mosi kasi kuwomba-womba navo. (Lera Mitengo 14:2, 10, 11.) Makhambi a mangi va lambile kukholwa ti to Jehovha a txi thumisa Mosi. Ngu toneto, Jehovha kha tumelela ti to liveleko lile la Vaisrayeli li bela ka Ditiko da Txithembiso.—Mit. 14:30.

7. Vaisrayeli vamwani va kombisile ngu nzila muni ti to va txi themba nzila yi Jehovha a nga txi va kongomisa ngu yona. (Mitengo 14:24) (Wona ni mfota.)

⁷ Ngu didhawa dimwani, Vaisrayeli vamwani va londisile mkongomiso wa Jehovha. Ngu txikombiso, Jehovha a ti khene: “Kalebhe . . . a ni engisile ngu kuhetiseka.” (Lera Mitengo 14:24.) Jehovha a hakete Kalebhe ni ku a tshumete e mninga txienge txi a nga txi sawula ka Ditiko da Txithembiso. (Jox. 14:12-14) Liveleko li li nga londisela la Vaisrayeli ni lona li simamile li londisa mkongomiso wa Jehovha. Mbimo yi Joxuwa a nga vhaleta Mosi kota mthangeli, wa va Israyeli, “va to va ni txithavo . . . ka otshe masiku ya kuhanya kwakwe.” (Jox. 4:14) Kota wuyelo, Jehovha a katekisile Vaisrayeli ni ku a va tekile kala ka ditiko di a nga ti va thembisile.—Jox. 21:43, 44.

8. Txhamusela nzila yi Jehovha a nga kongomisa ngu yona vathu vakwe ka timbimo ta Vakoma. (Wona ni mfota.)

 ⁸ Ngu kutsimbila ka malembe Jehovha a sawute valamuli kasiku ve kongomisa vathu vakwe. Ngu msana, ka timbimo ta vafumeli, Jehovha a sawute vaprofeti kasiku ve kongomisa vathu vakwe. Vafumeli va va nga ti thembekile ka Jehovha va ndi na tshumela ve mana txivhuno txa vaprofeti. Ngu txikombiso, Mkoma Dhavhidha ngu ku ti veka hahatshi a tumete txialakanyiso txa mprofeta Nathani. (2 Sam. 12:7, 13; 1 Mak. 17:3, 4) Mkoma Jesofati a londisile mkongomiso wa mprofeti Jazieli kasi kuziva ati a ndi no ti maha ngu vathu ni ku va tsanisa kasiku ve ‘themba vaprofeti va Txizimu.’ (2 Mak. 20:14, 15, 20) Se mkoma Ezekhiya a lavile mprofeti Isaya mbimo yi a nga ti karatekile. (Isaya 37:1-6) Yotshe mbimo yi vafumeli va nga txi engisa mkongomiso wa Jehovha, vona va txi katekiswa ni ku dotshe ditiko di ti vhikelekile. (2 Mak. 20:29, 30; 32:22) Ti ti hakubasani ti to Jehovha a txi thumisa vaprofeti kasi kukongomisa vathu vakwe. Hambi keto, kutala ka vakoma ni va Israyeli vamwani kha va engisa mkongomiso wa Jehovha.—Jer. 35:12-15.

JEHOVHA A KONGOMISILE MAKRISTU O KHATA NGU NZILA MUNI?

9. I mani awu Jehovha a nga m’thumisa kasi ku e kongomisa Makristu o khata? (Wona ni mfota.)

⁹ Jehovha a simekile dibanza da Wukristu ngu dilembe da Pentekoste 33 E.C. Kambe Jehovha a kongomisile ngu nzila muni Makristu ale o khata? Jehovha a vekile Jesu kota msungo wa dibanza. (Vaef. 5:23) Kambe Jesu a si womba-wombi ni m’thu ni m’thu e m’gela ati a fanelako kumaha. Ene a thumisile vapostoli ni madhota a Jerusalema kasi kukongomisa Makristu o khata. (Mith. 15:1, 2) I si nga eto dwe, madhota ni ona ma tshumete me avelwa kasiku me kongomisa dibanza.—1 Vat. 5:12; Tit. 1:5.

10. a) Makristu o khata ma angulisile kutxani ka mkongomiso awu ma nga txi ningwa? (Mithumo 15:30, 31) b) Ngu kutxani vamwani va nga si thembi vathu ava Jehovha a nga ti va vekile kasi kukongomisa vathu vakwe? (Wona dikwadro adi di ku: “ Ngu kutxani vamwani va si tumeli kuengisa ava Jehovha a nga va veka kasi ku ve va thangela.”)

¹⁰ Ina Makristu o khata ma thembile nzila yi Jehovha a nga ti kongomisa ngu yona vathu vakwe? Ina, mtalo wa vona va txi tsaka ngu kulondisa sileletelo si va nga ti si mana. Ni ku ‘vona va txi tala ngutu ngu kutsaka’ ngu txitsanisekiso txi va nga ti txi mana. (Lera Mithumo 15:30,  31.) Jehovha a va kongomisa ngu nzila muni vathu vakwe?

JEHOVHA A HI KONGOMISA NGU NZILA MUNI NYAMSI?

11. Ningela txikombiso txi vekako hakubasani ti to Jehovha wa kongomisa vathu vakwe nyamsi.

¹¹ Jehovha wa simama e kongomisa vathu vakwe nyamsi. A maha toneto ngu kuthumisa Dipswi dakwe, i ku Bhiblia, ni ngu kuthumisa Mwanana wakwe, Jesu Kristu, msungo wa dibanza. Ina hi ni sikombiso sa hakubasani si kombisako ti to Jehovha wa simama e thumisa vathu kasi kukongomisa vathu vakwe? Ina. Ngu txikombiso, wona ti ti nga maheka kukhukhela ngu dilembe da 1800. Charles Russell ni vangana vakwe ava ni vona va nga txi gonda Bhiblia, va khatile kupfisisa ti to dilembe da 1914 di ndi na va da lisima ngutu nguko di txi tsimbitisana ni kusimekwa ka Mfumo wa Txizimu. (Dhan. 4:25, 26) Kasiku ve hokelela magwito oneyo, vona va gondile ngutu wuprofeti wa mu ka Bhiblia. Ina Jehovha a txo kongomisa wuxolisisi wu va nga txi wu maha? Ti hakubasani to ina. Ati ti nga maheka ngu 1914 ti vekile hakubasani ti to Mfumo wa Txizimu ngu ditshuri wu ti simekilwe. Ka dilembe donedo ku khatile Yimbi yo Khata ya Mafu, se kukhukhela koneho malwati, nzala, ni kuzinginikela ka mafu si yite si engetela. (Luka 21:10, 11) Jehovha ngu ditshuri a thumisile vavamna vale vo thembeka kasi kuvhuna vathu vakwe.

12-13. Nji txani txi nga maheka ngu mbimo ya Yimbi ya Wumbidi ya Mafu atxi txi nga engetela mthumo wo txhumayela?

¹² Pimisa kambe ngu ti ti nga maheka mndani ka Yimbi wa Wumbidi ya Mafu. Msana ko xolisisa kwati Mtuletelo 17:8, vanathu va va nga ti thangela va ti pfisisile ti to yimbi yile yi si hi yise ka Armagedhoni, kambe yi txi hi yisa ka mbimo ya kurula ko kari aku ku ndi no ninga mkhanjo kuengeteleka ka mthumo wo txhumayela. Ngu toneto, vona va mahile txisungo txi txi nga ti woneka nga kha txi pfisiseki, i ku kumaha Txikolwa txa Bhiblia txa Giliyadhi txa Torre de Vigia kasi kutrenara varumiwa ku ve txhumayela ni kugondisa makhalo a mangi hamafuni kotshe. Kutala ka varumiwa, va rumetwe hambi mbimo yi yimbi yi nga ti hisa. Hahanze keto, txithumi txo thembeka txi tshumete txi maha Kursu ya Vatxhumayeli va Mfumo b kasi kutrenara votshe mabanzani kasiku ve va vahuweleli ni vagondisi va vanene. Ngu nzila yoneyo, vathu va Jehovha  va ti ko lulamiselwa ka mthumo wa hombe awu wu nga txita.

¹³ Hi txi wona msana ti hakubasani ti to Jehovha a txi kongomisa vathu vakwe ka timbimo tile to karata. Ni ku kukhukhela ka Yimbi ya Wumbidi ya Mafu, vathu va Jehovha ka matiko o hambana-hambana va sikota kumaha mthumo wo txhumayela va di ni mkhululeko nyana wo kari. Kuwomba ditshuri, mthumo wo txhumayela hamafuni kotshe wo ya wu txi engetela.

14. Ngu kutxani hi nga thembako sileletelo si tako ngu ka sengeletano ya Jehovha kumweko ni sa madhota? (Mtuletelo 2:1) (Wona ni mfota.)

¹⁴ Nyamsi, siro sa Mmidi wu wu Fumako sa simama si londisa mkongomiso wa Jesu. Sona si maha toneto kasi kutsaniseka ti to sisungo si va si mahako sa tsimbitisana ni ti Jesu a ti lavako. Hahanze keto, vawoneleli va sigava ni madhota va thumiswa kasi kuningela sialakanyiso soneso ka mabanza. c Madhota a vasawuleki ma ka ‘dianza da txinene’ da Jesu. (Lera Mtuletelo 2:1.) Ti hakubasani ti to, otshe madhota kha ma pelela ni ku ma maha tiphazamo. Mosi ni Joxuwa mbimo yimwani va mahile tiphazamo, ni ku vapostoli ni vona va mahile. (Mit. 20:12; Jox. 9:14, 15; Var. 3:23) Hambi keto, athu ha tiwona ti to Jesu wa simama e kongomisa txithumi txo thembeka kumweko ni madhota, ni ku ene a na simama e thumisa vavamna vava “yotshe mbimo kala kugumani ka mafu.” (Mat. 28:20) Se hi ni sotshe sivangelo so hi themba wotshe mkongomiso awu Jesu a hi ningako ngu ku thumisa vavamna va va vo thembeka.

ATHU HA WUYELWA NGAKO HI TXI SIMAMA HI LONDISA MKONGOMISO WA JEHOVHA

15-16. U nga gonda txani ka txikombiso txa vathu ava va nga londisa mkongomiso wa Jehovha?

¹⁵ Ngako hi txi londisa mkongomiso wa Jehovha, athu hi nga tidila ngu makatekwa. Ngu txikombiso, Andy ni msikati wakwe Robyn valondisile txileleto txa Mmidi wu wu Fumako mayelano ni ku va ni wutomi wo hehuka. (Mat. 6:22) Ngu ku maha toneto, vona va mani mkhanjo wo ve va vathumi vo tiningela ka ma projeto o aka a sengeletano. Robyn a womba tiya: “Mbimo yimwani ti lavile hi hanya ka makhalo a madotho o hambi kozinha ma si nga nayo. Ani ti lavile ni tshumela ni xavisa mitxhini yo hambana-hambana yo thavisa mifota, i nga ti simaha si ni nga txi si dhunda ngutu. Ni dite ngutu mbimo yi ni nga xavisa mitxhini ya mina yo thavisa mifota. Kambe kufana ni Sara msikati wa Abrahamu, ni ti tiemisete kwa mbi wonetela msana.” (Vaheb. 11:15) Kambe Andy ni msikati wakwe Robyn va ti pfisa kutxani ngu txiperiyensia txiya va nga va na txo? Robyn a simama e womba tiya: “Athu ha pfa litsako la hombe ngutu  ngu ku ziva ti to hi ninga sotshe a si hi ku naso Jehovha. Mbimo yi hi thumelako sengeletano, ha va ni txibaka txa nzila yi wutomi wu no ta va ngu yona ka mafu a maphya.” Mwamna wakwe Andy wa tumelelana ni mhaka yiya, ene a womba tiya: “Ha tsaka ngutu ngu kuziva ti to hi ningela mbimo yathu ni mtamo wathu ka Jehovha.”

¹⁶ Wona txikombiso tximwani txi kombisako ti to i nga va ta tinene ku hi londisa mkongomiso wa Jehovha. Msana ko heta txikolwa, Marcia a lavile kulondisa txileletelo atxi a nga txi mana txo va nyaphandule. (Mat. 6:33; Var. 12:11) Ene a womba tiya: “Ani ni mani mkhanjo wo gonda univhersidhadhe ngu mahala kudingana muni wa malembe. Kambe ni txi lava kumaha to engeteleka ka Jehovha. Ngu toneto ni sungile kugonda mthumo wo kari awu wu ndi no ni vhuna ku ni ti khatalela kota nyaphandule. Etxo i ve tximwetxo txa sisungo sa sinene ngutu ka wutomi wangu. Konku ni thuma kota nyaphandule wa mbimo yotshe, ni ku mthumo wa mina wo hehuka wa ni tumelela ku ni vhuneta Bhetele ni di m’tini ni ku maha timwani to xamalisa ka mthumo wa Jehovha.”

17. Hi wuyelwa ngu txani kambe ngako hi txi engisa mkongomiso wa Jehovha? (Isaya 48:17, 18)

¹⁷ Mbimo yimwani, ha amukela sileletelo sa Sengeletano a si si hi vhikelako. Ngu txikombiso ha mana sialakanyiso mayelano ni phango ya ku dhunda ngutu tithomba ni ku maha to kari ati ti nga vekako phangoni kuengisa kwathu milayo ya Txizimu . Mbimo yi hi engisako sileletelo soneso, ha wona nzila yi i ku tatinene ngu yona kuengisa mkongomiso wa Jehovha. Athu ha va ni livhalo lo basa, ni ku ha vayilela ati ti nga hi mahako hi karateka ngutu. (1 Tim. 6:9, 10) Hi txi maha toneto hi nga thumela Jehovha ngu mbilu yathu yotshe, Kha txi ngaho hamafuni hawa atxi txi nga hi ningako litsako, kurula ni ku eneliseka.—Lera Isaya 48:17, 18.

18. Ngu kutxani u di tiemisete kusimama u engisa mkongomiso wa Jehovha?

¹⁸ Ti hakubasani ti to Jehovha ana simama e thumisa vathu kasi ku ve ningela mkongomiso ka mbimo ya xanisa ya hombe ni ka mbimo ya Mfumo wa Kristu wa 1000 wa malembe. (Mas. 45:16) Ina hi na simama hi engisa mkongomiso hambi hi txi pimisa kumaha timwani? Ti na hi hehukela kuengisa mkongomiso wumwani ni wumwani awu wu tako ngu ka Jehovha ngako kukhukhela konku hi txi engisa sileletelo asi a hi ningako. Ngu toneto, mbimo yotshe hi lava kuengisa mkongomiso wa Jehovha, ti patako kuengisa sotshe sileletelo asi a hi ningako ngu ku thumisa vavamna ava a nga va veka kasi ku ve hi khatalela. (Isaya 32:1, 2; Vaheb. 13:17) Ngako hi txi londisa Jehovha i ku mkongomisi wathu wo pelela, athu hi nga themba ka ti to ene a na hi hulukisa ka totshe tiphango, ni ku hi na simama hi va vangana vakwe ngu ha ku si gumiko ka mafu a maphya.