Bhiblia yi ti veka ha kubasani ti to Jehovha a nga zivisa ati ti no maheka mbimo yi yi tako. (Isaya 45:21) Kambe Bhiblia kha yi txhamuseli totshe mayelano ni nzila yi Jehovha a zivisako ngu yona mwendo mbimo yi a mahako ngu yona toneto hambi mbimo yi a sawulako ku tiziva ngu yona. Se kha hi nga ni nzila yo ziva totshe mayelano ni wusikoti wa Jehovha wo ziva ati ti no maheka mbimo yi yi tako. Kambe, ku ni ti hi ti pfisisako.

Jehovha a nga maha totshe ati a ti lavako, kambe ti nga maha e sawula kwa mbi maha timwani. Ngu kuva ni wuzivi wo mbi gwitelwa Jehovha a nga zivisa tihi ni tihi a ti ati lavako. (Var. 11:33) Kambe Jehovha a nga sawula kwa mbi ziva ati ti no maheka ngu ku a ni wusikoti wo pelela wo ti wonelela apune.—Fananisa ni Isaya 42:14.

Jehovha wa tsanisekisa ti to kudhunda kwakwe mbimo yotshe ku na maheka. Se eto ti tsimbitisana ngu nzila muni ni wusikoti wakwe wo zivisa ta mbimo yi yi tako? Isaya 46:10 yi txhamusela tiya: “Ni zivisa magwito  kukhukhela makhatoni ni kukhukhela kale ngutu atile ti sanziko kumaheka; Ni ku khani: ‘Makungo angu ma na tsana, se ni na maha kotshe kuranda kwangu.’”

Tximwani txivangelo txi mahako to Jehovha e zivisa ti ti no maheka mbimo yi yi tako ngu ti to ene ani mtamo wo maha ti to timhaka ti hetiseka. Jehovha kha ti sungi ku e ziva ti ti no maheka mbimo yi yi tako kufana ni m’thu wu a lerako pajina yo gwitisa ya dibhuku kasi ku ziva totshe ti ti patekako. Hahanze keto Jehovha a nga maha txisungo txa ti to to kari ti maheka ka mbimo yi ayi lavako. Ni ku ene wa tsanisekisa ti to timhaka toneto ti maheka ngu yona mbimo yile ayi lavako.—Eks. 9:5, 6; Mat. 24:36; Mith. 17:31.

Ngu toneto Bhiblia yi thumisako, mapswi yo fana ni yawa “ni lulamisete,” “ni wombile” ni “ni simekile” kasi kutxhamusela ati Jehovha ati mahako mayelano ni ti ti no maheka mbimo yi yi tako. (2 Vafu. 19:25; Isaya 46:11) Mapswi oneyo mata ngu ka wuhunduluxeli wa dipswi da txihebheru a di di tsimbitisanako ni dipswi di di txhamuselako ku “Muwumbi.” (Jer. 18:4) Kufana ni muwumbi awu aku ni wusikoti wo txitxa dibumba di va txiya txo tshura, Jehovha a nga wumba mwendo kutxitxa so maha kasi ku e kota kumaha kudhunda kwakwe.—Vaef. 1:11.

Jehovha a ningile mkhululeko wo ti sawulela mmwani ni mmwani niku ene wa ti xonipha toneto. Ene kha sungi a ti ti no maheka ka wutomi wa mmwani ni mmwani. Niku ene kha mahi ti to vathu va vanene va maha to kari a ti ti no va beta txibeheni ditshiku dimwani. Ene a tumelela ti to mmwani ni mmwani e sawula nzila yakwe ni ku ene wa va txharihisa ku ve londisa nzila yi i ku ya yinene.

Wona txikombiso txa vathu va va nga txi zumba Ninivha. Jehovha a zivisile ti to didhoropa diya di ndi na hoxotwa ngu mhaka ya wubihi wa dona. Kambe mbimo yi vathu va Ninivha va nga tisola,“Txizimu txi ti layile ka makhombo ya txi nga ti ma wombile ti to txi na ma maha aniko kha txa ma maha.ʼʼ (Jona 3:1-10, NM) Jehovha a txitxile mawonelo yakwe mayelano ni ti a nga ti wombile nguku va Ninivha va thumisile mkhululeko wawe wo ti sawulela ni ku va xamute ngu nzila ya yinene ka didungula da Jona. Se kha va nga loviswa.

Txikombiso tximwani txa wuprofeti mayelano ni mkoma wu a dhanwako ku i Siro, awu a ndi no hulukisa Vajudha wukhumbini ni ku rumisa ku kuwusetwa dithempele da Jehovha. (Isaya 44:26–45:4) Mkoma Siro wa Peresiya a hetisisile wuprofeti wonewo. (Ezra 1:1-4) Jehovha a thumisile Siro kasi kuhetisisa wuprofeti wakwe na a si mu sinzisi ku e m’khozela, mwendo ku, Siro a di ni mkhululeko wo ti sawulela kumaha sisungo sakwe ni kusawula awu a no m’khozela.—Mav. 21:1.

Ti ha kubasani ti to ku ni wuxokoxoko wumwani wo tala ka wusikoti wa Jehovha wo ziva ati ti no maheka mbimo yi yi tako. Kuwomba ditshuri, kha nga ho m’thu wu a ti pfisisako kwati tinzila ta Jehovha, mwendo ku, ati a ti mahako ni ti a ti pimisako. (Isaya 55:8, 9) Kambe totshe ti Jehovha a nga zivisa ta tsanisa likholo lathu ti to yotshe mbimo Jehovha a maha ti i ku tatinene kupata ni kuzivisa ta mbimo ayi yi tako.