1, 2. Hi ti zivisa kutxani ti to Jehovha a ni wuha?

JEHOVHA i Txizimu txa wuha. Sotshe si hi ku naso si ta ngu kwakwe. Ngene nyamni wa sotshe si si ku ho ha mafuni ni ku wa hi vhuna ngu sona. (Masalmo 104:13-15; Hagayi 2:8) Amu ka Bhiblia hi gonda nzila yi Jehovha a nga maha sidiwukiso ngu silo sa lisima ti to e vhuna vathu vakwe.

² Kudingana 40 wa malembe, Jehovha a ningile Vaisrayeli manna ni mati mbimo yi va nga ti txiwulani. (Eksodha 16:35) Se vona va si pwati txilo. (Nehemiya 9:20, 21) Ngu kutsimbila ka mbimo Jehovha a ningile mprofeti Elija mtamo ti to e tata txidhuwana txa mafura txa noni yo thembeka. Ningo yoneyo yo ta ngu ka Txizimu yi vhuni noni ti to yi hakela sikweneti ni ti to yi mana male yo ti khatalela ni vanana va yona. (2 Vafumeli 4:1-7) Ngu kuseketelwa ngu Jehovha, Jesu a mahile txidiwukiso txa ti to kuva ni sakudya sa singi ni male mbimo yi yi nga ti laveka.—Matewu 15:35-38; 17:27.

3. Ngu sihi siwutiso si si no xamulwa ka msungo wuwa?

 ³ Jehovha a nga thumisa tximwani ni tximwani ti to e seketela sivangwa sakwe. Ngu toneto, ene a gela Malanda akwe ti to me ningela ngu ha ma kotako ngu kona ti to me seketela sengeletano yakwe. (Eksodha 36:3-7; Lera Mavingu 3:9.) Ka msungo wuwa hi na xamula siwotiso siya: Ngu kutxani Jehovha a txi lava ti to hi tshumela hi m’ninga silo sathu sa lisima asi i ku ene a nga hi ninga? Malanda akwe a kale ma wu seketete ngu nzila yihi mthumo wakwe? Sengeletano ya Jehovha yi yi thumisa ngu nzila yihi male ayi yi humiswako?

4. Ngu kutxani hi txi ningela ka Jehovha?

⁴ Ha ningela ka Jehovha nguko ha m’dhunda. Mbimo yi hi alakanyako ngu totshe ti Jehovha a nga hi mahela, timbilu tathu ti maha ti to hi mu dhunda ngutu. Mkoma Dhavhidha a ti pfite ngu nzila yoneyo mbimo yi a nga womba ati ti nga ti laveka ti to kuakwa dithepele. Ene a wombile ti to sotshe si hi ku naso si ta ngu ka Jehovha ni ku asi hi mu ningako ngene a nga hi ninga.—Lera1 Makronika 29:11-14.

5. Ngu kutxani hi di fanete ku ningela ka Jehovha ti txi huma mbiluni?

⁵ Kuningela i nzila yimwani yo khozela Jehovha. Ngu m’woniso, mpostoli Johani a pfite malanda a Jehovha a nzumani ma txi: “Ngawe u ku ni fanelo, Mkoma Txizimu txathu, ya kuamukela kupfaliswa, wudhumo ni mtamo, nguko ngawe u nga vanga sotshe simaha; se ngu kuranda kwako, sona si tumbulukile, si mana kuhanya.” (Mtuletelo 4:11) Ngu ditshuri Jehovha ngene basi a fanelwako ngu kupfaliswa ni wudhumo. Se ti lava hi maha mizamo ya hombe. Ngu kuthumisa Mosi, Jehovha a leletile ditiko da Israyeli ti to di maha m’buso kuraru ngu dilembe. Txienge tximwani txa m’buso wonewo txi txi pata kuningela ka Jehovha. M’thu a sa fanela “ku ti kombekisa masoni ka MKOMA a sa ñola txilo.” (Dhewuteronome 16:16) Ni nyamsi, txienge tximwani txa lisima txa wukhozeli wathu ngu ningela ti txi huma mbiluni. Hi txi maha eto hi kombisa ti to ha ninga lisima ni kuseketela mthumo wa sengeletano ya Jehovha.

6. Ngu kutxani kuningela i di ta lisima? (Wona mfota wu wu ku makhatoni.)

⁶ Phela nda lisima kuningela kambe hi si emeli kutshumetelwa. (Lera Mavingu 29:21, Tradução do Novo Mundo.) Alakanya ngu mwanana wu a ningwako simaliyana ngu vaveleki vakwe, se e thavisa ya yidotho e xava txo maha eya ninga vaveleki vakwe. U pimisa to va nga tipfisa kutxani vaveleki ngu ningo yoneyo? Mwendo nyaphandule wu a zumbako ni vaveleki vakwe se e humisa male e ninga vaveleki ti to ve hakela nyumba mwendo kuxava sakudya sa mwaya wawe. Ti nga maha vaveleki va sa txi emela txivhuno txonetxo, se ngu kutxani va txi amukela male? Nguku i nzila yo kombisa kubonga totshe ti va ti mahako ngu ngene. Ngu ha kufanako, Jehovha wa tiziva ti to nda lisima kuningela ngu silo sathu sa lisima.

7, 8. Ningela txikombiso txa nzila yi vathu va Jehovha va nga ti humisa ngu yona miningelo. a) Ka mithumo ya kuakwa. b) Ni kuseketela ava va nga ti thangela.

⁷ Ka Bhiblia, hi gonda ti to vathu va Jehovha va humisile miningelo ti to ve seketela mthumo wakwe. Mbimo yimwani va tiningetela ka mithumo yo kari. Ngu txikombiso, Mosi a kuzetile Vaisrayeli ti to ve sengela ka kuakwa ka ditenda do sawuleka. Mkoma Dhavhidha nene a mahile ti ti fanako mbimo yi ku nga ti lava kuakwa dithepele. (Eksodha 35:5; 1 Makronika 29:5-9) Ngu mbimo ya kufuma ka Mkoma Jowasi, vaphaxeli va wusetile dithepele ngu kuthumisa male yi vathu va nga ti humisile. (2 Vafumeli 12:4, 5) Mbimo yi Makristu a kale ma nga ziva ti to Judheya ku ti ni nzala, Mkristu mmwani ni mmwani a mahile mizamo yo vhuna vanathu vonevo.—Mithumo ya Vapostoli 11:27-30.

⁸ Vathu va Jehovha va ti humisa miningelo ti to ve seketela ava va nga ti thangela ka mthumo wakwe. Ngu txikombiso, ngu kuya ngu mlayo wa Mosi, Valevhi va singa ni txiavelo kufana ni tihunzu timwani. Se Vaisrayeli va humisile sa wugumi ve ninga Valevhi. Eto ti mahile ti to Valevhi ve tiningetela ka mthumo wu va nga ti wu maha ka ditenda da msengeletano. (Mitengo 18:21) Ngu ha kufanako, vavasikati va wuha va ningete si va nga ti naso ti to ve seketela Jesu ni vapostoli vakwe.—Luka 8:1-3.

9. Miningelo yi yi nga ti humiswa kale yi txi ta ngu hani?

⁹ Phela miningelo yoneyo yi txi ta ngu ka makhalo o hambana-hambana. Ngu txikombiso, Vaisrayeli va humisile silo sawe sa lisima asi va nga txi ta naso ngu Egipta ti to ve aka ditenda da msengeletano. (Eksodha 3:21, 22; 35:22-24) Ka mbimo ya kale, Makristu mamwani ma xavisile si ma nga ti naso ti to me vhuna vapostoli. Vapostoli va thumisile miningelo yoneyo ti to ve vhuna vanathu va va nga ti ni txilaveko. (Mithumo ya Vapostoli 4:34, 35) Makristu mamwani ma ti sengeleta male yi ma nga ti nayo ti to me seketela mthumo. (1 Vakorinto 16:2) Ngu toneto, ti singa ni mhaka ni ti to hi ganyile mwendo hi sisiwana, hotshethu hi nga ningela tximwani ni tximwani txi hi ku natxo ti to hi seketela mthumo.—Luka 21:1-4.

10, 11. a) Hi nga wu tekelela ngu nzila yihi wuha wu vathu va Jehovha va mbimoni ya kale va nga ti nawo? b) U tipfisa kutxani ngu kuseketela mthumo wa Mfumo?

¹⁰ Ni nyamsi, nathu hi nga humisa miningelo ti to hi seketela silaveko so kari. Ti nga maha dibanza di sunga ti to kuwusetwa Nyumba ya Mfumo mwendo kuakwa ya yiphya. Mwendo ti nga maha ku di ni txilaveko txo wusetwa didhavi. Hi nga tshumela hi humisa miningelo ti to hi seketela mtshangano  wa m’ganga mwendo kuvhuna vanathu va va nga welwa ngu tiphango ta mtumbuluko. Miningelo yathu yi nga tshumela yi vhuna varumiwa, vanyaphandule vo sawuleka, va woneleli va sigava ni va va thumako ka kuaka ka tihofisi ta madhavi, makhalo o ñola ka ona mitshangano ya hombe ni Tinyumba ta Mfumo ha mafuni kotshe.

¹¹ Hotshethu hi nga ningela si hi ku naso ti to hi seketela mthumo wu sengeletano ya Jehovha yi wu mahako ka masiku awa o gwitisa. Phela miningelo yoneyo nja txihunja. Mbimo yi hi betako male ka mabhokiso mwendo kuningela ngu internet ngu kuthumisa jw.org, kha hi lavi ti to vamwani ve tiziva ti to hi ningete male muni. Se u ti pfisa kutxani u txi wona ti to mningelo wako wu dotho ngutu? Phela ngu ditshuri, ku tala ka miningelo ayi yi amukelwako ngu sengeletano njidotho ngutu. Hambi vanathu va va pwatako, va ningela wudotho wu va ku nawo kufana ni Makristu a Makedhoniya. Ona ma ti ni “wusiwana wa hombe,” kambe ma kombisile wuha ngu kuhumisa miningelo.—2 Vakorinto 8:1-4.

12. Sengeletano yi duketa ngu nzila yihi ti to yi thumisa miningelo ngu nzila ya yinene?

¹² Mmidi wu wu Fumako njithumi txo thembeka na txi di ni wutxhari ka nzila yi wu thumisako ngu yona miningelo. (Matewu 24:45) Wona wa khongela ti to wu kota kumaha sisungo sa sinene sa nzila yi wu nga thumisako male ngu yona. (Luka 14:28) Mbimoni ya kale wamwana wo thembeka awu a nga ti khatalela timhaka ta miningelo ati tsaniseka ti to miningelo yi fanete yi thumiswa ka wukhozeli wa Jehovha basi. Ngu txikombiso, Ezra a tshumete Jerusalema ni silo sa lisima asi si nga txi ta ngu ka Mkoma wa Persiya asi si patako, silivhela, nzalama ni silo simwani sa lisima asi nyamsi si pindako male ya mtengo wa 300 wa timiliyoni. Ezra a ningete sileletelo asi si ndino va vhikela ka tiphango ta matiko ya va nga tiya ka ona. (Ezra 8:24-34) Malembe msana, mpostoli Paulo a tekile male ti to e ya vhuna vanathu va Judheya. Ene a ti tsaniseka ti to ava va nga ti khatalela timhaka ta male ve maha “mithumo ya yinene i singa masoni ka Mkoma dwe, kambe ni masoni ka vathu.” (Lera 2 Vakorinto 8:18-21.) Nyamsi, sengeletano yathu yi etetela txikombiso txa Ezra ni txa Paulo ngu kuthumisa miningelo ngu nzila ya yinene.

13. Ngu kutxani sengeletano yi di mahile kutxitxa ko kari ka mathumiselo a miningelo?

¹³ Mbimo yimwani mwaya wu nga txitxa nzila yi wu thumisako male ngu yona ti to wu si yi thumisi ngutu kupinda yi va yi manako. Mwendo ku va nga hehukisa wutomi ti to ve kota kumaha to tala ka Jehovha. Ngu ti sengeletano ya Jehovha yi ti mahako. Malembenyana msana hi woni silo sa siphya, kambe ngu mbimoanyana, kuthumisilwe male yo tala kupinda yi yi amukelwako. Kufana ni mwaya wule, sengeletano yi woni tinzila timwani to xayisa male ngu kuhungula yimwani mithumo mwendo ku yi hehukisa, se eto ti maha ti to yi thumiswa kwati miningelo yi vanathu va yi ningelako.

14-16. a) Yi thumwa txani miningelo yako? b) Silo si hi ningwako ngu sengeletano si kuvhunisile kutxani awe upune?

¹⁴ Wungi wa va i ku kale va txi thumela Jehovha va womba ti to sengeletano yi hi ninga  so tala kupinda kale. Konkuwa hi ni jw.org ni JW Broadcasting. Hi ni Tradução do Novo Mundo das Escrituras Sagradas ayi yi kuho ngu tidimi ta tingi. Ngu 2014/2015, hi ve ni Mtshangano wa Matiko Otshe wa masiku mararu awu wu nga txi khene: “Kukhata lavani Mfumo.” Yimwani ya mitshangano yoneyo yi mahilwe ka 14 wa madhoropa. Se ava va nga xalela mitshangano yoneyo va tsakile ngutu!

¹⁵ Wungi wawe va kombisile kubonga silo soneso si tako ngu ka sengeletano ya Jehovha. Ngu txikombiso, mpatwa wumwani wu wu thumako Ásia wu bhate tiya: “Hi mani txiavelo txo ya thuma ka didhoropa da didotho. Hi txi tipfa hi di hokha, ni ku hi ti thuka hi divala ti to hi ka mthumo wa Jehovha. Kambe mbimo yi hi nga xalela milongoloko ya JW Broadcasting, hi khumbute ti to nathu hi va mwaya wa vanathu va matiko otshe. Vanathu va wukhalo wu hi ku ka wona va yi dhunda ngutu JW Broadcasting. Msana ko xalela mlongoloko wa mtxima ni mtxima, hi talisa ku va pfa va txi khona va tipfa va di hafuhi ngutu ni siro sa Mmidi wu wu Fumako. Konkuwa ha ti guleta ngu kuva txienge txa sengeletano ya Txizimu.”

¹⁶ Ha mafuni kotshe, kupinda 2.500 wa Tinyumba ta Mfumo ta akwa ni kuwusetwa. Vanathu vamwani va dibanza dimwani va ditiko da Honduras va wombile ti to vona va ti navela ku va ni Nyumba yawe ya Mfumo, se konkuwa mixuwo yawe yi hetisekile. Va ti khona: “Ha tsaka ngu kuva hi di ka mwaya wa Jehovha ni wumwewo wa vanathu va ha mafuni kotshe.” Vamwani va ti pfisile toneto mbimo yi va nga amukela Bhiblia ni mabhuku ya ma nga seketelwa ka yona ngu lidimi lawe, mbimo yi va nga vhuna vanathu va va nga welwa ngu phango ya mtumbuluko, mwendo mbimo yi va nga wona wuyelo yo tsakisa ngu kuningela wufakazi wa ha kubasani ni ka makhalo ya ku  ku ni vathu vo tala ka wukhalo wu va zumbako ka wona.

17. Hi tizivisa kutxani ti to Jehovha wa seketela sengeletano yakwe?

¹⁷ Phela ava i ku singa Tifakazi kha va ti pfisisi ti to ngu kutxani hi txi maha totshe ti hi ti kotako ti to hi humisa miningelo ngu kutidhunda. Wona nzila yi mthangeli wa hombe wa koponi yo kari a nga ti pfa ngu yona mbimo yi a nga endela wumwani wa makhalo ya ku ganjwako kona mabhuku athu. Ene a xamate ngutu a txi wona ti to mthumo wu mahwa ngu vathu vo tiningetela ni ku kha ku mahwi mitshangano ti to kuhumiswa misengo yo kari. Ene a wombile ti to a ti hi ti mahako kha ti na ku koteka. Athu ha tipfisisa! Ha tiziva ti to eto ti koteka nguku Jehovha a seketelako mthumo wakwe.—Jobe 42:2.

18. a) Hi na mana txani ngako hi txi seketela Mfumo? b) Hi nga va gondisa ngu nzila yihi vanana vathu ni va i ku ngadi vaphya ka sengeletano ti to ve va ni wuha?

¹⁸ Jehovha wa hi ninga lungelo yo seketela mthumo wa Mfumo. Ene wa hi tsanisekisa ti to hi txi maha toneto, a na hi katekisa. (Malakiya 3:10) Jehovha a thembisa ti to hi di ni wuha, hi na mana silo so tala. (Lera Mavingu 11:24, 25.) A tshumela e hi gela ti to hi na tsaka mbimo yi hi ningelako, nguko “kuha i kateko ya hombe ngutu kupinda kuhiwa.” (Mithumo ya Vapostoli 20:35) Phela ati hi ti wombako ni simaho sathu, singa gondisa vanana vathu ni va i ku ngadi vaphya ka sengeletano ti to ve va ni wuha kasiku ve mana makatekwa o tala.

19. Msungo wuwa wu ku kuzetile txani?

¹⁹ Ngu ditshuri sotshe si hi ku naso si ta ngu ka Jehovha. Mbimo yi hi mtshumetelako hi kombisa ti to ha m’randa ni ku ha ti ninga lisima totshe ti a nga hi mahela. (1 Makronika 29:17) Mbimo yi Vaisrayeli va nga humisa miningelo ti to kuakwa dithepele, vona va “to tsaka ngu kule va nga ninga ngu kuranda kwawe, nguko va ningete ka MKOMA ngu mbilu yo hetiseka.” (1 Makronika 29:9) Ngu toneto, he simameni hi mana litsako ngu ku tshumela hi ningela ka Jehovha asi i ku ene a nga hi ninga.