1. Dhavhidha a ti pfisile kutxani ngu Jehovha? Eto ti mu kuzetile kumaha txani?

MKOMA DHAVHIDHA a ti khene: “MKOMA mbwa hombe, kambe a na ni fanelo yo dhumiswa ngutu.” (Mas. 145:3) Ene a ti randa Jehovha, se lirando lonelo li mmahile e dhumisa Txizimu “hagari ka msengeletano.” (Mas. 22:22; 40:5) Ngu ditshuri awe wa mu randa Jehovha, ni ku wa tumelelana ni mapswi a Dhavhidha o khene: “Bongwa awe MKOMA Txizimu txa tate wathu Israyeli ka yotshe mbimo.”—1 Mak. 29:10-13.

2. a) Hi nga m’dhumisisa kutxani Jehovha? b) Ngu txihi txikarato atxi vanathu vamwani va ku natxo? Hi na wuseta txani?

² Nyamsi, nzila yimwani ayi hi dhumisako Jehovha ngu yona ngu ningela tixamulo mitshanganoni. Kambe vanathu vamwani va ni txikarato txa hombe. Va ti lava kuxamula va di mitshanganoni, kambe va thava. Va nga kuxulisa kutxani kuthava koneko? Va nga vhunwa ngu txani ti to ve sikota kuningela tixamulo ti ti tsanisako? Na hi si se xamula siwotiso soneso, he khati ngu kuwuseta sivangelo sa lisima so ningela tixamulo mitshanganoni.

3-5. a) Ngu kuya ngu Vahebheru 13:15, ngu kutxani hi txi ningela tixamulo mitshanganoni? b) Ina ti lava ku hotshethu hi ningela tixamulo to fana? Txhamusela.

³ Hotshethu Jehovha a hi ningile lungelo yo m’dhumisa. (Mas. 119:108) Tixamulo tathu hi di mitshanganoni njienge txa “mhamba yo dhumisa,” se a walo a nga hi tshundako ku yi  ningela. (Lera Vahebheru 13:15.) Ina Jehovha a lava ti to hi ningela mhamba mwendo xamulo yo fana? Lambi!

⁴ Jehovha wa ti ziva ti to hi ni wusikoti ni siemo so hambana, se ene wa ninga lisima asi hi kotako kuningela sona. Alakanya ngu mixaka ya miningelo ayi a nga txi yi amukela ka Vaisrayeli. Phela vamwani va ti ningela ngu nvuta mwendo phongo. Kambe Vaisrayeli vamwani va i nga ti sisiwana va ndi no ningela “matuva mambidi mwendo mavhondo mambidi a situvani.” Se ngako m’thu a si si koti kuningela ngu sinyana simbidi, Jehovha a ti tumela “mune wa makilu a mpupu wa wunene.” (Levhi 5:7, 11) Mpupu wu si dhuli, kambe Jehovha a ti wu tsakela wu txi ningelwa, i txi nga va “mpupu wa wunene.”

⁵ Txizimu txathu txa wunene txi ti pfisa toneto ni nyamsi. Hi txi ningela xamulo txona kha txi rinzeli ti to hotshethu hi ziva kuwomba-womba kwati kufana ni Apolosi, mwendo kukholwisa kufana ni Paulo. (Mith. 18:24; 19:8) Jehovha a lava ti to hi ningela tixamulo ngu ha hi nga kotako ngu kona. Khumbula noni yile yi nga ningela simaleana simbidi. Phela Jehovha a yi woni i di ya lisima nguku yi nga ningela ngu sotshe si yi nga ti naso.—Luka 21:1-4.

6. a) Ngu kuya ngu Vahebheru 10:24, 25 tixamulo ti u ti engisako mitshanganoni ti kugwesisa kutxani? b) U nga kombisisa kutxani kubonga ngu tixamulo ati ti kutsanisako?

⁶ Ha tsaniselana ngu tixamulo tathu. (Lera Vahebheru 10:24, 25.) Hotshethu ha tsaka mbimo yi hi engisako tixamulo to hambana-hambana mitshanganoni. Ha tsakiswa ngu tixamulo to huma mbiluni ta vanana. Ha tshumela hi tsaniswa ngu mapswi ya mwanathu a txi xamula mayelano ni thomba yo kari ya moya yi a nga yi gonda. Ta hi tsakisa kambe kuwona va va manako “mtamo” wo ningela xamulo, hambi i di ti to va thavanyana mwendo kha va li zivi kwati lidimi lathu. (1 Vat. 2:2) Hi nga kombisisa kutxani kubonga mizamu yawe? Ngu ku va bonga ngu magwito ka mitshangano. Nzila yimwani ngu kuningela xamulo nathu. Se, kha hi na kuzumbela kuamukela txitsaniso dwe, kambe nathu hi na va tsanisa.—Var. 1:11, 12.

7. Ngu yihi wuyelo hi yi manako ngako hi txi ningela tixamulo?

⁷ Ha wuyelwa ngu tixamulo tathu. (Isaya 48:17) Ngu nzila muni? Txo khata, ngako  hi txi lulamisela ku ya xamula, hi na hisekela kuwuseta kwati mitshangano. Ngako hi txi lulamisela kwati hi mana wuzivi wo engeteleka wa Dipswi da Txizimu. Ngako hi di ni wu wuzivi ti na hi hehukela kuthumisa ati hi ti gondako. Txa wumbidi, mitshangano yi na hi tshambela ngutu, nguko hi na pateka ka yona. Txa wuraru, aku kuningela xamulo ti lavako mizamo yo kari, ti na hi vhuna kukhumbula timhaka ta lisima ti hi nga ti gonda hambi mitshangano yi di gumile.

8, 9. a) Ngu kuya ngu Malakiya 3:16, Jehovha a ti pfisa kutxani ngu tixamulo tathu? b) Ngu txihi txikarato atxi vamwani va nga vako natxo?

⁸ Hi tsakisa Jehovha mbimo yi hi kombisako kukholwa kwathu. Hi nga tsaniseka to Jehovha wa hi engisa ni ku ene wa ninga lisima mizamo yathu yo xamula mitshanganoni. (Lera Malakiya 3:16.) Ene a kombisa ti to wa tsaka ngu ku hi katekisa mbimo yi hi duketako ku m’tsakisa.—Mal. 3:10.

⁹ Ti ha kubasani ti to hi ni sivangelo sa sinene so xamula hi di mitshanganoni. Hambi keto, vamwani va thava kuguleta diwoko. Ngako nawe u txi ti pfisa toneto, u nga godholi. Konkuwa, he bhuleni ngu matshina o kari a milayo ya Bhiblia, sikombiso so kari, ni mamahelo o kari aya ma nga hi vhunako kuningela tixamulo hi di mitshanganoni.

10. a) Ngu kuhi kuthava aku vamwani va ku nako? b) Ngu kutxani kuva ni dizowa i nga vako ta tinene?

¹⁰ Ina awe wa wika msana u txi lava kuguleta diwoko to u xamula? I di toneto, khu nga wekha. Ditshuri ngu ti to wungi wathu hotshethu ha thavanyana. Na u si se lwisana ni txikarato txiya, khata ngu kuwona ti to nji txani txi kuvhalelako. Ina u thava ti to u na guleta diwoko u gwita u divala ti u lavako kuwomba mwendo u thava ku na xamula ta walo? Ina u thava ti to xamulo yako yi na palwa ngu ya vamwani? Phela kuthava ko ngeto ku nga va txikombiso txa txinene. Ku nga kombisa ti to wa tiveka hahatshi ni ku u wona vamwani va di gulekile ku kupinda. Jehovha wa tsaka ngu  kutiveka hahatshi. (Mas. 138:6; Vaf. 2:3) Kambe ene a lava ti to hi m’dhumisa ni kutsanisa vanathu mitshanganoni. (1 Vat. 5:11) Ene wa kudhunda, a na kuninga txibindi atxi u txi lavako.

11. Ngu txihi txialakanyiso txa mu ka Bhiblia atxi txi nga hi vhunako?

¹¹ Wona sialakanyiso simwani sa mu ka Mibhalo. Bhiblia yi womba ti to hotshethu ha onha ka ti hi ti wombako ni nzila yi hi ti wombako ngu yona. (Jak. 3:2) Jehovha kha emeli ti to athu kumweko ni vanathu hi va vo hetiseka. (Mas. 103:12-14) Vona mba mwaya wathu wa moya, ni ku vona va hi randa. (Marku 10:29, 30; Joh. 13:35) Vona va ti pfisisa ti to wumwani mkama tixamulo tathu ti na humanyana hanzila.

12-13. Hi gonda txani ka txikombiso txa Nehemiya ni txa Jona?

¹² Alakanya ngu sikombiso simwani asi si nga kuvhunako kuxula dizowa. Wa mu khumbula Nehemiya? A ti thuma wukomani ka mkoma wa hombe. Nehemiya a ti karatekile nguko a nga ti pfite ti to maguma a Jerusalema se i ti marumbi. (Neh. 1:1-4) Alakanya nzila yi a nga wika msana ngu yona mbimo yi mkoma a nga khene a na wombe ti to ngu kutxani a txi woneka a si tsaki! Nehemiya a to maha mkombelo ngu txikuluveta e gwita e xamula. Se mkoma a mahile to tala ti to e vhuna vathu va Txizimu. (Neh. 2:1-8) Tshumela u alakanya ngu Jona. Mbimo yi Jehovha a nga mu ruma kuya womba-womba ni vathu va Ninivha, ene a ti thava ngutu, se e tutuma e ya wukhalo wumwani. (Jona 1:1-3) Kambe ngu kuvhunwa ngu Jehovha, Jona a sikoti ku ya txhumayela Vaninivha. Se madungula akwe, ma va vhuni ngutu Vaninivha. (Jona 3:5-10) Ka txikombiso txa Nehemiya, hi gonda lisima lo maha mkombelo hi si se xamula. Ka txa Jona, hi gonda ti to Jehovha a nga hi vhuna ti to hi mthumela ku si nga ni mhaka ni kuthava ku hi ku nako. Ina vanathu va dibanzani va fana ni Vaninivha ti to hi za hi thava kuxamula?

¹³ Hi nga vhunwa ngu txani ti to hi ningela tixamulo ta tinene hi di mitshanganoni? Wona timwani ti u nga mahako.

14. Ngu kutxani hi di fanete hi lulamisela kwati mitshangano yathu? Ngu dihi ditshiku do lulamisela?

¹⁴ Lulamisela kwati mitshangano. Ngako u txi maha makungo ni kululamisela i di ngadi mbimo, u na tipfa u txi tsana kuxamula. (Mav. 21:5) Phela hotshethu kha hi na mithumo yo fana. Eloise awu i ku noni a ku ni mu ka 80 wa malembe, a khata kululamisela Gondo ya Muwoneleli makhatoni ka divhiki. A khene: “Na tsaka ngu mitshangano ni di lulamisete i di ngadi mbimo.” Joy, a thumako ditshiku ni ditshiku ka m’thu wo tihanyisa, a ti vekela mbimo ngu Mlongiso kasi e gonda Muwoneleli. A khene: “Ni dhunda ku ya gonda ni di ngadi kuwuseta.” Ike, i ku  didhota di di zumbako di di ñolekile futhi i ku nyaphandule di khene: “Ni wona i di tshuko kugonda kudotho-kudotho divhiki dotshe, kupinda kutekela kugonda kumweko ngu mbimo yo lapha.”

15. U nga mahisa kutxani ti to u lulamisela kwati mitshangano?

¹⁵ U nga mahisa kutxani ti to u lulamisela kwati mitshangano? Ka msungo wumwani ni wumwani wa gondo, khata ngu kukombela moya wo sawuleka ka Jehovha. (Luka 11:13; 1 Joh. 5:14) Hetanyana mbimo u txi wona msungo wa mhaka, sisungwana sa kona, sikombiso, titxhamuselo to engeteleka ni siwotiso so wuseta. Mbimo yi u gondako ndimana yimweyo ngu yimweyo, ka mibhalo ayi yi nga kombiswa zama kulera yi u nga yi kotako. Alakanyisisa ngu mhaka yi yi gondwako, wonisisa kha kwati amu u lavako ku ya xamula kona. Ngako u txi lulamisela kwati, u na vhuneka ngutu ni ku ti na kuhehukela ku ya xamula.—2 Vak. 9:6.

16. Ngu sihi sithumiswa asi si manekako ngu lidimi u li u li zivako? U si thumisisa kutxani?

¹⁶ Ngako ti txi koteka, thumisa sithumiswa simwani sa mu ka mitxhini asi si kuho ngu lidimi li u li zivako. Ngu kuthumisa sengeletano yakwe, Jehovha a hi ningile sithumiswa soneso ti to si hi vhuna kululamisela mitshangano. JW Library^® ya hi vhuna kubhaxara mabhuku mu ka foni mwendo tablet. Msana ko bhaxara hi nga gonda, hi nga lera mwendo kuengisela silo si hi nga bhaxara, ngu mbimo mwendo wukhalo wu hi wu lavako. Vamwani va thumisa JW Library ti to ve gonda va di txikolwani, mthumoni ngu mbimo yo humula, mwendo va txi enda. Watchtower Library ni BHIBHILIYOTEKA YA SITE^™ ya Watchtower sa hi vhuna kumaha wuxolisisi wa mhaka yo kari ayi hi tsakelako kugonda to tala ngu yona.

17. a) Ngu kutxani i di ta tinene kululamisela tixamulo ti di tate? b) U gondile txani ka vhidhiyo yi yi ku khene: Torne-se Amigo de Jeová — Prepare seu comentário?

¹⁷ U txi ti kota, lulamisela tixamulo to tala ka gondo yimwani ni yimwani. Ngu kutxani? Nguko ti nga maha u si xungametwi ka otshe makhambi ya u no guleta diwoko. Ti nga maha vamwani ve guleta mawoko ngu mbimo yimweyo, se mtsimbitisi wa gondo a no sawula mmweyo dwe. Ti to yi si dyiwi mbimo, kha ti na kukoteka ku votshe va guletako mawoko ve xamula ka txiwotiso txo kari. Ngu toneto, u nga swireki mwendo kugodhola ngako u si xungametwi yi txi nga txi khata gondo. Se, u txi lungisela tixamulo to tala, u na sikota kumana mkhanjo wo xamula nanawe. U nga xamula kambe ngu kulera m’bhalo wo kari. Hambiketo,  u txi ti kota lulamisela ku ta xamula ngu kuthumisa mapswi ako upune. *

18. Ngu kutxani ti di ni lisima kukomisa tixamulo?

¹⁸ Komisa xamulo yako. Phela tixamulo to koma ni to hehuka, ngu tona ti kuzetako. Ngu toneto, zama kukomisa tixamulo tako. Duketa kwa mbi pindisa 30 wa masegundo u txi xamula. (Mav. 10:19; 15:23) Ngako u di ni malembe u txi xamula mitshanganoni, zama kuvekela vamwani txikombiso txa txinene i ku kwa mbi heta dilembe u txi ngadi u txi xamula. Ngako tixamulo tako ti di ni titxhamuselo to karata ti tshumela ti lapha, vamwani va na thava ve pimisa ti to va na mbi sikota kuxamula kufana ni nawe. Xamulo yo koma yi tshumela yi ninga vamwani mkhanjo wo xamula. U txi xamula peka msungo wa mhaka, ngutu-ngutu i di awe wo khata kuxamula. U nga lweli kuxamulela totshe. Msana ko va se ku di xamutwe mhaka ya hombe ka ndimana yo kari, ngu kona se u nga wombako timwani to engeteleka.—Wona dibhokiso di di ku: “ Nzila yo ningela xamulo.”

19. U nga maha txani kasiku mtsimbitisi wa gondo e ku ninga mkhanjo wo xamula?

¹⁹ Gela mtsimbitisi wa gondo ti to ku ni ha u tsakelako kuxamula kona. Ngako u txi sawula kumaha toneto, womba-womba ni mtsimbitisi wa gondo mitshangano yi si se khata. Ngako ku txi wotiswa txiwotiso txa ha u lavako kuxamula kona, ngu txikuluveta guleta diwoko, u di gwimba kwati kasi ku e kuwona.

20. Mitshangano ya dibanza yi fanisa kutxani ni kususula ni vangana?

²⁰ Mitshangano ya dibanza, yi fana ni sakudya asi hi dyako kumweko ni vangana vathu. Hi nga pimisa ngako vanathu va ti lumisela sakudya, se ve kukombela ku u bhika so kari, u ndi na txani? U nga thavanyana, kambe u ndi na zama kululamisela nga ti u ti kotisako tona kasi ku votshe ve ta tsaka. Jehovha ngene a nga hi ramba, a lulamisete meza yo tala ngu silolo ka mitshangano yathu. (Mas. 23:5; Mat. 24:45) Ene wa tsaka ngako nathu hi si ti ngu mawoko, kambe hi ta di ñote txo kari hi txi kotako. Ngu toneto, lulamisela kha kwati, u tshumela u xamula u di txhatxhekile. U txi maha toneto, u na va u txi ta ni txo kari ka mitshangano ya dibanza, i ku mezani ka Jehovha i si nga ku ta dya dwe.