1-2. a) Jehovha a wona txani mbimo yi vathu va tshanganako ka Txialakanyiso txa Mkoma? (Wona mfota wa kapa.) b) Hi na bhula kutxani ka gondo yiya?

ALAKANYA ati Jehovha a ti pfisako tona mbimo yi a wonako timiliyoni ta vathu ti txi ya ka Txialakanyiso txa Mkoma. Ene kha bali mtengo dwe, kambe a wona mmweyo ni mmweyo wathu awu a sengemelako. Ngu txikombiso ene wa wona votshe va va manekako dilembe ni dilembe. Ka vonevo vamwani va kona va wonisana ni kuxaniswa. Vamwani kha va ti ka mitshangano yimwani, hambiko va ti wona i di ta lisima ku ta ka Txialakanyiso. Jehovha wa wona ni va va tako ngu dikhambi do khata, ti nga maha ngu kulava ku ta wona dwe.

² Ngu ditshuri Jehovha wa tsaka a txi wona dibutho da hombe di txita ka Txialakanyiso. (Luka 22:19) Hambiketo, ka Jehovha txa lisima hi nga mtengo wu wu manekako. Ene a tsakiswa ngu txivangelo txi txi mahako m’thu eta ka Txialakanyiso. Ka gondo yiya, hi na bhula ngu txiwotiso txiya: Ngu kutxani hi si yi ka Txialakanyiso dwe kambe ni ka mitshangano yimwani ayi Jehovha a yi lulamiselako avale a va randako?

3-4. a) Ngu kutxani hi txi xalela mitshangano? b) Ku maneka ka yona ti womba txani ngu ngathu? c) Ngu kuya ngu 1 Vakorinto 11:23-26, ngu kutxani ti sa fanela kulovha ka ditshiku da Txialakanyiso?

³ Txivangelo txa lisima txi txi hi mahako hi ya mitshanganoni ngu ti to yona njienge txa wukhozeli wathu. Timwani, nguko hi yako hi ya gondiswa ngu Jehovha. Vathu vo tigela kha va tumeli kugondiswa ngu txilo. (3 Joh. 9) Se athu ha  ti veka hahatshi hi tumela kugondiswa ngu Jehovha ni sengelatano yakwe.—Isaya 48:17, 18; Joh. 6:45.

⁴ Hi txi ya mitshanganoni hi kombisa ti to ha tiveka hahatshi. Ka mtshangano wuwa wo sawuleka wa Txialakanyiso txa lifo la Jesu, hi maneka i si nga ngu txikolo-kolo, kambe nguko hi ti vekako hahatshi hi engisa txirumo txa Jesu txo khene: ‘Mahelani ku ni alakanya.’ (Lera 1 Vakorinto 11:23-26) Mtshangano wonewo wu tsanisa themba yathu ya wumangwana ni ku hi khumbutisa lirando li Jehovha a ku nalo ngu ngathu. Hambiketo, Jehovha wa ti ziva ti to hi lava kutsaniswa ni kuningwa mtamo masiku otshe. Ngu toneto Ene a hi ninga mitshangano divhiki ni divhiki ni ku hi kuzeta ku hi maneka. Ku ti veka hahatshi ku hi susumetela kumaha toneto. Hi heta mbimo yo tala hi txi wuseta mitshangano ni kumaneka ka yona.

5. Ngu kutxani vathu vo ti veka hahatshi va txi amukela txirambo txa Jehovha?

⁵ Dilembe ni dilembe, vathu vo tala vo ti veka hahatshi va tumela txirambo txa Jehovha txo ta gondiswa ngu ngene. (Isaya 50:4) Va tsaka ngu kumaneka ka Txialakanyiso, ni ku va khata kumaneka ka yimwani mitshangano. (Zak. 8:20-23) Ngu wumwewo, ha tsaka kugondiswa ni kukongomiswa ngu Jehovha “m’vhuni [wathu] ni m’hulukisi [wathu].” (Mas. 40:17) Ti walo to tsakisa ngutu kupinda kuamukela txirambo txo gondiswa ngu Jehovha ni Jesu, Mwanana wakwe wu a mdhundako ngutu.—Mat. 17:5; 18:20; 28:20.

6. Ku ti veka hahatshi kuvhunisile kutxani dijaha dimwani ti to di ta ka Txialakanyiso?

⁶ Dilembe ni dilembe hi maha mizamo yo ramba vathu vo tala ti to ve ta ka Txialakanyiso txa lifo la Jesu. Vathu va vangi vo ti veka hahatshi va wuyetwe ngu kutumela txirambo. Ngu txikombiso, malembe msana dijaha dimwani di amukete txirambo txo ta ka Txialakanyiso, kambe di gete mwanathu wu a nga di ninga txiphephana ti to di na mbi ta maneka. Hambiketo, mwanathu a xamate a txi wona dijaha dile di di tile Nyumbani ya Mfumo ka ditshiku da Txialakanyiso. Dijaha dile di tsakile ngutu ngu ti di nga ñoliswa tona ha ko za di khata kuta mitshanganoni. Phela ka dilembe di nga londisela a to lovha mitshanganoni masiku mararu dwe. Nji txani txi nga maha di tsakela mitshangano? Nguko di nga txi ti veka hahatshi. Mwanathu wu a nga di ramba ati khene: “Dijaha do ti veka ngutu hahatshi.” Ti ha kubasani ti to Jehovha ngene a nga di dinda ti to di ta mkhozela, se konkuwa i mwanathu wu a nga bhabhatiswa.—2 Sam. 22:28; Joh. 6:44.

7. Ati hi ti gondako mitshanganoni ni mu ka Bhiblia ti nga hi vhunisa kutxani ku va vo tiveka hahatshi?

⁷ Phela ati hi ti gondako mitshanganoni ni mu ka Bhiblia ti nga hi vhuna ku va vo tiveka hahatshi. Ka mavhiki ya ma londiselako Txialakanyiso, mitshangano yathu yi womba-womba ngutu ngu txikombiso txa Jesu ni ku tiveka hahatshi aku a nga kukombisa ngu kuningela wutomi wakwe wu va mtirulo. Ka masiku ya ma londiselako Txialakanyiso, ha gonda ngu matimu ni simahakalo sa lifo la Jesu ni kuwuswa kwakwe. Ati hi ti gondako ka mitshangano yoneyo ni ti ti ku ka Bhiblia ti hi vhuna kukombisa kubonga digandelo di Jesu a nga hi mahela. Ta hi susumeta kuetetela mahanyelo akwe o ti veka hahatshi ni kumaha kuranda ka  Jehovha, hambi mbimo yimwani toneto ti txi hi karatela.—Luka 22:41, 42.

8. Jesu a kombisile txibindi ngu nzila yihi?

⁸ Hi tshumela hi etetela Jesu ngu kukombisa txibindi. Alakanya ngu txibindi txi a nga kombisa mbimo yi ma nga txi tshuketela masiku a lifo akwe. A txi ti ziva ti to valala vakwe va ndi na mu txhipisa, ve mu peketela ni ku mdaya. (Mat. 20:17-19) Kambe, ene a di ti emisete kufa. Se ku di hokile mbimo, a gete vapostoli vakwe ava a nga ti navo Getsemani a txi khene: “Khukhani hi tsula, se a hafuhi awu a lavako ku ni ningela.” (Mat. 26:36, 46) Mbimo yi sigevenga sile si nga ti lava ku ñola Jesu, a to tshuketa hafuhi, e ti kombekisa ha kubasani ni kugela masotxhwa ti to me leka vapostoli ve ti tsulela. (Joh. 18:3-8) Hi nga wona txibindi txi Jesu a nga txi kombisa! Nyamsi, vasawuleki ni tinvuta timwani va zama kuetetela Jesu ngu kukombisa txibindi. Ngu nzila yihi?

9. a) Ngu kutxani ti txi lava txibindi kuya mitshanganoni mbimo yotshe? b) Txikombiso txathu txi nga gwesisa kutxani vanathu va va ku jele ngu mhaka ya likholo?

⁹ Ti to hi xalela mitshangano ditshiku ni ditshiku, ti nga lava hi kombisa txibindi hi txi manana ni siemo so karata. Vanathu vamwani va ta mitshanganoni hambiku va mananako ni sikarato so fana ni kufelwa, dikhodho, mwendo malwati. Vamwani va manana ni kukanetwa ngu va mwanyani mwendo wukoma. Alakanya ngu ti to txikombiso txathu txi va gwesisa kutxani vanathu va va ku majele ngu mhaka ya likholo. (Vaheb. 13:3) Mbimo yi va zivako ti to ha simama hi txi thumela Jehovha ti si nga ni mhaka ni sikarato sathu, va tsaniswa likholo lawe, va mana txibindi ni kuthembeka ka Jehovha. Mpostoli Paulo a wonisanile ni txiemo txo nga txonetxo. Mbimo yi a nga ti jele ka Roma, a tsakile ngu kuziva ti to vanakwe va ti thumela Txizimu ngu kuthembeka. (Vaf. 1:3-5, 12-14) Neti a nga humiswa jele a bhalete dipapilo Vahebheru. Ka dipapilo donedo a kuzetile Makristu oneyo o thembeka a txi khene: “Yanani masoni ngu kurandana nga vanawe” ni ku va si leki kusengeletana.—Heb. 10:24, 25; 13:1.

10-11. a) Mba mani ava hi nga va rambako ka Txialakanyiso? b) Ngu kuya ngu Vaefesu 1:7 ngu txihi txivangelo txi hi ku natxo txo maha toneto?

¹⁰ Hi kombisa txibindi mbimo yi hi rambako maxaka athu, vathumi kulothi ni vaakelani ka Txialakanyiso. Ngu kutxani hi txi va ramba? Nguko hi kombisa kubonga ka ti Jehovha ni Jesu va nga hi mahela, se ta hi susumetela kugela vamwani ku ve ta ka Txialakanyiso. Hi lava ku va vhuna ve pfisisa ti to va nga wuyelwa ngu “kateko” ya Jehovha ya mtirulo.—Lera Vaefesu 1:7; Mtu. 22:17.

¹¹ Mbimo yi hi kombisako txibindi ngu kusengemela kumweko, hi tshumela hi kombisa fanelo yimwani ya lisima ayi Jehovha ni Mwanana wakwe va yi kombisako ngu tinzila to xamalisa.

12. a) Mitshangano yathu yi engetelisa kutxani lirando lathu ngu Jehovha ni Jesu? b) Ngu kuya 2 Vakorinto 5:14, 15 ti lava hi maha txani ti to hi etetela Jesu?

¹² Lirando lathu ngu Jehovha ni Jesu li hi kuzeta kuya mitshanganoni. Ati hi ti gondako mitshanganoni ti engetela lirando lathu ngu Jehovha ni Mwanana wakwe. Hi di mitshanganoni hi khumbutiswa ati va nga hi mahela. (Varoma 5:8) Txialakanyiso txi hi khumbutisa lirando la hombe li va ku nalo, hambi ka va va si li zivi lisima la mtirulo. Ha kombisa kubonga ni kuzama kuetela Jesu nguku mahanyelo athu a ditshiku ni ditshiku. (Lera 2 Vakorinto 5:14, 15.) Mbilu yathu yi tshumela yi hi kuzeta kudhumisa Jehovha nguku a nga hi ninga mtirulo. Nzila yimwani yo mdhumisa ngu ningela tixamulo to huma mbiluni hi di mitshanganoni.

13. Hi nga kombisisa kutxani kutshima ka lirando lathu ngu Jehovha ni Jesu? Txhamusela.

¹³ Hi nga kombisa lirando lo tshima ngu Jehovha ni Jesu ngu kumaha totshe ti hi nga ti kotako ngu mhaka yawe. Ti lava hi maha mizamo yo hambana-hambana ti to hi xalela mitshangano. Wungi wa mabanza ma tolovela kuñola mitshangano magwito ka ditshiku mbimo yi wungi wathu hi nga karala. Mitshangano yimwani yi ñolwa ngu magwito ka divhiki mbimo yi vamwani va ku kuhumulani. Ina Jehovha wa yi wona mizamo yathu yo xalela mitshangano hambi hi di karate? Ina! Phela, Jehovha wa tsaka ngutu a ku hi yi karatako ku ya mitshanganoni.—Marku 12:41-44.

14. Jesu a ti kombisile ngu nzila muni ti to a ni lirando lo khatalela vamwani?

¹⁴ Jesu a vekile txikombiso txa txinene txa lirando lo khatala ngu vamwani. Ene a sa tiemisela kufela vagondiswa vakwe basi, kambe ditshiku ni di ditshiku a txi thangetisa silaveko sa vamwani. Ngu txikombiso, a khatalete vagondiswa vakwe hambiko a nga ti karate ni kugodhola. (Luka 22:39-46) Ene a ti lava tinzila to va vhuna, i si nga kuvhunwa ene. (Mat. 20:28) Ngako lirando lathu ngu Jehovha ni vanathu i di la hombe, hi na maha totshe hi nga ti kotako ti to hi ya ka Txialakanyiso txa Mkoma ni ka yotshe mitshangano ya divhiki ni divhiki.

15. Mba mani va hi khatalako ngutu ngu vona?

 ¹⁵ Hi lumba sengeletano ya yimweyo dwe ya Wukristu wa ditshuri, ni ku ha tsaka ngu kuheta mbimo yo tala hi txi ramba vamwani ti to ve ta va ni nathu. Kambe, hi khatalela ngutu ava i ku “makholwa kulothu” ava se va nga hola. (Vag. 6:10) Hi kombisa lirando lathu ngu ku va kuzeta ku ve xalela mitshangano, ngutu-ngutu Txialakanyiso. Kufana ni Jehovha ni Jesu, ta hi tsakisa mbimo yi wu a nga hola a tshumelelako ka Jehovha, Tate wathu wa lirando ni Mdyisi wathu.—Mat. 18:14.

16. a) Hi nga tsaniselana ngu nzila muni? Mitshangano yi na hi vhuna kumaha txani? b) Ngu kutxani ayiya i di mbimo ya yinene yo khumbula mapswi ya ma ku ka Johani 3:16?

¹⁶ Ka mavhiki ya matako, zama kuramba vathu va vangi ngu ha u nga ti kotako ngu kona ka Txialakanyiso txi txi no va ngu Wazixanu, 19 ka Abril wa 2019. (Wona dibhokiso di di ku: “ Ina u na va ramba?”) Dilembe di tako, he zameni ku ta tsanisana ngu kumaneka ka mitshangano yotshe ayi Jehovha a hi ningako yona. Ngako mafu awa ma tshuketelako magwito, mitshangano yathu yi na hi vhuna kusimama hi di vo tiveka hahatshi, va txibindi, ni lirando. (1 Vat. 5:8-11) He kombiseni ngu mbilu yathu yotshe ati hi pfisako tona ngu Jehovha ni Jesu ni ngu lirando li va hi kombako.—Lera Johani 3:16.