NGU Wazithathu wa 24 ka Janeiro wa 2018, mwaya wa Bhetele wa Estados Unidos ni Canadá, wu tsakile mbimo yi wu nga ziviswa ti to mwanathu Kenneth Cook, Jr., se mmweyo wa siro sa Mmidi wu wu Fumako wa Tifakazi ta Jehovha.

Mwanathu Cook a velekilwe Pennsylvania wa mswa-ditambo, ditiko da Estados Unidos. A gondile ditshuri ka mgondi kulowe mbimo yi a nga txi lava kuheta tigondo takwe Sekundariya ni ku a bhabhatisilwe ngu 7 ka Junho wa 1980. A tekile wunyaphandule wa mbimo yotshe ngu 1 ka Setembo wa 1982. A ve nyaphandule ngu kudingana malembe mambidi, ngu msana a rambilwe ku ya thuma Bhetele ka Wallkill, Nova York, ngu 12 ka Outubro wa 1984.

Kudingana 25 wa malembe Mwanathu Cook a thumile ka mithumo yo hambana-hambana ka ku Ganja Mabhuku ni ka Hofisi ya Bhetele. A txhadhile ni Jamie ngu 1996, se ve khata kuthuma votshe Wallkill. Ngu 2009 Mwanathu Cook ni msikati wakwe va rurisilwe ve ya thuma ka Hofisi ya Wugondisi a khe Patterson, Nova York; Mwanathu Cook a ti thuma ka Hofisi ayi yi thumisanako ni Wubhali. Ngu Abril wa 2016 msana ko va di tshumete ve ya thuma ngu mbimonyana Wallkill, Mwanathu Cook ni msikati wakwe va txitxilwe ve ya Brooklyn, Nova York. Ku di pindile 5 wa mitxima va khatile kuzumba Warwick, Nova York a ha kuzumbako Mmidi wu wu Fumako. Ngu Janeiro ka 2017, Mwanathu Cook a sawutwe ku va mvhuni ka Komisawu ya Wubhali ya Mmidi wu wu Fumako.