1-2. a) Mapswi a Isaya 41:10 ma mu gwesisile kutxani mwanathu Yoshiko? b) Mba mani vamwani va va nga wuyelwako ngu mapswi oneyo?

MWANATHU mmwani wa txisikati a dhanwanko ku i Yoshiko a ti sibhejela a txi lwala. Dhokodhela wakwe a m’gete ku khene a ndi no hanya mitximanyana dwe. Ti si tsakisi. Se a mahile txani? A to khumbula m’bhalo wu awu dhundako ngutu, i ku Isaya 41:10. (Yi lere.) Kha kwati a to gela dhokodhela a txi khene kha thavi, nguko Jehohva a ti ñote dianza dakwe. * Mapswi a m’bhalo wonewo ma m’vhuni Yoshiko ti to e themba ngutu Jehovha. Nathu wu nga hi vhuna ku hi zumba hi di thuthile hi txi manana ni sikarato sa hombe. Kasi ku hi ti pfisisa kwati, he xolisiseni ti to ngu kutxani Txizimu txi di rumile Isaya kubhala mapswi oneyo.

² Makhatoni, Jehovha a thumisile Isaya ti to e bhala mapswi oneyo ti to e tsanisa Vajudha ava va ndi no ya wukhumbini wa Bhabhilona. Hambiketo, Jehovha a xayisile madungula onewo i si nga kuvhuna va va ndi no ya Bhabhilona dwe, kambe ni vathu votshe kukhukhela ngu mbimo yoneyo. (Isaya 40:8; Var. 15:4) Nyamsi, hi hanya ka “timbimo to karata” ngutu kupinda kale, ngu toneto mapswi a dibhuku da Isaya ma nga hi tsanisa.—2 Tim. 3:1.

3. a) Ngu sihi sithembiso asi si manekako ka Isaya 41:10, i ku m’bhalo wa dilembe da 2019? b) Ngu kutxani hi txi lava sitsaniso asi si ku ka sithembiso soneso?

³ Ka msungo wuwa, hi na bhula ngu sithembiso siraru asi si  tsanisako likholo si manekako ka Isaya 41:10, i ku siya: 1) Jehovha a na va ni nathu, 2) ene Njizimu txathu, ni 3) ene a na hi vhuna. Kufana ni Yoshiko, nathu ha si lava sitsaniso soneso * nguko ha manana ni sikarato ka wutomi wathu. Hi manana ni sikarato asi si vangwako ngu wubihi wa ditiko. Vamwani va manana ni kuxaniswa ngu wukoma. Konkuwa he bhule ngu sitsaniso siraru, tximwetxo ngu tximwetxo.

4. a) Ngu txihi txitsaniso txo khata a txi hi no bhula ngu txona? (Wona ni txhamuselo ya hahatshi.) b) Jehovha a ma kombisisa kutxani matipfelo akwe ngu ngathu? c) Eto ti kumaha u ti pfisa kutxani?

⁴ Txitsaniso txo khata a txi Jehovha a hi ningako ngu txiya: “U nga thave, nguko ani ni ni nawe.” * Jehovha wa hi komba ti to a ni nathu ngu ku hi khatalela ni ku hi komba wumbilu. Hi nga wona nzila yi a kombisako ngu yona matipfelo akwe ngu ngathu, a khene: ‘Wa randeka masoni kwangu, kambe u dhundekile, se ani ni kurandile.’ (Isaya 43:4) Txi walo txi txi nga mahako ku Jehovha e tsukula lirando lakwe ngu va va mthumelako, ene wa thembeka ngutu kwathu. (Isaya 54:10) Lirando ni wungana wakwe wa hi tsanisa. Ene a na hi vhikela kufana ni ti a nga mahela mngana wakwe Abrahamu. Jehovha a m’gete a txi khene: “U nga thave awe Abramu, ani ngani txitxhavangu txako.”—Gen. 15:1.

5-6. a) Hi ti zivisa kutxani ti to Jehovha wa ti lava ku hi vhuna ka sikarato sathu? b) Hi nga gonda txani ka txikombiso txa Yoshiko?

⁵ Ha tiziva ti to Jehovha a tsakela ku hi vhuna ka sikarato sathu nguko ene a thembisa vathu vakwe a txi khene: “Ngako u txi txhatuka matini, ni na va ni nawe hambi u txi txhatuka minambo, kha yi na mbi kumita; ngako u txi pinda ngu ha mndiloni, khu na mbi hya, hambi m’dhikila kha wu na mbi kuhisa.” (Isaya 43:2) Mapswi oneyo ma womba txani?

⁶ Jehovha kha hi thembisi ti to a na thavisa  sikarato asi si nemetisako wutomi, kambe a na mbi tumelela “minambo” mwendo “m’dhikila” wa sikarato si hi tsivela ku mthumela. A hi tsanisekisa ti to a na va ni nathu, e hi vhuna “kupinda” ngu ka sikarato soneso. Nji txani atxi Jehovha a no txi maha? A na hi vhuna kuxula dizowa ti to hi simama ni wuthembeki wathu kwakwe, hambi hi txi lava kudawa. (Isaya 41:13) Yoshiko wu a nga wombwa makhatoni, a ti woni ti to toneto ditshuri. Mwanana wakwe wa dihorana a khene: “Hi xamatisilwe nguko mame a nga ti si thavi. Hi ti woni ngu ditshuri ti to Jehovha a mu ningile kurula ka mbilu. Kala ditshiku di a nga luza ngu dona, mame a ti bhula ni vadhokodhela ni valwati kulowe ngu Jehovha ni sithembiso sakwe.” Hi gonda txani ka txikombiso txa Yoshiko? Ti to ngako hi txi themba txithembiso txa Txizimu txo khene “ni na va ni nawe,” nathu hi na va ni txibindi ni mtamo hi txi tsanisela sikarato.

7-8. a) Ngu txihi txi tsanisekiso txa wumbidi txi hi no bhula ngu txona? Txi womba txani? b) Ngu kutxani Jehovha a di gete Vajudha va va nga ti Bhabhilona ku: “U nga gume mtamo”? c) Ngu yahi mapswi a ya ma ku ka Isaya 46:3, 4 aya ma nga tsanisa timbilu ta Vajudha?

⁷ Txitsaniso txa wumbidi txi ku ka dibhuku da Isaya ngu txiya: “U nga gume mtamo, nguko ani ni Txizimu txako.” Kuguma mtamo ti womba txani? Ka lidimi ali m’bhalo wuwa wu nga bhalwa ngu lona, dipswi ‘kuguma mtamo’ di pfala i di “kuzumbela kuwonetela msana ngu kuthava kumanwa ngu phango” mwendo “kuthava nga wo lava kudawa.”

⁸ Ngu kutxani Jehovha a di gete Vajudha va va ndi no ya wukhumbini ka Bhabhilona ti to va si “gumi mtamo”? Nguko a ti zivile ti to vahanyi va ditiko donedo va ndi na thava. Va ndi na dhukiswa ngu txani? Nguko kugumani ka dilembe da wu 70 da wukhumbi wa Vajudha, Bhabhilona a ndi na dhumelwa ngu dibutho da mtamo da Vamedhi Persiya. Jehovha a ndi na thumisa dibutho donedo kasi e khulula vathu vakwe ka wukhumbi wa Bhabhilona. (Isaya 41:2-4) Mbimo yi Vabhabhilona ni vathu va matiko mamwani va nga ti ziva ti to valala vawe va hafuhi, va ti duketa kutsanisa txibindi txawe ngu kugelana ku khene: “Tsana.” Va tshumete ve khanda sizimu sa singi va txi pimisa ku si na va vhikela. (Isaya 41:5-7) Kasi Jehovha a tsanisile timbilu Vajudha a txi khene: “Aniko awe Israyeli [kuhambana ni vathu vamwani] txithumi txangu . . . U nga gume mtamu, nguko ani ni Txizimu txako.” (Isaya 41:8-10) Wona ti to Jehovha a ti khene: “Ani ni Txizimu txako.” Ngu mapswi oneyo Jehovha a txi tsanisa vakhozeli vakwe vo thembeka ti to kha va divali, ene i ti ngadi Txizimu txawe, se vona i ti ngadi vathu vakwe. A va gete tiya: “Ni na mi gula . . . ni ku mi xayisa.” Mapswi oneyo o thavelela ma tsanisile Vajudha vale va nga ti wukhumbini.—Lera Isaya 46:3, 4.

9-10. Ngu kutxani athu ti si lavi hi thava? Womba txikombiso.

⁹ Nyamsi wa ditshiku, vathu vo tala va guma mtamo nguko ditiko di yako masoni ngu kubiha. Phela nathu, ha manwa ngu sikarato so nga soneso. Kambe kha ti lavi hi thava. Jehovha a hi gela tiya: “Ani ni Txizimu txako.” Ngu kutxani mapswi oneyo i di txivangelo txo pfala txo simama hi si thavi?

¹⁰ Alakanya ngu txikombiso txiya: Jim ni Ben, va mndani ka ganuni awu a pekwako ngu moya wa hombe. Mbimo yi ganuni  a yako txitimwi ni hahatshi, kupfala dipswi di txi khene: “Sungani kwati tibhandi tanu. Hi na heta mbimonyana hi txi tsimbila ka moya.” Jim e thava ngutu. Kambe m’tsimbitisi wa ganuni e tshumela a txi khene: “Mi nga gumeni mtamo. Ngani ni tsimbitisako ganuni wuwa.” Mbimo yi a wombako toneto, Jim e zinginisa msungo, a txi khene: “Txitsaniso muni txonetxo?” Kambe a txi wona Ben, a wona ti to nem kha thavi. Jim e mu wotisa ku khene: “Ngu kutxani awe u si thavi?” Ben e sekanyana a txi khene: “Na m’ziva kwati wu a tsimbitisako ganuni. I tate wangu!” E gwita a txi khene: “Ema ni kugela to kari ngu tate wangu. Na kholwa ti to u txo m’ziva ni kuziva wusikoti wakwe, nawe u na mbi thava.”

11. Hi nga gonda txani ka txikombiso txa Jim ni Ben?

¹¹ Hi nga gonda txani ka txikombiso txiya? Kufana ni Ben, athu kha hi thavi nguko ha m’ziva kwati Tate wathu Jehovha. Ha ti ziva ti to a na hi xayisa hi txi manana ni sikarato sa hombe ka masiku awa a magwito. (Isaya 35:4) Ha mu themba Jehovha, ngu toneto, mbimo yi vathu vo tala va thavako ngu mhaka ya sikarato, athu hi na mbi thava. (Isaya 30:15) Kufana ni Ben, nathu hi lava kugela vamwani sivangelo so themba Txizimu. Ni vona va nga tsaniseka ti to hambi ku txo humelela txani ni txani, Jehovha a na va vhuna.

12. a) Ngu txihi txitsaniso txa wuraru txi hi no bhula ngu txona? b) Bhiblia yi txi khene “diwoko” da Jehovha, ti hi khumbulisa txani?

¹² Txitsaniso txa wuraru txi manekako ka Isaya, txi khene: “Na kutsanisa, kambe na kuvhuna.” Isaya se a ti txhamusete nzila yi Jehovha a ndi no tsanisa vathu vakwe ngu yona a txi khene: “MKOMA Txizimu a na ta,  kufana ni ndena, se diwoko dakwe di na fuma.” (Isaya 40:10) Mbimo yo tala Bhiblia yi thumisa dipswi “diwoko” kasi kukombisa mtamo. Se to ‘diwoko da Jehovha di na fuma,’ ti hi khumbutisa ti to Jehovha Mkoma wa mtamo. Ene a thumisile mtamo wakwe wa hombe ti to e vhikela vathu vakwe mbimoni ya kale, se ni nyamsi a nga txi simama e tsanisa ni kuvhikela ava va mthembako.—Dhewut. 1:30, 31; Isaya 43:10.

13. a) Ngu yihi mbimo yi Jehovha a xayisako txithembiso txakwe txo hi tsanisa? b) Ngu yihi themba ayi yi hi ningako mtamo?

¹³ Jehovha wa xayisa txithembiso txakwe txo khene “na kutsanisa” ngutu-ngutu hi txi xaniswa ngu valala vathu. Nyamsi, ka matiko mamwani valala vathu va zama ngu tinzila totshe ti to ve tsimbisa mthumo wo txhumayela mwendo kufuvisa sengeletano yathu. Hambi keto, athu kha hi dhudhumeli ngu toneto. Jehovha a hi ningile txitsaniso txo hi tata ngu mtamo ni themba. Ene a hi thembisa tiya: “Otshe matxhari ale ma longiselwako ku kuwukela, kha ma na mbi humelela.” (Isaya 54:17) Mhaka yoneyo yi hi khumbulisa silo siraru sa lisima.

14. Ngu kutxani hi si xamali hi txi xaselwa ngu valala va Txizimu?

¹⁴ Txo khata, kota valondeteli va Jesu, ha tiziva to hi na vengelwa. (Mat. 10:22) Jesu a profetile ti to vagondiswa vakwe va ndi na xaniswa ngutu ka masiku a magwito. (Mat. 24:9; Joh. 15:20) Txa wumbidi, wuprofeti wa Isaya wa hi txharihisa ti to valala vathu hi nga ti to va no hi vengela dwe; vona va na hi lwisa ngu matxhari o hambana-hambana. Matxhari onewo ma pata wukanganyisi, makuhu ya va hi hembelako ni ku hi xanisa ngu ku hi peka mwendo kubetwa jele. (Mat. 5:11) Jehovha a na mbi tsivela ti to valala vathu va si hi lwisi ngu matxhari oneyo. (Vaef. 6:12; Mtu. 12:17) Kambe kha ti lavi hi thava. Ngu kutxani?

15-16. a) Ngu txihi txilo txa wuraru atxi hi fanelako ku txi khumbula? Ni ku dibhuku da Isaya 25:4, 5 di womba txani? b) Isaya 41:11, 12 yi womba txani ngu va va hi lwisako?

 ¹⁵ Ku ni tximwani txa wuraru atxi hi fanelako ku txi khumbula. Jehovha a ti khene “otshe matxhari” aya ma hi lwisako “ma na mbi humelela.” Kufana ni ku diseta di hi vhikelako ka txihuhuri, Jehovha wa hi vhikela ka “kufuteta ka vaxanisi.” (Lera Isaya 25:4, 5.) Valala vathu va na mbi thuka ve hi xanisa kala kupinduka.—Isaya 65:17.

¹⁶ Jehovha wa tsanisa themba yathu ngu kutxhamusela kwati ati ti no humelela ava va hi “henyelako.” (Lera Isaya 41:11, 12.) Ku si nga ni mhaka ni ti to yimbi yathu ni valala vathu yi na hisisa kutxani, va na mana ta timweto: Votshe valala va vathu va Txizimu “va na lova.”

17-18. a) Kulera Bhiblia ku nga tsanisisa kutxani themba yathu ka Txizimu? Ningela txikombiso. b) Kualakanyisisa ngu m’bhalo wa dilembe da 2019, ti nga hi vhunisa kutxani?

¹⁷ Hi txi mu ziva kwati Jehovha, hi na tsanisa themba yathu kwakwe. Se, nzila yimweyo dwe yo ziva kwati Txizimu ngu lera Bhiblia kha kwati ni kualakanyisisa ngu ti hi nga lera. Bhiblia yi ni matimu o thembeka a nzila yi Jehovha a nga vhikela ngu yona vathu vakwe mbimoni ya kale. Matimu onewo ma hi ninga themba ya ti to ene a na hi tsanisa ni nyamsi.

¹⁸ Hi nga alakanyisisa ngu mapswi o tshura a ya Isaya a nga ma thumisa ti to e kombisa nzila yi Jehovha a hi vhikelako ngu yona. A womba ti to Jehovha m’dyisi kasi malanda akwe ndinvuta. Isaya a womba tiya ngu Jehovha: “A na sengeleta sinvutana mawokoni kwakwe, e si khutarela hakhana kwakwe.” (Isaya 40:11) Hi tipfa hi ti vhiketwe hi tshumela hi si karateki, mbimo yi Jehovha a hi khutarelako mawokoni kwakwe. Ti to hi si vileli mbimo yi hi mananako ni sikarato txithumi txo thembeka na txi di ni wutxhari txi langile Isaya 41:10 kota m’bhalo wa dilembe da 2019, “u nga gume mtamu, nguko ani ni Txizimu txako.” Alakanyisisa ngu mapswi oneyo o tsanisa. Ona ma na kuninga mtamo mbimo yi u mananako ni sikarato.