1-2. a) Jehovha a womba-womba ni vathu ngu nzila yihi? b) Hi na gonda txani?

JEHOVHA wa ti dhunda ku hi gela ati a ku nato. Mbimoni ya kale, ene a thumisile vaprofeti, tingelozi ni Mwanana wakwe Jesu Kristu ti to e hi gela ati a ku nato. (Amosi 3:7; Vag. 3:19; Mtu. 1:1) Nyamsi a thumisa Bhiblia. Ene a hi ningile Bhiblia kasi ku hi ziva ati a ti pimisako ni kupfisisa milayo yakwe.

² Mbimo yi Jesu a nga ti ha mafuni, Jehovha a tshumete e womba-womba nayo a di nzumani makhambi mararu. He gondi ngu ti Jehovha a nga womba, ati hi nga ti gondako ka mapswi onewo, ni wuyelo ya kona.

3. Nga ha ti nga kombiswa ngu kona ka Marku 1:9-11, Jehovha a wombile txani msana ka kubhabhatiswa ka Jesu? Mapswi onewo ma kombisa txani txa lisima?

³ Marku 1:9-11 yi kombisa dikhambi do khata adi Jehovha a nga womba-womba a di nzumani. (Yi lere.) A ti khene: “Awe u Mwanana wangu wo randeka ngutu, awu ni mu tsakelako.” Hi nga wona nzila yi mbilu ya Jesu yi nga gweswa ngu yona a txi pfa dipswi da Tate wakwe a txi kombisa ku mu randa ni ku mu tsanisa! Mapswi onewo a Jehovha ma kombisile timhaka tiraru ta lisima mayelano ni Jesu. Yo khata, Jesu i Mwanana wakwe. Ya wumbidi, Jehovha wa randa Mwanana wakwe. Ya wuraru, Jehovha wa amukela Mwanana wakwe. He ti wonisisi kwati yimweyo ngu yimweyo.

4. Ngu wuhi wuxaka wa wuphya awu Jesu a nga va nawo ni Txizimu mbimo yi a nga bhabhatiswa?

 ⁴ “Awe u Mwanana wangu.” Ngu mapswi oneyo, Jehovha a ti kombisa ti to Jesu, Mwanana wakwe se a ni wuxaka wa wuphya ni Nene. Mbimo yi Jesu a nga ti nzumani, ene i ti mwanana wa Txizimu wa moya. Hambi keto, mbimo yi a nga bhabhatiswa, a totilwe ngu moya wo sawuleka. Ka mbimo yoneyo, Jehovha a ti kombisa ti to Jesu kota Mwanana Wakwe wu a nga mu sawula se a ti ni themba yo tshumela e ya nzumani e ya va Mkoma ni Mphaxeli wa Hombe wo sawulwa ngu Txizimu. (Luka 1:31-33; Vaheb. 1:8, 9; 2:17) Ngu toneto, mbimo yi Jesu a nga bhabhatiswa, Tate wakwe a ti ni fanelo yo khene: “Awe u Mwanana wangu.”—Luka 3:22.

5. Hi nga li kombisisa kutxani lirando kufana ni Jehovha?

⁵ “Awe u . . . wo randeka ngutu.” Txikombiso txa Jehovha txo kombisa lirando, txi hi gondisa kuxota mikhanjo yo tsanisa vamwani. (Joh. 5:20) Ha ena ngako vamwani va txi hi ndunduzela ngu kuva hi di mahile to kari ta tinene. Ngu kufana, hi fanete hi kombisa lirando ka vanathu dibanzani ni vamwayani kwathu. Ngako hi txi ndunduzela vamwani, ha tsanisa likholo lawe ni ku va vhuna ve thumela Jehovha ngu kuthembeka. Ngutu-ngutu vaveleki, ti lava ve tsanisa vanana vawe. Ngako va txi ndunduzela vanana vawe ti txi huma mbiluni ve va komba lirando lawe, va va vhuna ku ve humelela.

6. Ngu kutxani hi di fanete hi themba Jesu Kristu?

⁶ “Awu ni mu tsakelako.” Mapswi onewo ma kombisa ti to Jehovha a ti tsaniseka ta ku Jesu a ndi na maha kudhunda ka Tate wakwe. Jehovha wa mu themba Mwanana wakwe, se nathu hi nga themba ti to Jesu a  na hetisisa sotshe sithembiso sa Jehovha. (2 Vak. 1:20) Mbimo yi hi alakanyako ngu txikombiso txa Jesu, hi ya hi tiemisela ngutu kugonda ni kulondisela mikondo yakwe. Kota malanda akwe, nathu Jehovha wa hi themba ti to hi na simama hi gonda ka txikombiso txa Mwanana wakwe.—1 Pedro 2:21.

7. Ngu dihi dikhambi da wumbidi a di Jehovha a nga womba-womba a di nzumani di nga bhalwa ka Matewu 17:1-5? A ti khene txani?

⁷ Lera Matewu 17:1-5. Dikhambi da wumbidi adi Jehovha a nga womba-womba ni Jesu i ve mbimo yi Jesu a nga “phinduka.” Jesu a ti dhani Pedro, Jakobe ni Johani ti to ve tsula nayo txitimwi ka mmango. Kona kheya, va woni muwoniso wo xamalisa ngutu. Khohe ya Jesu yi to phatima, simaha sakwe si woninga. Se vathu vambidi, va emelako Mosi ni Elija, va to khata kubhula nayo ngu ta lifo ni kuwuka kwakwe. Hambiku vapostoli vale va vararu va nga ti “nemelwa ngu wukohe,” va woni muwoniso wonewo wo xamalisa mbimo yi wukohe wu nga guma. (Luka 9:29-32) Ku to gwita ku ta direfu do woninga di ta fenengeta Jesu ni vale va vambidi, se kupfala dipswi da Txizimu mu ka di refu! Jehovha a tshumete e womba to wa amukela ni kuranda Jesu nga tile a nga wombisa tona mbimo yi a nga bhabhatiswa a txi khene: “Awuwa i Mwanana wangu wo randeka ngutu, awu ni tsakiswako ngutu ngu ngene.” Kambe ka dikhambi diya a tshumete a txi khene: “Mu engiseni!”

8. Jesu ni vagondiswa vakwe va vhunwisile kutxani ngu muwoniso?

⁸ Muwoniso wu kombisile ati Jesu a no wonekisa tona ka wudhumo ni mtamo kota Mkoma wa Mfumo wa Txizimu. Ngu ditshuri, Kristu a mani mtamo ti to e ta tsanisela sixaniso ni kudawa kwakwe. Muwoniso wu tshumete wu tsanisa likholo la vagondiswa kasi ku ve kota kutsanisela siduko sa likholo lawe asi va ndi no manana naso ngu kutsimbila ka mbimo. Ku di pindile kona mu ka 30 wa malembe, mpostoli Pedro a kombisile ti to muwoniso wonewo wa kuphinduka a ti ngadi a txi wu khumbula kha kwati.—2 Pedro 1:16-18.

9. Ngu txihi txialakanyiso txa lisima atxi Jesu a nga ninga vagondiswa vakwe?

⁹ “Mu engiseni!” Jehovha a ti vekile ha kubasani ta ku ene a lava hi engisa mapswi a Mwanana wakwe. Jesu a ti khene txani mbimo yi a nga ti ha mafuni? Ndo tala a nga womba ta lisima! Ngu txikombiso, ngu lirando a gondisile valondeteli vakwe nzila yo txhumayela mahungu a manene ni ku, ngu kuphinda-phinda a va alakanyisile kuzumba va di wonelete. (Mat. 24:42; 28:19, 20) A va gete ku ve zama ngu mtamo ni ku va tsanisa ku va si karali. (Luka 13:24) Jesu a kombisile txilaveko txo valondeteli vakwe ve randana, ve va ni wumwewo, ni kuengisa sirumo sakwe. (Joh. 15:10, 12, 13) Txialakanyiso atxi Jesu a nga ninga vagondiswa vakwe i ti txa lisima! Txialakanyiso txonetxo txi ngadi txi txi thuma ni nyamsi.

10-11. Hi nga kombisisa kutxani ti to ha mu engisa Jesu?

¹⁰ Jesu a ti khene: “Wuhi ni wuhi i ku wa ditshuri wa engisa dipswi dangu.” (Joh. 18:37) Hi kombisa ti to ha engisa dipswi dakwe mbimo yi hi simamako hi “timiselana ni kudivalelana mmwani ni mmwani, ngako m’thu adi ni txisolo ka mmwani.” (Vakl. 3:13; Luka 17:3, 4) Hi tshumela hi kombisa to ha engisa ngu kukhutala kutxhumayela mahungu a manene “ka mbimo yi yi fanelako ni ka mbimo yi yi si faneliko.”—2 Tim. 4:2.

 ¹¹ Jesu a ti khene: “Tinvuta tangu ta engisa dipswi dangu.” (Joh. 10:27) Valondeteli va Kristu va kombisa ti to vona va muengisa i si nga ngu kuengisela mapswi akwe dwe, kambe ngu kumaha ati ma rumako tona. Kha va khulumetelwi ngu “kuvilela ngu sa wutomi wuwa.” (Luka 21:34) Hahanze keto, va veka kuengisa Jesu ka wukhalo wo khata ka wutomi, hambi va txi manana ni siemo so karata. Wungi wa vanathu va tsanisela sikarato sa hombe, kupata ni kuxaniswa ngu vakaneti, wusiwana wa hombe, ni tiphango ta mtumbuluko. Vona va simama ve thembeka ka Jehovha ku si nga ni mhaka ni ti ti humelelako. Jesu a va ningile txitsaniso txiya: “Awule a nga amukela milayo yangu a txi yi veketa, eyo ngene a ni randako; se awule a ni randako, a na randwa ngu Tate wangu.”—Joh. 14:21.

12. Ngu yihi nzila yimwani ayi hi kombisako ti to ha engisa Jesu?

¹² Nzila yimwani yo kombisa ti to ha mu engisa Jesu ndiye: Ngu thumisana kwati ni va va nga sawulwa to ve hi thangela. (Vaheb. 13:7, 17) Ku ni ti sengeletano ya Jehovha yi nga ti kutshukwatiswa ka masiku a ngweno, ti patako sithumiswa sa siphya so txhumayela ngu sona, maakelo, kuwuseta, ni kuxayisa Tinyumba tathu ta Mfumo. Ha bonga ngutu ngu mkongomiso wonewo wa lirando! Ha tsaniseka ti to Jehovha a na katekisa mizamo yathu yo londisela mkongomiso wa sengeletano.

13. Ngu yihi wuyelo yo engisa Jesu?

¹³ Ha wuyelwa ngu kuengisa totshe ati Jesu a nga gondisa. Jesu a gete vagondiswa vakwe ti to tigondo takwe ti ndi na va humuta. A ti khene: “Mi na mana kuhumula mihefemuloni kwanu. Nguko mpakato wu ni mi ningako wa hehuka, ani mrwalo wa kona wa rwaleka.” (Mat. 11:28-30) Dipswi da Txizimu di patako Tievhangeli ta mune ta wutomi ni wuthumeli wa Jesu, da hi humuta ni kuwuseta mtamo wathu wa moya ni ku hi ha wutxhari. (Mas. 19:7; 23:3) Jesu a ti khene: “Va katekile ava va engisako dipswi da Txizimu, va txi di vekisa.”—Luka 11:28.

14-15. a) Ngu dihi dikhambi da wuraru a di Jehovha a nga womba-womba a di nzumani di nga bhalwa ka Johani 12:27, 28? b) Ngu kutxani mapswi a Jehovha ma di tsanisile Jesu?

¹⁴ Lera Johani 12:27, 28. Evhangeli ya Johani yi womba dikhambi da wuraru adi Jehovha  a nga womba-womba a di nzumani. Ku di sate masikunyana ti to e fa, Jesu a yite Jerusalema ka Pasika yakwe yo gwitisa. A ti khene: “Moya wangu wa pandiseka.” A to gwita e maha mkombelo a txi khene: “Tata dhumisa ditina dako.” Tate wakwe a xamute a di nzumani a txi khene: “Ani ni di dhumisile, kambe ni na engeta ni di dhumisa!”

¹⁵ Jesu a ti thava nguko a ti ni wutixamuleli wa hombe wo simama e thembeka ka Jehovha. Jesu a ti ti ziva ti to a ndi na xaniswa ngutu e tshumela e dawa ngu nzila ya tshofu. (Mat. 26:38) Kambe, txa lisima ngutu ka Jesu, i ti kudhumisa ditina da Tate wakwe. Jesu a lumbetilwe kuruka, kambe mialakanyo yakwe yi ti ha ko lifo lakwe li ndi na tisa txiruko ka Txizimu. Ngu ditshuri mapswi aya Jehovha a nga gela Jesu ma mu tsanisile! Se, a ndi na tsaniseka ti to ditina da Txizimu di na dhumiswa. Mapswi a Tate wakwe ma fanete ma di mu tsanisile ngutu ka sixaniso asi a ndi no manana naso. Hambiku i nga ti kova Jesu basi a nga pfa mapswi onewo, Jehovha a mahile ti to me bhalwa kasi ku hotshethu hi ma mana.—Joh. 12:29, 30.

16. Ngu kutxani mbimo yimwani hi nga zako hi pimisa ngutu ngu kurukwa ka ditina da Txizimu?

¹⁶ Kufana ni Jesu, nathu hi nga thuka hi pimisa ngutu ngu txiruko atxi txi nga tiswa ka ditina da Jehovha. Nathu ti nga maha hi di ñotwe ngu nzila yo biha kufana ni Jesu. Mwendo kudhukiswa ngu thenga ya makuhu ayi vakaneti va yi hangalasako ngu ngathu. Hi nga thuka hi alakanya ngu txiruko  atxi thenga yoneyo yi txi tisako ka ditina da Jehovha ni sengeletano yakwe. Ka txiemo txonetxo, mapswi a Jehovha njitsaniso txa hombe kwathu. Kha ti lavi hi za hi jujeka ngutu mapimo. Hi nga tsaniseka ti to “kurula ka Txizimu, ku pindako wotshe wuzivi, ku na veketa timbilu [tathu] ni mialakanyo [yathu] ngu Kristu Jesu.” (Vaf. 4:6, 7) Jehovha a na mbi tandeka kudhumisa ditina dakwe. Ngu kuthumisa Mfumo, ene a na phindula kotshe kurukwa aku Sathani ni mafu akwe ma nga ku tisa ka malanda Akwe o thembeka.—Mas. 94:22, 23; Isaya 65:17.

17. Ngu ku ya ngu Isaya 30:21, Jehovha a womba-wombisa kutxani ni nathu?

¹⁷ Ni konkuwa Jehovha a ngadi a txi womba-womba ni nathu. (Lera Isaya 30:21.) Ditshuri ti to athu kha hi na mbi pfa dipswi da Txizimu di txi ta ngu nzumani. Hambi keto, ene wa hi ninga Bhiblia, ayi yi hi ningako mkongomiso. I si ngeto dwe, moya wa Jehovha wa thuma ka “muwoneleti wo thembeka” ti to e simama e ninga sakudya malanda Akwe. (Luka 12:42) Ku ni mabhuku o tala o ganjwa ni ka internet, mavhidiyo ni so garavharwa asi si hi vhunako kutsanisa likholo lathu!

18. Mapswi a Jehovha ma nga tsanisa likholo ni txibindi txako ngu nzila yihi?

¹⁸ He xayiseni mapswi aya Jehovha a nga ma womba mbimo yi Mwanana wakwe a nga ti ha mafuni! Mapswi a Txizimu aya ma nga bhalwa mu ka Bhiblia, ma na hi ninga themba ya ti to Jehovha wa wona totshe ni ku a na thavisa txiruko atxi Sathani ni ditiko dakwe va hi rwekako. Ni ku, he simameni hi engisa kha kwati dipswi da Jehovha. Hi txi maha toneto, hi na sikota kutsanisela sikarato asi hi ku naso, ni simwani si ku ngadi si txi ta. Bhiblia ya hi khumbulisa yi txi khene: “Mi fanete kuva ni kutimisela kasi ku mi txi maha kuranda ka Txizimu, mi mana asi txi nga mi thembisa sona.”—Vaheb. 10:36.