1. Ngu txihi tximwani txo tsakisa ngutu ka wuthu wa Jesu? Txhamusela.

TXIMWANI txo tsakisa ngutu ka wuthu wa Jesu mbusikoti wakwe wo pfisisa txikarato txathu txo va hi sa hetiseka. Mbimo yi a nga ti ha mafuni, a ti sikota ‘kutsaka ni va va tsakako’ ni ‘kudila ni va va dilako.’ (Var. 12:15) Ngu txikombiso, mbimo yi ava va 70 va nga wuya ngu kutxhumayelani va di tsakile ngu kuhumelela ka mthumo wawe, “Jesu a to tala ngu kutsaka, ngu Moya wo Sawuleka.” (Luka 10:17-21) Kambe, mbimo yi a nga wona maxaka ma txi xaniseka ngu mhaka ya lifo la Lazaro, Jesu “a to pfa kupandiseka ka hombe moyani kwakwe e karateka.”—Joh. 11:33.

2. Nji txani txi nga vhuna Jesu kukombisa moya wa wumbilu ka vathu?

² Hambiku Jesu a nga ti hetisekile, ene a ti ni wuxinji ni wumbilu wa hombe ka vathu. Nji txani txi nga m’vhuna? Txo khata ka sotshe, ngu ti to Jesu a ti dhunda vathu. Nga ha ti nga wombwa ka msungo wu wu nga pinda, ene a ti ‘mana kutsaka kwakwe ni vanana va vathu.’ (Mav. 8:31) Lirando lonelo li mu susumetile kuziva kwati nzila yi vathu va pimisako ngu yona. Mpostoli Johani a txhamusete tiya: “Ene a txi ti ziva ti ti ku timbiluni ka vathu.” (Joh. 2:25) Jesu a ti ni wumbilu wa hombe ka vamwani. Vathu va ti pfa lirando lakwe se ve tsakela madungula a Mfumo. Hi txi kulisa wumbilu ngu vathu, hi na humelela ka mthumo wo txhumayela.—2 Tim. 4:5.

3-4. a) Hi di ni moya wa wumbilu, hi na va wonisa kutxani vathu? b) Hi na gonda txani ka msungo wuwa?

³ Mpostoli Paulo a ti ti ziva ti to a ti fanete e txhumayela, nathu ha ti ziva. (1 Vak. 9:16) Hambi keto, ngako hi di ni moya wa wumbilu, hi na wona mthumo wo txhumayela i si  nga ti to o va fanelo dwe. Hi na lava kukombisa ti to ha khatala ngu vathu ni ku hi tsakela ku va vhuna. Ni ku, ha ti ziva ti to “kuha i kateko ya hombe ngutu kupinda kuhiwa.” (Mith. 20:35) Hi txi teka mthumo wathu ngu nzila yoneyo, hi na mana litsako la hombe.

⁴ Ka msungo wuwa, hi na gonda nzila yo kombisa moya wa wumbilu hi txi txhumayela. Txo khata, hi na wona to hi nga gonda txani ka matipfelo a Jesu ngu vathu. Hi gwita hi bhula ngu mune wa tinzila to etetela txikombiso txakwe.—1 Pedro 2:21.

5-6. a) Mba mani ava Jesu a nga va pfela wusiwana? b) Nga ha ti nga wombwa ngu kona ka Isaya 61:1, 2, ngu kutxani Jesu a di pfete wusiwana vathu va a nga txi va txhumayela?

⁵ Alakanya ngu txikombiso txa Jesu txo kombisa moya wa wumbilu. Dikhambi dimwani, Jesu ni vagondiswa vakwe va txhumayete ve za ve karala. Vona va ti “pwata ni mbimo ya kudya sakudya.” Se Jesu a to va teka e ya navo “ka wukhalo wa txiwula, vona vokha” ve ya “humula kudotho.” Aniko, dibutho da vathu di to thangela masoni di ya mu Jesu ni vagondiswa vakwe va nga txi ya kona. Mbimo yi Jesu a nga hoka e wona dibutho dileya, a to maha txani? Ene ‘a to va pfela wusiwana *, nguko va ti fana ni tinvuta to mbi na mdyisi. Se e khata ku va gondisa timhaka to tala.’—Marku 6:30-34.

⁶ Wona txivangelo txi txi nga maha Jesu e pfela wusiwana vathu. Ene a va woni va txi “fana ni tinvuta to mbi na mdyisi.” Ti nga maha Jesu a di pimisile ngu ti to vamwani ka vona i ti sisiwana ni ku va ti thuma ngutu to ve kota kudyisa ngamu yawe. Vamwani kutilava va ti fetwe. I di toneto Jesu a ti ma pfisisa matipfelo awe. Nga ha hi nga bhula ngu kona ka msungo wu nga pinda Jesu a mananile ni sikarato so fana ni soneso. Jesu a ti khatala ngu vamwani, ni ku ti mkuzetile ku e va thavelela.—Lera Isaya 61:1, 2.

7. Hi nga txi etetelisa kutxani txikombiso txa Jesu?

 ⁷ Hi gonda txani ka txikombiso txa Jesu? Kufana ni Jesu, hi hagari ka vathu vo “fana ni tinvuta to mbi na mdyisi.” Va lwisana ni sikarato so tala. Hi ni si si lavekako kwakwe, i ku madungula a Mfumo. (Mtu. 14:6) Athu hi etetela Mkoma wathu Jesu, ngu kutxhumayela mahungu a manene ni kuva “ni wumbilu ka va vo tiveka hahatshi” mwendo sisiwana. (Mas. 72:13) Ha va pfela wusiwana vathu, se hi lava kumaha to kari to va vhuna.

8. Ngu yihi nzila yo khata yo kombisa moya wa wumbilu ka va hi va txhumayelako? Womba txikombiso.

⁸ Hi nga vhunwa ngu txani ti to hi va ni moya wa wumbilu ka va hi va txhumayelako? Hi nga ti veka ka wukhalo wawe, hi va ñola nga ti hi ndi no lava ku vamwani ve hi ñolisa tona itiku ngathu hi ku ka txiemo txawe. * (Mat. 7:12) He bhuli ngu mune wa tinzila ati hi nga mahisako tona. Yo khata, wona txilaveko txa m’thu ni m’thu. Ngako hi txi txhumayela, mthumo wathu wu fana ni wa dhokodhela. Dhokodhela wamnene a wona txilaveko txa mlwati mmwani ni mmwani. Ene a wotisa siwotiso, e gwita e engisela kha kwati mbimo yi mlwati a txhamuselako mpando wakwe. Se hahanze ko dhokodhela e tekela ku mninga mirende ayi a yi pimisako koneho, a nga emanyana kupinda mbimo yo kari ti to e wona a ti kupandisako tona kasi ku e kota ku mninga mirende ayi yi no mu vhuna. Ngu kufana, hi nge thumisi mamahelo a mamwewo ka votshe va hi va manako thembweni. Hahanze keto, hi alakanya ngu txiemo ni mawonelo a mmwani ni mmwani.

9. Nji txani atxi hi si faneliko kututumela ku txi pimisa? Txhamusela.

⁹ U txi mana m’thu thembweni, u nga tutumeli ku khawe wa si ziva siemo sakwe mwendo ati a ti kholwako ni ku ngu kutxani a txi kholwa ka tona. (Mav. 18:13) Hahanze keto, manisisa ditshuri ngu kuthumisa siwotiso sa sinene. (Mav. 20:5) Ngako ti di tolovelekile ka wukhalo wanu, mu wotisi mayelano ni mthumo, mwaya wakwe, ati a ti zivako ni ti a wu wonisako tona wutomi. Ngako hi txi wotisa siwotiso, ti maha to m’thu e kombisa ti to mahungu a manene ma nga mu vhuna txani. Se hi txi za hi ti ziva, hi nga kombisa moya wa wumbilu ka silaveko sona sile sakwe ni ku mninga txivhuno atxi a txi lavako, nga ti Jesu a nga mahisa tona.—Fananisa ni 1 Vakorinto 9:19-23.

10-11. Ngu kuya ngu 2 Vakorinto 4:7, 8, ngu yihi nzila ya wumbidi yo kombisa moya wa wumbilu? Womba txikombiso.

¹⁰ Txa wumbidi, duketa kupfisisa ti to wutomi wawe wu nga va wu txi tsimbilisa  kutxani. Nathu ha thuka hi va ni sikarato so fana ni sawe. Nguko nathu kha ha hetiseka. (1 Vak. 10:13) Ha ti ziva ti to wutomi ka mafu awa, wu nga karata ngutu. Ho tsanisela basi ngu kuvhunwa ngu Jehovha. (Lera 2 Vakorinto 4:7, 8.) Kambe alakanya ngu va va lwisanako ni sikarato sa mafu awa va si nga ni txivhuno txa Jehovha. Kufana ni Jesu, ha va pfela wusiwana, se hi susumeteleka ku va ‘zivisa ta tinene.’—Isaya 52:7.

¹¹ Alakanya ngu txikombiso txa mwanathu mmwani a dhanwako ku i Sergey. Na a si se gonda ditshuri, Sergey a ti ni tingana ni dizowa. A txi thava kubwabwata. Ngu mbimo, a tumete kugonda Bhiblia. A khene: “Mbimo yi ni nga ti gonda Bhiblia, ni gondile ti to Makristu ma ni fanelo yo gela vamwani ati ma ti kholwako. Nem ni si pimisi ti to nani ni nga ti kota.” Hambi keto, a pimisile ngu va va ko mbi se gonda ditshuri, a pimisile ngu ti wutomi wa va va si ziviko Jehovha wu nga vako ka tona. A khene: “Timhaka ta tiphya ati ni nga txi ti gonda, ti ni tisete litsako ni kudikha ka mbilu. Ni ti ti ziva ti to vamwani ni vona ta laveka ve gonda timhaka tiya.” Mbimo yi moya wa wumbilu wa Sergey wu nga txi kula, txibindi txakwe txo txhumayela ni txona txi kute. A khene: “Ni xamate, kugela vamwani mayelano ni Bhiblia ngu ditshuri ku ni mahile ni xula dizowa ni tingana. Ku tshumete kutsanisa timhaka toneto ta tiphya ka mbilu yangu.” *

12-13. Ngu kutxani ti txi lava hi laphisela mbilu ava hi va gondisako? Womba txikombiso.

¹² Ya wuraru, laphisela mbilu ava u va gondisako. Khumbula, ti nga maha va si khali kupimisa ngu ditshuri da Bhiblia adi athu i ko va mndiwo wathu. Vamwani va dhunda ngutu ati va kholwako ka tona. Ti nga maha va txi wona ti to wukhongeli wawe wu va patanisa ni timwaya tawe, midhawuko yawe ni sihena sa wukhalo wawe. Hi nga va vhunisa kutxani?

¹³ Alakanya ngu tiya: Ku maheka txani  ngako dibhulaho da kale, di nga sakala di txi lava kutxitxwa? Ku akwa da diphya na ku txi ngadi kuthumiswa da kale. Se ngako adi da diphya di txi guma, adile da kale da dhilizelwa. Ta fana, na hi si se bhula ni m’thu ngu kuleka tigondo takwe ta “kale” ati a ti tsakelako, ti lava hi khata ngu ku mu vhuna e tsakela ngutu tigondo ta “tiphya” i ku, tigondo ta Bhiblia ati a si se tolovelana nato. Eho se ngu kona a no va a di emekile kuleka mawonelo akwe a kale. Kutilava ti nga teka mbimo kuvhuna m’thu ka toneto.—Var. 12:2.

14-15. Hi nga va vhunisa kutxani ava va zivako ta tidotho mwendo nem va si ziviko txilo ngu themba ya wutomi wo mbi guma ka Paradhise ha mafuni? Womba txikombiso.

¹⁴ Ngako hi txi laphisela mbilu ava hi va manako thembweni, hi na mbi emela ti to ve pfisisa mwendo kutumela ditshuri da Bhiblia ka ditshiku do khata. Hahanze keto, moya wa wumbilu wu hi susumetela ku va vhuna ve alakanyisisa ngu Mibhalo hambi ti txi teka mbimo. Ngu txikombiso, pimisa ngu nzila yi u nga alakanyisisako ngu yona mayelano ni themba ya wutomi wo mbi guma ni mafu a paradhise. Vo tala vo ziva ta tidotho ngu tigondo toneto, vamwani nem txilo. Ti nga maha va txi kholwa ku lifo magwito a totshe. Mwendo ti nga maha va txi alakanya ti to votshe va vanene va ya nzumani. Hi nga va vhunisa kutxani?

¹⁵ Mwanathu mmwani a mani nzila yi a nga yi wona yi txi thuma kwati. Kukhata, a lera Genesisi 1:28. E gwita e wotisa nyamne wa m’ti ti to Txizimu txi ti lava ve hanya hani ni ku ve hanyisa kutxani? Wungi wawe va khona: “Txi lava ve hanya mafuni, ka txiemo txa txinene.” Se mwanathu e gwita e lera Isaya 55:11 se e wotisa ti to ina txikongomelo txa Txizimu txi txitxile kani. Nyamne wa mti e xamula ku ahim-him. Ngu magwito, mwanathu a lera Masalmo 37:10, 11 se e wotisa ku khene ngu wuhi wumangwana wa vathu. Ngu kualakanyisisa navo ngu Mibhalo, mwanathu wuwa se a vhuni vathu vo tala ve pfisisa ti to ni konkuwa Txizimu txi ngadi txi lava ku vathu ve hanya ngu ha ku si gumiko ka Paradhise ha mafuni.

16-17. Ngu kuya ngu Mavingu 3:27, ngu yihi nzila yimwani yo kombisa moya wa wumbilu ngu simaho? Womba txikombiso.

¹⁶ Ya wumune, zama kulava tinzila to kombisa kukhatala ngu simaho. Ngu txikombiso, ina u ta nga hoka ngu mbimo ayi nyamne wa mti a nga mbi tiemisela? Hi nga kombela divalelo hi thembisa kuwuya ngu mbimo yimwani. Se loko nyamne wa mti a txi lava kuvhunwa kumaha to kari ko? Mwendo awu a si sikotiko kuhuma mtini a txi lava hi mu vhuna ngu mthumo wo kari? Ka siemo so nga soneso, hi nga sikota ku va vhuna.—Lera Mavingu 3:27.

¹⁷ Mwanathu mmwani wa txisikati a ve ni wuyelo ya yinene ngu kumaha tximaho txa txidotho txa wunene. Ngu moya wa wumbilu  a bhalete mwaya wumwani wu nga ti fetwe ngu mwanana. Ka dipapilo a patile ni tindimana ta Bhiblia ati ti thavelelako. Mwaya wule wu ti pfisile kutxani? Mame wa kona a ti khene: “Nyamnova ni sa tsaka, kambe dipasi dako di ni vhunile ngutu. Nem kha ni tizivi to ni nga kubongisa kutxani mwendo kukugela lisima ali dipasi dako di ku nalo kwangu. Ti nga maha ni di lerile kona mu ka 20 wa makhambi nyamnova. Kha na kholwa nzila yi di nga kombisa ngu yona wunene ni kukhatala kwako. Na bonga ngu mbilu yangu yotshe.” Ti ha kubasani, hi nga va ni wuyelo ya yinene ngako hi txo tiveka ha wukhaloni ka va va xanisekako, hi tshumela hi va mahela to kari to va vhuna.

18. Hi txi yelanisa ni ti ti ku ka 1 Vakorinto 3:6, 7, ngu yahi mawonelo aya hi fanelako kuva nawo?

¹⁸ Phela, ti lava hi va ni mawonelo a manene ka mthumo wathu thembweni. Hi nga vhuna vamwani ve gonda mayelano ni Txizimu, kambe athu hi maha ta tidotho. (Lera 1 Vakorinto 3:6, 7.) Awu a ndindako vathu i Jehovha. (Johani 6:44) Ngu magwito, tiya ngu txiemo txa mbilu ya m’thu kutumela mwendo kulamba mahungu a manene. (Mat. 13:4-8) U nga divale ti to wungi wa vathu kha va tumela didungula da Jesu, hambiku ene i nga ti m’gondisi wa hombe! Ngu ditshuri, hi nga godholeni ngako wungi wa va hi duketako ku va vhuna va si tumeli mahungu a manene.

19. Ngu yihi wuyelo yo kombisa wumbilu hi di ka mthumo wo txhumayela?

¹⁹ Hi mana wuyelo ya yinene ngako hi txi kombisa wumbilu hi di ka mthumo wa thembwe. Ni ku hi na mana litsako lo txhumayela. Hi na mana litsako li li tako ngu kuha. Ni ku eto timaha ku avale va ku ni “fanelo ya wutomi wo mbi guma” ve amukela mahungu a manene. (Mith. 13:48) Ngu toneto “he maheni wunene ka votshe vathu, na hi di ngadi ni mbimo.” (Vag. 6:10) Ngu magwito hi na mana litsako lo tisa wudhumo ka Tate wathu wa nzumani.—Mat. 5:16.