GONDO 10
Nji txani txi ni vhalelako kubhabhatiswa?
“Se ve kwitima ve ya matini ngu wumbidi wawe, Filipi ni mthangeli wule wa mthenwa; se Filipi a to m’bhabhatisa.”—MITH. 8:38.
NDANDO 51 Hi ti ningetete ka Txizimu
ATI HI NO TI GONDA *
1. Nji txani atxi Adhamu ni Evha va nga txi luza ni ku yi ve yihi wuyelo ya kona?
AWE u alakanya ti to i mani wu a ku ni fanelo yo veka milayo ya ta tinene ni to biha? Mbimo yi Adhamu ni Evha va nga dya m’hando wo ziva ta tinene ni to biha, va kombisile tiya: Kwa mbi themba Jehovha ni milayo yakwe. Va sawute ku tivekela vapune milayo ya ta tinene ni to biha. (Gen. 3:22) Kambe alakanya ngu ti va nga luza. Wungana wawe ni Jehovha. Va tshumete ve luza lungelo yo hanya kala kupinduka, ve tshumela ve ningeta vanana vawe txionho ni lifo. (Var. 5:12) Txisungo txa Adhamu ni Evha txi va tisete xomulo ya hombe.
Msana ko va Muetiyopiya a di tumete Jesu, ngu txikuluveta a lavile kubhabhatiswa (Wona tindimana 2-3)
2-3. a) Muetiyopiya a mahile txani mbimo yi a nga txhumayelwa ngu Filipi? b) Ngu yahi makatekwa aya hi ma manako ngu kubhabhatiswa? Ngu sihi siwotiso asi hi no bhula ngu sona?
2 Wona kuhambana ka ti Adhamu ni Evha va nga maha ni ti Muetiyopiya wule wa mthenwa a nga maha mbimo yi a nga txhumayelwa ngu Filipi. Muetiyopiya a bongile ati Jehovha ni Jesu va nga mu mahela, se ngu txikuluveta e bhabhatiswa. (Mith. 8:34-38) Ngako hi txi tiningetela ka Txizimu, hi bhabhatiswa kufana ni wule wa mthenwa, ku ni ti hi ti kombisako. Hi kombisa kubonga kwathu ngu ti Jehovha ni Jesu va nga hi mahela. Hi tshumela hi kombisa ti to ha mthemba Jehovha ni ku ha ti pfisisa ti to ngene a ku ni fanelo yo veka milayo ya ta tinene ni to biha.
3 Alakanya ngu makatekwa ya hi ma manako ngu kuthumela Jehovha! Hi mana themba yo mana sotshe asi Adhamu ni Evha va nga si luza, kupata ni kuhanya kala kupinduka. Jehovha wa hi divalela sionho sathu e tshumela e hi ninga livhalo lo basa nguko hi ku ni likholo ka Jesu Kristu. (Mat. 20:28; Mith. 10:43) Hi tshumela hi va txienge txa mwaya wa Jehovha wa malanda akwe ma ku ni themba yo tsakisa ya mbimo yi yi tako. (Joh. 10:14-16; Var. 8:20, 21) Hambiku makatekwa otshewo ma ku ha kubasani, vamwani ava va nga gonda ngu Jehovha, va godhola kutekelela txikombiso txa Muetiyopiya wule wa mthenwa. Nji txani txi va vhalelako kubhabhatiswa? Va nga si xulisa kutxani sikarato soneso?
SIKARATO ASI SI VHALELAKO VAMWANI TI TO VE BHABHATISWA
Sikarato asi vamwani va mananako naso va si se bhabhatiswa Kuthava kutandeka (Wona tindimana 4-5) *
4-5. Ngu sihi sikarato asi Hannah a nga manana naso?
4 Dizowa. Avery awu vaveleki vakwe i ku Makristu. Tate wakwe njikombiso txa txinene kota tate wu a khatalako ni ku ene didhota adi di hisekako. Kambe, Avery wa thava kubhabhatiswa. Ngu kutxani? Ene a khene: “Ni si tizivi ti to na sikota kuhanya kufana ni tate wangu.” Avery a tshumela e thava ati a nga thukako e kombelwa ngu kutsimbila ka mbimo. A khene: “Ni thava ku ta kombelwa ku ni maha mkombelo hagari ka vathu, ni ningwa m’wombawombo, mwendo ni kombelwa kuthangela mtxawa ka mthumo wa thembwe.”
5 Hannah wa 18 wa malembe, eyo ngu dizowa a to vhala. Vaveleki vakwe va thumela Jehovha. Kambe ene a ti thava ti to ina a na sikota kuhanya ngu milayo ya Jehovha kani. Ngu kutxani? Hannah a ti kulisile mapimo a walo ngu ngene. Ngu kutsimbila ka mbimo, ene a si tsaki ha koza e tixanisa kudotho-kudotho, kambe eto ti txo engetela timhaka. A khene: “Ati ni nga txi maha ni si geli m’thu, hambi vaveleki vangu, futhi ni ti alakanya ti to Jehovha a nge ni dhundi ngu mhaka ya ti ni nga txi timahela nipune.”
Kukuzetelwa ngu vangana (Wona ndimana 6) *
6. Nji txani txi nga ti vhalela ku Vanessa e bhabhatiswa?
6 Kukuzetelwa ngu vangana. Vanessa wa 22 wa malembe a khene: “Ni ti ni mngana wu se ni nga ti ni digume da malembe ni txi sakana nayo.” Hambi keto, mngana wa Vanessa a si seketeli makungo akwe o bhabhatiswa. Eto ti si mu tsakisi Vanessa, a khene: “Ni txi wona ti txi karata kumana mngana, se ni ti thava ti to ngako ni txo leka awu ni nga ti nayo, tangu ti gwitile, na mbi mana mmwani.”
Dizowa (Wona ndimana 7) *
7. Makayla a ti thava txani? Ngu kutxani?
7 Kuthava kutandeka. Makayla, a ti ni 5 wa malembe mbimo yi ndiyakwe a nga thaviswa dibanzani. Mbimo yi a nga ti kula, a yi woni nzila yi simaho sa ndiyakwe si nga va gwesa ngu yona vaveleki vakwe. Makayla a khene: “Ni txi thava ti to ngako ni txo bhabhatiswa, na nda thuka ni maha txionho, ni thaviswa dibanzani se ni engetela kupanda ka vaveleki vangu.”
Kuthava kukanetwa(Wona ndimana 8) *
8. Miles a ti thava txani?
8 Kuthava kukanetwa. Tate wa Miles ni mame wakwe wa wumbidi va thumela Jehovha, kambe mame wakwe wo mveleka hi nga Fakazi. Miles a khene: “Ni zumbile ni mame 18 wa malembe, kambe ni ti thava ku m’gela to ni lava kubhabhatiswa. Ni sa yi divala nzila yi a nga angula ngu yona mbimo yi papa a nga va Fakazi. Se ni ti thava ti to nani a nga ni wusela txivhunyi.”
U NGA SI XULISA KUTXANI SIKARATO?
9. Ku na maheka txani mbimo yi u gondako ati Jehovha a nga timiselisa tona kumweko ni lirando lakwe?
9 Nji txani atxi txi nga maha ti to Adhamu ni Evha ve sawula kwa mbi thumela Jehovha? Nguko va nga tandeka kukulisa lirando ngu Jehovha. Hambi keto, Jehovha a va tumelete kuhanya malembe o tala, ve va ni vanana ve tshumela ve tivekela vapune milayo ya makuliselo a vanana. Kha ta swela kuwoneka ti to txisungo txa Adhamu ni Evha txo mbi engisa Jehovha i ti wuphukuphuku wa hombe. Matiwula awe a date mnanda wakwe, mazunga ni wubihi wu talete vathu votshe. (Gen. 4:8; 6:11-13) Hambi keto, Jehovha a ti nayo nzila yo hulukisa vanana va Adhamu ni Evha, ava va lavako ku mthumela. (Joh. 6:38-40, 57, 58) Mbimo yi u gondako ati Jehovha a nga timiselisa tona kumweko ni lirando lakwe, lirando lako ngu ngene li na kula. U na mbi lava kutekelela Adhamu ni Evha, kambe u na lava ku tiningetela ka Jehovha.
U nga si xulisa kutxani sikarato soneso ( Wona tindimana 9-10) *
10. Ngu kutxani kualakanyisisa ngu Masalmo 19:7 ti nga kuvhunako ku u thumela Jehovha?
10 Simama u gonda ngu Jehovha. U txi ya masoni u gonda ngu Jehovha, u na ya u tsana ngutu ti to u nga si kota kuthumela Jehovha kha kwati. Avery wu a nga wombwa makhatoni a khene: “Ni mani mtamo nguko ni nga lera ni kualakanyisisa ngu txithembiso txa Masalmo 19:7.” (Yi lere.) Mbimo yi Avery a nga wona ti to Jehovha a txi hetisisile txithembiso txonetxo, lirando lakwe ngu Txizimu li kute. Lirando kha li hi vhuni kuva ni mtamo dwe, kambe li tshumela li hi vhuna kuveka mapimo athu ka Jehovha ni ti ene a ti lavako. Hannah awu a nga wombwa txitimwi khe, a khene: “Ngu kuthumisa gondo yangu ya Bhiblia, ni ti tumbute ti to ngako ni txi tixanisa, ni xanisa ni Jehovha. (1 Pedro 5:7) Hannah a mahile ‘mlondeteli wa dipswi da Txizimu.’ (Jak. 1:22) Ku ve ni wuyelo yihi? A khene: “Mbimo yi ni nga wona nzila yi ni vhunekako ngu yona ni txi engisa Jehovha, ni kulisile lirando ngu ngene. Konkuwa na tsaniseka ti to mbimo yotshe Jehovha a na ni kongomisa ngako ni txi lava txivhuno.” Hannah a sikoti kuxula txikarato txo tixanisa. Ene a ti ningetete ka Jehovha ni kubhabhatiswa.
(Wona ndimana 11) *
11. Vanessa a mahile txani ti to e mana vangana va vanene? Hi gonda txani ka toneto?
11 Sawula vangana ngu wutxhari. Vanessa wu a nga wombwa makhatoni, a ti woni ti to mngana wakwe a txi m’vhalela kuthumela Jehovha. A gumisile wungana wawe. Kambe Vanessa kha maha toneto dwe. A ti karatete kumana vangana va dibanzani. A khene a vhunwi ngu txikombiso txa Nowa ni mwaya wakwe. A khene: “Va ti randetwe ngu vathu va va si thumeliko Jehovha, kambe vona vapune ha mwayani i ti vangana.” Msana ko bhabhatiswa, Vanessa a vite nyaphandule. A khene: “Eto ti ni vhuni kumana vangana vo tala, i si nga dibanzani kwathu dwe, kambe ni ka mamwani.” Nawe u nga va mana vangana va vanene ngu kumaneka ngutu ka mthumo awu Jehovha a nga hi ninga.—Mat. 24:14.
(Wona tindimana 12-15) *
12. Ngu kuhi kuthava aku Adhamu ni Evha va nga mbi va nako? Va wuyetwe ngu txani?
12 Thava ngu nzila ya yinene. Kuthava kumwani nga kunene. Ngu txikombiso, mbimo yotshe ti lava hi thava kuhenyisa Jehovha. (Mas. 111:10) I ti ku Adhamu ni Evha va ti ko va ni txithavo txo nga toneto, nga va sa tshuralela Jehovha. Kambe va mu tshuralete. Mbimo yi va nga maha toneto, maso awe ma to tuleka kha kwati ha koza ve wona ti to vona i ti vaonhi. Txawe i ti ku tshapelisa txionho ni lifo ka vanana vawe. Ngako se va nga ti ti wona, mwendo ve pfisisa txiemo txawe, va to telwa ngu tingana ngako i nga ti simbwiri se ve lava so ti fenengeta.—Gen. 3:7, 21.
13-14. a) Ngu kuya ngu 1 Pedro 3:21, ngu kutxani ti si lavi hi thava ngutu lifo? b) Ngu sihi sivangelo si hi ku naso so randa Jehovha?
13 Hambiku ti lavako hi va ni txithavo txa hombe ka Jehovha, kha ti zi ti lava ku hi thava ngutu lifo. Jehovha se a mahile lulamiselo yo hi mana wutomi wo mbi guma. Ngako hi txi maha txionho, hi gwita hi tisola ngu mbilu yotshe, Jehovha a na vhala txionho txathu. Ene a na hi divalela mayelano ni likholo li hi ku nalo ngu digandelo da mtirulo da Mwanana wakwe. Phela nzila yo khata kukombisa likholo, ngu ningetela wutomi wathu ka Txizimu ni kubhabhatiswa.—Lera 1 Pedro 3:21.
14 Hi ni sivangelo so tala so randa Jehovha. I si nga nguko a hi ningako silo so tsakisa ditshiku ni ditshiku, kambe ene a tshumela e hi gondisa ditshuri mayelano ni nene ni sikongomelo sakwe. (Joh. 8:31, 32) Ene a hi ningile dibanza da Wukristu ti to di hi kongomisa ni ku hi seketela. Ene wa hi vhuna kurwala mrwalo wathu, e tshumela e hi ninga themba yo hanya kala kupinduka mbimo yi yi tako hi di hetisekile. (Mas. 68:19; Mtu. 21:3, 4) Mbimo yi hi alakanyisisako ngu ti Jehovha a nga hi mahela kasi ku hi komba ti to wa hi randa, ti hi maha hi mranda. Ngako hi txi randa Jehovha, hi va ni kuthava ka kunene. Hi thava kuhenyisa Awu a nga hi randa ngutu.
15. Makayla a kuxulisile kutxani kuthava kutandeka?
15 Makayla, awu a nga wombwa txitimwi khe, a xute kuthava kutandeka mbimo yi a nga pfisisa nzila yi Jehovha a divalelako ngu yona. A khene: “Ni ti woni ti to hotshethu kha ha hetiseka, ha phazama. Kambe ni ti pfisisile ti to Jehovha wa hi randa ni ku a na hi divalela ngu txiseketelo txa m’tirulo.” Lirando lakwe ngu Jehovha li mu kuzetile ku e tiningetela kwakwe ni kubhabhatiswa.
(Wona ndimana 16) *
16. Miles a vhunisilwe kutxani kuxula kuthava kukanetwa?
16 Miles wu a nga ti thava ti to mame wakwe a na nda wusa txivhunyi, a kombete txivhuno ka muwoneleli wa txigava. A khene: “Nene a ti kulete ka mwaya awu wu nga hambana ngu wukhongeli. A ni vhuni ni alakanyisisa ngu ti to ni nga wombisa kutxani ka mame kasi ku e kholwa ti to kulava kubhabhatiswa, njisungo txangu hi nga papa a ni sinzisako.” Mame wa Miles kha angula ngu nzila ya yinene. Ngu magwito, ti lavile e khukha mtini, kambe kha leka txisungo txakwe. A khene: “Kugonda ngu ti Jehovha a nga ni mahela ti gwesile mbilu yangu. Ni txi alakanya kwati ngu digandelo da m’tirulo da Jesu, ni ti woni ti to Jehovha wa ni randa. Toneto ti ni mahile ni tiningetela ka Jehovha ni kubhabhatiswa.”
U NGA LEKI TXISUNGO TXAKO
Hi nga kombisa ti to ha bonga ati Txizimu txi nga hi mahela (Wona ndimana 17)
17. Ngu wuhi mkhanjo awu hotshethu hi ku nawo?
17 Mbimo yi Evha a nga dya m’hando wa mndonga wa jaradhi ka Edheni, a tshuralete Jehovha. Mbimo yi Adhamu nene a nga dya, a kombisile kwa mbi bonga ngu totshe ta tinene ati Jehovha a nga ti mu mahete. Hotshethu hi ni mkhanjo wo kombisa ti to ha lamba kuseketela txisungo txa Adhamu ni Evha. Ngu kubhabhatiswa, hi komba Jehovha ti to ha kholwa ti to ene a ni fanelo yo hi vekela milayo ka ta tinene ni to biha. Hi kombisa lirando lathu ni ku ha mthemba Tate wathu.
18. U nga maha txani ti to u thumela Jehovha kha kwati?
18 Txikarato atxi hi mananako natxo msana ko bhabhatiswa, ngu hanya ngu milayo ya Jehovha ditshiku ni ditshiku, i si nga kutihanyela. Magidhi a vathu va hanya ngu nzila yoneyo nyamsi wa ditshiku. U nga fana navo ngako u txi simama u gonda kwati Dipswi da Txizimu, i ku Bhiblia; u txi ya mitshanganoni mbimo yotshe; ni kutxhumayela vamwani ngu kuhiseka. (Vaheb. 10:24, 25) Ngako u txi lava kumaha txisungo, engisa dipswi da Jehovha ngu kuthumisa Bhiblia ni sengeletano yakwe. (Isaya 30:21) U txi maha toneto, totshe ti u mahako ti na tsimbila kwati.—Mav. 16:3, 20.
19. Ngu tihi ti u fanelako kusimama u ti wona? Ngu kutxani?
19 Mbimo yi u simamako u wona ati mkongomiso wa Jehovha wu ku vhunisako tona, nzila yi u randako milayo yakwe ngu yona yi na kula. Txiwalo atxi Sathani a no kuninga txi no kulekisa kuthumela Jehovha. Hi nga alakanya mazana a malembe u txi hanya. U na wona msana, u wona ta ku ka sisungo sotshe u nga maha, txo bhabhatiswa ngu txona i ku txa txinene ngutu!
NDANDO 31 Tsimbila ni Txizimu
^ par. 5 Ku ni txisungo txa lisima atxi ti no lava u txi maha, i ku txa ti to u na bhabhatiswa mwendo ahim-him. Ngu kutxani i di txa lisima? Msungo wuwa wu na xamula. Wu na tshumela wu vhuna ava va alakanyako ngu kubhabhatiswa ti to ve xula sikarato asi si nga thukako si va tshumetela msana.
^ par. 55 TITXHAMUSELO TA MIFOTA: Dizowa: Mphya a txi thava kuxamula mitshanganoni.
^ par. 57 TITXHAMUSELO TA MIFOTA: Vangana: Mphya wu i ku Fakazi a txi thava mbimo yi a wonako Tifakazi kulowe.
^ par. 59 TITXHAMUSELO TA MIFOTA: Kutandeka: Dihorana di txi pimisa ti to aku ndiya ya kona yi nga thaviswa dibanzani yi tshumela yi khukha mtini ni dona di nga tandeka.
^ par. 61 TITXHAMUSELO TA MIFOTA: Kukanetwa: Mphya a txi thava kumaha mkombelo a txi wonetelwa ngu mame wakwe wu i si ngako Mkristu.
^ par. 63 TXHAMUSELO YA MIFOTA: Dizowa: Mphya a txi timahela gondo yakwe apune.
^ par. 65 TXHAMUSELO YA MIFOTA: Vangana: Mphya a txi gonda kutiguleta ngu kuva Fakazi
^ par. 67 TXHAMUSELO YA MIFOTA: Kutandeka: Dihorana di dhunda ditshuri di bhabhatiswa.
^ par. 69 TXHAMUSELO YA MIFOTA: Kukanetwa: Mphya a txi txhamusela mame wakwe ngu txibindi ati a ti kholwako.
