1, 2. a) Ngu yihi themba ya malanda a Txizimu? b) Nji txani txi no hi vhuna kurinzela hakhelo? (Wona mfota wu wu ku makhatoni.)

MAKRISTU aya i ku vasawuleki ma ni themba ya lisima yo ya hanya nzumani. Mpostoli Paulo a ti khene i “txhatxhazelo ya kuxula ayi ni dhanelwako yona nzumani ngu Txizimu.” (Vafilipiya 3:14) Vasawuleki va na ya nzumani ve ya fuma ni Jesu Kristu ka Mfumo wakwe ni kuvhuna vathu ti to ve va vo hetiseka. (Mtuletelo 20:6) Eyo i themba yo tsakisa! Kambe tinvuta timwani ti ni themba yimwani. Ngu yihi? Yo hanya kala kupinduka ka mafu a Paradhise, se ni toneto ta tsakisa!—2 Pedro 3:13.

² Paulo a ti lava ti to vasawuleki kulowe ni vona ve zumba va di thembekile ti to ve mana hakhelo. A va gete tiya: “Alakanyani simaha si i ku sa txitimwi.” (Vakolosa 3:2) Ku ti laveka ve veka mapimo awe ka themba yawe ya nzumani. (Vakolosa 1:4, 5) Kualakanya ngu makatekwa a  Jehovha ti vhuna otshe malanda a Txizimu ti to me rinzela hakhelo, ku singa ni mhaka ni ti to nja nzumani mwendo nja ha mafuni.—1 Vakorinto 9:24.

3. Ngu yihi phango ayi Paulo a nga txharihisa Makristu ka yona?

³ Paulo a tshumete e txharihisa Makristu ngu phango ayi yi nga va tekelako hakhelo. Ngu txikombiso, ene a bhalete Vakolosa ti to ve ti wonela ka Makristu a makuhu aya ma nga ti zama kutsakisa Txizimu ngu kulondisela Mlayo wa Mosi hahanze ko va ni likholo ka Kristu. (Vakolosa 2:16-18) Phango yimwani yi Paulo a nga womba-womba ngu yona yi ngadi ho ni nyamsi, futhi yi nga hi luzisa hakhelo. Ene a txhamusete nzila yo lwa ni minavelo yo biha ni nzila yo lulamisa sikarato mwayani kwathu mwendo ni vanathu dibanzani. Txialakanyiso txa Paulo txi nga hi vhuna ni nyamsi. Konkuwa he xolisiseni sialakanyiso sa lirando asi si ku ka dipapilo da Paulo do ya ka Vakolosa.

4. Ngu kutxani minavelo yo biha yi nga hi luzisako hakhelo?

⁴ Na a si se womba-womba ngu hakhelo yawe yo tsakisa Paulo a ti khene: “Ngu toneto, ha mmidini kwanu, dayani asi i ku sa mafu: Wugango, mahanyelo a nzambwa, makolo, mixuvo yo biha.” (Vakolosa 3:5) Minavelo yo biha yi nga kula ha ko za yi hi luzisa wuxaka ni Jehovha ni themba yathu ya mbimo yi yi tako. Mwanathu mmwani wu a nga khala kuxulwa ngu minavelo yo biha kambe konku se a nga wuyela dibanzani a khene minavelo yoneyo yi kute ha ko za e “ta wona phango se ti di onhekile.”

5. Hi nga ti vhikelisa kutxani ka siemo asi si ku ni phango?

⁵ Ti lava hi tiwonela ngutu ngako hi di ka txiemo atxi txi nga hi ndakisako milayo ya yinene ya Jehovha. Ngu txikombiso, mbutxhari ti to a va va lavako kutekana ve tivekela sipimelo sokari, mayelano ni kuñolana, kupswopswana ni kuzumba vokha. (Mavingu 22:3) Phango yimwani ngu loko hi txi ya kugwevhani ni m’thu wa limbewu lo hambana mwendo hi txi thuma nayo. (Mavingu 2:10-12, 16) U nga ti vhikelisa kutxani? U nga ti sise ti to u Fakazi ya Jehovha. U nga divale ti to kusakana ngu kusihana ti ni phango. Ngako hi sa tsaka mwendo hi di ni txiwunda, ti lava hi tiwonela. Ti nga maha se hi lava m’thu awu hi no tipfa a txi hi randa, se hi tumela kutsakelwa ngu mani ni mani. Toneto ti ni phango. Ngako u txi tipfisa toneto, u nga thuke u maha txilo atxi txi no kutekela hakhelo. Kombela txivhuno ka Jehovha ni ka vanathu.—Lera Masalmo 34:18; Mavingu 13:20.

6. Hi fanete hi tiwonela txani ngako hi txi sawula misakano?

⁶ Ti to hi daya minavelo yo biha ti lava hi vayilela misakano ya nzambwa. Misakano ya nyamsi yi hi khumbulisa timhaka ta Sodhoma ni Gomora. (Judha 7) Ava va humisako misakano, va maha ti woneka nga wugelegele kha wa biha nem  kha wu nga ni phango. Se ti lava hi tiwonela. Hi nga yotshe misakano ya ditiko hi no yi amukela. Ti lava hi si sawuli misakano ayi yi no hi tsivela kumana hakhelo ya wutomi.—Mavingu 4:23.

7. Nji txani txi nga thukako txi humelela dibanzani?

⁷ Ha tsaka ngu kuva siro sa dibanza da Wukristu. Hi di mitshanganoni hi gonda Bhiblia ni kutsaniselana ngu lirando. Eto ti hi vhuna kusimama hi rinzela hakhelo. Kambe mbimo yimwani hi nga thuka hi kandana sizenende ni vanathu dibanzani. Ngako hi si lulamisi sikarato ni vanathu, hi nga zumba ni txiviti.—Lera 1 Pedro 3:8, 9.

8, 9. a) Ngu tihi tifanelo ati ti no hi vhuna kumana hakhelo? b) Hi nga maha txani ngako mwanathu wo kari a txi hi henyisa?

⁸ Kha ha fanela kuleka txiviti txi hi tsivela kumana hakhelo. Paulo a gete Makristu a Kolosa a txi khene: “Nga ti mi nga sawulwa ngu Txizimu, mi manekako mi di basile ni kurandeka, ambalani moya wa wumbilu, wa wunene, wa ku ti veka hahatshi, wa kuthutha ni wa litimiselo; mi txi timiselana ni kudivalelana mmwani ni mmwani ngako m’thu a di ni txisolo ka mmwani, nga kule Kristu a nga mi divalela, nananu mahisani toneto. Kambe txitimwi ka sotsheso ambalani lirando, i ku txitsaniso txo hetiseka.”—Vakolosa 3:12-14.

⁹ Lirando ni wunene si nga hi vhuna ti to hi divalela vamwani. Hi nga maha txani ngako hi di henyisilwe ngu ti mwanathu a nga ti womba mwendo ku ti maha? Hi nga khumbula ditshiku di athu hi nga nga henyisa mmwani se e hi divalela. Hi m’bongile ngu wunene wakwe! (Lera Ekleziyaste 7:21, 22.) Hi bonga Kristu aku a nga tshanganisa vakhozeli va ditshuri. (Vakolosa 3:15) Phela hotshethu hi khozela Txizimu tximwetxo, hi txhumayela mahungu a mamwewo ni ku hi ni sikarato so fana ni sa vamwani. Se ngako hi txi va ni wunene ni lirando hi divalela vanathu, dibanza di na va ni wumwewo se hi na zumba hi txi rinzela hakhelo.

10, 11. a) Ngu kutxani mabava ma di ni phango? b) Hi nga ma vayilelisa kutxani mabava?

¹⁰ Mabava ma nga hi tsivela kumana hakhelo. Bhiblia yi kombisa ti to mabava ma ni phango. Ngu txikombiso, Kayini a date Abhele nguku a nga m’bavela. Kora, Dhatani ni Abhiramu va bavete Mosi, se ve mu wukela. Mkoma Sawule a ti lava kudaya Dhavhidha nguku a nga ti m’bavela. Bhiblia yi womba ditshuri yi txi kha yona: “Ahawa ku ku ni wukhuxu ni mibhando, ku na tumbuluka mazolonga ni totshe tixaka ta siwonho.”—Jakobe 3:16.

¹¹ Ngako hi txi ti karatela kuva ni lirando ni wunene, hi na mbi va ni mabava. Bhiblia yi khene: “Lirando la timisela, lirando li ni wumbilu, lirando kha li nga ni mazonda.” (1 Vakorinto 13:4) Hi fanete hi wona timhaka ngu ha Jehovha ati wonako ngu kona ti to hi si vi ni mabava. Ti lava hi teka vanathu i di sihango  sa mmidi wumwewo, mmidi wa kona i ku dibanza. Bhiblia yi khene: “Ngako txihango txo kari txi txi dhumiswa, sotshe sihango sa tsaka kumweko natxo.” (1 Vakorinto 12:16-18, 26) Se ngako mwanathu a txi mana dithomo, hi na tsaka nayo, hi si m’baveli. Jonatani mwanana wa Mkoma Sawule a mahile toneto. Mbimo yi ene a nga mbi sawulwa ti to e va mkoma, kambe kusawulwa Davhidha, ene kha m’bavela. Kambe a to tsanisa ni kuseketela Dhavhidha. (1 Samueli 23:16-18) He tekeleleni wunene ni lirando la Jonatani.

12. Ngu txihi txialakanyiso txa Bhiblia txi nga vhunako mwaya ti to wu mana hakhelo?

¹² Ngako mmwani ni mmwani ha mwayani a txi thumisa matshina a milayo ya Bhiblia, mwaya wathu wu na va ni kudikha ni litsako ni ku wu na mana hakhelo. Nditxe txialakanyiso txa Paulo ka timwaya: “Anu vavasikati, ti vekeni hahatshi ka vamna vanu, nguko ti ni fanelo ka vale i ku sihango sa ditshuri sa Mkoma. Anu vavamna, randani vasikati vanu, mi si zumbi ngu ku va xupha. Anu vanana, engisani vaveleki vanu ka totshelele, nguko ta tsakisa ka Mkoma. Anu vaveleki, mi nga henyiseleni vanana vanu, kasiku mi si va theli dikhodho.” (Vakolosa 3:18-21) Txialakanyiso txiya txi nga wu vhunisa kutxani mwaya?

13. Mwanathu a nga mvhunisa kutxani mwamna wakwe ti to e thumela Jehovha?

¹³ Ti nga maha mkatako a si thumeli Jehovha. U nga maha txani ngako u txi wona nga ene kha kuñoli ngu nzila ya yinene? U nga thuka u henya, kambe ina eto ti na vhuna? Hambi i di ti to wa kuleka  u maha ati u ti lavako, ina u na sikota ku m’vhuna ti to e thumela Jehovha? Ahim-him. Kambe ngako u txi mkomba txixonipho kota msungo wa mwaya, u nga si kota kuvhuna mwaya ti to wu va ni kudikha ni ku Jehovha a na dhumiswa. Txikombiso txako txa txinene txi nga maha ti to mwamna wako e tsakela kuthumela Jehovha, se motsheno mi na mana hakhelo.—Lera 1 Pedro 3:1, 2.

14. Mkristu a nga maha txani ngako msikati wakwe a si m’xoniphi?

¹⁴ Ti nga maha msikati wako a si thumeli Jehovha. U nga maha txani ngako a si ku xoniphi? Ina a na simama e kuxonipha ngako u txi duketa ku mu komba ti to i mani i ku wamwamna? Ahim-him! Txizimu txi lava ti to u va wamwamna awu a ku ni lirando u txi etetela Jesu. (Vaefesu 5:23) Jesu ngene msungo wa dibanza, kambe mbimo yotshe a kombisile lirando ni kutimisela. (Luka 9:46-48) Ngako u txi etetela Jesu, ti nga maha msikati wako e tsakela kuthumela Jehovha.

15. Mkristu a nga m’kombisisa kutxani msikati ti to wa m’randa?

¹⁵ Jehovha a gela vavamna a txi khene: “Randani vasikati vanu, mi si zumbi ngu ku va xupha.” (Vakolosa 3:19) Wamwamna wa lirando a ninga lisima msikati wakwe. A mahisa kutxani? Mbimo yi msikati a womba-wombako, wa engisela e tshumela e mu gela ti to ati a nga womba nda lisima. (1 Pedro 3:7) Hambi i di ti to hi nga totshe ati mwamna a no tumela, kambe a txi engisela ti nga m’vhuna kumaha sisungo sa sinene. (Mavingu 15:22) Wamwamna wa lirando kha sinzisi msikati ti to e mu xonipha. Kambe a  duketa ku m’bhabha. Ngako mwamna a txi randa msikati ni vanana, va na thumela Jehovha ngu litsako se ve mana hakhelo ya wutomi.

16, 17. Ngako u di mphya u nga mahisa kutxani ti to u si henyiswi ngu vaveleki vako?

¹⁶ U di mphya ti nga maha u pimisa ti to vaveleki vako va karata. Eto ti nga maha u khata kukanakana kuthumela Jehovha. Kambe, loko u txo leka Jehovha, u na wona ti to a walo ni wamweyo hahanze khe a kudhundako kufana ni vaveleki vako ava i ku Makristu ni vangana vako va dibanzani.

¹⁷ Alakanya ngu tiya: Ngako vaveleki vako va si kulayi u na tizivisa kutxani ti to va khatala ngu ngawe? (Vahebheru 12:8) Aku va nga mbi hetiseka ti nga maha nzila yi va kulayako ngu yona yi ku henyisa. Kambe u nga khatali ngu tona. Awe pfsisa ati va kulayako tona. U nga phikizani navo, awe engisela. Txizimu txi khene: “Awule a vekisako mapswi a ni wuzivi, se a wule wa moya wo ziza m’thu wa mapimo.” (Mavingu 17:27) Tivekisele ku va m’thu wa mapimo, awu a tumelako kulaywa ku singa ni mhaka ni ti to va kulayisa kutxani. (Mavingu 1:8) U nga divali ti to kuva mwanana wa Makristu i njombo. Vona va tsakela kukuvhuna.

18. Ngu kutxani u di tiemisete kumana hakhelo?

¹⁸ Ku singa ni mhaka ni ti to hi rinzela kuya nzumani mwendo ku ta hanya ha mafuni, hotshethu hi rinzela wumangwana wa wunene. Jehovha kha hi yokisi futu. Themba yathu yi seketetwe ka ti M’vangi wa ditiko a wombako, i ku tiya: “Mafu ma na tala ngu kuziva MKOMA.” (Isaya 11:9) Na i singa kale votshe ha mafuni va na gonda ngu Txizimu. Eyo i hakhelo ya yinene ayi hi yi thumelako. Mbimo yotshe u nga divali ati Jehovha a nga kuthembisa, ni ku u nga tumeleli txilo txi ku tekela hakhelo!