1. Ku nga humelela txani mbimo yi hi txhumayelako, ni ku hi nga tsaniseka ka txani?

 HA TIZIVA ti to mbimo yi hi txhumayelako hi na kanetwa. Kukanetwa koneko ti nga maha ku engeteleka ka mbimo yi yi tako. (Dhan. 11:44; 2 Tim. 3:12; Mtu. 16:21) Hambi keto hi nga tsaniseka ti to Jehovha a na hi ninga txivhuno txi hi txi lavako. Ngu kutxani? Nguko mbimo yotshe Jehovha a vhuni malanda akwe kuhetisisa mthumo wawe ku si nga ni mhaka ni ti to mthumo wonewo wu txi karata ku hokela hani. Ngu txikombiso hi na wona ati ti nga humelela mprofeti Ezekhiyele mbimo yi a nga txhumayela Majudha ya ma nga di wukhumbini ka Bhabhilona.

2. Jehovha a wombile ti to vathu va va nga txi txhumayelwa ngu Ezekhiyele i di vo zumbisa kutxani? Ngu tihi timhaka tiraru ti nga vhuna Ezekhiyele hi no ti wona ka gondo yiya? (Ezekhiyele 2:3-6)

² I ti vathu vo zumbisa kutxani ava Ezekhiyele a nga txi va mana ka mthumo wakwe wo txhumayela? Jehovha a wombile to i ti vathu va “tikhohe to thuvika,” “timbilu to banga,” ni “nyumba yo kaneta.” Vona va txi thola kufana ni mipa ni ku va txi dayisa kufana ni tihume. Ngu toneto Jehovha a nga gela Ezekhiyele atxi khene: “U nga thave”! (Lera Ezekhiyele 2:3-6.) Ezekhiyele a hetisisile mthumo wakwe wo txhumayela nguko ene 1) a ti rumetwe ngu Jehovha, 2) a txi ningwa mtamo ngu Moya wa Txizimu ni ku 3) a txi gonda Dipswi da Txizimu. Timhaka tiya ta tiraru ti m’vhunisile kutxani Ezekhiyele ni ku ti nga hi vhunisa kutxani nyamsi?

3. Ngu yahi mapswi ya kutilava ma nga tsanisa Ezekhiyele, ni ku Jehovha a mu tsanisekisile to a ndi na m’vhuna ngu nzila muni?

³ Jehovha a gete Ezekhiyele a txi khene: “Na ku rumela.”  (Eze. 2:3, 4) Ngu kutxani mapswi yawa ma di tsanisile Ezekhiyele? Kha ti kanakanisi to a khumbute ti to Jehovha a thumisile mapswi ya ma fanako mbimo yi a nga rumela Mosi, ni Isaya kota vaprofeti vakwe. (Eks. 3:10; Isaya 6:8) Ezekhiyele a txi ti ziva kambe to Jehovha a vhuni vaprofeti vonevo va vambidi kuxula sikarato. Se mbimo yi Jehovha a nga gela Ezekhiyele ngu makhambi mambidi a txi: “Na ku rumela,” a ti ni sivangelo so themba ti to Jehovha a ndi na m’vhuna. Hahanze keto makhambi o tala ka dibhuku da Ezekhiyele ka wombwa to: “Mhaka ya MKOMA yi tile kwangu.” (Eze. 3:16) Kuengetela keto, mapswi ya ma ku “dipswi da Jehovha di tshumete kambe di ta kwangu” ma wuyeletetwe makhambi o tala. (Eze. 6:1, NM) Ezekhiyele a txi tsaniseka ti to a rumetwe ngu Jehovha. Ni ku a ku i ngadi mwanana wa mphaxeli ti nga maha a di gondisilwe nzila yi Jehovha a nga vhuna vaprofeti vakwe. Ka Isaake, Jakobe ni Jeremiya Jehovha ati khene: “Ani ni ni nawe.—Gen. 26:24; 26:24; 28:15; Jer. 1:8.

4. Ngu tihi ti nga vhuna Ezekhiyele ku e mana mtamo wo hetisisa mthumo wakwe?

⁴ Vaisrayeli va angulisile kutxani ka ti Ezekhiyele a nga ti txhumayela? Jehovha ati khene: “Nyumba ya ka Israyeli, kha yi na mbi ti lava ku kuengisa, nguko kha va lavi ku ni engisa ani.” (Eze. 3:7) Mbimo yi Vaisrayeli va nga txi lamba kuengisa Ezekhiyele vona va txi lamba kuengisa Jehovha. Mapswi yawa ma tsanisekisile Ezekhiyele ti to mbimo yi vathu va nga txi lamba ku mu engisa ti si wombi ti to i si nga mprofeti wa mnene. Jehovha a tshumete a tsanisekisa Ezekhiyele ti to mbimo yi wulamuli wu a nga txi wu txhumayela wu nga ndi no hoka, vathu va di na “tiziva taku hagari kwawe, ku ti ni mprofeti.” (Eze. 2:5; 33:33) Ngu ditshuri, kualakanyisisa ngu tiya ti vhuni Ezekhiyele kumana mtamo awu a nga txi wu lava kasi kuhetisisa mthumo wakwe.

5. Ngu kuya ngu Isaya 44:8, nji txani txi hi ningako mtamo?

⁵ Nathu ha mana mtamo nguko ha tiziva ti to hi rumelwa ngu Jehovha. Ene wa hi guleta ngu ku hi dhana to hi “tifakazi” takwe. (Isaya 43:10) Eyo i lungelo ya hombe nguto. Nga ha Jehovha a nga gela Ezekhiyele a txi khene: “U nga thavi,” nathu Jehovha wa hi gela a txi khene: “Mu nga thaveni.” Ngu kutxani hi si faneli kuthava va va hi kanetako? Nguko kufana ni Ezekhiyele athu hi rumetwe ngu Jehovha ni ku hi ni txivhuno txakwe.—Lera Isaya 44:8.

6. a) Jehovha a hi tsanisekisa kutxani to a na hi vhuna? b)  Hi wu mana hayi mtamo wo simama hi maha mthumo wathu?

⁶ Jehovha wa hi tsanisekisa ti to a na hi vhuna. Ngu txikombiso a sise womba to: “Anu mi tifakazi tangu,” ene a wombile a txi khene: “Ngako u txi txhatuka matini, ni na va ni nawe, hambi u txi txhatuka minambo, kha yi na mbi ku mita, ngako u txi pinda ngu ha mndiloni, khu na mbi hya, hambi m’dhikila kha wu na mbi kuhisa.” (Isaya 43:2) Mbimo yi hi txhumayelako ha thuka hi manana ni sikarato si fanako ni ku mitwa ngu mati mwendo kupinda ngu ha mndiloni. Hambi keto ngu vhunwa ngu Jehovha ha simama hi txhumayela. (Isaya 41:13) Kufana ni ka mbimo ya Ezekhiyele vathu nyamsi va lamba kuengisa didungula dathu. Kambe ha tiziva to kulamba kwawe kha ti wombi ti to athu kha hi hetisisi kwati mthumo wathu kota Tifakazi ta Txizimu. Ha mana mtamo ngu kuziva to Jehovha wa tsaka ngako hi txi simama hi maha mthumo wathu ngu kuthembeka. Mpostoli Paulo ati khene: “Mmwani ni mmwani a na tshungulwa madingano ni mthumo wakwe.” (1 Vak. 3:8; 4:1, 2) Mwanathu mmwani wa txisikati i ku kale a txi thuma kota nyaphandule ati khene: “Ta ni ninga litsako kuziva ti to Jehovha a na hakhela kutikarata kwathu.”

7. Ti nga maha Ezekhiyele a txi ti pfisa kutxani mbimo yi a nga txi alakanyisisa ngu muwoniso wu a nga wu wona? (Wona mfota wa kapa.)

⁷ Ezekhiyele a woni mtamo wa Moya wa Txizimu. Ati a nga ti wona ka muwoniso ti mu vhuni kuwona to i ti Moya wo sawuleka wu nga txi vhuna tingelozi ni kutsimbitisa marodha a mmovha wa nzumani. (Eze. 1:20, 21) Ezekhiyele a angulisile kutxani? Ene a bhate ti ti nga humelela. Ati khene: “Mbimo yi ni nga ti wona tiya, ni to wa ngu khohe yangu.” Ezekhiyele a wite hahatshi nguko a xamatisilwe ngu ti a nga ti wona. (Eze. 1:28) Msana keto, mbimo yotshe yi Ezekhiyele a nga txi alakanyisisa ngu muwoniso wule wo xamatisa a ti tsaniseka ti to ngu kuvhunwa ngu Moya wa Txizimu a ndi na sikota kuhetisisa mthumo wakwe.

8-9. a) Nji txani txi Jehovha a nga gela Ezekhiyele? b) Jehovha a tsanisisile kutxani Ezekhiyele kasi kutxhumayela vathu vale va timbilu to banga?

⁸ Jehovha a gete Ezekhiyele a txi khene: “Mwanana wa m’thu, khukha u txi ema, ni na womba-womba ni nawe.” Mapswi yawa ma ningile Ezekhiyele mtamo mwendo “moya” a wu a nga txi wu lava kasi ku e khukha e ema. Ezekhiyele a wombile tiya: “Sekoko moya wu to wulela kwangu mbimo yile a nga ti ti womba-womba ni nani.” (Eze. 2:1, 2) Ngu tsimbila ka mbimo Ezekhiyele a kongomisilwe ngu “dianza” da Txizimu i ku moya wo sawuleka wa Txona. (Eze. 3:22; 8:1; 33:22; 37:1; 40:1) Moya wa Txizimu wu kongomisile Ezekhiyele ka mthumo wu a nga wu amukela wo txhumayela vathu va “tikhohe ni timbilu to banga.” (Eze. 3:7) Jehovha a gete tiya Ezekhiyele: “Wona taku ni tsanisile khohe yako kupinda yawe, ni bangisa mbanza yako kupinda mbanza yawe. Mbanza yako ni yi mahile yi fana ni dhayimani, yi bangi ngutu kupinda dirigwi; u nga thave koko, hambi ku tunywa ngu tikhohe tawe.” (Eze. 3:8, 9)  Jehovha a txi lava kugela Ezekhiyele to: ‘U nga godholiswe ngu tikano tawe, ani ni na kuvhuna.’

⁹ Msana keto moya wa Txizimu wu kongomisile Ezekhiyele ka mthumo wo txhumayela. Ezekhiyele a ti khene: “Dianza da Txizimu di ti ti ni mtamo txitimwi kwangu.” Ti tekile kona mu ka divhiki kasi ku Mprofeti wuwa e tumela ni kualakanyisisa ngu didungula di a nga di no di txhumayela. (Eze. 3:14, 15) Msana keto Jehovha a m’tekile eya mkovani aha “moya wu nga wulela kwakwe.” (Eze. 3:23, 24) Ezekhiyele se a di lungekile kukhata mthumo wakwe.

10. Ngu txihi txivhuno hi txi lavako kasi kusimama ni mthumo wathu wo txhumayela, ni ku ngu kutxani?

¹⁰ Nji txani txi no hi vhuna kusimama ni mthumo wathu wo txhumayela? Kasi kuxamula txiwotiso txiya a hi woni ti ti nga humelela Ezekhiyele. A sise kukhata mthumo wakwe wo txhumayela, Moya wa Txizimu wu mningile mtamo. Kufana ni Ezekhiyele nanathu nyamsi hi nga simama ni mthumo wathu wo txhumayela ngu kuvhunwa ngu moya wo sawuleka wa Txizimu. Ngu kutxani? Nguko Sathani wa lwisana ni nathu a lava ti to hi ema mthumo wathu wo txhumayela. (Mtu. 12:17) Ka mawonelo a nyama ti nga woneka nga kha hi nga va txilo kwakwe. Kambe ha m’xula mbimo yi hi txhumayelako mahungu a manene. (Mtu. 12:9-11) Ngu nzila muni? Yotshe mbimo yi hi txhumayelako hi kombisa ti to kha hi dhukiselwi ngu Sathani, se mbimo yi hi txhumayelako hi kombisa ku m’xula. A ku hi simamako hi txhumayela hambi hi txi manana ni kukanetwa ti komba ti to ha ningwa mtamo ngu Moya wo Sawuleka ni ti to ha tsakelwa ngu Jehovha.—Mat. 5:10-12; 1 Pedro 4:14.

11. Moya wo Sawuleka wu nga hi vhuna kumaha txani, ni ku hi fanete kumaha txani kasi ku hi simama hi wu amukela?

¹¹ Ngu txihi timwani hi nga tsanisekako ka tona ngu kuziva to Jehovha a bangisile khohe ni mbanza ya Ezekhiyele yo fanekisela? Moya wa Txizimu wu nga hi ninga mtamo a wu hi  wu lavako kasi kuwonisana ni sikarato a si hi si manako ka mthumo wathu wo txhumayela. (2 Vak. 4:7-9) Nji txani txi hi fanelako kumaha kasi kusimama hi amukela moya wa Txizimu? Hi fanete kusimama hi khongela ni kutsaniseka ti to Jehovha a na engisa mikombelo yathu. Jesu a gondisile valondeteli vakwe ku va ti fanete kusimama “ve kombela, . . . ve lava, . . . ve gogota.” Se kota xamulo Jehovha adi na “ninga Moya wakwe wo Sawuleka ka vale va m’kombelako.”—Luka 11:9, 13; Mith. 1:14; 2:4.

12. Ngu kuya ngu Ezekhiyele 2:9–3:3, dibhuku di txi ta ngu ka mani, ni ku di ti bhatwe txani?

¹² Ezekhiyele a si ningwi mtamo basi ngu moya wa Txizimu, Dipswi da Txizimu ni dona di txi tsanisa likholo lakwe. Ka m’woniso wu Ezekhiyele a nga va nawo, a woni dianza di di ni dibhuku do petelwa. (Lera Ezekhiyele 2:9–3:3.) Dibhuku donedo di txi ta ngu ka mani? Di ti bhatwe txani? Ni ku di m’tsanisile ngu nzila muni Ezekhiyele? Dibhuku dile di txita ngu ka Txiluvelo txa Txizimu. Ti nga maha Jehovha a di thumisile yimweyo ya tingelozi tile ta mune Ezekhiyele a nga ti wona makhatoni kasi ku m’ninga dibhuku. (Eze. 1:8; 10:7, 20) Dibhuku donedo di ti ni mapswi a Txizimu a wulamuli, a ya Ezekhiyele a nga di fanete kugela vathu vale va timbilu to banga, ava va nga ti wukhumbini. (Eze. 2:7) Mapswi yale a wulamuli ma ti bhatwe otshe madhawa ka dibhuku dile do petwa.

13. Nji txani txi Jehovha a nga gela Ezekhiyele to e maha ngu dibhuku, ngu kutxani di nga txi tshamba?

¹³ Jehovha a gete Mprofeti wuwa ti to “e dya ni ku tata disusu ngu dibhuku.” Ezekhiyele a engisile e dya dotshe dibhuku dile. Ngu yihi txhamuselo ya m’woniso wuwa? Ezekhiyele a ti fanete kupfisisa khakwati didungula di a nga ndi no di txhumayela. Ti wombako to didungula diya di ti fanete kukhata ngu kugwesa matipfelo ni mialakanyo yakwe. Msana keto ku humelete timhaka to xamalisa. Ezekhiyele a pfite ti to dibhuku “di ti tshamba ku fana ni wulombe.” (Eze. 3:3) Ngu kutxani? Ka Ezekhiyele lungelo yo emela Jehovha yi txi tshamba ni kutsakisa. (Mas. 19:8-11) Ene a txi bonga Jehovha ngu ku a nga m’tumelela kuthuma kota mprofeti wakwe.

14. Nji txani txi nga vhuna Ezekhiyele kulungekela kumaha mthumo wakwe?

¹⁴ Ku di pindile mbimo Jehovha a gete Ezekhiyele ti to a ti fanete “kuveka mbiluni totshe timhaka takwe, ati a di no m’gela.” (Eze. 3:10) Ngu thumisa sileletelo siya Jehovha a gete Ezekhiyele to a di fanete kuveka mapswi ya ma nga di bhatwe ka dibhuku dile hamsungo ni kutshumela e alakanyisisa ngu ona. Ngu kumaha toneto likholo la Ezekhiyele li ndi na tsana ni ku ti di na maha ti to e kota kuhuwelela didungula dile da mtamo. (Eze. 3:11) Aku a nga ti ni Dipswi da Txizimu ka txisofu ni mbilu yakwe, Ezekhiyele se a di lungekile kumaha mthumo wakwe.—Fananisa ni Masalmo 19:14.

15. Kasi kutsanisa likholo lathu nji txani hi fanelako ku txi “veka mbiluni”?

¹⁵ Kasi ku hi simama ka mthumo wathu wo txhumayela hi fanete kutumelela Dipswi da Txizimu di tsanisa likholo lathu. Kufana ni Ezekhiyele hi fanete “kuveka hambiluni” totshe ti Jehovha a hi gelako. Nyamsi Jehovha a womba-womba ni nathu ngu kuthumisa Dipswi dakwe i ku Bhiblia. Se hi nga tsanisekisa kutxani to Dipswi da Txizimu da simama di gwesa mapimo, matipfelo ni simaho sathu?

16. Nji txani txi hi fanelako kumaha ngu Dipswi da Txizimu, ni ku hi nga di vekisa kutxani mbiluni kwathu?

¹⁶ Kufana ni ku hi dyako sakudya kasi ku hi kula, hi nga kula ngu didhawa da moya ngako hi txi simama hi gonda ni kualakanyisisa ngu  Dipswi da Txizimu. Ha yi tekela hamsungo gondo mayelano ni dibhuku do petwa ayi Jehovha a nga hi vekela yona. Jehovha a lava ti to “hi tata disusu dathu ngu dipswi dakwe,” i ku ti to hi fanete ku hi di pfisisa. Hi nga maha toneto ngu kumaha mkombelo, kugonda ni kualakanyisisa. Kukhata ha maha mkombelo kasi kululamisela timbilu tathu ti amukela Dipswi da Txizimu. Msana keto ha gonda Bhiblia. Ngu magwito ha ema hi alakanyisisa khakwati ngu ti hinga ti gonda. Ku na va yihi wuyelo? Mbimo yi hi alakanyisisako likholo lathu li na tsana.

17. Ngu kutxani i di ta lisima kualakanyisisa ngu ti hi ti gondako ka Bhiblia?

¹⁷ Ngu kutxani i di ta lisima kugonda ni kualakanyisisa ngu Dipswi da Txizimu? Kumaha eto ti na hi ninga mtamo wo txhumayela didungula da Mfumo ni ku ta huwelela didungula da wulamuli i si nga kale. I si nga eto basi, kualakanyisisa ngu tifanelo ta Jehovha ti na hi vhuna kutsanisa ni kukulisa wungana wathu ni nene. Kota wuyelo, hi na ti dila ngu kueneliseka ni kudikha moyani.—Mas. 119:103.

18. Ngu tihi ti vathu va no ta sinziseka ku ti tumela, ni ku ngu kutxani?

¹⁸ Athu kha hi nga vaprofeti kufana ni Ezekhiyele, kambe athu hi ti emisete kusimama hi txhumayela mahungu a Jehovha ma ku mu ka Bhiblia kala kuza e sunga ti to mthumo wathu wo txhumayela wu hokile magwito. Mbimo yi wu no hoka wulamuli vathu kha va na mbi va ni txivangelo txo womba ti to kha va amukela sialakanyiso sa Jehovha mwendo ku va txharihisa. (Eze. 3:19; 18:23) Kuhambana ni to, va na ta sinziseka kutumela ti to didungula di hi di txhumayelako di ta ngu ka Txizimu.

19. Nji txani txi no hi ninga mtamo wo hi hetisisa mthumo wathu wo txhumayela?

¹⁹ Nji txani txi no hi vhuna kusimama ka mthumo wathu? Ndimhaka tile ta tiraru ti nga vhuna Ezekhiyele i ku kusimama hi txhumayela nguko ha tiziva ti to hi rumilwe ngu Jehovha, ha ningwa mtamo ngu moya wo sawuleka ni ku ha ti dyisa ngu Dipswi da Txizimu. Ngu txivhuno txa Jehovha hi ti emisete kusimama ni mthumo wathu wo txhumayela ni kutsanisela “kala magwito.”—Mat. 24:13.