1. Hi ti zivisa kutxani to Jehovha a lava kuva hafuhi ni nathu?

 JEHOVHA wa hi ramba to hi tshuketa kwakwe. (Jak. 4:8) Ene a lava kuva Txizimu txathu, Tate ni Mngana wathu. Wa xamula mikombelo yathu ni ku wa hi vhuna ngako hi txi manana ni sikarato ni ku a thumisa sengeletano yakwe kasi ku hi vhikela. Kambe hi nga maha txani kasi kutshuketa ka Jehovha?

2. Hi nga tshuketisa kutxani ka Jehovha?

² Hi nga tshuketa ka Jehovha ngu kumaha mkombelo kwakwe ni kugonda Dipswi dakwe hi tshumela hi alakanyisisa ngu dona.Mbimo yi hi mahako toneto hi na mranda ngutu ni ku hi na m’xonipha. Hi tiemisete ku mu engisa ni ku mninga wudhumo awu wu fanelako ene basi. (Mtu. 4:11) Mbimo yi hi yako hi txi mziva kwati Jehovha hi na mthemba ni ku hi na themba sengeletano yi a nga hi ninga kasi ku yi hi vhuna.

3. Sathani a maha txani kasi ku hi hambanisa ni Jehovha, kambe njitxani txi no hi vhuna ku hi si thuki hi leka Jehovha ni sengeletano yakwe? (Masalmo 31:13, 14)

³ Kambe Sathani a zama ku hi hambanisa ni Jehovha, ngutu-ngutu mbimo yihi wonisanako ni sikarato. A mahisa kutxani toneto? Kudotho-kudotho a zama ku hi lekisa kuthemba Jehovha ni sengeletano yakwe. Kambe hi nga ti vhikela ka makungo akwe. Ngako themba ni likholo lathu ka Jehovha yi di tsani kha hi nambi leka Txizimu txathu ni sengeletano ya txona.—Lera Masalmo 31:13, 14.

4. Hi na bhula ngu txani ka gondo yiya?

⁴ Ka gondo yiya hi na wona sikarato siraru asi si nga tako ngu hahanze ka dibanza; tximwetxo ngu tximwetxo ka sona txi nga  moxa themba yathu ka Jehovha ni sengeletano yakwe. Sikarato soneso si nga hi hambanisisa kutxani ni Jehovha? Hi nga maha txani kasi kuxula makungo a Sathani?

5. Sikarato si nga moxisa kutxani themba yathu ka Jehovha ni sengeletano yakwe?

⁵ Mbimo yimwani hi nga wonisana ni sikarato so fana ni kukanetwa ngu maxaka mwendo kuluza mthumo. Sikarato soneso si nga moxisa kutxani themba yathu si hi hambanisa ni Jehovha ni sengeletano yakwe? Ngako i di kale hi txi wonisana ni sikarato hi nga tipfa hi di godhote ni ku hi sina themba. Sathani a londola mikhanjo yoneyo kasi ku hi maha hi kana-kana lirando la Jehovha ngu ngathu. Sathani a lava ku hi pimisa to hi xaniseka ngu mhaka ya Jehovha ni sengeletano yakwe. Ku humelete to fana ngu Vaisrayeli khe Egipta. Makhatoni va txi kholwa to Jehovha a ti vekile Mosi ni Aroni kasi ku va humisa wukhumbini. (Eks. 4:29-31) Kambe msana kova Faro a di nemetisile thumo wawe va sote Mosi ni Aroni ngu txikarato txile, va txi khona: “Mi hi mahete dibava masoni ka Faro ni masoni ka sithumi sakwe, mi vekile ditxhari manzani kwawe kasi va txi hi daya ngu dona.” (Eks. 5:19-21) Txo panda ngu ti to va ningile mnando malanda o thembeka a Txizimu. Ngako i di kale u txi wonisana ni sikarato u nga maha txani kasi ku themba yako ka Jehovha ni sengeletano yakwe yi simama yi di tsani?

6. Hi nga gonda txani ka nzila yi mprofeti Habhakuki a nga tsanisela ngu yona sikarato? (Habhakuki 3:17-19)

⁶ Gela Jehovha ta mbiluni kwako ngu mkombelo ni kuemela txivhuno txakwe. Mprofeti Habhakuki a wonisanile ni sikarato so tala. Mbimo yimwani ti txi woneka nga a txo kana-kana to Jehovha wa khatala ngu ngene. Se a gete Jehovha ta mbiluni kwakwe ngu mkombelo. A ti khene: “Ni na dila kala yihi mbimo MKOMA, na awe u si ni engisi kani? . . . Ngu kutxani u ni wonisako to biha kani?” (Hab. 1:2, 3) Jehovha a xamute mkombelo wule wo huma mbiluni wa dilanda dakwe do thembeka. (Hab. 2:2, 3) Msana ko alakanyisisa ngu mithumo ya Jehovha Habhakuki a tshumete eva ni litsako. Atxi tsaniseka to Jehovha a txi khatala ngu ngene ni ku a ndina mvhuna kuwonisana ni sikarato. (Lera Habhakuki 3:17-19.) Ngu yihi gondo kwathu? Mbimo yi u wonisanako ni sikarato maha mkombelo ka Jehovha u m’gela ati u ti pfisako tona. Msana keto emela txivhuno. Ngako u txi maha toneto tsaniseka to Jehovha a na ku ninga mtamo kasi ku u tsanisela. Se mbimo yi u no pfa txivhuno txakwe likholo lako li na kula.

7. Nji txani txi maxaka a Shirley ma nga txi womba mayelano ni likholo lakwe, kambe a vhunwi ngu txani ku a si luzi likholo lakwe ka Jehovha?

⁷ Simama ni txiemiso txa txinene txa timhaka ta moya. Wona ati ti nga humelela mwanthu Shirley a zumbako Nova Guine mbimo yi a nga txi wonisana ni sikarato. b Mwaya wa Shirley wu txi pwatela ni ku makhambi mamwani va txi pwata sakudya so enela. Mmweyo ka maxaka akwe a zamile kugoha themba yakwe ka Jehovha, a ti khene: “U khawe moya wa Txizimu wa ku vhuna, kambe txi hani txivhuno txa kona? Mwaya wathu wu nga di ni wusiwana. Wo luza mbimo yako ngu kutxhumayela.” Shirley a khene: “Ni ti wotisile tiya: ‘Ina Jehovha ngu ditshuri wa khatala ngu ngathu?’ Ngu txikuluveta ni mahile mkombelo ka Jehovha ni m’gela ati ni nga txi ti pfisa tona. Ni simamile ni gonda Bhiblia ni mabhuku athu ni ku mbimo yotshe ni txi txhumayela ni kupateka ka mitshangano.” Msana keto a woni to Jehovha a txi khatalela mwaya wakwe  nguku kha va khali kupwata sakudya ni ku va di tsakile. Shirley a womba tiya: “Ni ti pfite to Jehovha a txi xamula mikombelo yangu.” (1 Tim. 6:6-8) Ngako u txi simama ni txiemiso txa txinene txa timhaka ta moya khu na mbi tumelela sikarato mwendo kukana-kana ku kuhambanisa ni Jehovha.

8. Nji txani txi nga humelelako vanathu ava va ku ni wutixamuleli ka sengeletano ya Jehovha?

⁸ Valala vathu va haxa madungula kasi kuhangalasa makuhu ngu vanathu ava va ku ni wutixamuleli ka sengeletano ya Jehovha. (Mas. 31:13) Vanathu vamwani va betilwe jele ni kulumbetwa to sigevenga. Makristu o khata ma wonisanile ni txikarato txo fana mbimo yi mpostoli Paulo a nga lumbetwa e tshumela e betwa jele a singa ni mnando. Va angulisile kutxani?

9. Makristu mamwani ma angulisile kutxani mbimo yi Paulo a nga khotelwa?

⁹ Makristu mamwani o khata ma lekile kuninga txivhuno Paulo mbimo yi a nga di khotetwe Roma. (2 Tim. 1:8, 15) Ngu kutxani? Ina va txo pfa tingana aku vathu va nga txi wona Paulo i di txigevenga? (2 Tim. 2:8, 9) Mwendo va txo thava to ni vona va na xaniswa? Ti si nga ni mhaka ni ti va nga txi ti pimisa, alakanya nzila yi Paulo a nga tipfa ngu yona. Phela ti wonisanile ni sikarato sa singi ni ku a di vekile wutomi wakwe haphangoni ngu mhaka yawe. (Mith. 20:18-21; 2 Vak. 1:8) Hi nga faneni ni vale va nga landula Paulo mbimo yi a nga txi lava txivhuno. Hi fanete kukhumbula txani mbimo yi vanathu ava va ku ni wutixamuleli va xaniswako?

10. Hi fanete kukhumbula txani mbimo yi vanathu ava va ku ni wutixamuleli va xaniswako, ni ku ngu kutxani va txi xaniswa?

¹⁰ Khumbula to ngu kutxani hi txi xaniswa ni ku i mani a ku vangako. Dibhuku da 2 Timoti 3: 12 di khene: “Kha ditshuri, votshe va va lavako kuhanya ngu wukhongeli ngu ka Kristu Jesu, va na xaniswa.” Ngu toneto kha ha fanela kuxamala mbimo yi Sathani a xanisako vanathu ava va ku ni wutixamuleli. Txikongomelo  txakwe ngu va xanisa kasi ku ve leka kuthembeka ni ku hi dhukisa.—1 Pedro 5:8.

11. Hi nga gonda txani ka txikombiso txa Onesiforo? (2 Timoti 1:16-18)

¹¹ Simama u tsanisa vanathu ni kuthembeka kwawe. (Lera 2 Timoti 1:16-18.) Mkristu mwani wo khata a nga txi dhanwa ku Onesiforo a angute ngu nzila yo hambana mbimo yi Paulo a nga di jele. “Kha telwa ngu tingana ngu mhaka ya tingomondo [ta Paulo].” Kuhambana ni to, Onesiforo a vekile wutomi wakwe ha phangoni ngu kulavetela Paulo se mbimo yi a nga mmana a xote tinzila to mninga txivhuno. Ngu yihi gondo kwathu? Kha ha fanela kutumelela dizowa di hi tsivela kuvhuna vanathu ava va xaniswako. Kambe hi fanete ku va emela ni ku va vhuna. (Mav. 17:17) Vona va li lava lirando ni txivhuno txathu.

12. Hi gonda txani ka vanathu va Rússia?

¹² Wona nzila ayi vanathu va Rússia va vhunako ngu yona vanathu vamwani va nga khotelwa. Mbimo yi va xuxiswako vanathu vo tala va tsula matribhunali ku ya va tsanisa. Ngu yi hi gondo kwathu? Mbimo yi vanathu ava va ku ni wutixamuleli va lumbetwako mwendo va xaniswako kha ha fanela kuthava. Va pate ka mikombelo yako, khatalela timwaya tawe ni kuxola timwani tinzila to kombisa to wa khatala ngu vona.—Mith. 12:5; 2 Vak. 1:10, 11.

13. Kupoyilelwa ku nga onhisa kutxani themba yathu ka Jehovha ni sengeletano yakwe?

¹³ Maxaka athu aya i si ngako Tifakazi, vagondi mwendo vathumi kulothi va nga hi seka ngu mhaka ya kutxhumayela mwendo ngu ku hi hanyako ngu matshina a milayo o guleka a Jehovha. (1 Pedro 4:4) Vona va nga khona: “Ani na kudhunda kambe wukhozeli wako wa si tatela ni ku wu gondisa timhaka ati ti ku kule ngutu ni ditshuri.” Vamwani va nga hi kaneta ngako hi txi kombisa kuthembeka ka Jehovha mbimo yi m’thu a thaviswako dibanzani, va nga kona: “Awe khu nga ni lirando ngu vamwani.” Mapswi o nga yawa ma phaya kukana-kana ka mialakanyo yathu. Se hi nga khata kutiwotisa tiya: “Ina Jehovha a lava ni maha totshe tiya? Sengeletano yakwe kha yi ngo ti karatisela?” Ngako u txi wonisana ni txiemo txo nga txiya u nga maha txani kasi kusimana u di hafuhi ni Jehovha ni sengeletano yakwe?

14. Hi fanete ku angulisa kutxani mbimo yi vathu va hi tseketselako ngu mhaka ya ku hi hanyako ngu milayo ya Jehovha? (Masalmo 119:50-52)

¹⁴ Tiemisele kusimama u londisa milayo ya Jehovha. Jobe a txi londisa milayo ya Jehovha hambi ku a nga txi tseketselwa ngu kumaha toneto. Mmweyo wa va va nga txi ti maha vangana wa Jobe a zamile ku m’maha e pimisa to hambi a txo simama e londisa milayo ya Txizimu, txona txi si khatali. (Jobe 4:17, 18; 22:3) Kambe Jobe kha kholwa ka makuhu oneyo. A txi ti ziva to milayo ya Jehovha ya tatinene ni to biha yi lulamile ni ku a di tiemisete kunamarela ka yona. Kha tumelela vamwani ve m’luzisa themba. (Jobe 27:5, 6) Ngu yihi gondo kwathu? U nga tumelele vatseketseli ve ku maha u kana-kana milayo ya Jehovha; alakanyisisa ngu ti ti nga ku humelela. Ti nga maha makhambi o tala u di woni to wutomi wako wa tsakisa mbimo yi u mahako a ti Jehovha a ti lavako. Tiemisele kusimama u di ka sengeletano ni kulondisa milayo ya Jehovha. Se kha si ngaho sipoyilo si no ku hambanisa ni Jehovha.—Lera Masalmo 119:50-52.

15. Ngu kutxani Brizit a nga txi tseketselwa?

¹⁵ Wona ati ti nga humelela mwanathu wa txisikati wa Índia a dhanwako ku i Brizit. A txi poyilelwa ngu maxaka ngu mhaka ya likholo  lakwe. Msana ka kuva a di bhabhatisilwe ngu 1997, mwamna wakwe awu i si ngako Fakazi a luzile mthumo. Se mwamna wakwe a sungile to Brizit ni mahorana akwe va ti fanete ku ya zumba ni vaveleki vakwe ka didhoropa dimwani. Kambe Brizit a ndi na wonisana ni sikarato sa hombe. Aku mwamna wakwe a nga si thumi ti lavile to ene e thuma otshe masiku kasi kuxayisa mwaya. I singa eto basi, dibanza di txi zumba ka mnava wa 350 wa makilometro ni amu va nga txi zumba kona. Yo biha ngu ti to maxaka a mwamna wakwe ma txi m’wukela. Se ngu mhaka ya toneto ti lavile to Brizit ni mwaya wakwe ve rura kambe. Msana keto mwamna wakwe a luzile. Ku di pindile mbimonyana dihorana dakwe da 12 wa malembe ni dona di luzile ngu cancro. Kasi ku mu engetela sikarato, maxaka a Brizit ma mnigile mnando ngu mhaka ya txikarato txile, va wombile ti to i di ku a sa sawula kuva Fakazi ya Jehovha makhombo yale ma sa maheka. Hambi keto a simamile e themba Jehovha ni kuva hafuhi ni sengeletano yakwe.

16. Ngu yahi makatekwa aya Brizit a nga ma mana ngu kusimama a di hafuhi ka Jehovha ni sengeletano yakwe?

¹⁶ Aku Brizit a nga txi hanya kule ngutu ni dibanza, muwoneleli wa txigava a m’kuzetile kutxhumayela amu a nga txi zumba kona ni kutsimbitisa mitshangano mtini kwakwe. Makhatoni a ti pfite ti txi karata, kambe a londetile mkongomiso. A txi txhumayela mahungu a manene vamwani ni kutsimbitisa mitshangano mtini kwakwe ni ku a txi tiha mbimo yo maha wukhozeli wa mwaya ni mahorana akwe. Ku vite yihi wuyelo? Brizit a si koti kukhata kugonda Bhiblia ni vathu vo tala ni ku simwani sigondo sakwe si bhabhatisilwe. Se ngu 2005 a khatile kuthuma kota nyaphandule wa mbimo yotshe. Kuthemba kwakwe Jehovha ni sengeletano yakwe ti ve ni wuyelo ya yinene. Mahorana akwe ma thumela Jehovha ngu kuthembeka ni ku se ku ni mabanza mambidi ka wukhalo wonewo. Brizit wa tsaniseka to Jehovha a mnigile mtamo wo wonisana ni sikarato ni kutsanisela kutseketselwa ngu maxaka.

17. Hi fanete kutiemisela kumaha txani?

¹⁷ Sathani a lava hi pimisa to Jehovha wa hi leka mbimo yi hi mananako ni sikarato ni ku ngako hi txi simama hi txi seketela sengeletano ya Jehovha ti no hi tisela sikarato dwe. Sathani a lava to hi thava mbimo yi vanathu va va ku ni wutixamuleli va lumbetwako, va xaniswako mwendo kubetwa jele. Ngu kuthumisa vatseketseli ene a lava kumoxa themba yathu ka Jehovha ni sengeletano yakwe. Kambe athu ha ma ziva marindi akwe ni ku kha hi kanganyiswi. (2 Vak. 2:11) Tiemisele kuvayilela makuho a Sathani ni kusimama u di thembekile ka Jehovha ni sengeletano yakwe. Khumbula to Jehovha kha na mbi thuka e kutshotsha. (Mas. 28:7) Ngu toneto u nga tumeleli txilo txi ku hambanisa ni Jehovha.—Var. 8:35-39.

18. Hi na ta wona txani ka gondo ayi yi londiselako?

¹⁸ Ka gondo yiya hi woni sikarato asi hi nga si manako si txi ta ngu hahanze ka dibanza. Kambe kuthembeka kwathu ka Jehovha ni sengeletano yakwe ku nga dukwa ngu sikarato asi si tako ngu mndani ka dibanza. Hi nga si xulisa kutxani sikarato soneso? Hi na ta ti wona ka gondo ayi yi londiselako.