MLAYO wa Mosi wu ti tumelela vathu ti to ve maha sixambanyo so kari ngu kuwomba mapswi o fana ni awa: “Ni xambanya ngu Txizimu” mwendo “Ni xambanya ngu ditina da Jehovha.” Kambe ka mbimo ya Jesu sixambanyo se i ti mkhuwo ka Vajudha, va ti xambanya ka totshe ti va ti wombako. Vona va ti maha toneto kasiku vathu ve kholwa ti va wombako. Kambe, Jesu a lambisile tximaho txonetxo makhambi mambidi. A wombile tiya: “‘Inna’, a na ve i di ‘Inna’, ‘Ahim-him’ a na ve i di ‘Ahim-him.’”—Matewu 5:33-37; 23:16-22.

Ngu kuya ngu Theological Dictionary of the New Testament, Talmude yi hi vhuna kupfisisa nzila yi ti nga ti tolovelekile ngu yona ka Vajudha kumaha sixambanyo, mwendo kutsanisa ti to mapswi awe ditshuri. Dibhuku diya di txhamusela ti to ngu sihi sixambanyo asi i nga ti sa lisima ni si i nga ti singa sa txilo.

Jesu hi ngene ekha a nga wona mkhuwo wuwa wu di bihile. Ngu txikombiso, m’zivi wa matimu wa Mjudha Flavius Josephus a bhate tiya mayelano ni mtxawa wa wukhongeli awu wu nga ti ti ho ngu mbimo ya Jesu: Vakhongeli vonevo va ti kholwa ti to sixambanyo si bihile kupinda ni kuhemba. Vona va ti wona ti to ngako m’thu a txi xambanya ti to vathu ve kholwa ati a ti wombako, eyo m’thu a ni makuhu. Karingani yimwane ya Vajudha ya dibhuku da Wuzivi wa Sirach, mwendo ya Wutxhumayeli (23:11) yi womba to fana, yi khene: “Awu a zumbelako kuxambanya, a ti tatela makhombo.” Jesu a lambisile kumaha sixambanyo ka timhaka ati i singako ta lisima. Ngako hi txi wombawomba ditshuri, ti na mbi lava ku mbimo yotshe hi xambanya ati hi nga womba ti to ti kholwa ngu vathu.