TATE wa John a bhabhatisilwe ngu va 1950 eva mmweyo wa Tifakazi ta Jehovha ka txidhoropana txa Gujarat ditikoni ka Índia. Kambe John ni mame wakwe ni vamwane vanana va mtxhanu va ti khutalela Txhetxhe ya Katolika. Ngu toneto votshe va ti mu kaneta ngutu tate wawe ngu kuva i di Fakazi ya Jehovha.

Ditshiku dimwane tate wa John a mkombete ti to e heleketa dipapilo ka mwanathu wa dibanzani. Kambe ka yona mixo yile, John a ti ti wite litiho a txi zama kutula txikotela. Hambiku a nga ti ti dayisile a ti lava kutsula mu a nga rumwa, se a to teka txitarapu e sunga hale ka litiho e tsula e heleketa dipapilo.

Mbimo yi John a nga hoka a mani msikati wa mwanathu wule, se e mu ningeta dipapilo. Ene i ti Fakazi ya Jehovha. Wule wamsikati a ti woni ti to John a ti dayisile litiho, se a to mkhatalela. A to mu kuwula e gwita eya teka mirende yakwe e ta m’bhanditxha litiho. Ene a gwitile e mu bhikela txaya. Ka mbimo yotsheleleyo va ti bhula ngu timhaka ta Bhiblia va txi sekelela.

Ngu mhaka ya wunene awu John a nga wu wona, mawonelo akwe ngu Tifakazi ma to khata kutxitxa. Ene a to wotisa wule wamsikati siwotiso simbidi mayelano ni ti ti hambanisako Txhetxhe ya Katolika ni Tifakazi ta Jehovha. A lavile kuziva ti to ina Jesu i Txizimu kani, ni ku ina hi fanete hi maha mikombelo ka Mariya kani. Mabhulo ma tsimbite nguko mwanathu wule a ti txi ziva txiGujarati i ku lidimi la John. A mkombile tixamulo ngu ha ka Bhiblia se e mninga txibhukwana txi txi ku “Estas Boas Novas do Reino.”

Mbimo yi John a nga ya lera txibhukwana txile, a ti woni ti to i ti ditshuri. A khukhile e ya ka paderi e m’wotisa siwotiso asi a nga wotisa wule wamsikati. Eto ti to henyisa paderi ha koza e mu rinzeta Bhiblia, e mu bhongela a txi khene: “Se u Sathani! Ndiyeyo Bhiblia, ni kombe ha yi wombako ti to Jesu hi nga Txizimu. Ni kombe ha yi wombako ti to u nga mahe mikombelo ka Mariya. Ni kombe ka!” Eto ti mu henyisile ngutu John. A to gela paderi wule ti to kha na mbi ngadi e kanda kambe txhetxheni ka Katolika. Se kha nga za e tsula kambe!

Kukhukhela ka koneho, John a to khata kugonda Bhiblia ni Tifakazi, a amukete ditshuri ni ku a khatile kuthumela Jehovha. Ngu kutsimbila ka mbimo, vavangi mwayani kwawe va amukete ditshuri. Kupindile konamu ka 60 wa malembe John a di ngadi ni txibawa txa hale a nga khala kutiwila. Kambe, ngako John a txi wona txibawa txile txi mu khumbutisa tximaho tximwetxo txa wunene wa Wukristu a txi txi nga m’vhuna ti to e ziva Jehovha.—2 Vakorinto 6:4, 6.