1, 2. a) Ngu wuhi mthumo wu i nga ti wa lisima ngutu ka Jesu? b) Hi fanete hi maha txani ti to hi va vavhuneteli va vanene va Txizimu?

JESU i ti m’vati na a si se khata mthumo wo txhumayela. (Marku 6:3; Varoma 15:8) Ene a mahile mithumo yotshe kha kwati. Kota m’vati, a gondile kuthumisa kwati sithumiswa so vata ngu sona siya sa sinene. Se mbimo yi i nga ti mtxhumayeli, a thumisile wuzivi wo tshima wa Mibhalo ti to e vhuna vathu votshe kupfisisa ditshuri da Dipswi da Txizimu. (Matewu 7:28; Luka 24:32, 45) Mbimo yi a nga ti ni 30 wa malembe a lekile kuvata e khata muthumo wo txhumayela ngu a txi ti ziva ti to ngu wona i nga ti wa lisima ngutu awu a nga ndi no wumaha. A ti khene Txizimu txi ti mu rumile ti to e ta txhumayela mahungu a manene a Mfumo wa Txizimu. (Matewu 20:28; Luka 3:23; 4:43) Jesu a ti veka mapimo akwe ko txhumayela mahungu a manene ni ku a ti lava ti to vamwani ni vona ve maha toneto.​—Matewu 9:35-38.

² Wungi wathu kha hi nga va vati, kambe ha gondisa vamwani mahungu a manene. Mthumo wonewo mbwa lisima nguko hi thuma ni Jehovha. Phela Bhiblia yi khene “hi va vhuneteli va Txizimu.” (1 Vakorinto 3:9; 2 Vakorinto 6:4)  M’bhali wa Masalmo a wombile ditshuri a txi khene: “Mapswi ako ma tsaniswa ngu ditshuri.” (Masalmo 119:159, 160) Dipswi da Jehovha nditshuri. Ngu toneto hi lavako kutsaniseka ti to hi vathu va va “gondisako [ñolako, NM] dipswi da ditshuri ngu nzila yo lulama.” (Lera 2 Timoti 2:15.) Hi zama kusimama hi yi thumisa kwati Bhiblia, i ku txithumiswa txa lisima txo gondisa vamwani ngu Jehovha, Jesu, ni Mfumo. Sengeletano yi humisile sithumiswa sa sinene so hi vhuna kutxhumayela kwati, se ti lava hi si ziva kwati ku si thumisa. Sithumiswa soneso si mu ka Farameti yo Gondisa.

3. Ngu txihi txikongomelo txathu hi di thembweni? Mithumo 13:48 yi hi vhunisa kutxani ti to hi maha toneto?

³ Ti nga maha u xamala u txi khawe ngu kutxani hi txi khathu i Farameti yo Gondisa i si nga Farameti yo Txhumayela. Ngu ti to “kutxhumayela” ti womba kuhuwelela to kari, kambe “kugondisa” ti womba kutxhamusela to kari ti to m’thu e pfisisa ati a ti pfako se e gwita e tsakela kumaha ti a nga gonda. Mbimo yi tsute, magwito ma hafuhi, se hi di thembweni, txikongomelo txhathu ngu khata kutsimbitisa sigondo ni kugondisa vathu ditshuri ti to ve kota kuva vagondiswa va Kristu. Eto ti womba kuhisekela kuxota ava va ku ni “fanelo ya wutomi wo mbi guma” ni kuva vhuna ti to ve khata kuthumela Jehovha.​—Lera Mithumo 13:44-48.

4. Hi nga va manisa kutxani ava va ku ni “fanelo ya wutomi wo mbi guma”?

⁴ Hi nga va manisa kutxani ava va ku ni “fanelo ya wutomi wo mbi guma”? Kale ka vapostoli, va ndi no va mana ngu kutxhumayela dwe. Jesu a gete vagondiswa vakwe a txi khene: “Ni ka dihi didhoropa mwendo txidhoropana mi na kuwulela kona, lavani kuziva awu a fanelako.” (Matewu 10:11) Ni nyamsi ti lava hi maha toneto. Phela ngako vathu va si ti lavi, va txi tiguleta, mwendo va si na mhaka ni Txizimu, ti ha kubasani ti to va na mbi engisela mahungu a manene. Hi xota vathu va va tsakelako, vo tiveka hahatsi ni va va lavako kuziva ditshuri. Ati hi mahako hi nga ti fananisa ni ti Jesu ti nga ti lava e maha mbimo yi a nga ti vata. Na a si se vata txo kari, kufana ni ditimba, dikange mwendo tximwani, ku ti laveka e khata ngu kumana dipulangu da dinene. A di di mani, ngu kona a no yela farameti yakwe, e khata kukombisa mithumo yakwe. Ngu kufana, ni nyamsi ti lava hi khata hi mana m’thu wu a tsakelako, se ngu kona hi no thumisa sithumiswa ni wusikoti wathu ti to hi mu vhuna e va m’gondiswa.​—Matewu 28:19, 20.

5. Ngu tihi ati hi fanelako hi ti ziva ngu si si ku ka Farameti yo Gondisa? Womba txikombiso. (Wona mifota yi yi ku makhatoni.)

⁵ Ka farameti, txithumiswa tximwani ni tximwani txi ni mthumo wa txona. Ngu txikombiso, alakanya ngu si Jesu a nga ti si thumisa kota m’vati. * (Wona txhamuselo ya hahatshi.) Ku ti laveka e va ni so pima ngu sona, so bhala, so wila, so dola ni so bhanda ngu sona dipulangu, kumweko ni so khwaya ni kupatanisa mapulangu. Ngu kufana, ni ka Farameti yo Gondisa tximwani ni tximwani txi ni mthumo wa txona. Konkuwa he woneni ti to hi nga sithumisisa kutxani sithumiswa soneso sa lisima.

6, 7. a) U ma thumisisa kutxani makartawu ya site? b) Ngu kutxani hi txi thumisa txirambo txa mitshangano?

⁶ Makartawu a site. Txithumiswa txiya njidotho kambe txi thuma kwati kugela vathu ti to ve ya bela ka site yathu ya jw.org. Ka site yathu va nga gonda to tala ngu ngathu hambi kukombela gondo ya Bhiblia. Vathu vo pinda 400.000 se va kombete gondo ya Bhiblia ngu kuthumisa jw.org, ni ku ditshiku ni ditshiku vathu va mazana va kombela! Tolovela kuzumba ni makartawu mangayhana ti to u ma thumisa mbimo yi u bhulako ni vathu va u mananako navo.

⁷ Sirambo. Txirambo txa mitshangano yathu txi womba tiya: “Wa rambwa ti to u ta gonda Bhiblia ni Tifakazi ta Jehovha.” Txi gwita txi womba ti to u nga gonda “ka mitshangano yathu ya ha kubasani” “mwendo ngu wukongomisi wa m’thu apune.” Txirambo txi gela vathu to athu hi va mani ni kuramba ava i ku “sisiwana moyani,” ti to ve gonda Bhiblia ni nathu. (Matewu 5:3) Phela vathu va amukelwa ka mitshangano yathu ku si nga ni mhaka ni ti to va tumela kugondelwa mwendo ahim-him. Ngako va txi ta ka mitshangano yathu, va na ta wona nzila yi va nga gondako ngu yona Bhiblia.

8. Ngu kutxani ti di ni lisima kuramba m’thu mitshanganoni hambi i txo va ditshiku dimwedo? Womba txikombiso.

⁸ Ti ni lisima kusimama hi ramba vathu ti to ve ta xalela mitshangano yathu hambi i txo va ditshiku dimwedo. Ngu kutxani? Nguko ngako va txi ta, va na ti wona ti to Tifakazi ta Jehovha ti gondisa ditshuri da Bhiblia ni kuvhuna vathu to ve ziva Txizimu, kasi wukhongeli wa makuhu kha wu mahi toneto. (Isaya 65:13) Mpatwa wumwani wa Estados Unidos i ku Ray ni Linda va ku woni kuhambana koneko. Va ti kholwa ka Txizimu, ni ku va ti lava ku txi ziva kwati. Se va woni i di tshuku kuthanga ngu kubela ka totshe titxhetxhe ti nga ti dhoropani kwawe i di kona va no wona ti to ngu yihi yi va no bela ka yona. Kukhata, vona va ti lava kuwona ti to ina va ndi na gonda to kari, se ve gwita ve wona kambe ti to vathu va kona ina va ambala ngu nzila yi yi fanelako vathu va va thumelako Txizimu. Kugumile malembe va txi xota, nguku titxhetxhe i ti tingi. Kambe va thelekile dikhodho. Txiwalo va nga gonda, ava va nga ti va mana titxhetxheni mule va sa ambala ta wuthu. Msana ko huma ngu ka yi yo gwita, Linda a tsute mthumoni se Ray e ya mtini. Mbimo yi Ray a yako mtini, ka txitarato txi a nga tsimbila ngu txona a woni Nyumba ya Mfumo. Se a nje khene ‘na nga wona ti ti mahekako hale.’ Phela a ti ya tsaka ngutu! Votshe va va nga ti hale va ti ni wunene ni txingana ni ku va ti ambate ngu nzila ya yinene. Ray a ti zumbile ngu masoni futhi a tsakile ngu ti a nga gonda! Atiya ti hi khumbutisa ati ti wombwako ngu mpostoli Paulo mayelano ni m’thu wu khatako ku ta mitshanganoni: “Kha ditshuri Txizimu txiho hagari kwanu.” (1 Vakorinto 14:23-25) Msana keto, Ray a khatile kuya mitshanganoni Sonto yimwani ni yimwani. A gwitile e hamba e ya ni ka yotshe ya hagari ka divhiki. Linda nene a khatile kuya mitshanganoni, se hambiku votshe va nga  ti ni ma 70 wa malembe, va gondile Bhiblia ni kubhabhatiswa.

9, 10. a) Ngu kutxani siphehana si txi hehuka kukhata mabhulo? b) U nga txi thumisisa kutxani txiphephana txi txi ku khene Nji txani Mfumo wa Txizimu?

⁹ Siphephana. Ka farameti yathu ku ni 8 wa siphephana. Kha si karati ku si thumisa ni ku sa hehuka kukhata ngu sona mabhulo. Kukhukhela si khata kuhumiswa ngu 2013 se ku ganjilwe 5 wa tibhiliyoni! Sotshe si ni mazumbelo o fana. Se, u txi kota kuthumisa tximwetxo, sotshe u nga sikota! Awe u si thumisisa kutxani siphephana ti to u khata mabhulo ni m’thu?

¹⁰ Ti nga maha u txi lava kuthumisa txi txi ku khene Nji txani Mfumo wa Txizimu? Komba m’thu txiwotiso txile txi ku masoni u gwita u mu wotisa tiya: “Ina u khala ku ti wotisa ti to nji txani Mfumo wa Txizimu? U nga khawe i . . . ?” Gwita u mu komba tixamulo tile ta tiraru e sawula yimweyo. A txi xamula, u nga karateke ngu kuwomba ti to ngu tona mwendo hi nga tona, txi tule u mu komba ha ko ‘Bhiblia yi womba txani’ se u lera mibhalo yile yi nga kombiswa, i ku Dhaniyeli 2:44 ni Isaya 9:6. Mi txi gwita kubhula, mu wotisi txiwotiso txiya: “Alakanyisisa ngu tiya”: “Wu nava wu di ngu nzila yihi wutomi ku txi fuma mkoma wa Mfumo wa Txizimu?” txi ku msana ka txiphephana. U txi wuya kambe u nga ta mu xamula. U txi mu mana kambe, u nga thumisa gondo 7 ya dibroxura di di ku khene Ngu yahi mahungu a manene aya matako ngu ka Txizimu?, i ku tximwani txa txithumiswa txo khata ngu txona gondo ya Bhiblia.

11. Marevhista ma mahetwe txani? Ngu tihi ti hi fanelako ku tiziva ngu ona?

¹¹ Marevhista. Muwoneleli ni Khenjemuka! ngu ona marevhista aya ma manekako ngu tidimi to tala ha mafuni kotshe! Misungu ya timhaka yi yi manekako ka kapa, yi mahetwe kundinda vathu va makhalo otshe nguko ma lerwa ngu vathu va matiko o hambana. Hi nga thumisa marevhista onewo ti to hi vhuna vathu ku ve veka mapimo awe ka ti i ku ta lisima ngutu ka wutomi. Kambe kukhata, ti lava hi ziva ti to direvhista diya di mahetwe vathu vo zumbisa kutxani.

12. a) Khenjemuka! a mehetwe vathu vo zumbisa kutxani? Ngu txihi txikongomelo txakwe? b) Ngu tihi to tsakisa ti u nga manana nato u txi thumisa Khenjemuka!?

¹² Khenjemuka! a mahetwe vathu va va ko ziva ta tidotho mwendo va si ziviko txilo ngu Bhiblia. Ti nga maha va si zivi txilo ngu tigondo ta Wukristu, va si thembi wukhongeli, mwendo nem va si ti zivi ti to Bhiblia yi nga vavhuna kutshukwatisa wutomi wawe. Txikongomelo txa hombe txa Khenjemuka! ngu kholwisa wu a lerako ti to Txizimu txiho. (Varoma 1:20; Vahebheru 11:6) A tshumela e vhuna m’gondi ti to e kholwa ti to Bhiblia i “dipswi da Txizimu mpela.” (1 Vatesalonika 2:13) Marevhista a Khenjemuka! a 2018 ma ni misungu yiya: “Nzila yo mana litsako,” “12 segredos para uma família ser feliz” ni “Como lidar com a dor da morte.”

13. a) Muwoneleli wa vathu votshe a mahetwe vathu vo zumbisa kutxani? b) Ngu tihi to tsakisa ti u nga manana nato u txi thumisa Muwoneleli?

¹³ Txikongomelo txa hombe txa direvhista  da vathu votshe da Muwoneleli ngu txhamusela tigondo ta Bhiblia ka vathu va se va zivako ta tidotho ngu Txizimu ni Bhiblia. Ti nga maha va txi zivanyana to kari ngu Bhiblia, kambe va si pfisisi kwati tigondo ta yona. (Varoma 10:2; 1 Timoti 2:3, 4) Marevhista a Muwoneleli a vathu votshe a 2018 ma ti ni tixamulo ta siwotiso siya: “Será que a Bíblia ainda é útil?,” “É possível saber o futuro?” ni “Será que Deus se importa consigo?”

14. a) Mavhidhiyo athu ma mahetwe txani? b) Ngu tihi to tsakisa ati u nga manana nato u txi thumisa mavhidhiyo?

¹⁴ Mavhidhiyo. Ka mbimo ya Jesu, m’vati a ti ko va ni sithumiswa sa manza dwe. Kambe konkuwa ku ni si si thumako ngu gezi, so fana ni disaho, mboro ni so swilitela ngu sona mapulangu. Ngako hi txi txhumayela, hahanze ko thumisa mabhuku basi, hi ni mavhidhiyo o tshura aya hi kombako vathu. Ka farameti yathu hi ni mavhidhiyo ya ma ku: Ngu ku txani hi txi gonda diBhibhele?, Yi mahiswa ku txani gondo ya Bhiblia?, Kumahwa txani Nyumbani ya Mfumo? ni Quem São as Testemunhas de Jeová?. Mamwani ma thuma kwati ka dikhambi do khata, kasi mamwani hi nga ma thumisa ka diendo do wuyela. Otshe nzithumiswa sa lisima ngutu nguko ma kuzeta vathu kugonda Bhiblia ni kuta mitshanganoni.

15. Mavhidhiyo ma va gwesisa kutxani vathu va txi xalela ngu tidimi tawe? Womba sikombiso.

¹⁵ Ngu txikombiso, mwanathu mmwani wa txisikati a mani wamsikati awu a nga ti ta ngu Micronesia lidimi lakwe i ku Txiyapese. A mu kombile vhidhiyo yi yi ku Ngu ku txani hi txi gonda diBhibhele? gu Txiyapese. Mbimo yi vhidhiyo yi nga khata, wule wamsikati a ti khene: “Aliya lidimi langu. Ni ma womba-wombelo a kona nga m’ganga wathu. Kha ni kholwi! Ngu lona lidimi langu!” Msana keto, a ti khene a na ya lera ni kuxalela sotshe si si ku ka site yathu ngu lidimi lakwe. (Fananisa ni Mithumo 2:8, 11.) Tximwani txikombiso nja mwanathu mmwani wa txisikati wa Estados Unidos a wu tshanzana yakwe yi nga tizumba ka ditiko dimwani da kule ngutu. A mu rumete link ya vhidhiyo yona yile ngu lidimi lakwe. Ene a bete ka internet e xalela vhidhiyo e gwita e bhalela hahani wakwe e-mail a txi khene: “Ni tsakisilwe ngu hale ko khene ku ni mtamo wo biha awu wu tsimbitisako sikarato sa ditiko. Ni kombete gondo ya Bhiblia ka internet.” Eto ta tsakisa ngutu nguko ditiko di a ku ka dona mthumo wathu wa tsimbwa!

16. Womba ati dibroxura dimwedo ngu dimwedo di nga mahelwa tona: a) Engisa Txizimu u hanya ngu ha ku si nga ni magwito. b) Ngu yahi mahungu a manene aya matako ngu ka Txizimu? c) Mba mani ava va mahako kudhunda ka Jehovha nyamsi?

¹⁶ Mabroxura. Hi nga mu gondisisa kutxani m’thu wu a si si kotiko kwati kulera mwendo a si ngako ni txilo txo yelana ni Bhiblia ngu lindimi lakwe? Hi nga thumisa dibroxura di di ku khene Engisa Txizimu u hanya ngu ha ku si nga ni magwito. * (Wona txhamuselo ya hahatshi.) Txithumiswa txa txinene ngutu txo khata gondo  ya Bhiblia dibroxura di di ku khene Ngu yahi mahungu a manene aya ma tako ngu ka Txizimu? U nga mu komba 14 wa siwotiso asi si ku msana ka dibroxura se u gwita u wotisa to ngu txihi txi txi nga mu tsakisa ngutu. Se u nga gwita u khata kugonda nayo ngu hale a nga sawula. Ina se u duketile kumaha toneto u txi maha maendo o wuyela? Dibroxura da wuraru ka farameti yathu ngu di di ku khene Mba mani ava va mahako kudhunda ka Jehovha nyamsi? Dona di mahetwe kugondisa ava hi gondako navo mayelano ni sengeletano yathu. Ka Manual de Atividades Vida e Ministério Cristãos de março de 2017 u nga gonda mathumiselo a kona.

17. a) Ngu txihi txikongomelo txa mabhuku ale o gonda ngu ona? b) Mi na maha txani hambi loko txigondo txi di bhabhatisilwe? Ngu kutxani?

¹⁷ Mabhuku. Msana ko khata txigondo ngu dibroxura, ngu mbimo u nga txitxa mi ya ka dibhuku di di ku khene Bhiblia yi nga hi gondisa txani? Dona di nga vhuna vathu kugonda tigondo ta makhato ta Bhiblia. Ngako txigondo txi txi kula, mi di heta, mi nga simama mi gonda ngu di di ku khene Continue a Amar a Deus. Txithumiswa txiya txi na vhuna m’thu kuthumisa matshina a milayo ya Bhiblia ka wutomi wakwe ditshiku ni ditshiku. U nga divali, hambi a di bhabhatisilwe ti lava mi simama ni gondo mi heta otshe a mambidi. Eto ti na m’vhuna e va ni likholo lo tsana ka Jehovha ni kuzumba a di thembekile.​—Lera Vakolosa 2:6, 7.

18. a) Kota vagondisi va ditshuri, 1 Timoti 4:16 yi hi kuzeta kumaha txani? Ngu yihi wuyelo ya kona? b) Ngu txihi txikongomelo txo thumisa Farameti yo Gondisa?

¹⁸ Kota Tifakazi ta Jehovha, hi ni wutixamuleli wo gondisa vathu “dipswi da ditshuri, i ku Evhangeli” yi yi nga va ningako wutomi wo mbi guma. (Vakolosa 1:5; lera 1 Timoti 4:16.) Kasi ku hi vhuna kumaha toneto, hi ni Farameti yo Gondisa yi yi ku ni sithumiswa si hi si lavako. (Wona dibhokiso di di ku khene “ Farameti yo Gondisa.”) He si thumiseni nga ti hi si kotisako tona sithumiswa soneso. Mmwani ni mmwani a nga sawula ti to amu ka farameti ngu sihi a no si thumisa ni mbimo ya kona. U nga divali, txikongomelo txathu hi nga kuphakela mabhuku dwe, nem kha hi lavi ku ma ningela ka vathu va va si tsakeliko madungula athu. Txathu ngu maha vagondiswa vathu va va tsakelako, vo tiveka hahatshi, ni va ngu ditshuri va lavako kuziva Txizimu, i ku vathu va va ku ni “fanelo ya wutomi wo mbi guma.”​—Mithumo 13:48; Matewu 28:19, 20.