1, 2. a) Kutxitxa ka siemo hi sa tiemela ti nga hi gwesa ngu nzila yihi? (Wona mfota wu wu ku makhatoni.) b) Ngu kuya ngu Masalmo 131 nji txani txi no hi vhuna ku va ni kurula ka mialakanyo?

MSANA ko Lloyd ni Alexandra va di thumile Bhetele kupinda 25 wa malembe, va gwitile ve sawulwa kuva vanyaphandule. Makhatoni eto kha ta va renderisa. Lloyd a khene: “Ni ti tipfa nga ni ziwa ngu kuthuma Bhetele ni txiavelo txi ni nga ti natxo. Ka mapimo angu ni tsakile ngu txivangelo txa kutxitxa kuwa, kambe msana ka mavhiki ni mitximanyana, mbimo yotshe ni ti tipfa ni di tsukutwe.” Ngu mbimo yo kari Lloyd a ti va ni mawonelo a manene, se yimwani e va ni dikhodho.

² Hi txi ngadi hi txi hanya, ku na va ni mbimo yi ku no txitxa to kari ka wutomi wathu na hi sa tiemela, se eto ti nga hi dhukisa ni ku hi juja mapimo. (Mavingu 12:25) Ngako ku txi txitxa to kari se ti hi karatela ku ti tumela, nji txani txi no hi vhuna kurengisa moya wathu? (Lera Masalmo 131:1-3.)  Konkuwa he woni ti to malanda a Jehovha a kale ni a ngweno ma mahile txani ti to me va ni kurula ka mialakanyo hambi ma di humeletwe ngu thanga ngani ka wutomi wawe.

3. Ngu yihi thanga ngani yi yi nga mana Josefa?

³ He woni txikombiso txa Josefa. Ka votshe vanana va Jakobe, Josefa ngene i nga ti khoni-khoni. Ngu toneto, vakoma vakwe va ti m’bavela. Se mbimo yi a nga ti ni 17 wa malembe, va mu xavisile e va txithumi. (Genesisi 37:2-4, 23-28) A hetile 13 wa malembe a txi xaniseka ditikoni ka Egipta. Josefa se a ti kule ngutu ni tate wakwe wo m’dhunda. Se txiemo txakwe txi di mmahile e gumelwa ngu themba ni kuhenya, kambe kha maha toneto. Nji txani txi nga m’vhuna?

4. a) Nji txani txi nga vhuna Josefa mbimo a nga ti jele? b) Jehovha a yi xamulisile kutxani mikombelo ya Josefa?

⁴ Mbimo yi Josefa a nga ti xaniseka jele, ti nga maha a di vekile mapimo akwe ka nzila yi Jehovha a ndi no mu vhuna ngu yona. (Genesisi 39:21; Masalmo 105:17-19) Ti nga maha a di pimisile ngu miloro yakwe i di ngadi mwanana se e tsaniseka ti to Jehovha a ngadi ni nene. (Genesisi 37:5-11) Ti woneka a di mahile mkombelo e gela Jehovha totshe ati ti ku mbiluni kwakwe. (Masalmo 145:18) Se Jehovha a xamute mikombelo yakwe ni ku mu ninga themba ti to a ndi na va “ni nene” ka totshe.​—Mithumo 7:9, 10. * (Wona txhamuselo ya hahatshi.)

5. “Kurula ka Txizimu” ku nga hi vhunisa kutxani hi txi manana ni siemo so karata?

⁵ Mbimo yi hi mananako ni siemo so karata, “kurula ka Txizimu” aku kuvhikelako “mialakanyo” yathu ku nga hi vhuna ti to hi rengisa moya wathu. (Lera Vafilipiya 4:6, 7.) Mbimo yi hi vilelako ni kujujeka mapimo, “kurula ka Txizimu” ku nga hi tsanisa ti to hi simama hi thumela Jehovha hi si karali. Konkuwa he xolisiseni sikombiso sa ngweno sa vanathu va va nga manana ni siemo soneso.

6, 7. Mikombelo yathu yi nga hi vhunisa kutxani ti to hi tshumela hi va ni kudikha ka mialakanyo? Womba txikombiso.

⁶ Mbimo Ryan ni Juliette va nga pfa to txiavelo txawe txa wunyaphandule wo sawuleka txi gumile, va ve ni dikhodho. Ryan a khene: “Hi tshuketile ka Jehovha ngu mkombelo. Hi txi tiziva ti to hi ti ni lungelo yo sawuleka yo kombisa kuthemba kwathu Jehovha koneho. Vo tala dibanzani kwathu i di ngadi vaphya ditshurini, se hi kombete ka Jehovha ti to e hi vhuna hi va sikombiso sa sinene sa likholo.”

⁷ Jehovha a wu xamulisile kutxani mkombelo wawe? Ryan a khene: “Matipfelo o biha ni ku karateka ku hi nga ti nako kukhatani si nyamalati ngu txikuluveta. Se kurula ka Txizimu kuveketile timbilu tathu ni mialakanyo. Hi tumbute ti to hi ngo simama hi thumiswa ngu Jehovha ngako hi txi va ni mawonelo a manene.”

8-10. a) Ngako hi txi vilela, moya wa Txizimu wu nga hi vhunisa kutxani? b) Jehovha a nga hi vhunisa kutxani hi txi veka mapimo athu ka mthumo wakwe?

⁸ Moya wa Txizimu wu nga rengisa mbilu yathu, ni ku hi vhuna hi mana tindimana ta  mu ka Bhiblia ati ti nga hi mahako hi pfisisa ati ngu ditshuri i ku ta lisima ka wutomi. (Lera Johani 14:26, 27.) Alakanya ati ti nga humelela Philip ni Mary, i ku vatekani va va nga thuma Bhetele kuya kona mu ka 25 wa malembe. Kambe mndani ka mune wa mitxima, va fetwe ngu vamame ni dimwani dixaka dawe, ni ku ti lavile ve ya khatalela tate wa Mary wu a nga ti lwala ngu msungo.

⁹ Philip a khene: “Ni alakanya ti to ka timwani ti tsimbila kwati, kambe ku ni ti ti nga txi kelela. Ni ti ya humbana ni Vakolosa 1:11 ka gondo yo kari ya Muwoneleli. Kutsanisela ni ti tsanisela, kambe i si nga ngu nzila ya yinene. Phela ku ti laveka ni ‘tsanisela kwati ngu kutimisela ni litsako.’ Ndimana yile yi ni khumbutisile ti to litsako langu kha la seketelwa ka siemo sangu, kambe ka mtamo wu moya wa Txizimu wu ku nawo ka wutomi wangu.”

¹⁰ Aku Philip ni Mary va nga veka mapimo awe ka mthumo wa Jehovha, ene a va katekisile ngu tinzila to tala. Msana ko huma Bhetele, va ti ya mana sigondo asi si nga kula ngu didhawa da moya ni ku si ti lava kugonda ko tala ngu divhiki. Mary a khene: “Sigondo soneso i ti litsako lathu ni nzila yi Jehovha a nga ti hi gela ngu yona ti to wutomi wu tsimbila kwati.”

11, 12. a) Josefa a mahile txani atxi Jehovha a ndi no txi katekisa? b) Jehovha a mu katekisile ngu nzila yihi Josefa?

¹¹ Ngako hi txi manana ni thanga ngani, hi nga thuka hi vilela ngutu ha koza hi zumbela kualakanya ngu sikarato sathu dwe. Eto nga ti di humelete ka Josefa. Hahanze keto, ene a mahile ti a nga ti kota ka txiemo txakwe. Nga ti a nga ti thumisa tona ka Potifari, a si tifeleli mbimo yi muwoneleli wa jele a nga ti mu ninga mithumo yo kari.​—Genesisi 39:21-23.

¹² Ditshiku dimwani, Josefa a rumilwe kukhatalela sibotxhwa simbidi asi i nga ti tinduna ta Faro. Josefa a va ñote ngu nzila ya yinene, vavamna vonevo va txhatxhekile mbilu ka Josefa ha koza ve mu gela ni miloro yi yi nga ti va dhukisile. (Genesisi 40:5-8) Dibhulo donedo di zite di maha ti to Josefa e huma jele, kambe eto a si ti zivi. Msana ka malembe mambidi, a humisilwe jele eva mkoma wa Egipta. Phela wa hombe ka Josefa ngu wukoma i ti Faro dwe!​—Genesisi 41:1, 14-16, 39-41.

13. Ku si nga ni mhaka ni siemo sathu, hi nga maha txani ti to Jehovha e hi katekisa?

 ¹³ Kufana ni Josefa, nathu hi nga thuka hi ti mana hi si ti zivi to hi na maha txani. Kambe ngako hi txi timisela ni kumaha ti hi ti kotako, Jehovha a na hi katekisa. (Masalmo 37:5) Hambi hi txi tipfa hi txi karateka ni kujujeka mapimo, hi na mbi ‘rereka’ mwendo kugumelwa ngu themba. (2 Vakorinto 4:8) Jehovha a na va ni nathu, ngutu-ngutu hi txi veka mapimo athu ka mthumo wo txhumayela.

14-16. Filipi a mahisile kutxani ti to e zumba a di vekile mapimo akwe ka mthumo wo txhumayela hambi wutomi wakwe wu txi txitxa?

¹⁴ Txikombiso txa txinene txa m’thu wu a nga zumba a di vekile mapimo akwe ka mthumo wo txhumayela hambi siemo si txi txitxa, i Filipi wa mbimo ya vapostoli. Dikhambi dimwani a ti txhumayela Jerusalema. (Mithumo 6:1-6) Kambe txikwete txi gwitile txi dima ngu m’hini. Msana ka kudawa ka Sitefani, kukhatile kuxaniswa Makristu ngu toneto ona ma thavile Jerusalema. Aku Filipi a nga ti lava kuzumba a di bhisi ngu mthumo wa Jehovha, ene a yite dhoropani ka Samariya, aha vathu va kona va nga ti ni ditora da mahungu a manene.​—Matewu 10:5; Mithumo 8:1, 5.

¹⁵ Filipi a ti tiemisete kuya ova mu moya wa Txizimu wu mu rumako kona. Se Jehovha a mu thumisile ti to e txhumayela ka makhalo o nem va si khali kupfa mahungu a manene. Phela Vajudha vo tala va si va woni i di va txilo Vasamariya ni ku va ti va xanisa. Kambe Filipi a si na txisawu-sawu, ngu litsako a va txhumayete mahungu a manene. Se Vasamariya va engisete Filipi “ngu mbilu yimweyo”!​—Mithumo 8:6-8.

¹⁶ Msana keto, moya wa Txizimu wu kongomisile Filipi ti to e ya txhumayela madhoropani ka Azoto ni Khezareya, ku nga ti tate ngu Vamatiko. (Mithumo 8:39, 40) Msana keto wutomi wakwe wu tshumete wu txitxa. A akile m’ti e va ni mwaya. Kambe ku si nga ni mhaka ni nzila yi wutomi wakwe wu nga txitxa ngu yona, Filipi a ti zumba a di bhisi ngu mthumo wo txhumayela, ni ku Jehovha a simamile e mu katekisa kumweko ni mwaya wakwe.​—Mithumo 21:8, 9.

17, 18. Ngako ku txi humelela thanga ngani, kuveka mapimo athu ka mthumo wo txhumayela ti nga hi vhunisa kutxani?

 ¹⁷ Kutala ka va ku ka mthumo wa mbimo yotshe va womba ti to kuveka mapimo awe ka mthumo wo txhumayela ti va vhuna kuzumba va di tsakile ni kuva ni mawonelo a manene hambi siemo si txi txitxa. Ngu txikombiso, mbimo yi Osborne ni Polite va ditiko da Joni va nga huma Bhetele, va ti alakanya ti to va na mbi swela kumana mthumo wo ti hanyisa ni wukhalo wo zumba. Kambe Osborne a khene: “Dikhombo da kona, mthumo kha ha kuluveta hi wu mana nga ti hi nga ti pimisa tona.” Polite a khene: “Kugumile mitxima yiraru hi si mani mthumo, nem hi sa veka txilo. Etxo i ti txikarato.”

¹⁸ Nji txani txi nga vhuna Osborne ni Polite kha mhaka yiya? Osborne a khene: “Kutxhumayela kumweko ni dibanza ti ni vhuni kuva ni mialakanyo ya yinene.” Hahanze ko thuma kuzumba m’tini va txi alakanya ngu sikarato sawe, va ve bhisi ngu mthumo wo txhumayela. Eto ti va tisete litsako la hombe! Polite a khene: “Hi xotile mithumo kotshe, se hi zite hi wu mana.”

19-21. a) Nji txani txi no hi vhuna kuva ni kudikha ka mialakanyo? b) Hi nga wuyelwa ngu nzila yihi ngako hi txi manana ni thanga ngani?

¹⁹ Nga ha hi nga ti wona ngu kona, ngako hi txi maha ti hi ti kotako ka siemo sathu ni kuveka themba ka Jehovha dwe, hi na sikota kuva ni kudikha ka mialakanyo yathu ku si nga ni mhaka ni ti ti humeleko. (Lera Mika 7:7.) Ngu kutsimbila ka mbimo, hi na ti wona ti to nzila yi hi nga tsimbitisana ni kutxitxa ngu yona yi tsanisile wuxaka wathu ni Jehovha. Polite a khene kutxitxwa kwawe Bhetele ti mu gondisile ati ngu ditshuri ti wombako tona kuthemba Jehovha hambi wutomi wu txi woneka nga wa nemela.  A khene: “Wuxaka wangu ni nene wu tsanisilwe.”

²⁰ Mary wu a nga wombwa makhatoni, a ngadi a txi khatalela tate wakwe a txi thuma kota nyaphandule. A khene: “Ni gondile ti to ngako ni txi vilela, ti lava ni ema, ni khongela, ni gwita ni humula. Gondo ya hombe yi ni nga yi gonda ngu leka totshe manzani ka Jehovha, eto ti na laveka ngutu mbimo yi yi tako.”

²¹ Lloyd ni Alexandra va tumela ti to kutxitxa ku ku nga va ho ka wutomi wawe ku dukile likholo lawe ngu tinzila to nem va sa ti emela. Kambe va ti wona ti to ku va vhunisile kutxani. Konkuwa va ti ziva ti to likholo lawe litsani ti to li nga va thavelela ngako va di ni sikarato, ni ku va ti pfa va di tshukwatisile wutomi wawe.

22. Hi txi maha ati hi ti kotako ka siemo sathu, hi nga tsaniseka ngu txani?

²² Ka masiku awa, hi nga thuka hi manwa ngu thanga ngani. Hi nga thuka hi amukela txiavelo tximwani ka mthumo wa Jehovha, hi lwala, mwendo ti lava hi khatalela dixaka dathu di ni ku ni txikarato. Ka totshe, tsaniseka ti to Jehovha wa khatala ngu ngawe ni ku a na kuvhuna ngu mbimo ya kona. (Vahebheru 4:16; 1 Pedro 5:6, 7) Kasi konkuwa, awe zama ti u nga ti kotako. Khongela ka Tate wako Jehovha, u gonda ku m’themba ka totshe. Ngu nzila yoneyo, ku si nga ni mhaka ni kutxitxa ka siemo, mbimo yotshe u na va ni kudikha ka mialakanyo aku ku tako ngu ka Jehovha.