1. Jehovha a tipfisa kutxani mbimo yi a wonako malanda akwe?

 JEHOVHA wa ti wona totshe ati ti humelelako malanda akwe. Wa ti wona mbimo yi hi nga tsaka ni mbimo yi hi nga pandiseka. (Mas. 37:18) Ene wa tsaka mbimo yi hi mahako totshe ati hi nga tikotako kasi ku mthumela hambi hi di karatekile. Kuengetela ka toneto ene wa ti lava ku hi vhuna ni ku hi thavelela.

2. Ngu tihi ati Jehovha a ti mahako ngu vale va nga pandiseka mbiluni, ni ku hi nga maha txani kasiku hi wuyelwa ngu nzila yi Jehovha ahi khatalelako ngu yona?

² Dibhuku da Masalmo 147:3 di womba ti to Jehovha wa bhanditxha silonda sa vale va ku ni timbilu ati ti nga khuveka. Ka ndimana yiya, Jehovha a txhamuselwa kota m’thu awu a khatalelako ngu lirando m’thu mmwani awu a nga dawiswa ngu didhawa da matipfelo. Kambe ngu tihi ati hi fanelako kumaha ngaku hi txi lava kuwuyelwa ngu tinzila ati Jehovha a hi khatalelako ngu tona? Wona txikombiso txiya: Dhokodhela wo kari a nga tikota kuvhuna m’thu wo kari awu a nga dawiswa. Kambe kasiku txilonda txa wu a nga dawiswa txi hola, ene a fanete kumaha totshe ati dhokodhela a nga m’gela. Ka gondo yiya, hi na wona ati Jehovha a ti wombako ka Bhiblia atxi gela avale va xanisekako ngu didhawa da matipfelo ni kutshumela hi wona ti to hi nga si londisisa kutxani sialakanyiso sakwe sa lirando.

ATHU HI VA LISIMA KA JEHOVHA

3. Ngu kutxani vamwani va txi tipfa va si vhuni txilo?

³ Athu hi hanya ka mafu aya ma si ngaku ni lirando. Vathu kha va kombisani lirando. Va tshumela ve maha ti to vamwani ve tipfa va si vhuni txilo ni ku va ñola ngu nzila yo biha. Mwanathu mmwani wa txisikati dhanwako ku i Helen a a womba tiya: “Ani ni kute  ka mwaya awu wu nga si na lirando. Tate wangu i ti m’thu wa tshofu ngutu ni ku mbimo yotshe a txi zumbela ku ni gela ti to kha ni vhuni txilo.” Kufana ni Helen, ti nga maha nawe u di ñotwe ngu nzila yo biha, se u pimisa ti to kha ngaho a kudhundako. Ngaku eto ti di kuhumelete ti nga kukaratela kukholwa ti to ku ni m’thu awu a khatalako ngu ngawe.

4. Ngu kuya ngu Masalmo 34:18, ngu tihi ati Jehovha ahi tsanisekisako ka tona?

⁴ Hambi i di ti to u ñotwe ngu nzila yo biha ngu vamwani, tsaniseka ti to Jehovha wa kuranda ni ku wa ninga lisima ati awe u ku ngu tona. Ene “a hafuhi ka vale va ku kupandisekani ka mbilu.” (Lera Masalmo 34:18.) Ngaku awe u txi tipfa u di “pandisekile mbiluni” khumbula ti to Jehovha a woni timhaka tatinene mbiluni kwako ni ku ngene a nga kusawula kasi ku m’thumela. (Joh. 6:44) Mbimo yotshe Jehovha a tiemisete ku kuvhuna nguku awe u wa lisima ngutu kwakwe.

5. Hi nga gonda txani ngu kuwona nzila yi Jesu a nga txi ñola ngu yona vathu ava va nga txi ñolwa ngu nzila yo biha?

⁵ Hi nga gonda to tala mayelano ni matipfelo a Jehovha ngu kuxolisisa txikombiso txa Jesu. Mbimo yi a ngadi hamafuni, Jesu a txi khatala ngutu ngu vathu ava va nga txi vengelwa ni va va nga si kombiswi lirando ngu vathu vamwani. (Mat. 9:9-12) Ngu txikombiso, Jesu a tsanisile ni kundunduzela likholo la wamsikati awu a nga gwesa tshokani ka siyambalo sakwe a di ni themba ya ti to a na hanyiswa ka malwati o thisa aya a nga ti nawo. (Marku 5:25-34) Ni ku ha tiziva ti to Jesu a etetete ngu nzila yo hetiseka tifanelo ta Jehovha. (Joh. 14:9) Se tsaniseka ti to ka Jehovha awe u wa lisima ngutu, ni ku ene wa ti ninga lisima tifanelo tako tatinene, kupata likholo ni lirando ali u ku nalo ngu ngene.

6. U nga maha txani ngaku u txi tipfa u si nga wa txilo?

⁶ U nga maha txani ngaku u si kholwi ti to u wa lisima ka Jehovha? Lera tindimana ta Bhiblia ati ti kombisako nzila yi Jehovha a kuningako lisima ngu yona ni ku tihe mbimo yo alakanyisisa ngu  tona. b (Mas. 94:19) U nga ti fananisi ni vathu vamwani ni ku u nga veki mapimo ka timhaka ati u no mbi tikota kumaha. Jehovha kha emeli ti to u maha tatingi kupinda ati u tikotako kumaha, ene a lava hi maha ati hi tikotako kumaha. (Mas. 103:13, 14) Ngaku u di ñotwe ngu nzila yo biha ka mbimo ayi yi nga pinda,u nga ti ninge mnando ngu ti m’thu eneyo a nga kumahela. Ngu ditshuri awe u sa fanela kuñolwa ngu nzila yoneyo! Khumbula ti to ka Jehovha awe khu nga ni mnando, kambe mnando wu ni wule a nga kuñola ngu nzila yo biha. (1 Pedro 3:12) Sandra awu a nga ñolwa ngu nzila yo biha i di ngadi mwanana a womba tiya: “Mbimo yotshe ani ni maha mkombelo kasiku Jehovha e ni vhuna ni ti wona ngu nzila yi ene a ni wonako ngu yona.”

7. Siperiyensiya sathu hi nga si thumisisa kutxani ka mthumo wa Jehovha?

⁷ U nga thuki u kana-kana ti to Jehovha a nga kuthumisa ti to u vhuna vamwani. Jehovha a kuningile lungelo yo thuma kumweko nayo ka m’thu wo txhumayela. (1 Vak. 3:9) Sikarato asi si nga kuhumelela si nga kuvhuna kupfisisa nzila yi vathu ava va xanisekako va tipfako ngu yona. Ngu toneto awe u nga maha totshe ati u tikotako kasi ku va vhuna. Helen a amukete txivhuno, se konku, ene wa tikota kuvhuna vamwani. Ene a womba tiya: “Kale ni txi tipfa ni si nga wa txilo. Kambe Jehovha a ni vhuni ku ni tipfa ni di wa lisima, ni ku nyamsi wa ni thumisa kasi ku ni vhuna vamwani.” Helen a tsakile ni ku konku a thuma kota nyaphandule wa mbimo yotshe.

TUMELA TI TO JEHOVHA AKU DIVALETE

8. Ngu tihi ati Jehovha ahi gelako ka dibhuku da Isaya 1:18?

⁸ Malanda mamwani a Jehovha ma ngadi ma txi tipfa mnando ni kuvilela ngu mhaka ya tiphazamu, ati ma nga maha ma si si kubhabhatiswa hambi msana kova ma di bhabhatisilwe. Kambe nda tinene ku hi khumbula ti to Jehovha a hi ningile digandelo ta mterulo nguku ene wa hi randa ngutu. Ni ku a lava hi tumela ningo yoneyo ya lisima. Jehovha wa hi tsanisekisa ti to ngaku hi txi ‘wombawombisana’ c nayo ene a na hi divalela. (Lera Isaya 1:18.) Kuva Jehovha a txi divala sionho asi hi nga mmahela kale, ti kombisa ti to wa hi randa ngutu! Ni ku ngu mbimo yimweyo, ene a hi gela ti to yotshe mbimo a na khumbula timhaka tatinene ati hi ti mahako.—Mas. 103:9, 12; Vaheb. 6:10.

9. Ngu kutxani hi sa fanela kuveka mapimo ka tiphazamu tathu ta kale?

⁹ Ngaku u txi tipfa u di godhote ngu mhaka ya ti u nga maha kale, maha totshe a ti u nga tikotako kasi kuveka mapimo ako ka ti u ti mahako konku ni ti u no ta tikota kumaha ka mbimo ayi yi tako. Wona txikombiso txa mpostoli Paulo. Ene a di xanisile Makristu ngu nzila ya tshofu ni ku a txi ti sola ngu ti a nga ti mahile. Kambe, ene a txi tiziva ti to Jehovha a ti m’divalete. (1 Tim. 1:12-15) Ina Paulo a simamile e pimisa ngu tiphazamu ati a ngadi ti mahile kale? Ahim-him. Nem a si zumbeli kupimisa ngu ti a nga ti mahile mbimo yi i nga ti m’farisi awu a nga txi xoniphwa ngutu. (Vaf. 3:4-8, 13-15) Kambe Paulo a simamile e maha a ti a nga tikota ka mthumo wo txhumayela ni kuveka mapimo ka wumangwana wakwe. Kufana ni Paulo, nanathu hi nge sikoti kutxitxa ati hi nga maha kale. Kambe hi nga sikota kudhumisa Jehovha ngu ti hi ti mahako konku ni kuveka mapimo ka wumangwana ni ka sithembiso so tsakisa asi Jehovha a nga hi mahela.

10. Hi nga maha txani ngako hi di henyisile vamwani kale?

¹⁰ Ti nga maha u txi tipfa mnando ngu mhaka ya ti u nga maha kale ti nga gwesa mwendo kukhuvekisa vamwani. Nji txani txi nga kuvhunako? Maha totshe ati u nga tikotako kasi kululamisa  timhaka toneto, u womba ni kukombisa ti to wa ti sola ngu ti u nga maha. (2 Vak. 7:11) Hahanze keto, kombela Jehovha e vhuna vathu va va nga pandiseka ngu mhaka ya simaho sako. Jehovha ngu ditshuri a na kuvhuna kumweko ni vale u nga va khuvekisa kasiku mi simama mi timisela ni kuva ni kurula.

11. Hi nga gonda txani ka txikombiso txa mprofeti Jona? (Wona wa kapa.)

¹¹ Gonda txo kari ka tiphazamu tako ta kale, ni ku tumelela Jehovha e kuthumisa ngu nzila ayi ene a yi wonako i di ya yinene. Wona ati ti nga humelela mprofeti Jona. Jehovha ati m’kombete ti to eya Ninivha kambe ene a pfhukile eya wukhalo wumwani. Jona a kawukilwe ngu Jehovha ni ku ene a gondile txo kari ngu phazamu yakwe. (Jona 1:1-4, 15-17; 2:7-10) Jehovha kha leka kuthumisa Jona. Ene a mningile wumwani mkhanjo wo eya Ninivha ni ku ka dikhambi diya Jona a tumete. Ditshuri ti to Jona a ti sote ngu kuva a sa engisa ka dikhambi do khata, kambe eto kha ta m’tsivela ku e tumela txiavelo txa txiphya a txi a nga ningwa ngu Jehovha.—Jona 3:1-3.

JEHOVHA A THUMISA MOYA WO SAWULEKA KASIKU E HI THAVELELA

12. Hi nga kupfisa kutxani kurula ka Jehovha mbimo yi hi humelelwako ngu to biha? (Vafilipiya 4:6, 7)

¹² Jehovha wa hi thavelela ngu kuthumisa moya wakwe wo sawuleka mbimo yi hi humelelwako ngu to biha mwendo ngaku hi txi felwa ngu wu hi mdhundako. Wona ati ti nga humelela Ron ni Carol. Mwanana wawe wa mfana a ti sungile. Vona va womba tiya: “Se hi ti wonisanile ni sikarato sa hombe kale, kambe atxiya txi txi pinda sotshe. Hi hetile masiku amangi hi si oteli ni wusiku hi txi maha mkombelo ka Jehovha. Ni ku ngu ditshuri hi tikoti kupfa kurula a ku dibhuku da Vafilipiya 4:6, 7 di ku wombako.” (Lera.) Ngaku u di pandisekile ngu mhaka ya to kari to biha ati ti nga kuhumelela gela Jehovha ngu mkombelo nzila yi u tipfako ngu yona. Maha toneto yotshe mbimo yi u tipfako u di pandisekile. (Mas. 86:3; 88:1) Mbimo yotshe kombela moya wo sawuleka wa Jehovha. Tsaniseka ti to Jehovha a na kumahela ati u m’kombelako tona.—Luka 11:9-13.

13. Moya wo sawuleka wu nga hi vhunisa kutxani ti to hi simama hi thumela Jehovha? (Vaefesu 3:16)

¹³ Ina awe u tipfa u si nga ni mtamo wo maha to engeteleka ngu mhaka ya txiemo txo karata atxi u wonisanako natxo? Ti di ngeto, moya wo sawuleka wu nga kuninga mtamo wo u simama u thumela Jehovha u di thembekile. (Lera Vaefesu 3:16.) Wona ati ti nga humelela mwanathu wa txisikati awu a dhanwako ku i Flora. Ene ni mwamna wakwe va txi thuma kota varumiwa mbimo yi mwamna wakwe a nga maha wugango se ve dhivhorsiyara. Flora a womba tiya: “Ani ni pandisekile ngutu ngu mhaka ya ku mwamna wangu a nga maha wugango ni ku ni si tikoti kupimisa timwani hahanze ka ti mwamna wangu a nga ti mahile. Ani ni ti maha mkombelo ka Jehovha ni txi kombela moya wo sawuleka kasiku wu ni vhuna kuwonisana ni txiemo txiya. Jehovha a ni thavelete ni ku ni ve ni mtamo wo timisela ngu mhaka ya txivhuno txakwe hambiku makhatoni ti nga txi woneka ti si koteki.” Flora a tipfite ti to Jehovha a mvhuni ku eya masoni e m’themba ni ku a tsanisekile ka ti to Jehovha a ndi na simama e m’vhuna ka txikarato tximwani ni tximwani. Flora a tshumela e womba tiya: “Mapswi ya ma ku mu ka dibhuku da Masalmo 119:32 ma txhamusela kwati nzila yi Jehovha a nga ni vhuna ngu yona: ‘Ni na khutalela kuvekisa sirumo sako, nguko atiya ti na ni ninga wuzivi wa hombe.’”

14. Hi nga maha txani kasi ku hi amukela moya wo sawuleka wa Txizimu?

¹⁴ Msana ko kombela moya wo sawuleka wa Jehovha, nji txani atxi u nga txi mahako? Zama kumaha totshe ati ti no kuvhuna kuamukela moya wo sawuleka, to fana ni kuxalela mitshangano ni kupateka ka mthumo wo txhumayela. Lera Bhiblia ditshiku ni ditshiku eto ti na kuvhuna kuva ni mapimiselo a Jehovha. (Vaf. 4:8, 9)  Mbimo yi u lerako Bhiblia veka mapimu ka vathu ava Bhiblia yi wombako ti to va wonisanile ni sikarato u zama kuwona nzila yi Jehovha a nga va vhuna ngu yona kutsanisela. Sandra awu a nga xaniseka ngutu ngu mhaka ya sikarato asi a nga tshangana naso ka wutomi wakwe a womba tiya: “Mapimu a Josefa ma gwesa ngutu mbilu yangu. Ene a wonisanile ni sikarato sasingi ni ku a ñotwe ngu nzila yo biha kambe kha tumelela ti to sikarato soneso si holisa wungana wakwe ni Jehovha.”—Gen. 39:21-23.

JEHOVHA A THUMISA VANATHU KASIKU HI THAVELELA

15. Mba mani va nga hi thavelelako ni ku va nga hi vhunisa kutxani? (Wona ni mfota.)

¹⁵ Mbimo yi hi xanisekako vanathu va nga hi “thavelela.” (Vakl. 4:11) Jehovha a thumisa vanathu kasi ku hi komba lirando. Vona va hi thavelela mbimo yi va hi engiselako kwati ni kuzama kupfisisa ati hi tipfako. Va nga hi komba ndimana yo kari ya mu ka Bhiblia mwendo kumaha mkombelo ni nathu. Hambi va si wombi txilo kuva va di hafuhi ni nathu ti nga hi thavelela. d (Var. 15:4) Mbimo yimwani vanathu va nga hi vhuna khumbula ati Jehovha a ti pimisako mayelano ni txikarato txathu, ngu nzila yoneyo hi na tipfa hi di thuthile ni ku hi na sikota kutsanisela. Mwendo mbimo yimwani hi di pandisekile vanathu va nga hi tisela txo kari atxi hi txi dhundako se hi tsaka.

16. Hi nga maha txani kasi ku vamwani ve hi vhuna?

¹⁶ Kasi ku vamwani ve hi vhuna va fanete ku ti  ziva ati hi ti lavako. Vanathu va hi dhunda ngutu ni ku va ti lava ku hi vhuna. (Mav. 17:17) Kambe, ti nga maha vanathu va si tizivi ati hi tipfisako tona ni ti hi ti lavako. (Mav. 14:10) Zama kugela matipfelo ako mngana wako awu i ku mkristu wo vitwa. Mgela a ti a nga ti mahako kasi ku e kuvhuna. U nga sawula didhota dimwedo mwendo mambidi aya u tipfako u di txhatxhekile kubhula nawo u ma gela ati u ti pfisako tona. Vanathu va txisikati ti nga maha ve tipfa va di txhatxhekile kuya bhula ni mmwani mwanathu wa txisikati awu a nga vitwa ngu didhawa da moya.

17. Nji txani atxi txi nga hi tsulupetelako kuamukela txivhuno txa vanathu, ni ku hi nga ti xulisa kutxani toneto?

¹⁷ Ngu mhaka ya kukarateka ngutu ti nga maha u si ti lavi kuva hafuhi ni vathu vamwani. Ditshuri ti to mbimo yimwani vanathu kha va nambi hi pfisisa mwendo ku va nga womba ati ti nga engetelako kupandiseka kwathu. Hambiketo, u nga zumbi mbimo yo lapha u di wekha. (Jak. 3:2) Jehovha a nga thumisa vanathu kasiku ve kutsanisa, ngu toneto u nga tumelele ti to sikarato asi u wonisanako naso si kuvhalela kuamukela txivhuno atxi u txi lavako. Didhota adi di dhanwako ku i Gavin adi di ku ni malwati a dhepresawu di womba tiya: “Mbimo yo tala kha ni ti lavi kuwombawomba mwendo kuva ni vangana vangu.” Hambiketo, Gavin a simama e maha mizamo yo eva kumweko ni vangana vakwe ni ku ka makhambi o tala a tipfa a di tsakile a txi maha toneto. Mwanathu wa txisikati awu a dhanwako ku i Amy a womba tiya: “Ngu mhaka ya ti ti nga ni mahekela kale, ta ni karatela kuthemba vathu. Kambe na gondela kudhunda ni kuthemba vanathu kufana ni Jehovha. Na tiziva ti to eto ta mtsakisa Jehovha ni ku nani na tsaka.”

SITHEMBISO SA JEHOVHA SA MBIMO AYI YI TAKO SA HI THAVELELA

18. Ngu tihi ati hi ti emelako ka mbimo ayi yi tako, ni ku hi nga maha txani konku?

¹⁸ I singa kale, Jehovha a na thavisa sotshe asi si hi mahako hi karateka ni kupfa kupanda. (Mtu. 21:3, 4) Di txi hoka ditshiku diya, sotshe asi si hi mahako hi pfa kupanda “kha si na mbi khumbulwa.” (Isaya 65:17) Nga ha hi nga ti wona ngu kona ka gondo yiya Jehovha ‘wa bhanditxha silonda sathu.’ Ngu toneto, londola totshe ati Jehovha a kumahelako kasi ku kuthavelela ni ku kuvhuna. U nga thuki u kana-kana ti to Jehovha ‘wa kukhatalela.’—1 Pedro 5:7.