1. Ngu tihi tiningo ati Jesu a nga hi ninga?

 KHA ngaho m’thu mmwani a nga kombisa wuha kupinda Jesu. Mbimo yi a nga ti hamafuni ene a mahile sidiwukiso sasingi kasi kuvhuna vamwani. (Luka 9:12-17) Niku ene a hi ningile ningo ya lisima ngutu ayi yo kha ngaho mmwani awu adi no hi ninga, i ku wutomi wakwe. (Joh. 15:13) Msana ka ku adi wusilwe Jesu a simamile e kombisa wuha. Ene adi wombile ti to adi na kombela Jehovha ku e rumela moya wakwe wo sawuleka kasiku wu hi gondisa ni ku hi thavelela. Niku ene a mahile toneto. (Joh. 14:16, 17; 16:13) Ngu kuthumisa mitshangano Jesu wa simama e hi ninga treinamentu kasiku hi sikota kumaha vagondiswa hamafuni kotshe.—Mat. 28:18-20.

2. Mba mani “vavamna va i ku tiningo” va nga wombwa ka Vaefesu 4:7, 8?

² Wona ningo yimwani ayi Jesu a nga hi ninga. Mpostoli Paulo a bhate ti to msana ka kuva Jesu adi tsute nzumani ene “a ningete vavamna va i ku tiningo.” (Lera Vaefesu 4:7, 8, NM.) Paulo a txhamusete ti to Jesu a ningete tiningo toneto kasi kuvhuna dibanza ngu tinzila tatingi. (Vaef. 1:22, 23; 4:11-13) Nyamsi “vavamna va i ku tiningo” kuwombwa malanda a wuthumeli, madhota ni vawoneleli va sigava. a Ditshuri ti to vavamna vonevo kha va hetiseka niku va maha tiphazamu. (Jak. 3:2) Kambe mkoma wathu Jesu Kristu a thumisa vanathu vonevo kasiku ve hi vhuna. Vona tiningo takwe kwathu.

3. I ngu nzila muni mmweyo ni mmweyo wathu a nga seketelako “vavamna va i ku tiningo”?

³ Jesu a ningile “vavamna va i ku tiningo” mthumo wo ve aka niku tsanisa dibanza. (Vaef. 4:12) Kambe mmweyo ni mmweyo wathu a nga maha txienge txakwe kasi kuvhuna vanathu vonevo ku  ve hetisisa wutixamuleli wu va ku nawo. Kasiku u ti pfisisa kwati alakanyisisa ngu tiya: vamwani kwathu ha pateka ngu ku kongoma ka ku aka Nyumba ya Mfumo. Vamwani va seketela ngu kumaha mithumo yimwani yo fana ni kubhika mndiwo, kupakela vathumi ni si si no thumiswa. Ngu ha kufanako, ngu mapswi ni simaho sathu hotshethu hi nga seketela ati malanda a wuthumeli, madhota ni vawoneleli va sigava va ti mahako. Hi na wona to i ngu nzila muni mthumo wawe wu hi vhunako ni ti hi nga kombisisako ngu tona ku va bonga ni kutshumela hi bonga Jesu i ku ene a nga hi ninga “vavamna va i ku tiningo.”

MALANDA A WUTHUMELI MA VHUNETELA

4. Ngu yihi yimwani ya mithumo yi malanda a wuthumeli ma nga txi yi maha ka timbimo ta Makristu o khata?

⁴ Ka mbimo ya vapostoli vanathu vamwani va txi avelwa kuthuma kota malanda a wuthumeli. (1 Tim. 3:8) Ti woneka nga Paulo a txi wombawomba ngu malanda a wuthumeli ka 1 Vakorinto 12:28 mbimo yi a nga womba-womba ngu va vo ‘vhuna vamwani.’ Ti ti komba nga malanda a wuthumeli ma txi khatalela siavelo sawe sa lisima kasiku madhota me kota kuveka mapimu ko tsanisa vanathu ni kutxhumayela. Ngu txikombiso, ti nga maha malanda a wuthumeli ma txi thumiswa kasi kubhala makopiya ya mibhalo ya mu ka Bhiblia mwendo ko xava materiyali aya ma nga txi laveka kasi kumaha makopiya oneyo.

5. Ngu yihi yimwani ya mithumo yi malanda a wuthumeli ma yi mahako?

⁵ Pimisa ngu mithumo yo kari ayi malanda a wuthumeli ma yi mahako ka dibanza dako. (1 Pedro 4:10) Ti nga maha me khatalela tikonta, materitoriyo ya dibanza, me kombela mabhuku ni ku ma phakela ka vanathu. Vamwani mitshanganoni va thuma kota maxungameti mwendo kuvhuneta ko xayisa Nyumba ya Mfumo. Yotshe mithumo yiya ya laveka kasiku dibanza di thuma ngu nzila ya organizadhu. (1 Vak. 14:40) Hahanze keto mamwani malanda a wuthumeli ma maha sienge ka mtshangano wa mahanyelo a wukristu ni ku ma veka madhixkursu ya hakubasani. Dilanda da wuthumeli di nga avelwa kuvhunetela muwoneleli wa mtxawa wa mthumo wa thembwe. Mbimo yimwani malanda a wuthumeli ma rambwa ngu madhota kasiku ve maha kumweko maendo a wudyisi.

6. Ngu kutxani hi di fanete kuninga lisima ati malanda a wuthumeli ma ti mahako?

⁶ Wona ti vamwani va ti wombako mayelano ni txivhuno txi malanda a wuthumeli ma txi ningelako dibanzani. Beberly, b mwanathu wa txisikati wa Bolívia a womba tiya: “Ani na vhuneka ngutu mitshanganoni ngu kona ha ka txivhuno txa malanda a wuthumeli. Ngu kona ha ka ti va ti mahako ani na sikota kuembelela, kuningela tixamulo, kuengisela madhixkursu ni ku gonda ka mavhidhiyo ni ka mifota ayi yi kombiswako mbimo yi mitshangano yi tsimbilako. Vona va vhikela Nyumba ya Mfumo ni kutshumela ve vhuna ava va xalelako mitshangano ngu kuthumisa telefone. Ku txi gwita mitshangano vona va tiemisela ko basisa Nyumba ya Mfumo, kuvhuneta ka tikonta ni kutshumela ve hi ninga mabhuku aya hi ma lavako. Ni fanete ku va bonga ngutu ngu ti va ti mahako.” Khe Colombia, Lesile msikati wa didhota dimwani a wombile tiya: “Mwamna wa mina a vhunwa ngutu ngu malanda a wuthumeli. i si ngeto adi na zumba a di ñolekile. Se na bonga ngu kutiemisela kwawe ko vhuneta.” Ti nga maha nawe u txi tipfisa toneto ngu malanda a wuthumeli a dibanzani kwako.—1 Tim. 3:13.

7. Hi nga kombisa kubonga ngu nzila muni ka malanda a wuthumeli? (Wona ni mfota.)

⁷ Kambe kha ta enela ku hi tipfa hi txi bonga ngu ti malanda a wuthumeli ma ti mahako. Bhiblia yi tshumela yi hi kuzeta yi txi: “Kombisani kubonga.” (Vakl. 3:15) Krzysztof didhota da khe Finlândia di txhamusela nzila yi di kombisako ngu yona kubonga: “Na bhala dipasi mwendo ni rumela mensaji yi ku ni ndimana ya Bhiblia ni kuwombawomba ngu nzila yo kongoma ni dilanda  da wuthumeli ni txi digela nzila yi di nga ni tsanisa ngu yona mwendo nzila yi ni ningako ngu yona lisima ati di ti mahako.” Pascal ni Jael va zumbako Nova Caledónia va tolovela kumahela mkombelo malanda a wuthumeli. Pascal a womba tiya: “Masikwana yawa ha mahela ngutu mkombelo malanda a wuthumeli hi bonga Jehovha ngu mthumo wawe ni ku mkombela to e va navo ni kutshumela e va vhuna.” Ti hakubasani ti to Jehovha wa engisa ni kuxamula mikombelo yoneyo, se ngu nzila yoneyo dotshe dibanza da wuyelwa.”—2 Vak. 1:11.

MADHOTA “MA THUMA NGU KUHISEKA”

8. Ngu kutxani Paulo a di bhate ti to madhota ‘ma txi thuma ngu kuhiseka’? (1 Vatesalonika 5:12, 13)

⁸ Ngu mbimo ya Mkristu o khata madhota ma txi thuma ngu kuhiseka kasiku me vhuna dibanza. (Lera 1 Vatesalonika 5:12, 13, NM; 1 Tim. 5:17) Ona ‘ma txi tsimbitisa’ dibanza i ku ti to ma txilulamisela mitshangano niku kumweko ni mamwani madhota va txi maha sisungo. Vona va ti tshumela va txi ‘ningela silayo’ ka vanathu ngu nzila yo kongoma, kambe ngu lirando ngu txikongomelo txo vhikela dibanza. (1 Vat. 2:11, 12; 2 Tim. 4:2) Hahanze keto vavamna vonevo ti txi lava ve thuma kasiku ve xayisa timwaya tawe, ve xayisa likholo lawe, ni kuxayisa wuxaka wawe ni Jehovha kasiku si zumba si di tsani.—1 Tim. 3:2, 4; Tit. 1:6-9.

9. Ngu tihi timhaka timwani ati madhota ma ti mahako?

⁹ Madhota ni ona nyamsi wa ditshiku ma zumba ma di ñolekile ngutu. Vona va txhumayeli va evhangeli. (2 Tim. 4:5) Madhota ma hi ninga txikombiso txa txinene ngu kupateka ngu kuhiseka ka mthumo wo txhumayela. Vona va tshumela ve lulamisela mthumo wo txhumayela ka teritoriyo ya dibanza ni ku hi trenara kasiku hi va vagondiswa ni ku va vatxhumayeli va vanene. Madhota ma tshumela me thuma kota valamuli ava va ku ni wululami ni wumbilu. Ngaku m’thu a txi maha txionho txa hombe madhota ma ti karatela ku m’vhuna kasiku e wuseta wungana wakwe ni Jehovha. Ngu mbimo yoneyo ya yimweyo va maha totshe ti va nga ti kotako kasiku dibanza di simama di di basile. (1 Vak. 5:12, 13; Vag. 6:1) Txitimwi ka totshe tiya madhota ma ziwa kota vadyisi. (1 Pedro 5:1-3) Vona va lulamisela kwati madhixkursu awe aya ma seketelwako mu ka Bhiblia. Va tshumela ve maha mizamo kasi kuvhuna votshe vathu dibanzani ni ku va maha maendo a wudyisi. Mamwani madhota ma vhuneta ko aka, ko wuseta Tinyumba ta Mfumo, ko lulamisela makongresu ni masembleya, ka Makomisawu o womba-womba ni sibhejela, ka Mitxawa yo pfuxela valwati ni ka siavelo simwani. Kuwomba ditshuri madhota ma thuma ngutu.

10. Ngu kutxani hi di fanete kuninga lisima ati madhota ma ti mahako?

¹⁰ Jehovha a thembisile tivunta takwe ku tininga vadyisi ava va di no ti xayisa kwati, ngu nzila yoneyo ‘kha ti nambi ngadi ti thava hambi kudhudhumela.’ (Jer. 23:4) Khe Finlândia mwanathu wa txisikati awu a dhanwako to i Johanna a woni ditshuri da mapswi oneyo mbimo yi mame wakwe a nga wonisana ni malwati a hombe ngutu. Ene a womba tiya: “Ani ta ni karatela ngutu kuwombawomba ngu matipfelo a mina ka vathu vamwani, kambe didhota do kari adi ni nga sa tolovelana ngutu nado di ni engisete ngu pasiyensiya, di maha mkombelo kumweko ni nani di ni komba nzila yi Jehovha ani dhundako ngu yona. Ani kha ni ti khumbuli kwati ti a nga ti womba kambe ati ni ti khumbulako ngu ti to ni pfite kurula ka hombe. Na tsaniseka ti to Jehovha a mrumile kasiku ta ni vhuna yona yile mbimo ni nga ti ni txilaveko.” I ngu nzila muni madhota a dibanzani kwako ma nga kuvhuna ngu yona?

11. I ngu nzila muni hi nga kombisako kubonga kwathu madhota? (Wona ni mfota.)

¹¹ Jehovha wa tsaka mbimo yi hi kombisako kubonga ngu mbilu ngu madhota “ngu mhaka ya mthumo wawe.” (1 Vat. 5:12, 13) Henrietta, wu nene a zumbako Finlândia, a womba tiya: “Madhota ma zumba yotshe mbimo ma di tiemisete ku hi vhuna, kambe eto kha ti lavi kuwomba to  vona vo salelwa ngu mbimo, mtamo mwendo kha va nga ni sikarato. Yimwani mbimo ani ni tshuketela didhota ni di gela tiya: ‘Wa ti ziva, awe u didhota da kwati, ni tsakela ku u ti ziva toneto.’” Mwanathu wa txisikati wa khe Turquia, a dhanwako ku i Sera, a womba tiya: “Madhota ma lava kuningwa mtamo kasiku me simama me maha totshe ti ma ti mahako. Hi nga va ninga mtamo wonewo ngu ku va bhalela dipasi do va bonga, ku va ramba ku ta dya ni nathu mwendo kuthuma navo ka mthumo wa thembwe.” Ina ku ni didhota do kari adi di thumako ngutu kasi kuvhuna dibanza, di u tipfako u di ni fanelo yo di bonga? U ti wonisa kutxani kualakanyela tinzila to kari to kombisa kubonga kwako ka dona.—1 Vak. 16:18.

VAWONELELI VA SIGAVA VA TSANISA MABANZA

12. Mba mani ava Jesu a nga txi va thumisa kasi kutsanisa mabanza ka mbimo ya Vapostoli? (1 Vatesalonika 2:7, 8)

¹² Vamwani va “vavamna va i ku tiningo” ava Jesu a nga va ningela mabanzani va thuma ngu nzila yimwani. Ene a thumisile madhota khe Jerusalema kasi kuninga txiavelo Paulo, Bharnabhasi ni vamwani ti to ve thuma kota vawoneleli va sigava. (Mith. 11:22) I ti txihi txikongomelo txa kona? Kufana ni malanda a wuthumeli ni madhota, vawoneleli va sigava va tsanisa mabanza. (Mith. 15:40, 41) Vanathu vava va ti tona tatingi ka wutomi wawe hambi kuveka wutomi wawe ha phangoni kasiku ve gondisa ni ku kuzeta vamwani.—Lera 1 Vatesalonika 2:7, 8.

13. Ngu wuhi wutixamuleli awu muwoneleli wa txigava aku nawo?

¹³ Vawoneleli va sigava va heta mbimo yayingi txitaratoni. Vamwani va heta maora amangi va txi enda kukhukhela ka dibanza dimwani va txiya ka dimwani. Muwoneleli wa txigava, otshe mavhiki ya a thumako a maha madhixkursu amangi, maendo a wudyisi, mtshangano ni vanyaphandule, mtshangano ni madhota ni mitshangano ya mthumo wa thembwe. A lulamisela  madhixkursu ni kululamisela masembleya ni makongresu. Otshe malembe ene mgondisi wa txikolwa txa vanyaphandule ni ku a tshumela e lulamisela mtshangano wo sawuleka ni vanyaphandule va txigava. Txitimwi ka totshe tiya ti lava e khatalela siavelo sa lisima ngutu, mbimo yimwani si ku ni txikuluveta.

14. Ngu kutxani hi nga wombako ti to vawoneleli va txigava makatekwa para mabanza?

¹⁴ Ngu kutxani hi nga wombako ti to vawoneleli va sigava tiningo ta lisima mabanzani? Mwanathu wo kari wa khe Turquia a wombile tiya mayelano ni maendo a vawoneleli va sigava: “Ka diendo dimwani ni dimwani adi muwoneleli wa txigava a hi mahelako ani ni tipfa ni txi kuzetwa kuvhuna vanathu va dibanzani ka mina. Ani se ni zivile vawoneleli va sigava vavangi, kambe kha nga ho ni wamweyo kwawe a khalako ku ti komba nga a ñolekile ngutu aha ko kha nga ni mbimo yo bhula ni nani.” Johanna, awu se hi nga bhula ngu ngene a thumile ka mthumo wa thembwe ni muwoneleli wa txigava, kambe kha va nga kota kuwombawomba ni m’thu. Ene a womba tiya: “Hambiketo ani ni ngadi ni txi di khumbula ditshiku dileya. Vakoma va mina vavambidi va di rurile ve ya zumba kule se ani ni txi va xuva ngutu. Muwoneleli wa txigava a ni tsanisile ni ku ni vhuna kuwona to mipfhuka yiya nja mbimonyana. Konku ti nga maha ti si koteki ku hi zumba hafuhi ni mwaya wathu mwendo vangana vathu, kambe ka mafu a maphya hi na zumba navo ngu ha ku si gumiko.” Eso simweso sa sikombiso asi si vekako hakubasani ti to vawoneleli va sigava makatekwa ka vale va va endelako.—Mith. 20:37-21:1.

15. a) Ngu kuya ngu 3 Johani 5-8, hi nga kombisisa kutxani kubonga vawoneleli va sigava? (Wona ni mfota.) b) Ngu kutxani hi di fanete kuninga lisima vasikati va vavamna ava va thumako dibanzani ni ku hi nga ti mahisa kutxani toneto? (Wona dikwadru adi di ku “ Khumbula vasikati vawe.”)

¹⁵ Mpostoli Johani a kuzetile Gayo ti to e amukela vawoneleli va sigava ava va nga ti tsute ku ya tsanisa dibanza. Ene a bhate a txi khene: “U na  va u txi maha tatinene ngako u txi va longela sa nzila ngu tifanelo ti ti tsakisako Txizimu.” (Lera 3 Johani 5-8.) Hi nga ti mahisa kutxani toneto? Nzila yimwani ngu ramba mwoneleli wa txigava kasiku hi ta dya nayo. Yimwani ngu pateka ka mthumo wo txhumayela ka divhiki do sawuleka. Leslie, wu hi nga bhula ngu ngene a kombisa kubonga ka vawoneleli va sigava ngu tinzila timwani. Ene a womba tiya: “Na maha mkombelo kasiku Jehovha e khatalela silaveko sawe. Ani ni mwamna wa mina ha va bhalela mapasi hi txi va bonga ngu diendo di va nga di maha ni ku va gela nzila yi va nga hi vhuna ngu yona.” Khumbula tiya: vawoneleli va sigava va ni sikarato ni ku va karala kufana ni nathu. Yimwani mbimo va wonisana ni malwati, kuvilela kumweko ni kugodhola. Ngu kuthumisa mapswi a manene mwendo ningo yo kari, Jehovha a nga hi thumisa kasi kuxamula mikombelo ya vawoneleli va sigava!—Mav. 12:25.

KU NGA TXI LAVEKA “VAVAMNA VA I KU TININGO”

16. Hi txi alakanyisisa ngu Mavingu 3:27, ngu sihi siwotiso asi mwanathu mmwani ni mmwani a nga ti mahelako?

¹⁶ Hamafuni kotshe ku ni txilaveko txa vanathu ava va nga kotako kuthuma kota “vavamna va i ku tiningo.” Ngako u di mwanathu wa txiwamna wu a nga bhabhatiswa ina ‘mtamo wo maha eto wu manzani kwako’? (Lera Mavingu 3:27.) Ina u ni minavelo yo maha mizamo kasi ku u maha dilanda da wuthumeli? Se ngako u di dilanda da wuthumeli, ina wa navela kumaha didhota ti to u thuma to engeteleka kasi ku u vhuna vanathu dibanzani? c Ina u nga maha kutxitxa ko kari ka wutomi wako kasiku u pateka ka Txikolwa txa Vatxhumayeli va Mfumo? Txikolwa txonetxo txi na kutrenara ti to u ya masoni u thumiswa ngu Jesu. Ngako u txi pimisa ti to malungelo oneyo khu na ku ma hokelela, maha mkombelo ka Jehovha. Mkombele ti to moya wo sawuleka wu kuvhuna kuhetisisa txiavelo txihi ni txihi txi u nga txi amukelako.—Luka 11:13; Mith. 20:28.

17. “Vavamna va i ku tiningo” va kombisa txani mayelano ngu Mkoma wathu Jesu Kristu?

¹⁷ Vanathu ava Jesu a va thumisako kota “vavamna va i ku tiningo” txikombiso txa ti to ene a nga txi simama e hi khatalela ka masiku yawa o gwita. (Mat. 28:20) Hi ni Mkoma wa lirando, wa wuha awu a hi ningako vanathu ava va nga lulamiselwa kwati kasiku ve khatalela silaveko sathu. Mbimo yi u pimisako ngu toneto wa bonga ngutu, hi nga tona? Se ngu toneto lavetela mikhanju yo kombisa kubonga ngu vanathu vonevo va tiningetelako. Ni ku u nga divale kubonga Jehovha, i ku ene a hi ningako “sotshe sihiwa sa lisima, sotshe siningo sa kuhetiseka.”—Jak. 1:17.