VAISRAYELI va txi wu dhunda ngutu wutxenje. Bhiblia makhambi amangi yi womba-womba ngu vathu na va txi txhaya sitrumentu ni kuembelela tindando. Txienge txa txingi txa Bhiblia tindando. Ngu txikombiso, Masalmo, Ndando ya tindando ni Sidilo si bhatwe kasiku si kota kuembelelwa. Dibhuku do kari mayelano ni wutomi wa timbimo ta Bhiblia di womba ti to Bhiblia yi kombisa khakwati ti to Vaisrayeli va thumisile tindando ka mithumo yayingi ka wutomi wawe.

Wutxenje wu txi maha txienge txa ditshiku ni ditshiku. Vaisrayeli va txi embelela tindando kasi kombisa matipfelo awe. (Isaya 30:29) Vavasikati va txi txhaya singomana, ve embelela tindando to tsakisa ni kusinya mbimo yi ku nga txi vekwa mkoma wamphya, ngaku masotxhwa ma txi xula yimbi ni ka mibuso ya wukhozeli. (Val. 11:34; 1 Sam. 18:6, 7; 1 Vafu. 1:39, 40) Vaisrayeli va txi tshumela ve embelela tindando kasi kukombisa kupandiseka ngaku m’thu atxi fa. (2 Mak. 35:25) Ti hakubasani ti to Vaisrayeli va txi wu dhunda ngutu wutxenje.

Vakoma va Israyeli va txi dhunda wutxenje. Mkoma Sawule a dhani Dhavhidha nyumbani ya wukoma kasiku e ya txhaya txitende. (1 Sam. 16:18, 23) Msana ka mbimo, mbimo yi Dhavhidha a nga va mkoma, ene a khandile sitrumentu sa wutxenje, a bhate tindando to tshura ni kululamisela mtxawa awu wu nga ti txhaya dithempeleni ka Jehovha. (2 Mak. 7:6; Amosi 6:5) Mkoma Solomoni a ti ni vaembeleli va txiwamna ni va txisikati ka nyumba yakwe ya wukoma.—Ekl. 2:8.

Txa lisima ngutu, Vaisrayeli va txi thumisa wutxenje kasi kukhozela Jehovha. Ngu ditshuri, 4.000 wa vavamna va txi txhaya sitrumentu dithempeleni ka Jerusalema. (1 Mak. 23:5) Vona va txi txhaya timbila, sitende ni tingoma. (2 Mak. 5:12) Kambe vatxhayi vonevo va nga ti ni wusikoti hi nga vona basi va nga txi dhumisa Jehovha ngu tindando. Vaisrayeli vavangi va txi embelela mbimo yi va nga txi enda ve ya Jerusalema kasiku ve ya maha mibuso kona kheya. Tindando toneto ti dhanwi ku tindando ta vapfhumba. (Mas. 120-134) Ngu kuya ngu mibhalo ya txijudha, Vaisrayeli vamwani va embelete timwani ta tindando ta Masalmo a ngu mbimo ya m’buso wa Paxkwa.

Wutxenje i nga di wa lisima ngutu ka vathu va Jehovha nyamsi. (Jak. 5:13) Ha embelela tindando ka Jehovha kasiku hi m’dhumisa. (Vaef. 5:19) Athu ha tipfa hi di hafuhi ni vanathu mbimo yi hi embelelako tindando hi di kumweko. (Vakl. 3:16) Eto ta hi tsanisa ni ku ta hi vhuna ku hi tsanisela mbimo yi hi mananako ni sikarato. (Mith. 16:25) Wutxenje i nzila yo kombisa likholo lathu ka Jehovha ni lirando lathu ngu ngene.