GONDO 36
Armagedhoni, thenga yo tsakisa!
“Yi to va tshanganisa ka . . . Armagedhoni.”—MTU. 16:16.
NDANDO 150 Lavani Txizimu mi na hulukiswa
ATI HI NO TI GONDA *
1-2. a) Ngu kutxani Armagedhoni i di thenga yo tsakisa? b) Ngu sihi siwotiso asi hi no bhula ngu sona?
INA u khala kupfa vathu va txi kha vona Armagedhoni i yimbi ya sibhamu sa hombe ni mabhomba mwendo phango ya mtumbuluko? Kuhambana ni toneto, Bhiblia yi womba thenga yo tsakisa ngu Armagedhoni i ku thenga yo tsakisa ngutu! (Mtu. 1:3) Yimbi ya Armagedhoni hi nga yo onhetela, kambe njo hulukisa vathu! Ti mahisa kutxani toneto?
2 Bhiblia yi womba ti to Armagedhoni yi na mahela ta tinene vathu ngu kugumisa wukoma wa vathu. Yimbi yoneyo yi na gumisa votshe vabihi, yi hulukisa ava vo lulama. Timwani ta tinene yi no mahela vathu ngu vhikela kuonhwa ka mafu. (Mtu. 11:18) Kasi ku hi pfisisa mhaka yiya, he bhuleni ngu siwotiso siya: Nji txani Armagedhoni? Ku na maheka txani na yi si se hoka? Hi nga maha txani ti to hi ta huluka ka Armagedhoni? Hi nga simamisa kutxani hi thembeka ka mbimo yi ya magwito?
NJI TXANI ARMAGEDHONI?
3. a) Dipswi “Armagedhoni” di womba txani? b) Ngu kuya ngu Mtuletelo 16:14, 16 ngu kutxani hi txi womba to Armagedhoni hi nga wukhalo wo kari wu wu kuho ha mafuni?
3 Lera Mtuletelo 16:14, 16. Dipswi “Armagedhoni” do va wukhalo wumwewo amu ka Bhiblia, dona di ta ngu ka dipswi da Txihebheru di wombako Mmango wa Megidho. (Mtu. 16:16) Megidho i ti didhoropa da kale ka Israyeli. (Jox. 17:11) Kambe Armagedhoni hi nga ditina da wukhalo wo kari awu wu ku ho ha mafuni. Kuwombwa txiemo atxi “vakoma va dotshe ditiko” va no ta tshangana kasi kuwukela Jehovha. (Mtu. 16:14) Kambe ka msungo wuwa, hi na tshumela hi thumisa dipswi “Armagedhoni” kasi kutxhamusela yimbi yi yi no londetela kutshangana ka vakoma va mafu. Hi ti zivisa kutxani ti to Armagedhoni mbukhalo wo fanekisela? Txo khata, kha wu ngaho mmango wu dhanwako ku i Megidho. Wukhalo wuwa wa Megidho, mbudotho ngutu ti to kuya tshangana “vafumeli va dotshe ditiko” ni mabutho awe kumweko ni sibhamu sawe. Txa wuraru, nga ha hi no ti wona ngu kona ka msungo wuwa, yimbi ya Armagedhoni yi na khata mbimo yi “vafumeli” va ditiko va no xasela vathu va Txizimu ava va nga hangalaka ni dotshe ditiko.
4. Ngu kutxani Txizimu txi di yelanisile yimbi ya txona ni Megidho?
4 Se, ngu kutxani Jehovha a txi yelanisa yimbi yakwe ya hombe ni Megidho? Megidho ni libala la Jezrayeli i ti makhalo a tiyimbi to tala. Ka yimwani mbimo, Jehovha ngene apune a nga ti lwa tiyimbi toneto. Ngu txikombiso, mabambe ka “mati a Megidho” Jehovha a vhuni Bharake wu i nga ti Mlamuli ti to e xula dibutho da Sisera. Bharake ni mprofeti Dhebhora va bongile Jehovha ngu ku a nga va vhuna ve xula. Va embelete va txi khona: “Tinyeleti ti lwite, txitimwi nzumani . . . ti txi wukela Sisera. Mpswinga wa mnambo wa Kixoni wu va kukuletile.”—Val. 5:19-21.
5. Ngu kuhi kuhambana aku ku kuho ka yimbi ya Armagedhoni ni yimbi yi Bharake a nga lwa?
5 Mapswi o gwita a ndando ya Bharake ni Dhebhora ngu awa: “Valala vako va na fuvise tona eto, awe MKOMA! Aniko avale va kurandako, va na fanane ni ditambo, ngako di txi sisimuka ngu wotshe mtamo wa dona.” (Val. 5:31) Ka Armagedhoni, valala va Txizimu va na ta loviswa se avale va txi randako va na ta hulukiswa. Kambe ku ni kuhambana ka tiyimbi tiya ta timbidi. Ka Armagedhoni, vathu va Txizimu va na mbi ta lwa. Va na mbi ta xoma matxhari! Nguko ‘kuzumbiseka’ ni ku ‘kuthemba’ Jehovha ni ka mabutho akwe a nzumani ku na va ‘mtamo wawe.’—Isaya 30:15; Mtu. 19:11-15.
6. Jehovha a na va xulisa kutxani valala vakwe ka Armagedhoni?
6 Ka yimbi ya Armagedhoni Jehovha a na va xulisa kutxani valala vakwe? A nga thumisa tinzila to tala. Ngu txikombiso, a nga thumisa kuzinginikela ka mafu, maralala, ni nyangafula. (Jobe 38:22, 23; Eze. 38:19-22) Ku tilava a nga maha to valala vakwe ve dayana vapune. (2 Mak. 20:17, 22, 23) A nga thumisa tingelozi to ti dayela vabihi. (Isaya 37:36) Ku si nga ni mhaka ni ti Jehovha a no mahisa tona, ene a na xula. Valala vakwe votshe va na loviswa. Se votshe va vo lulama va na huluka.—Mav. 3:25, 26.
ATI TI NO HUMELELA YI SI NZE KUHOKA ARMAGEDHONI
7-8. a) Ngu kuya ngu 1 Vatesalonika 5:1-6, ngu yahi mapswi aya ma no wombwa ngu vakoma va ditiko? b) Ngu kutxani ma no va ni phango?
7 Kuhuwelelwa ka “kudikha ni kukhaliseka” ku na thangela “ditshiku da Mkoma.” (Lera 1 Vatesalonika 5:1-6.) Ka 1 Vatesalonika 5:2. “Ditshiku da Mkoma” kuwombwa “kuxaniseka ka hombe.” (Mtu. 7:14) Hi na tizivisa kutxani to xanisa ya hombe yi lava kukhata? Bhiblia yi khene ku ni mhaka yi yi nga mbi toloveleka. Etxo ku na va txona txikombiso txa kukhata ka xanisa ya hombe.
8 Txikombiso txonetxo ngu txi txi nga wombwa ku ku na huwelelwa “kudikha ni kukhaliseka.” Ngu kutxani vakoma va no womba toneto? Ina vathangeli va wukhongeli va na seketela? Ti nga maha. Hambi keto, mapswi onewo i na va makuhu mamwani a madhimoni. Kambe makuhu onewo ma na va ni phango nguko ma na maha to vathu ve tipfa va di khalisekile, kuve kuxaniseka ka hombe ka vathu ka hoka. Phela, “nguyo mbimo ku
no humelela dikhombo ngu txidhukisa hagari kwawe, kota nga wamsikati, ngako a txi lumwa.” Se malanda a Jehovha ko? Aku ma si zivako sikombiso sa kona, ma na xamala kambe ti na mbi va dhukisa nguko va na va di rinzete.9. Jehovha a na lovisisa kutxani ditiko da Sathani?
9 Jehovha a na mbi lovisa mafu a Sathani nga ti a nga mahisa tona ka mbimo ya Nowa, to va hiyela votshe ngu mbimo yimweyo. A na va lovisa ngu simahakalo simbidi. Txo khata, a na lovisa Bhabhilona wa Hombe i ku wukoma wa wukhongeli wa makuhu. Se ka Armagedhoni a na lovisa dotshe ditiko da Sathani, kupata ni tipolitika, mabutho a tiyimbi ni mabhindo a kona. He xolisiseni kwati simahakalo soneso sa simbidi.
10. Ngu kuya ngu Mtuletelo 17:1, 6 ni 18:24, ngu kutxani Jehovha a no lovisa Bhabhilona wa Hombe?
10 “Kulamulwa ka digelegele da hombe.” (Lera Mtuletelo 17:1, 6; 18:24.) Bhabhilona wa Hombe a nyetisete ngutu ditina da Txizimu. A gondisile makuhu mayelano ni Txizimu. Kufana ni wamsikati wa digelegele, wukhongeli wa makuhu kha wuthembeki ka Jehovha, wu seketela wukoma wa vathu. Wu tshumela wu xanisa ava va ku ka wona ni ku va dyela timale tawe. Wona wu dayete vathu vo tala kupata ni malanda mamwani a Jehovha. (Mtu. 19:2) Se, Jehovha a na mu lovisisa kutxani Bhabhilona wa Hombe?
11. Jehovha a na thumisisa kutxani “txikalani txo bhilibila” to txi lovisa Bhabhilona wa Hombe?
11 Jehovha a na lovisa “digelegele da hombe” ngu kuthumisa “digumi da titxheho” ta “txikalani txo bhilivila.” Txikalani txiya txi emela mtshangano wa ma Nações Unidas. Titxheho ta digumi ti emela wukoma awu wu seketelako mtshangano wonewo. Ka mbimo yi Txizimu txi nga yi veka, vakoma vonevo va na wukela Bhabhilona wa Hombe. Vona va na ‘m’tshambula tinguwo ve mu leka i di tximbwiri’ ngu kuteka tithomba takwe ni ku kombisa wubihi wakwe. (Mtu. 17:3, 16) Kuloviswa kuwa ka txikuluveta, ko nga o va ditshiku dimwedo, ku na karata ava va seketelako wukhongeli wa makuhu. Ngutu-ngutu aku a nga txi tigela a txi khene: “Ni khalahatshile nga khosikazi, kha ni nga noni, txima kha ni nambi va ni txidilo.”—Mtu. 18:7, 8.
12. Ina Jehovha a na leka malanda akwe me loviswa ngu matiko? Ngu kutxani?
12 Jehovha a na mbi tumelela ti to matiko me lovisa vathu vakwe. Malanda akwe ma tsaka ngu kudhanwa ngu ditina dakwe ni ku ma engisa txirumo txakwe txo huma ka Bhabhilona wa Hombe. (Mith. 15:16, 17; Mtu. 18:4) Vathu va Txizimu va tshumela ve tikarata ti to ve vhuna vamwani ve huma ka Bhabhilona wa Hombe. Ngu toneto, malanda a Jehovha ma na mbi “tshapelwa ngu mitungu yakwe.” Kambe likholo lawe li na dukwa.
Ku si nga ni mhaka ni mu va kukona, vathu va Txizimu va na themba txona mbimo yi va xaselwako (Wona ka ndimana 13) *
13. a) I mani Goge? b) Ngu kuya ngu Ezekhiyele 38:2, 8, 9, Goge a na hokisa kutxani ka wukhalo wu wu dhanwako ku i Armagedhoni?
13 Kuxasela ka Goge. (Lera Ezekhiyele 38:2, 8, 9.) Msana ka kuloviswa wotshe wukhongeli wa makuhu, vathu va Txizimu va na nga mndonga awu wu ku wokha wu nga huluka ka txingulu. Sathani a na va a di henyile. A na kombisa kuhenya koneko ngu kuthumisa madhimoni i ku “mimoya ya nzambwa,” ti to me womba makuhu kasi ku matiko me wukela malanda a Jehovha. (Mtu. 16:13, 14) Msengeletano wonewo wu dhanwa ku i: “Goge wa ditiko da Magoge.” Mbimo yi matiko ma no khata toneto, ma na va se ma di hokile ka wukhalo awu wo fanekisela, wu wu dhanwako ku i Armagedhoni.—Mtu. 16:16.
14. Ngu tihi ati Goge a no ti tumbula?
14 Goge a na themba “diwoko [dakwe] da nyama,” i ku mabutho akwe a tiyimbi. (2 Mak. 32:8) Athu hi na themba Jehovha Txizimu txathu, i ku ti matiko ma no tiwona i di wuphuku-phuku. Phela, sizimu sa Bhabhilona wa Hombe si na mbi mu ponisa ka “txikalani” ni ka “titxheho ta digumi!” (Mtu. 17:16) Se matiko ma na pimisa to ma na hi lovisa ngu kuhehuka. “Kufana ni direfu, di txi fenengeta ditiko,” ene a na dhumela vathu va Jehovha. (Eze. 38:16) Kambe Goge a na ti wona to a ti ya kanda txikelemu. Kufana ni Faro ka Linene lo Bhilivila, Goge a na ti tumbula to a vhukile Jehovha.—Eks. 14:1-4; Eze. 38:3, 4, 18, 21-23.
15. Jesu a na ta maha txani ka yimbi ya Armagedhoni?
15 Kristu ni mabutho akwe a nzumani va na vhikela vathu va Txizimu ve lovisa matiko otshe ni mabutho awe. (Mtu. 19:11, 14, 15) Se kuwombwa txani ngu Sathani mlala wa hombe wa Jehovha, awu a nga hangalasa makuhu aya ma kongomisako matiko ka Armagedhoni? Jesu a na rinza Sathani ni madhimoni akwe ka diphala do hokoma, aha va no khotelwa kudingana 1.000 wa malembe.—Mtu. 20:1-3.
U NGA MAHA TXANI TI TO U TA HULUKA KA ARMAGEDHONI?
16. a) Hi nga kombisisa kutxani to ha txi “ziva Txizimu”? b) Ngu mbimo ya Armagedhoni ku na maheka txani ngu va va zivako Txizimu?
16 Ti si nga ni mhaka ni ti to hi vakale mwendo hi ngadi kugonda ditshuri, kasi ku hi ta huluka ka Armagedhoni, hi fanete ‘kuziva Txizimu’ ni ‘kuengisa Evhangeli ya Mkoma wathu Jesu.’ (2 Vat. 1:7-9) Hi kombisa to hi ‘ziva Txizimu’ ngako hi txi ziva ati txi ti dhundako ni ti txi si ti dhundiko ni milayo ya txona. Hi nga tshumela hi kombisa to ha txi ziva ngu ku txi randa ni ku txi engisa ni kukhozela txona basi. (1 Joh. 2:3-5; 5:3) Mbimo yi hi mahako toneto, hi na va ni lungelo yo “ziwa ngu txona,” i ku ti to hi na ta huluka ka Armagedhoni! (1 Vak. 8:3) Ngu nzila yihi? Nguko “kuziwa ngu txona” ngu amukelwa ngu Txizimu.
17. Ti womba txani ‘kuengisa evhangeli ya Mkoma wathu Jesu’?
17 “Evhangeli ya Mkoma wathu Jesu” yi pata totshe tigondo ati Jesu a nga ti gondisa, ti manekako ka Dipswi da Txizimu. Hi engisa mahungu a manene ngako hi txi thumisa ati hi ti gondako. Kuengisa koneko ti pata kuthangetisa silaveko sa Mfumo, hi hanya ngu milayo yo lulama ya Jehovha, ni kuhuwelela Mfumo wa Txizimu. (Mat. 6:33; 24:14) Ti tshumela ti pata kuvhuneta vasawuleki ngako va ku ni wutixamuleli wa hombe.—Mat. 25:31-40.
18. Vasawuleki va na wu hakelisa kutxani wunene awu va nga mahelwa?
Na i si nga kale vasawuleki va na hakela wunene awu va nga mahelwa ngu va va “tinvuta timwani.” (Joh. 10:16) Ngu nzila yihi? Na ku si se khata yimbi ya Armagedhoni, votshe va va 144.000 va na va va di tsute nzumani se i di vathu va moya. Vona va na gwita ve patana ni dibutho da nzumani adi di no lovisa Goge ve vhikela “dibutho da hombe” da va va fanako ni tinvuta. (Mtu. 2:26, 27; 7:9, 10) Ngu ditshuri, ava va dibutho da hombe va na tsaka ngu kuva va di seketete vasawuleki va Jehovha mbimo yi va nga ti ngadi ha mafuni.
18HI NGA SIMAMISA KUTXANI HI THEMBEKA KA MBIMO YI YA MAGWITO?
19-20. Ku si nga ni mhaka ni sikarato, hi nga simamisa kutxani hi thembeka mbimo yi Armagedhoni yi tshuketelako?
19 Ka masiku awa o karata, wungi wa malanda a Jehovha ma manana ni sikarato. Hambi keto hi nga tsanisela ngu litsako. (Jak. 1:2-4) Kasi ku hi tsanisela ti lava hi simama hi maha mkombelo. (Luka 21:36) Kuengetela ka mkombelo, hi fanete hi gonda Bhiblia ditshiku ni ditshiku ni kualakanyisisa ngu yona kupata ni wuprofeti wo xamatisa mayelano ni timbimo ti tathu. (Mas. 77:12) Timhaka toneto ni kutxhumayela hi si karali, ti na maha to hi va ni likholo lo tsana ni ku themba yathu yi na tsana!
20 Alakanya ati ti no tsakisisa tona mbimo yi Bhabhilona wa Hombe a no va a di lovisilwe ni yimbi ya Armagedhoni yi di gumile! Ni kutshumela u alakanya ngu litsako ali u no li mana mbimo yi vathu votshe va no va va txi xonipha ditina da Txizimu ni wukoma wa txona! (Eze. 38:23) Ngu ditshuri, Armagedhoni mahungu a manene ka va va zivako Txizimu, va engisako Mwanana wa txona ni ka va va tsaniselako kala magwito.—Mat. 24:13.
NDANDO 143 Simama u hiseka, wonelela, ni ku rinzela
^ par. 5 Se kupinda malembe o tala vathu va Txizimu va txi emela kuwona Armagedhoni. Ka msungo wuwa, hi na bhula ngu ti to nji txani Armagedhoni, ku na maheka txani na yi si se hoka ni ku hi nga simamisa kutxani hi thembeka ka mbimo yi ya magwito.
^ par. 71 TITXHAMUSELO TA MIFOTA: Mbimo yi simahakalo so xamalisa si humelelako. 1) hi na txhumayela ti txi ngadi ti txi koteka, 2) hi na simama hi gonda, ni 3) kusimama hi themba kuvhikelwa ngu Txizimu.
^ par. 85 TITXHAMUSELO TA MIFOTA: Maphoyisa ma txi dhumela mwaya wa Makristu awu wu thembako ti to Jesu ni tingelozi va wona totshe ti ti humelelako.