1. Ngu kutxani hi di fanete hi tiveka hahatshi ka Jehovha?

HI FANETE hi tiveka hahatshi * ka Jehovha nguko ene Mvangi wathu. Ngu toneto, ene a ni txivangelo txo pfala txo hi vekela milayo. (Mtu. 4:11) Kambe, ku ni txivangelo tximwani txi hi mahako hi lava ku mu engisa, nguko mafumelo akwe ngu ona dwe i ku a manene. Ka matimu a vathu, vakoma va ta va txi fuma vathu. Kambe hi txi va dinganisa ni mafumelo a Jehovha kha va wuyelwi, nguko Jehovha a ni wuzivi kupala votshe, a ni lirando, wa pfela wusiwana, ni ku Mkoma wu a ku ni wuxinji.—Eks. 34:6; Var. 16:27; 1 Joh. 4:8.

2. Ngu kuya ngu Vahebheru 12:9-11, ngu kutxani hi txi tiveka hahatshi ka Jehovha?

² Jehovha a lava ku athu hi mu engisa, i si nga ngu ku mu thava, kambe nguko hi mu randako ni ku i ku Tate wathu wa lirando. Ka dipapilo di Paulo a nga bhalela Vahebheru, ene a txhamusete to hi fanete “kuxonipha ngutu Tate,” mwendo kutiveka hahatshi kwakwe nguko ene a hi gondisa kasi ku ti “txi hi vhuna.”—Lera Vahebheru 12:9-11.

3. a) Hi ti komba ngu nzila yihi to ha tiveka hahatshi ka Jehovha? b) Ngu sihi siwotiso si hi no xamula?

³ Hi tiveka hahatshi ka Jehovha ngu kumaha ati hi nga ti kotako kasi ku mu engisa ka totshe ni kwa mbi themba mapimo athu hipune. (Mav. 3:5) Ta hehuka kutiveka hahatshi ka Jehovha ngako hi txi ziva tifanelo takwe ta tinene. Ngu kutxani? Nguko tifanelo toneto ti woneka ka totshe ti a ti mahako. (Mas. 145:9) Ngako hi txi gonda ngu Jehovha hi na ya hi mu randa ngutu. Se, hi na mbi lava mkhwepa wa milayo  ya ti hi fanelako kumaha ni ti hi sa fanela kumaha. Hi zama ku mialakanyo ni matipfelo athu si longolokisana ni ti i ku ta tinene ni kuvayilela to biha. (Mas. 97:10) Hambi keto, mbimo yimwani ti nga karata kuengisa Jehovha. Ngu kutxani? Ni ku madhota, vatate ni vamame va nga gonda txani ka sikombiso sa Mkoma Nehemiya, Mkoma Dhavhidha, ni Mariya mame wa Jesu? Msungo wuwa wu na ningela tixamulo ta kona.

4-5. Ngu kuya ngu Varoma 7:21-23, ngu kutxani ti nga karatako kutiveka hahatshi ka Jehovha?

⁴ Tximwetxo txa sivangelo si si hi mahako ti hi karatela kutiveka hahatshi ka Jehovha nguko hi nga tshapelwa ngu txionho. Se, ngu mtumbuluko wathu hi nga mbimo yotshe hi engisako Txizimu. Msana ka kuva Adhamu ni Evha va di tshuralete Txizimu ni kudya mhando, va ti vekete milayo vapune. (Gen. 3:22) Ni nyamsi, vathu vo tala va sawula kueyisa Jehovha se va maha ati va ti lavako.

⁵ Hambi va va zivako ni kuranda Jehovha ti nga va karatela kutiveka hahatshi kwakwe. Mpostoli Paulo nene a ti ni txikarako txonetxo. (Lera Varoma 7:21-23.) Kufana ni Paulo, nathu hi lava kumaha ta tinene masoni ka Jehovha. Kambe, mbimo yotshe ti lava hi lwa ni minavelo yo maha to biha.

6-7. Ngu txihi txivangelo tximwani txi nga hi mahako ti hi karatela kutiveka hahatshi ka Jehovha? Womba txikombiso.

⁶ Txivangelo tximwani txi nga hi mahako ti hi karatela kutiveka hahatshi ka Jehovha i nga va ku kuzetelwa ngu mikhuwo ni mapimiselo a vathu va mu hi nga kulela kona. Mapimiselo o tala a vathu ma lwisana ni kudhunda ka Jehovha, se ti lava hi lwa yimbi ya hombe ti to hi si pimisi kufana ni vathu vonevo. Wona txikombiso.

⁷ Ka makhalo o tala ti tolovelekile kukuzetela vaphya ku ti ningetela ko mana male yo tala. Mwanathu mmwani a dhanwako ku i Maria * a mananile ni txikarato txonetxo. A si se kugonda ditshuri, ene a gondile ka sikolwa sa hombe khe ditikoni kwawe. Maxaka akwe ma ti mu kuzeta kulava mthumo wa timale. Nene a ti ti lava toneto. Kambe, msana ko gonda ditshuri mayelano ni Jehovha a txitxile makungo akwe. Hambi keto, ene a khene: “Mbimo yimwani na mana mkhanjo wo va ni mthumo wo mana male ya yingi, kambe wu ndi na ni vhalela kuthumela Jehovha nga ti ni ti lavisako tona. Se, ngu mhaka ya ti ni nga kulisa tona ta ni karatela kulamba. Ni kombela Jehovha ku e ni vhuna kwa mbi tumela mthumo wonewo awu wu ndi no ni vhalela kumaha to tala ka Jehovha.”—Mat. 6:24.

8. Hi na bhula ngu txani?

⁸ Loko hi txi tiveka hahatshi ka Jehovha ha wuyelwa hipune. Kambe, ava va ku ni wutixamuleli vo fana ni madhota, vatate ni vamame va ni txivangelo tximwani txo londisa mkongomiso wa Txizimu, nguko vona va vhuna vamwani. He bhule ngu sikombiso sa mu ka Bhiblia asi si nga hi gondisako kuthumisa wutixamuleli ngu nzila yi yi tsakisako Jehovha.

9. Ngu sihi sikarato si Nehemiya a nga manana naso?

⁹ Jehovha a ningile madhota wutixamuleli wo dyisa vathu vakwe. (1 Pedro 5:2) Madhota ma nga gonda to tala ngu kuxolisisa nzila  yi Nehemiya a nga thumisana ngu yona ni vathu va Jehovha. Aku i nga ti Mkoma khe Judha, ene a ti ni wutixamuleli wa hombe. (Neh. 1:11; 2:7, 8; 5:14) Alakanyisisa ngu sikarato si a nga manana naso. A woni to vathu va nyenyezisete dithepele ni ku va si vhuneti Valevhi ngu miningelo nga ti mlayo wa Mosi wu nga ti ruma tona. Vajudha va si londiseli mlayo mayelano ni Sabbata, ni ku majaha mamwani ma ti txhadhile ni vavasikati va matiko. Mkoma Nehemiya ti ndi na lava e wonisa ni mhaka yiya.—Neh. 13:4-30.

10. Nji txani txi Nehemiya a nga maha ka sikarato si a nga manana naso?

¹⁰ Nehemiya kha thumisa wutixamuleli wakwe ti to e veka milayo yo sukela ka vathu va Txizimu. Hahanze keto, ene a kombete kukongomiswa ngu Jehovha ni kugondisa vathu va Txizimu milayo ya txona. (Neh. 1:4-10; 13:1-3) Nehemiya a tshumete e thuma kumweko navo, hambi ka mthumo wo wuseta maguma a Jerusalema.—Neh. 4:15.

11. Ngu kuya ngu 1 Vatesalonika 2:7, 8, madhota ma fanete me ñolisa kutxani vanathu dibanzani?

¹¹ Madhota ti nga maha ma si manani ni sikarato so fana ni sa Nehemiya, kambe ma nga tekelela txikombiso txakwe. Ngu txikombiso, ona ma thuma ngutu kasi kuvhuna vanathu. Ni ku kha va tumeleli wutixamuleli wawe wu va maha ve ti guleta. Hahanze keto, vona va ñola dibanza ngu nzila ya lirando. (Lera 1 Vatesalonika 2:7, 8.) Aku i ku vo tiveka hahatshi ni ku va ni lirando va womba-womba ngu nzila ya lirando ni vamwani. André awu i ku didhota a khene: “Ni woni to vanathu va engisa ngako madhota ma di ni wunene ni wumbilu. Tifanelo tiya ti kuzeta vanathu kuthumisana kwati ni madhota.” Didhota dimwani didhanwako ku i Toni di khene: “Ni zama kuthumisa txialakanyiso txi txi ku ka Vafilipiya 2:3 ni ku mbimo yotshe ni zama kuwona vamwani i di va hombe kwangu. Atiya ti ni vhuna kuvayilela ku va ñola ngu nzila ya tshofu.”

12. Ngu kutxani i di ta lisima ku madhota me tiveka hahatshi?

 ¹² Madhota ti lava me tiveka hahatshi kufana ni Jehovha. Hambiku Jehovha i ku Nyatxitimwi ka wuvangi wotshe, wa “nama” kasi ku e “wusa sisiwana si huma ha lithuluni.” (Mas. 18:35; 113:6, 7) Jehovha wa va nyenya ava vo tiguleta ni vo tigela.—Mav. 16:5.

13. Ngu txani mwanathu wu i ku didhota ti txi lava e “kawuka lidimi lakwe”?

¹³ Mwanathu wu i ku didhota awu a lavako kutiveka hahatshi ka Jehovha ti lava e “kawuka lidimi lakwe.” A si njo maha eto, a nga thuka e womba-womba ngu nzila yo biha ngako m’thu wo kari si mu xoniphi. (Jak. 1:26; Vag. 5:14, 15) André wu a nga wombwa msana a khene: “Mbimo yimwani na thuka ni xamula ngu nzila ya walo ka mwanathu wu ni wonako nga kha ni xoniphi kota didhota. Kambe, ni alakanyisisa ngu sikombiso sa vavamna vo thembeka va mu ka Bhiblia, se eto ti ni vhunile kuwona lisima lo tiveka hahatshi ni ku va wo thutha.” Madhota ma kombisa kutiveka hahatshi ka Jehovha ngu ku va ni lirando ni wunene ma txi womba-womba ni vanathu kupata ni madhota kulowe.—Vakl. 4:6.

14. Ngu wuhi wutixamuleli wu Jehovha a nga ninga vatate? Ni ku a emete txani kwawe?

¹⁴ Jehovha a ningile wutixamuleli vatate wo va misungo ya timwaya, se ene a emete ti to ve gondisa ni kulaya vanana vawe. (1 Vak. 11:3; Vaef. 6:4) Kambe wutixamuleli wu ni mihangano, nguko va na ti xamulela ka Jehovha i ku ene m’vangi wa timwaya totshe. (Vaef. 3:14, 15) Vatate va kombisa kutiveka hahatshi ka Jehovha ngu kuthumisa wutixamuleli wawe ngu nzila yi yi tsakisako Txizimu. Vona va nga gonda ka txikombiso txa Mkoma Dhavhidha.

15. Ngu kutxani txikombiso txa Mkoma Dhavhidha i di txa lisima ka vatate?

¹⁵ Jehovha a sawute Dhavhidha ku va msungo i si nga wa mwaya wakwe dwe, kambe wa ditiko dotshe da Israyeli. Kota Mkoma, Dhavhidha a ti ni wutixamuleli wa hombe. Mbimo yimwani a ti thumisa wutixamuleli wakwe ngu nzila yo biha e maha sionho. (2 Sam. 11:14, 15) Kambe, a kombisile kutiveka hahatshi ngu kutumela kukawukwa. Ene a phofute matipfelo akwe ka Jehovha ngu mkombelo. Ene a ti maha totshe kukombisa to wa tumela kulaywa ngu Jehovha. (Mas. 51:1-4) Txitimwi keto, a ti ti veka hahatshi e tumela txivhuno hambi  txa vavasikati. (1 Sam. 19:11, 12; 25:32, 33) Dhavhidha a gondile txo kari ka tiphazamo takwe ni ku a ti thangetisa timhaka ta moya.

16. Vatate va nga gonda txani ka Dhavhidha?

¹⁶ Vatate va nga gonda txani ka Mkoma Dhavhidha? Vona va nga gonda to kha va fanela kuthumisa wulawuli awu Jehovha a nga va ninga ngu nzila ya walo. Tumela to wa phazama, u tshumela u amukela txivhuno txa vamwani. Ngako u txi maha toneto, mwaya wako wu na kuxonipha. Mbimo yi u mahako mkombelo ni mwaya wako ti veke hakubasani ti to wa txi lava ngutu txivhuno txa Jehovha. Ni ku, txa lisima ngutu, thangetisa timhaka ta moya ka wutomi wako. (Dhewut. 6:6-9) Khumbula to txa lisima ngutu atxi u nga ningako mwaya wako njikombiso txako txa txinene.

17. Ngu txihi txiavelo txi Jehovha a nga ninga vamame?

¹⁷ Jehovha a ningile vamame txiavelo txa lisima ngutu ha mwayani, vona va ni wulawuli wo kari ka vanana vawe. (Mav. 6:20) Phela, txikombiso txa vamame txi nga vhuna vanana ka wutomi wotshe. (Mav. 22:6) Wona ti vamame va nga ti gondako ka Mariya mame wa Jesu.

18-19. Vamame va nga gonda txani ka txikombiso txa Mariya?

¹⁸ Mariya a txi yi ziva kwati Mibhalo. A txi mu xonipha ngutu Jehovha ni ku a ti akile wuxaka wa hombe ngutu nayo. Ene a di ti emisete kumaha kuranda ka Jehovha hambiku eto ti nga txitxa wutomi wakwe.—Luka 1:35-38, 46-55.

¹⁹ Vamame ni vona va nga tekelela txikombiso txa Mariya. Ngu nzila yihi? Txo khata, ngu kusimama ve va vangana va Jehovha ngu kugonda Bhiblia ni mikombelo yawe vapune. Txa wumbidi, ti lava hi txitxa wuthu wathu kasi ku hi tsakisa Jehovha. Ngu txikombiso, ti nga maha u di kulete ka mwaya wu wu vaveleki nga txi zumbela kuhenya ni kubhongela vanana. Se ti nga maha u di kute u txi pimisa to eto kha ta biha. Msana ko gonda ngu Jehovha, u nga tipfa ti txi karata kuthuthala ni kutimiselela vanana ngutu-ngutu va si kuengisi ngako u di karate. (Vaef. 4:31) Ka mbimo yoneyo, ti lava u themba ngutu Jehovha ngu kumaha mkombelo. Mame mmwani a dhanwako ku i Lídia a khene: “Mbimo yimwani, ti ti lava ni maha mkombelo ka Jehovha kasi ku ni si va bhongeli loko va si ni engisi. Ku ni mkama ni nga ti ema kubhonga ni maha mkombelo ka Jehovha e ni vhuna. Mkombelo wa ni vhuna kuva wo thutha.”—Mas. 37:5.

20. Ngu sihi sikarato asi vamame vamwani va mananako naso, ni ku va nga si xulisa kutxani?

 ²⁰ Vamame vamwani va manana ni txikarato txo fana ni txa Lídia txo ti pfa ti txi va karatela kukombisa lirando ka vanana. (Tit. 2:3, 4) Vamwani va kulete ka timwaya ti vaveleki va nga si kombisi lirando ka vanana vawe. Ngako awe u di kulete ka mwaya wo nga toneto kha ti lavi u maha toneto nawe. Mame wu a tivekako hahatshi ka Jehovha ti lava e gonda kukombisa lirando ka vanana. Ti nga karata kutxitxa mapimiselo akwe, matipfelo ni mamahelo. Kambe ti nga koteka kutxitxa, ni ku kutxitxa koneko ku na vhuna ene ni mwaya wakwe.

21-22. Ngu kuya ngu Isaya 65:13, 14, hi na wuyelwa ngu txani hi txi tiveka hahatshi ka Jehovha?

²¹ Mkoma Dhavhidha a ti vekile hahatshi ka Jehovha. Ene a bhate a tiya: ‘Sirumo sa MKOMA nzo lulama, sa ninga litsako mbiluni. Sirumo sa MKOMA nzo lulama; sa woninga mapimo, sa gondisa wuzivi ka txithumi txako MKOMA, awule a si xayisako wa mana hakhelo.’ (Mas. 19:8, 11) Nyamsi ta hehuka kuwona kuhambana ka va va tivekako hahatshi ka Jehovha ni va va eyisako sileletelo sakwe. Ava va ti vekako hahatshi ka Jehovha va ‘embelela ngu kutsaka ka timbilu tawe.’—Lera Isaya 65:13, 14.

²² Ngako madhota, vatate ni vamame va txi tiveka hahatshi ka Jehovha va na tshukwatisa wutomi wawe, timwaya tawe ti na mana litsako ni dibanza di na va ni wumwewo. Ta lisima ngutu ka totshe, vona va na tsakisa mbilu ya Jehovha. (Mav. 27:11) Ngu magwito va na mana litsako la hombe ngutu.