1-2. a) Ngu kutxani ti si hi xamalisi ngako wukoma wu txi tsimbisa mthumo wathu wa Wukristu? b) Hi na bhula ngu txani ka msungo wuwa?

NGU 2018, kupinda 223.000 wa vatxhumayeli va mahungu a manene va ti hanya ka matiko aya mithumo yathu ya moya yi nga txi tsimbiswa. Atiya kha ti xamalisi. Nga ha hi nga ti wona ka msungo wu wu nga pinda, Makristu a ditshuri ma ti ziva ti to ma na xaniswa. (2 Tim. 3:12) Hani ni hani mu hi ku kona, wukoma wa ditiko wu nga thuka ngu txikuluveta wu tsimbisa mthumo wathu wa Wukristu nem hi sa tiemela.

² Ngako wukoma wu txo thuka wu tsimbisa mthumo wathu, ti nga maha u ti wotisa: ‘Aku hi xaniswako, ina Jehovha a to hi leka? Ina hi na mbi ngadi hi khozela Jehovha? Mwendo ni na rura ni ya ka ditiko dimwani aha ni no ya khozela Jehovha ni di txhatxhekile?’ Ka msungo wuwa hi na bhula ngu siwotiso soneso. Hi na tshumela hi bhula ngu ti to hi nga simamisa kutxani hi thumela Jehovha hambi ku txi tsimbiselwa ni ku ngu tihi ati hi fanelako ku ti vayilela.

3. Ngu kuya ngu 2 Vakorinto 11:23-27, ngu sihi sikarato asi mpostoli Paulo a nga manana naso? Hi gonda txani ka txikombiso txa Paulo?

³ Ngako wukoma wu txi tsimbisela mthumo wathu wa Wukristu, hi nga phazama hi pimisa to Jehovha a to hi henyela. Kambe, khumbula to kuxaniswa kha ti wombi to Jehovha a to hi leka. Wona txikombiso txa Paulo. Jehovha a txi  tsakiswa ngutu ngu Paulo. Ene a ve ni lungelo yo bhala 14 wa mabhuku a mibhalo ya Wukristu ya Txigriki ni ku i ti mpostoli ka matiko. Hambiketo, a ti xaniswa ngutu. (Lera 2 Vakorinto 11:23-27.) Hi nga gonda ka txikombiso txa Paulo ti to Jehovha a nga tumelela to vathu vakwe ve xaniswa.

4. Ngu kutxani ditiko di txi hi nyenya?

⁴ Jesu a txhamusete to ngu kutxani hi di fanete kuemela ku hi xaniswa. A ti khene hi na vengelwa nguko hi si ngako va ditiko. (Joh. 15:18, 19) Hi txi xaniswa, hi nga ti to hi to lekwa ngu Jehovha. Kambe ti kombisa to hi maha ati i ku ta tinene!

5. Ina vathu va ha mafuni va nga wu emisa mthumo wa Jehovha? Txhamusela.

⁵ Vathu va ha mafuni, va nge wu emisi mthumo wa Jehovha Txizimu. Vo tala va duketile ve tandeka. Wona ti ti nga maheka ngu mbimo ya Yimbi ya Wumbidi ya Mafu. Ka mbimo yoneyo, ka matiko o tala wukoma wu ti sinyisa ngunyupeso vathu va Txizimu. Hi nga ti to mthumo wa Tifakazi ta Jehovha wu ti ko tsimbiswa amu ku nga ti fuma wukoma wa Nazi wa Jermani dwe, kambe ni matiko a Austrália, Canadá ni mamwani matiko. Kuhumelete txani? Ngu 1939 mbimo yi ku nga khata yimbi, ku ti ni 72.475 wa vahuweleli ha mafuni kotshe. Kambe mbimo yi yimbi yi nga guma ngu 1945, ngu kateko ya Jehovha, se ku ti ni 156.299 wa vahuweleli. Mtengo wa vahuweleli se i ti wa hombe ngutu!

6. Mbimo yi vakaneti va ko khona vo hi dhukisela, kuhumelela txani? Txhamusela.

⁶ Mbimo yi vakaneti va ko khona vo hi dhukisela, vo hi thela mafura ti to hi thumela Jehovha ngu kuhiseka. Ngu txikombiso, mpatwa wumwani wu nga ti ni mwanana wa m’dotho wu ti zumba ka ditiko adi wukoma wu nga ti tsimbisa wukhozeli wathu. Hahanze ko thava, mpatwa wule wu to teka wunyaphandule. Msikati a lekile mthumo wakwe wa timale ti to e phandula. Mwamna a khene kutsimbiswa kumahile vathu ve lava kuziva to tala ngu Tifakazi ta Jehovha. Ngu toneto ti ti hehuka kukhata sigondo. Phela hi nga mpatwa wule dwe wu nga wuyelwa.  Didhota dimwani di wombile ti to kutala ka va va nga ti emile kuthumela Jehovha va khatile kuta mitshanganoni ni kutshumela ve khateta kutxhumayela.

7. a) Hi gonda txani ka Levhi 26:36, 37? b) U na maha txani u txi tsimbiswa kuthumela Jehovha?

⁷ Mbimo yi valala vathu va tsimbiselako mthumo wathu, va lava to hi thava kuthumela Jehovha. Va nga tshumela ve hangalasela makuhu ngu ngathu, ve rumela vathu vo ta gwajisa mtini kwathu, ve hi ñola hiya wukomani, vamwani hambi jele va tsula. Va txi mahetela toneto, va alakanya to ava va nga mbi bela jele va na thava. Phela i ti ku athu ho va thava, hi nga va hi txo ti “tsimbisa” hipune. Kha hi lavi kufana ni va va wombwako ka Levhi 26:36, 37. (Yi lere.) Kha hi na mbi leka dizowa di hi godholisa mwendo ku hi lekisa kuthumela Jehovha. Ha mu themba Jehovha, se kha hi tumeli kudhukiselwa. (Isaya 28:16) Hi kombela mkongomiso ka Jehovha ngu mkombelo. Ha tiziva to ngako a txi hi vhuna, hambi wukoma wa hombe wa vathu, wu nge sikoti ku hi lekisa kuthumela Jehovha ngu kuthembeka.—Vaheb. 13:6.

8-9. a) Ngu txihi txisungo atxi msungo wumwani ni wumwani wa mwaya wu fanelako ku txi maha? b) Ni ku wu na vhunwa ngu txani ti to wu maha txisungo txa txinene?

⁸ Ngako wukoma wa ha u zumbako kona wu txi tsimbisa wukhozeli wathu, ti nga maha u txi tiwotisa ti to ina ni nga rura ni ya amu ku nga hola kani. Ayiya i mhaka ya m’thu apune, kha ku nga ni wu a nga kumahelako txisungo. Vamwani va wona i ditshuko kugonda ati ti nga mahwa ngu Makristu a kale ka vapostoli mbimo yi ma nga xaniswa. Mbimo yi valala va nga daya Sitefani, vathu va Jerusalema va rurile veya Judheya ni Samariya ni kumwani ka kule ko fana ni Fenikiya, Kipra ni Antiyokiya. (Mat. 10:23; Mith. 8:1; 11:19) Hambi keto vamwani va nga wona ti Paulo a nga maha mbimo yi ku nga tshumela kuvhutuka wumwani mndilo, ene kha khukha makhalo aya kutxhumayelwa ku nga ti lambiswa. Hahanze keto, ene a tiningete ku ya txhumayela ni kutsanisa vanathu ka madhoropa aya ku nga ti hisa ngutu.—Mith. 14:19-23.

⁹ Hi gonda txani ka timhaka tiya? Msungo wumwani ni wumwani wu fanete wu maha txisungo ka mhaka yo rura. Na a si se maha txisungo, a na mahe mkombelo, e xolisisa siemo sa mwaya, e wona wuyelo yi yi no va ho ni sikarato si si nga manekako ngako va txi rura. Ka mhaka yiya, Mkristu mmwani ni mmwani a fanete e “rwala thundu yakwe.” (Vag. 6:5) Kha ha fanela ku va ni mawonelo ka txisungo atxi vamwani va mahako.

10. Ngu wuhi mkongomiso awu Hofisi ya didhavi ni madhota ma no kuninga?

¹⁰ Hi nga simamisa kutxani hi khozela Jehovha hambi hi txi tsimbiswa? Hofisi ya didhavi yi na ninga madhota mkongomiso ni ti hi nga ti mahako kasi ku hi mana sakudya sa moya, matshanganelo ni matxhumayelelo. Ngako ti si koteki ku Hofisi ya didhavi yi womba-womba ni madhota, ona ma na kuvhuna awe ni dibanza dako kusimama u khozela Jehovha. Madhota ma na kuninga mkongomiso wu wu nga seketelwa mu ka Bhiblia ni ka mabhuku athu.—Mat. 28:19, 20; Mith. 5:29; Vaheb. 10:24, 25.

11. Ngu kutxani hi nga tsanisekako ti to mbimo yotshe hi na va ni sakudya? U nga maha txani kasi kuvhikela sakudya soneso sa moya?

 ¹¹ Jehovha a thembisile ti to malanda akwe ma ndi na khura ngu didhawa da moya. (Isaya 65:13, 14; Luka 12:42-44) Tsaniseka ti to sengeletano yakwe yi na maha totshe kasi kuva ni sakudya sa moya. Se u nga maha txani? Mbimo yi kutsimbiselwako, zama kumana wukhalo wa wunene wo sisa ka wona Bhiblia ya wena ni otshe mabhuku ya u ku nawo. Ti wonele ku u si leki mabhuku oneyo ni Bhiblia hambi i di ka fone ka wukhalo wo woneka. Mmweyo ni mmweyo kwathu a fanete ku e maha to kari kasi ku e simama a di tsani ngu didhawa da moya.

12. Madhota ma nga lulamiselisa kutxani mitshangano yi va ngu nzila yo sisaleka?

¹² Se ku na maheka txani ngu mitshangano yathu? Madhota ma na maha malulamiselo a ti to kuxalelwa mitshangano ngu nzila yo vathu va si leri txilo. Ti nga maha u kongomiswa ku mi ya tshangana ngu mitxawa ya yidotho ni ku mbimo yo bela mitshangano yi nga txitxa. U nga vhikela vamwani ngu kwa mbi bwabwata ngutu mbimo yi u hokako mwendo kuhuma ngu mitshanganoni. Ti nga ti lava u ambala ngu nzila yo nga wo tsimbita tako.

13. Hi nga gonda txani ka vanathu va kale ka mfumo wa União Soviética?

¹³ Mayelano ni mthumo wo txhumayela, siemo si nga txitxa ngu kuya ngu makhalo. Athu ha mu randa Jehovha ni ku ha tsakela kugela vamwani ngu ta Mfumo wakwe, se hi na yi mana nzila yo txhumayela. (Luka 8:1; Mith. 4:29) M’bhali wa matimu Emily B. Baran a wombile tiya mayelano ni Tifakazi ta Jehovha ta kale ka União Soviética: “Hambiko wukoma wu nga gela makholwa ti to ma nga txhumayeli vamwani, Tifakazi ti khatile mabhulo ni vaakelani, vathumi kulowe ni vangana. Mbimo yi ti nga ñolwa ngu toneto, Tifakazi ti txi txhumayela sibotxhwa kulowe.” Hambiko mfumo wa kale wa União Soviética wu nga txi tsimbisela kha ka emwa kutxhumayela. Ngako nawe u txi zumba ka wukhalo wu mthumo wathu wu tsimbiswako, nawe tiemisele kumaha toneto!

14. Masalmo 39:1 yi hi txharihisa ka txani?

¹⁴ Tiwonele ka ti u bhulako ni vamwani. Ngako txiemo txa ditiko txi txi bhedha, hi fanete hi khumbula to ku ni “mbimo ya kumalala.” (Ekl. 3:7) Kha ti laveki kubhula ngu timhaka ta txihunja, to fana ni matina a vanathu, amu hi mananako kona, ati hi txhumayelisako tona ni ti hi si manisako  tona sakudya sa moya. Eto timhaka hi nga wombeni ka wukoma; nem hi nga bhuleni ngu tona ni vangana vathu mwendo maxaka a hafuhi mwendo a kule. Hi txo thuka hi phazama, vanathu va nga bela txibeheni ngu mhaka yathu.—Lera Masalmo 39:1.

15. Sathani a na zama ku hi vangela txani ni ku hi nga ti vayelelisa kutxani kumaha mibhando?

¹⁵ Hi nga tumeleleni timhaka ta tidotho ti vanga mibhando. Sathani wa tiviza to mwaya kha wu tsani ngako wu txi abaniswa. (Marku 3:24, 25) Ngu toneto, ene a na zama to hi va ni mibhando. Toneto a mahela ku hi na zumbela kulwisana ngu txathu, hahanze ko lwa ni nene.

16 Ngu txihi txikombiso txa txinene atxi Gertrud Poetzinger a nga hi siyela?

¹⁶ Phela hambi vanathu va va nga vitwa ti lava ve tiwonela ka mhaka yiya. Wona txikombiso txa vanathu vambidi i nga ti vasawuleki, Gertrud Poetzinger ni Elfriede Löhr. Ka mbimo ya mfumo wa va Nazi, vona va ti jele kumweko ni vanathu vamwani va txisikati. Gertrud a khatile kubavela Elfriede nguko a nga ti tsanisa vale vamwani ngu miwomba-womba yakwe. Ngu msana, Gertrud a tisote se e kombela txivhuno ka Jehovha. A ti khene: “Ti lava hi tumela ditshuri ngako vamwani va di ni wusikoti wa hombe mwendo va di ni wutixamuleli wo pinda wathu.” A kuxulisile kuxani kubavela kwakwe? Gertrud a wonisisile tifanelo ta tinene ta Elfriede ni txingana txi a nga ti natxo. Ngu nzila yoneyo, a tshumete e va ni wuxaka wa wunene ni Elfriede. Votshelele va tsanisete ve za ve huma jele ni ku va thumete Jehovha ngu kuthembeka kala ku za ve heta txiavelo txawe txa ha mafuni. Ngako hi txi ti karatela kuxula sikarato ni vanathu, hi na vayilela kuvanga mibhando.—Vakl. 3:13, 14.

17. Hi nga wu londiselisa kutxani mkongomiso?

¹⁷ Londisela mkongomiso. Ngako hi txi londisela mkongomiso wa vanathu va va ku ni wutixamuleli ni va va thembekako, hi na vayilela sikarato. (1 Pedro 5:5) Ngu txikombiso, ka ditiko dimwani adi mthumo wathu wu nga ti tsimbiswa vanathu va va ku ni wutixamuleli va gete vahuweleli ti to va si ningeli mabhuku va txi txhumayela. Kambe nyaphandule mmweyo kha engisa mkongomiso wonewo, se a ti ningela mabhuku. Nji txani txi nga maheka? Ene ni vamwani va di hafuhi ni kugwita kutxhumayela ngu txitshuketi, va ñotwe ngu maphoyisa. Ti nga maha mphoyisa ma txo va londisela ngu msana, me tshumela me wona mabhuku aya  va nga txi ningela. Hi gonda txani? Ti lava hi londisela mkongomiso hambi hi si wu tsakeli. Jehovha wa tsaka ngako hi txi thumisana kwati ni vanathu ava ene a nga va veka ti to ve hi thangela.—Vaheb. 13:7, 17.

18. Ngu kutxani hi sa fanela kuveketela milayo yo sukela?

¹⁸ U nga veketele milayo yo sukela. Ngako madhota ma txi veka milayo yo sukela, vamwani va na nemelelwa. Mwanathu Juraj Kaminský a txi khumbula mbimo yi mthumo wathu wu nga txi tsimbiswa ditikoni da kale ka Tchecoslováquia, a khene: “Msana ko vanathu va va nga ti ni wutixamuleli ni madhota o tala va di ñotwe, ava va nga huluka va khatile kuvekela vahuweleli milayo yo va nga mahi tiya ni tile, va na mahe tiya.” Jehovha kha hi ninga wutixamuleli wo vekela milayo vamwani. Awu a veketelako milayo yo sukela, kha vhikeli vanathu, kambe o lava kufuma likholo la vanawe.—2 Vak. 1:24.

19. Ku si nga ni mhaka ni mizamo ya Sathani, 2 Makronika 32:7, 8 yi hi ninga themba yihi?

¹⁹ Mlala wathu wa hombe, Sathani Dhiyabhulosi a bhisi ni malanda a Jehovha o thembeka. (1 Pedro 5:8; Mtu. 2:10) Ene ni maxaka akwe, va na duketa kuemisa mthumo wa Jehovha. Kambe athu kha hi dhudhumeli! (Dhewut. 7:21) Jehovha a ni nathu, ene kha na mbi hi leka hambi mthumo wathu wu txi tsimbiswa.—Lera 2 Makronika 32:7, 8.

20. U tiemisete kumaha txani?

²⁰ Ti lava hotshethu hi tiemisela kufana ni vanathu va kale ka vapostoli, va nga gela vakoma va mbimo yoneyo va txi khona: “Ati ti nga lulama masoni ka Txizimu ngu tihi kani: kuengisa anu mwendo kuengisa Txizimu kani? Athu kha hi na ku sikota kumalala ni ti hi nga ti wona ni ti hi nga tiengisa.”—Mith. 4:19, 20.